དོལ་སྨྱོན།
—-གསོ་རིག་སློབ་དཔོན་ཆེན་མོ་རྒན་རིན་པོ་ཆེ་རག་རྡོ་བློ་བཟང་བསྟན་འཛིན་མཆོག་ལ་བཅར་འདྲི་ཞུས་པ།
དེ་ཡང་བཅུ་ཕྲག་རིག་པའི་གཞུང་ལུགས་ཀྱི་འཆད་ཉན་དང་ཐོས་བསམ་གང་ལའང་ཆེས་མེད་དུ་མི་རུང་ཞིང་གལ་གནད་ཆེ་བའི་ཐབས་ལམ་ཞིག་ནི། རིག་གཞུང་དེའི་ངོས་དང་ཟུར་རེ་རེ་ནས་གསལ་བར་བྱེད་པའི་བགྲོ་གླེང་གི་བྱེད་ཐབས་སམ། ཡང་ན་བཅར་འདྲིའི་གཏམ་གླེང་ངམ་དེ་མིན་དྲི་བ་དྲིས་ལན་གྱི་སྒོ་ནས་གསལ་བར་བྱེད་པ་དེ་ཡིན། དེ་ལྟ་བུའི་བྱེད་ཐབས་དེས་ནི་བརྗོད་དོན་གྱི་རྩ་བ་འཛིན་སླ་ཞིང་། དངོས་ཤུགས་ཟུར་བསྟན་གྱི་ཁྱད་པར་དག་ཀྱང་ཤེས་སླ་ལ། དབང་པོ་རབ་འབྲིང་ཀུན་ལ་གོ་བདེ་ལྟ་བདེའི་ཁྱད་ཆོས་རྨད་དུ་བྱུང་བ་ཞིག་ཏུ་མངོན།
དེས་ན་གསོ་རིག་སློབ་དཔོན་ཆེན་མོ་རྒན་རིན་པོ་ཆེ་རག་རྡོ་བློ་བཟང་བསྟན་འཛིན་མཆོག་གིས། ལོ་མང་པོའི་ནད་ཐོག་ལག་ལེན་དང་། གཞུང་ལུགས་ལྟ་གྲུབ། སྨན་རྫས་སྦྱོར་བཟོ་དང་། བགྲོ་གླེང་གཏམ་བཤད་སོགས་གསོ་དཔྱད་བསྟན་པའི་བྱ་བཞག་ལ་རྨད་དུ་བྱུང་བའི་ཕྱག་རྗེས་ཟབ་མོ་བཞག་པ་ནི། རང་རེ་སྨན་པ་རྒན་དར་གཞོན་གསུམ་ཀུན་གྱིས་མིག་མཐོང་ལག་ཟིན་ཡིན་པས་མུན་དོང་ལ་མདའ་འཕེན་པ་དང་། ལ་རྒྱབ་ཀྱི་ལྗོན་ཤིང་བརྩི་བའི་ངལ་བ་བསྟེན་པའི་དགོས་པ་མ་མཆིས་སྙམ།
ད་ལམ་གུས་པས་ལོ་ལྔའི་རིང་བོད་ཀྱི་གསོ་བ་རིག་པའི་གཞུང་ལུགས་ལ་རང་ནུས་ཅི་ལྕོགས་ཀྱིས་སྦྱང་བརྩོན་བྱས་པའི་བརྒྱུད་རིམ་ཁྲོད། ལོ་རྒྱུས་དང་གཞུང་ལུགས་སོགས་དཀའ་བའི་གནས་ལ་དོགས་པ་ཅི་རིགས་སུ་མཆིས་པ་དེ་དག