རྒྱ་མིས་བོད་མིར་མགོ་སྐོར་བཏང་བའི་གནས་ཚུལ།

ཨ་རིའི་རྡོ་རྗེ་ནས།
དེ་སྔོན་ལན་མང་རླུང་འཕྲིན་དུ་རྒྱང་སྲིང་བྱས་ཡོད་པ་བཞིན། རྒྱ་མིའི་བཟོ་ཚོང་ལས་ཁང་ཞིག་ནས་བོད་མི་མང་པོ་ཞིག་མགོ་སྐོར་བཏང་ནས་རྒྱ་ནག་ཏུ་ཁྲིད་ཡོད་པ་དང༌། མགོ་སྐོར་གཏོང་མཁན་གྱི་ཚོགས་པ་དེའི་མིང་ལ་ཐན་ཧྲི་གནམ་སྡེ[གནམ་འདེགས་ཡིན་སྲིད]ཚོགས་པ་དང༌། ཚོགས་པ་དེའི་མགོ་ཁྲིད་ཀྱི་མིང་ལ་ལིན་ཅན་ཡིང་ཟེར་གྱི་ཡོད་པ་རེད། ཚོགས་པ་དེ་རྒྱ་ནག་ཐན་ཅེན་ལ་ཡོད་འདུག་པ་དང༌། བོད་པ་དེ་དག་ཁྲིད་འགྲོ་ས་དེ་ནི་རྒྱ་ནག་ཧྲང་ཞིན་ཞན་ཡང་ཟེར་ས་དེ་ཡིན་འདུག །ཚོགས་པ་དེས། བོད་མི་དེ་དག་ལ། མི་རེས་རྒྱ་སྒོར་ཉིས་སྟོང་ལྔ་བརྒྱ་རེ་སྤྲད་ནས་ཚོགས་པ་དེའི་ནང་འཛུལ་ཞུགས་བྱས་པ་ཡིན་ན། ལོ་གཅིག་ནས་གཉིས་བར་ཤེས་ཡོན་གྱི་སློབ་སྦྱོང་སྤྲད་རྒྱུ་དང༌། སློབ་སྦྱོང་ཐོན་མཚམས་མི་རེ་ལ་རྒྱ་སྐོར་ཁྲི་ཉིས་བརྒྱ་བཞི་བཅུ་ཡས་མན་རེ་ཕྱིར་སྤྲོད་རྒྱུ་ཡིན་པ་མ་ཟད། ཚོགས་པ་དེའི་སློབ་ཐོན་ལག་ཁྱེར་སྤྲད་ནས་འཛམ་གླིང་ག་བར་དགའ་ན་ཡང་ལས་ཀ་སྤྲོད་ཐུབ་ཀྱི་ཡོད་ལུགས་བཤད་འདུག །
བོད་མི་དེ་དག་ཡིད་ཆེས་ཐབས་སུ། ལིན་ཅན་ཡིང་ཁོ་པས་དེ་སྔ་བོད་ནག་ཆུ་རུ་སློབ་གྲྭ་བཙུགས་པ་སོགས་གཞན་ཕན་གྱི་བྱ་བ་མང་པོ་སྒྲུབ་ལུགས་དང༌། མི་གྲངས་དུང་ཕྱུང་༡༢་ལྷག་ལ་རོགས་རམ་བྱས་པའི་ཡིག་ཆ་ཁག་དང༌། ༢༠༠༩་ལོའི་རྒྱ་ནག་གི་མི་རིགས་འཆམ་མཐུན་གྱི་གཟེངས་རྟགས་ཨང་དང་པོ་ཐོབ་པའི་མཛད་སྒོའི་སྐབས་ཀྱི་པར་དང་ཡིག་ཆ་ཁག་བཅས་བསྟན་གྱི་ཡོད་འདུག །
རྒྱུ་མཚན་དེ་དག་ལ་བརྟེན་ཕྱི་ལོ་༢༠༠༧ ལོའི་ཟླ་༥ ཙམ་ནས་བོད་པ་རྣམས་ཚོགས་པ་དེར་འཛུལ་ཞུགས་བྱེད་འགོ་བཙུགས་ཡོད་འདུག་པ་དང༌། དེ་ནས་རིམ་པས་ཇེ་མང་དུ་ཕྱིན་ནས། ཁྱོན་ཚོགས་པ་དེར་ཞུགས་མཁན་བོད་རིགས་མི་གྲངས་༢༠༠༠ ལྷག་བྱུང་ཡོད་པ་དང༌། ཞན་ཡང་རང་ལ་སླེབས་པ་དེ་བོད་པ་མི་གྲངས་༡༥༠༠ ཙམ་བྱུང་ཡོད་པའི་ནང༌སྐྱེས་པ་དང་བུད་མེད། གྲྭ་བཙུན་དང་བླ་སྤྲུལ་དེ་འདྲ་ཡང་ཡོད་འདུག །
བོད་པ་རྣམས་ཞན་ཡང་ལ་སླེབས་སྐབས་ཐོག་མར་མི་ཁ་ཤས་ལ་ཟླ་རེར་སྒོར་སུམ་བརྒྱ་ཡས་མས་རེ་སྤྲད་ཡོད་འདུག་པ་དང༌། དེ་ནས་རྒྱུ་མཚན་འདྲ་མིན་བཤད་ནས་སྒོར་གཅིག་ཀྱང་རག་ཡོད་མི་འདུག །དེ་ནས་རིམ་པས་ཚོགས་པ་དེའི་འགོ་ཁྲིད་ཁ་ཤས་ས་གནས་ཉེན་རྟོགས་པས་འཇུ་བཟུང་བྱས་པ་སོགས། བོད་པ་ཚོས་ཚོགས་པ་དེ་རྫུན་པ་དང༌། མི་མགོ་སྐོར་གཏོང་མཁན་ཡིན་པ་ཤེས་རྟོགས་བྱུང་ཡོད་འདུག །
བདུན་ཕྲག་ཁ་ཤས་ཀྱི་སྔོན་དུ། ཞན་ཡང་ནས་བོད་རིགས་ཚོའི་འཐུས་མི་ཁག་གཅིག་པེ་ཅན་དུ་ཞུ་གཏུག་བྱེད་པར་ཕྱིན་ནས། ཐན་ཧྲེ་གནམ་སྡེ་ཚོགས་པའི་ས་ནས་ད་བར་གྱི་འགྲོ་སོང་དང་གྱོང་གུད་ཕོག་པའི་གུན་གསབ་རག་ཐབས་བྱས་ཡོད་ཀྱང༌། པེ་ཅན་ནས་ལིན་ཅན་ཡིང་གི་ཚོགས་པ་ཨ་མ་ཡོད་ས་ཐན་ཅེན་ལ་འགྲོ་དགོས་ལུགས་བཤད་ནས་གཏུག་བཤེར་བདག་སྤྲོད་བྱས་མེད་པ་རེད། བོད་རིགས་འཐུས་མི་དེ་དག་ཐན་ཅེན་ལ་སླེབས་ཀྱང་ཁོ་ཚོས་ཡོལ་ཐབས་དང་ཁ་མཁས་རྐྱང་རྐྱང་བཤད་ནས་གྲུབ་འབྲས་གང་ཡང་ཐོན་མེད་པ་དང༌། དེ་རྗེས་སླར་ཡང་ཞན་ཡང་ནས་བོད་རིགས་མང་པོ་ཡོང་ནས་ད་ཆ་ཐན་ཅེན་ལ་བོད་པ་བརྒྱ་ཡས་མས་ཞིག་དང༌། པེ་ཅེན་ལ་བོད་པ་བཅུ་གྲངས་ཞིག་གིས་མུ་མཐུད་ཞུ་གཏུག་བྱེད་བཞིན་ཡོད་པ་རེད།
དེ་རིང་ཚེས་༢༦ ཉིན་མོར། པེ་ཅེན་ནང་ཡོད་པའི་བོད་པ་ཚོས་པེ་ཅེན་དུ་ཡོད་པའི་མི་རིགས་དོན་གཅོད་ཞུ་ཡོན་ལྷན་ཁང་དུ་ཞུ་གཏུག་བྱེད་སར་ཕྱིན་ཡོད་ཀྱང༌། ད་ལྟ་གནས་ཚུལ་གང་བྱུང་མིན་ཤེས་མེད་པ་དང༌། ཐན་ཅེན་ནང་ཡོད་པའི་བོད་པ་ཞིག་དྲན་པ་འཐོར་ནས་སྨན་ཁང་དུ་ཁུར་དགོས་ཆགས་ཡོད་འདུག་ཅིང༌། ཁོང་ཚོ་མོ་ཊའི་གཞུང་ལམ་ཐོག་ཉལ་སྡོད་པའི་པར་རྒྱག་སྐབས་ཉེན་རྟོག་པ་ཡོང་ནས་བརྒྱབ་བཅུག་ཡོད་མི་འདུག །ཁོང་ཚོས་ཟེར་ན། དེ་རིང་ནས་བཟུང་ཁོང་ཚོའི་དངུལ་དང་ཁ་ལག་ཡོངས་རྫོགས་རྫོགས་ཟིན་ཡོད་པས། མུ་མཐུད་གནས་ཐབས་གྲལ་ཡང་ཤི་ན་ཡང་ཐན་ཧྲི་གནམ་སྡེ་ཚོགས་པའི་སྒོ་འགྲམ་རང་ལ་ཤི་རྒྱུ་ཡིན་སྐོར་བཤད་འདུག །
ཡང་དེ་རིང༌། བོད་རིགས་ཁྲིམས་རྩོད་པ་དབྱངས་ཅན་ཟེར་བ་ཞིག་ནས་ཁོ་ཚོ་ལ་རོགས་པ་བྱེད་རྒྱུ་ཁས་བླངས་ཡོད་ཀྱང༌། རྒྱ་ནག་གཞུང་དང་ཁ་གཏད་ལྟ་བུ་ཆགས་ཡོད་སྟབས་ཁོ་མོས་ནུས་ཤུགས་ཇི་ཙམ་སྟོན་རྒྱུ་ཡིན་མིན་ཏེ་ཚོམ་ཡིན་ལུགས་བོད་རིགས་དེ་དག་གིས་བཤད་འདུག །བོད་རིགས་དབྱངས་ཅན་ཁྲིམས་རྩོད་པ་ནི་སྲོག་ཐོག་ལ་ཐུག་པའི་ཉེན་མེད་ཉེས་འགེལ་གྱི་གྱོད་གཞི་མང་པོ་དག་སེལ་བྱས་ནས། མི་མང་པོའི་སྲོག་སྐྱོབ་ཡོད་ལུགས་དེ་སྔོན་རྒྱ་ནག་གི་དུས་དེབ་མང་པོས་བསྔགས་བརྗོད་བྱས་ཡོད་པ་རེད།
སྤྱིར་དེ་སྔོན་ཁོང་ཚོས་ཟས་བཅད་ངོ་རྒོལ་བྱས་ཡོད་འདུག་ཀྱང༌། ཕ་ཡུལ་གོ་འཇོ་ནས་ཡིན་པས་རྒན་པོ་ཞིག་ན་ནས་ཤི་གྲབས་པ་དང༌། རྒན་པོ་དེས་ཁྱོད་ཚོས་མ་ཟོས་ན་ཟ་གི་མིན་ཞེས་ཨུ་ཚུགས་བྱས་སྟབས། ཟས་བཅད་བྱས་ནས་ཉིན་གྲངས་ལྔ་ཡི་རྗེས་སུ་ཁ་ལག་ཟོས་ཡོད་འདུག །
ད་ཆ་གནམ་གཤིས་གྲང་ཞིང་ཁ་ལག་མེད་པ་དང༌། ཁང་པ་མེད་པར་གཞུང་ལམ་ཐོག་ཉལ་ནས་ཡོད་སྟབས་ན་མཁན་ཇེ་མང་དུ་འགྲོ་བཞིན་ཡོད་པ་དང༌། དེ་སྔོན་ཕ་ཡུལ་ནང་ཆེན་ནས་ཡིན་པས་མི་གཅིག་འདས་གྲོངས་སུ་སོང་བ་དང༌། མི་མང་པོ་ཞིག་ན་ནས་ཕྱིར་ལྷ་ས་སོགས་སུ་ལོགས་པ་བྱུང་ཡོད་འདུག །