རང་ཉིད་གཙོས་པའི་གསར་བུ་བ་དག་ལ་ཕན་པའི་རེ་བ་དང་བཅས་ཏེ་བོད་ཀྱི་གསོ་བ་རིག་པའི་ཁྱབ་ཁོངས་བྱིངས་དང་འབྲེལ་བའི་དྲི་བ་སྣ་ཚོགས་བཏོན་པ་ལ་ཐུགས་སྤྲོ་བ་དང་བཅས་ཏེ་བཀའ་ལན་གནང་བ་ལས། འདིར་བོད་ཀྱི་གསོ་བ་རིག་པའི་ལོ་རྒྱུས་དང་གཞུང་ལུགས། ལག་ལེན་དང་ལྟ་གྲུབ་ཐད་ལ་ཐུན་མོང་མ་ཡིན་པའི་རིགས་པའི་ཁྱད་ཆོས་དང་། བསམ་བློའི་སྒྲོམ་གཞི་དག་མང་མང་གིས་གོ་ཐུབ་ཅིང་ངེས་ཤེས་འདྲེན་ཐུབ་པའི་བཀའ་ལན་དག་དཀྱུས་གཅིག་ཏུ་བྱས་ཏེ་སྒྲ་སྡུད་འཕྲུལ་འཁོར་ལས་ཡེ་གེར་ཕབ་ཅིང་། སླར་རིན་པོ་ཆེ་མཆོག་ལ་སྤྱན་འབུལ་ཞུས་པས་ཚིག་དོན་གང་ཅིར་ཞུ་དག་གཏན་འབེབས་མཛད་ཅིང་། བགྲོ་གླེང་གི་ཚུལ་དུ་བྱས་ཏེ་དྲ་ལམ་དག་ཏུ་དགོད་པའི་བཀའ་ཡི་གནང་བ་ལེགས་པར་ཐོབ་པ་བརྒྱུད་འདི་ག་དྲ་ཚིགས་སུ་སྤེལ་བ་ཡིན།
དོལ་སྨྱོན།
ཐོག་མར་རིན་པོ་ཆེ་མཆོག་ནས་སྐུ་སྒེར་གྱི་ཕྱག་ལས་དང་དཔེ་ཁྲིད་ཀྱི་མཛད་བྲེལ་སོགས་ལ་མ་འཛེམས་པར་གུས་པའི་བཅར་འདྲི་དང་ལེན་གནང་བར་བཀའ་དྲིན་ཆེ་ཞེས་ཞུ་རྒྱུ་ཡིན། དེ་ནས་རིན་པོ་ཆེ་མཆོག་གི་ལོ་རྒྱུས་སྟབས་བདེ་ཞིག་དང་དེའི་ནང་ནས་བཤེས་གཉེན་བསྟེན་ཕྱོགས་དང་སློབ་གཉེར་གནང་ཕྱོགས། དེའི་རྗེས་ནས་བོད་དང་རྒྱ་གར་དེ་བཞིན་ཕྱི་རྒྱལ་སོགས་རྒྱལ་ཁབ་ཁག་ཏུ་གསོ་རིག་གི་བསྟན་པ་ལ་ཕྱག་ལས་གནང་བའི་སྐོར་ངོ་སྤྲོད་ཅུང་ཟད་གནང་རོགས།
རྒན་རིན་པོ་ཆེ།
གསོ་བ་རིག་པའི་བསྟན་པ་ལ་ངས་བྱ་བ་གང་ཡང་བྱེད་ཐུབ་ཡོད་མ་རེད། སྤྱིར་སྟངས་ང་རང་ ༡༩༥༦ ལ་སྐྱེས་ཤིང་། དེ་ནས་ ༡༩༥༩ ལོར་རྒྱ་མིར་ངོ་རྒོལ་དང་ཟིང་འཁྲུག་བྱུང་ཞིང་མཐར་བོད་ས་ཡོངས་རྫོགས་རྒྱ་མིས་དབང་དུ་བསྒྱུར་དུས། སློབ་གཉེར་འདོད་པ་ཚིམས་པ་ཞིག་བྱེད་ཐུབ་ཡོད་མ་རེད། ལྷག་པར་དུ་ཆུང་དུས་ཀྱི་དུས་ཚོད་དེ་སྒོ་ཟོག་འཚོ་བ་སོགས་ཀྱིས་རྫོགས་པ་རེད། དེའི་ཞར་ཞོར་ལ་ཡི་གེ་སློབ་པ་དང་འདོན་པ་བློ་འཛིན་དང་གཞུང་གི་རྩ་བ་ཕྲན་བུ་རེ་བློ་ལ་འཛིན་པ་མ་གཏོགས་གང་ལྟར་ཕན་ཐོགས་པའི་སློབ་གཉེར་ཡག་པོ་ཞིག་བྱུང་ཡོད་མ་རེད། དེ་ནས་ ༡༩༦༤ ལོ་ལ་རིག་གནས་གསར་བརྗེ་མགོ་ཚུགས་ཤིང་། དེ་དུས་སློབ་གཉེར་བྱེད་ཀྱི་ཡོད་པ་ཤེས་པ་དང་སློབ་གཉེར་གྱི་དཔེ་ཆ་དག་མིག་གིས་མཐོང་བ་སོགས་བྱུང་ན་ཉེན་ཁ་ཤིན་ཏུ་ཆེན་པོ་རེད། དེ་དུས་སློབ་སྦྱོང་བྱེད་རྒྱུ་ཡོད་མ་རེད་ལ་སྒོ་ཟོག་འཚོ་བ་སོགས་ལས་སློབ་སྦྱོང་ཡག་པོ་ཞིག་བྱེད་ཐུབ་ཡོད་མ་རེད།
དེ་ནས་ ༡༩༧༤ ལོ་ལ་རིག་གནས་གསར་བརྗེ་དེའི་ནང་ནས་མི་མང་ཀུང་ཧྲི་བཙུགས་པ་དང་ངེད་ཚོའི་ལུང་པ་གཅིག་པུ་མ་རེད། བོད་ས་ཡོངས་སུ་རྫོགས་ལ་མུ་གེ་བྱུང་ཞིང་ཟ་རྒྱུ་འཐུང་རྒྱུ་མ་རག་ནས་མི་མུ་གེས་ཤི་བ་མང་པོ་བྱུང་བ་རེད། དེ་དུས་ཚོང་རྒྱབ་ནས་ཡར་མར་འགྲོ་མི་ཆོག་ཅིང་། ས་གནས་ཞིང་འབྲོག་གི་ཐོན་སྐྱེད་ཀྱང་ཡག་པོ་མ་བྱུང་ནས་བོད་ས་མང་པོར་མུ་གེས་ཤི་བ་མང་པོ་བྱུང་བ་རེད། གནས་ཚུལ་དེ་ལྟ་བུའི་འོག ༡༩༧༩ ལོ་ལ་རྒྱ་ནག་གི་ཧོ་ཡོ་པང་ ཟེར་བ་དེ་ཀྲུང་དབྱངས་ཀྱི་སྐུ་ཚབ་ཏུ་བོད་ལ་ཕེབས། བོད་ཀྱི་ས་གནས་ཀྱི་དངོས་ཡོད་གནས་ཚུལ་ལ་རྟོགས་ཞིབ་བྱེད་དུས། བོད་ནང་གི་རྒྱ་ནག་གི་མགོ་འཁྲིད་ཚོས་མ་ཡིན་ཡིན་མདོག་གིས་ཡར་ལ་སྙན་ཐོ་སྤྲད་པ་དག་དངོས་ཡོད་གནས་ཚུལ་མིན་པར་ཤེས་རྟོགས་བྱུང་ནས། བོད་ཀྱི་དངོས་ཡོད་གནས་ཚུལ་དེར་འགྱུར་བ་ཞིག་བཏང་ན་མ་གཏོགས་འགན་མི་བཟོད་པ་ཞིག་ཆགས་ཡོང་དུས། བོད་དུ་རྒྱ་ནས་རྒྱ་མི་མང་པོ་སླེབས་པ་དག་ཉུང་དུ་གཏོང་བ་དང་། བོད་ནང་གི་དཔལ་འབྱོར་འགན་གཙང་ཅན་དུ་བསྒྱུར་བ་ཞེས་མི་མང་ཀུང་ཧྲི་དེ་གང་ཡོད་པ་མི་མང་ལ་བགོ་བཤའ་རྒྱབ། སོ་སོའི་འཚོ་བ་འབད་བརྩོན་བྱེད་པ་དང་ཞིང་ཁ་འདེབས་པ་སོགས་དེ་ཚོའི་མ་རྩ་བགོ་བཤའ་རྒྱབ་ནས་འཚོ་བ་རང་སྐྱོང་བྱེད་པའི་སྐད་ཆ་བཤད་ནས་འགྱུར་བ་ཏོག་ཙམ་གཏང་བ་རེད། དེ་འདྲ་བྱས་ནས་བོད་ནང་ལ་འཚོ་བ་སོགས་གང་འཚམ་ཡག་ཏུ་ཕྱིན་པའམ་འགྱུར་བ་འགྲོ་བའི་མགོ་ཚུགས་པ་རེད།
དེ་ནས་ ༡༩༨༠ ཐམ་པའི་ལོ་ལ་ང་རང་ལྷ་ས་ལ་ཡོང་བ་རེད། དང་པོའི་འཆར་གཞི་ལྟར་ན་ང་རང་གི་གོང་མ་དེ་ཚོའི་གདན་ས་སེ་ར་ལ་ཕྱིན་ནས་སློབ་གཉེར་ཏོག་ཙམ་བྱེད་རྒྱུ་བྱས་པ་རེད། དེ་དུས་བོད་ལ་ཆོས་སྒོ་ཕྱེ་ཙམ་ཡིན་དུས་སེ་ར་ལ་སློབ་གཉེར་བྱེད་ས་ཅང་ཡོད་མ་རེད། ང་རང་གི་རྒན་ལགས་རྒན་ཐུབ་བསྟན་ཡར་འཕེལ་ཞུ་བ་སེ་ར་ལ་བཞུགས་ཡོད་རེད། ང་རང་ཁོང་གི་སྐུ་མདུན་ལ་བཅར་ནས་གཞུང་ཆེན་པོ་ལ་སློབ་གཉེར་ཅུང་ཙམ་བྱས་པ་རེད། དེ་ནས་སེ་རར་སྡད་པའི་གོ་སྐབས་སམ་ཕན་ཐོག་ཡོད་པ་ཞིག་མ་བྱུང་ནས་ལྷ་ས་ལ་མར་ཡོང་བ་རེད། ལྷ་ས་སྨན་རྩིས་ཁང་ལ་ཟུར་དུ་རྒན་ཚེ་རྣམ་རིན་པོ་ཆེ་བསྟེན་པ་རེད། དེ་དུས་ཚེ་རྣམ་རིན་པོ་ཆེ་བཙོན་ཁང་ནས་གཡར་པོའི་ཚུལ་དུ་མ་གཏོགས་མར་གཏན་འཇག་ཕེབ་ཐུབ་ཡོད་མ་རེད། ཉི་མ་ཁ་ཤས་ལ་མར་གཡར་དེ་ནས་ཉི་མ་ཁ་ཤས་ནས་ཡར་འབྱོར་ཐོ་རྒྱག་པར་ཕེབས་དགོས་པ་སོགས་དེ་འདྲ་བྱས་པ་རེད། དེ་དུས་རྒན་བློ་བཟང་དབང་ཕྱུག་སོགས་ཁོང་རྣམ་པ་ཀྲུང་གོའི་གསོ་རིག་ཀུན་བཏུས་ཀྱི་རྩོམ་སྒྲིག་པར་གདན་འདྲེན་ཞུས་འདུག ང་དེ་དུས་ཡོན་ཀྲང་བྱམས་པ་འཕྲིན་ལས་ཀྱིས་ཐུགས་ཁུར་གནང་ནས་ཡི་གེ་ཉམས་གསོ་ལས་ཀའི་ཁོང་ཡིན་ཅིང་། དེ་ནས་ཞར་དང་ཞོར་ནས་ཁོང་རྣམ་པ་གཉིས་ལ་བསྟེན་ནས་ཏོག་ཙམ་ཏོག་ཙམ་བྱས་ནས་གང་ལྟར་མེད་པ་ལས་དྲག་ཙམ་ཞིག་ཤེས་པ་རེད།
གང་ལྟར་འདོད་པ་ཁེངས་པ་ཞིག་བྱུང་ཡོད་མ་རེད། མི་ཚོ་ནང་བཞིན་སློབ་གྲྭ་འགྲིམས་སློབ་གཉེར་བྱས་པ་ལྟ་བུ་མིན་པར་ང་རང་གི་སློབ་གཉེར་དེ་ཚོ་ང་རང་གི་འདོད་པ་ཁེངས་པ་ཞིག་བྱུང་ཡོད་མ་རེད། ཞར་དང་ཞོར་ནས་ཏོག་ཙམ་ཏོག་ཙམ་ཤེས་པ་དེ་ཚོ་རྒན་རྣམ་པ་ཚོའི་ཐུགས་རྗེ་བཀའ་དྲིན་རེད། རིགས་ལམ་ཏོག་ཙམ་ཡོད་པ་དེ་ཚོ་རྒན་ཐུབ་བསྟན་ཡར་འཕེལ་དང་ཁོ་རང་རྣམ་པ་ཚོའི་ཐུགས་རྗེ་བྱིན་རླབས་རེད།
དང་པོ་ཕ་ཡུལ་ནས་སྨན་སློབ་སྦྱོང་བྱེད་ས་དེ་ ༡༩༧༠ ནང་ང་རང་ཏོག་ཙམ་ན་བ་རེད། དེ་དུས་རྒན་ཀུན་དགའ་ལ་བསྟེན་ནས་སྒེར་ངོས་ནས་སྨན་ལ་དོ་སྣང་ཏོག་ཙམ་བྱུང་བ་རེད་གཞན་ཅང་ཡོད་མ་རེད། དེ་རྗེས་ ༡༩༨༧ གྱི་ལོ་མཇུག་ཏུ་བོད་ལ་ཟིང་འཁྲུག་ཆེན་པོ་ཞིག་ལངས་པ་རེད། དེ་དུས་ང་རང་རྒྱ་གར་ལ་བྲོས་བྱོལ་དུ་ཡོང་དགོས་བྱུང་། རྒྱ་གར་དུ་སླེབས་ནས་རྡ་ས་སྨན་རྩིས་ཁང་དུ་དགེ་རྒན་བྱས་ནས་ཏོག་ཙམ་བསྡད་པ་རེད། དེ་ནས་ ༡༩༩༣ ལོ་མཇུག་ཏུ་ཝཱ་ཎ་གཙུག་ལག་སློབ་གཉེར་ཁང་དུ་རྒྱ་གར་གཞུང་གི་ངོས་ལེན་ཐོག་བོད་ཀྱི་གསོ་བ་རིག་པའི་སྡེ་ཚན་ཟུར་དུ་འཛུག་འཆར་ལ་བརྟེན། ཆོས་དོན་ལས་ཁུངས་ཀྱིས་སྨན་རྩིས་ཁང་དུ་ཝཱ་ཎ་མཐོ་སློབ་ལ་སྨན་དགེ་ཞིག་གཏོང་དགོས་པའི་བཀའ་ཕེབས་པ་ལྟར། སྨན་རྩིས་ཁང་ནས་ང་རང་བཏང་བ་རེད། ཐོག་མའི་འཆར་གཞི་ལྟར་ན་ང་ཟླ་བ་དྲུག་གི་བར་དུ་གཡར་བ་རེད། དེ་རྗེས་གཞན་ཞིག་ཚབ་ཏུ་གཏོང་བའམ་ཡང་ན་ང་རང་རང་འཇག་སྡོད་དགོས་པ་སོགས་གནས་ཚུལ་གསལ་པོ་བྱུང་ཡོད་མ་རེད། གང་ལྟར་དེ་འདྲ་བྱས་ནས་ ༡༩༩༣ སྤྱི་ཟླ་ ༡༢ པ་ནས་ཟུང་ ༢༠༡༣ སྤྱི་ཟླ་ ༦ པ་བྱེད་དུས་ལོ་ཉི་ཤུ་ཙམ་ཝཱ་ཎ་རུ་བསྡད་པ་རེད།
ད་ཞེ་དྲགས་ཞེ་དྲགས་ཆོ་ཡོད་པ་ཞིག་བྱུང་ཡོད་མ་རེད། གང་ལྟར་བསྡད་པའི་ཡུན་ལ་སློབ་ཚན་གྱི་འཆར་གཞི་སྒྲིག་པ། སློབ་ཚན་འཁྲིད་པ། སློབ་ཚན་འཁྲིད་པ་དེ་ཡང་གང་ཐུབ་ཀྱིས་འབད་བརྩོན་བྱས་པ་ཞིག་ལ་སློབ་ཚན་འཁྲིད་པ་ཙམ་མིན་པར་སྨན་པ་ཚོ་ལ་མཁོ་ངེས་པའི་ལག་ལེན་རྣམས་སྤུས་དག་ཅིག་ཡོངས་བར་འབད་བརྩོན་བྱས་པ་རེད་དེ་སྤུས་དག་ཅིག་ད་ལྟ་བར་ཡོང་ཐུབ་ཡོད་མ་རེད། ཕྱོགས་གཅིག་ནས་རྒྱ་གར་གཞུང་གིས་སླབ་པ་སློབ་གཉེར་གྱི་འགྲོ་སོང་ཆ་ཚང་གནང་བར་བཀའ་དྲིན་ཆེན་པོ་རེད་དེ། ཕྱོགས་གཅིག་ནས་སྒོར་སྟོང་ཕྲག་ཆ་ཤས་ཀྱི་འགྲོ་སོང་གཏོང་བ་ལའང་གཞུང་ལ་ཆོག་མཆན་ཞུ་བ་དང་། ཆོག་མཆན་ལ་སྒུག་དགོས་པ་སོགས་མང་པོ་ཞིག་འདོད་པ་ནང་བཞིན་ཞིག་བྱེད་རྒྱུ་གང་ཡང་ཡོད་མ་རེད།
ད་དུང་ཡང་འབད་བརྩོན་བྱེད་བཞིན་པ་རེད། སློབ་འཁྲིད་བྱེད་པ་ཙམ་མིན་པར། གལ་ཆེས་ཤོས་སུ་སློབ་གཉེར་བ་དག་སྤུས་དག་ཟེར་ནའང་འདྲ་དེང་སང་གི་འཛམ་གླིང་གི་མི་འདྲ་བོ་ཡོང་བ་ལ། ཕྱོགས་གཅིག་ནས་ལག་ལེན་གང་ཡོད་པ་དེ་ཚོ་སྦྱང་ས་ཡོད་པ་དང་། སྦྱངས་པ་ཙམ་མིན་པར་སྦྱངས་ཟིན་པ་དེ་ཚོར་ཉམས་ཞིབ་བྱེད་དགོས་པ་དེ་ཚོ་མཐོ་རིམ་སློབ་གྲྭ་ཞིག་ལ་མཚོན་ན་གལ་ཆེན་པོ་ཞེ་དྲགས་རེད། དེ་འདྲའི་དམིགས་ཡུལ་བཞག་ནས་འབད་བརྩོན་བྱེད་བཞིན་པ་རེད་དེ་གང་དགོས་པ་དེ་དང་གང་བསམ་པ་དེ་ད་དུང་ཡོང་ཁག་པོ་རེད།
ཡང་སློབ་གྲྭ་རང་ལ་མཚོན་ན་རྒྱ་གར་ནང་གི་གཙུག་ལག་སློབ་གཉེར་ཁང་ཞིག་ཆགས་སྡད་ཡོད་དུས། དེ་བརྒྱུད་ནས་ ༢༠༠༨ ལོར་བོད་ཀྱི་གསོ་བ་རིག་པ་དེ་རྒྱ་གར་གཞུང་གི་རྩ་ཁྲིམས་ཐོག་ངོས་ལེན་ཡོང་ཐབས་ལ་འབད་བརྩོན་བྱས་པ་རྒྱུད་རྒྱ་གར་གཞུང་གིས་དེ་ངོས་ལེན་བྱས་ན་འགྲིམས་མིན་གྱི་བརྟག་དཔྱད་ཆེད། གཟིགས་རྟོགས་ཚོགས་ཆུང་ཞིག་ཟུར་དུ་བཙུགས་པ་རེད། ལས་ཀ་བྱེད་མཁན་མང་པོ་ཡོད་རེད་དེ་ཐོག་མའི་མགོ་འཛུག་ས་དེ་ངེད་ཚོའི་སློབ་གྲྭ་ནས་ཡིན་པ་རེད། སློབ་གྲྭའི་ནང་དགེ་རྒན་དང་འཛིན་སྐྱོང་ལས་བྱེད་སོགས་མཁས་པ་མང་པོ་ཡོད་རེད། ཡིན་ནའང་ཁོང་རྣམ་པ་བོད་ཀྱི་གསོ་བ་རིག་པ་ལ་འབྲེལ་བ་དམིགས་བསལ་མེད་དུས། ང་རང་ལ་མཚོན་ན་དེའི་ཐད་ནས་རྒྱ་གར་གཞུང་གི་མཁས་པ་དེ་ཚོ་ལ་བོད་ཀྱི་གསོ་བ་རིག་པ་ངོ་སྤྲོད་བྱེད་རྒྱུ་དང་། དེའི་རྒྱབ་ལྗོངས་ཀྱི་གཞུང་དང་འབྲེལ་བ་ལྟ་གྲུབ་དང་ལོ་རྒྱུས་སོགས་མང་པོ་ཞིག་ངོ་སྤྲོད་བྱེད་རྒྱུའི་གོ་སྐབས་ཡག་པོ་བྱུང་བ་རེད། རྒྱ་གར་གཞུང་གིས་བཙུགས་པའི་རྟོག་ཞིབ་ཚོགས་པའི་མི་སྣ་དག་ཀྱང་བློ་གཟུ་བོར་གནས་པ་མཁས་པའི་དབང་པོ་ཉམས་མྱོང་ཡོད་པ་དེ་འདྲ་ཤ་སྟག་རེད། དེ་འདྲ་བྱས་ནས་རྒྱ་གར་གཞུང་གིས་དངོས་ཡོད་གནས་ཚུལ་ལ་གཟིགས་ནས་དུས་ཚོད་ཡུན་རིང་མ་འགོར་བར་བོད་ཀྱི་གསོ་བ་རིག་པའི་རིང་ལུགས་དེ་ཁྲིམས་ཐོག་ནས་ངོས་ལེན་ཐོབ་པ་རེད།
གཞུང་ལུགས་དེ་ཁྲིམས་ཐོག་ནས་ངོས་ལེན་ཡོད་དུས་རིམ་པས་སློབ་གཉེར་བྱེད་སའི་སློབ་གཉེར་ཁང་དང་། སྨན་སྦྱོར་རིག་པ་དག་ཀྱང་ཁྲིམས་ཐོག་ནས་ངོས་ལེན་བྱེད་ཆོག་པ་བཅས་གང་ལྟར་དེའི་ཐད་ནས་ལས་འགན་གལ་ཆེན་ཞིག་བསྒྲུབས་པ་ཡིན་བསམ་གྱི་ཡོད། ང་ལ་མཚོན་ན་ཚོགས་པ་དེའི་ནང་དུ་མིང་འཁོད་བཞག་པ་དེ་འདྲ་ཡོད་མ་རེད། ཡིན་ནའང་འབྲེལ་ཡོད་ཀྱི་ཆ་ནས་ཁོང་རྣམ་པར་སྙན་ཞུ་འབུལ་བ་དང་། ངོ་སྤྲོད་བྱེད་པ་སོགས་སྤྱིར་བཏང་མི་མང་པོ་ཞིག་དང་འབྲེལ་བ་ཡོད་རེད་དེ། ང་རང་རྒྱུས་ཡོད་ཀྱི་ཆ་ནས་དམིགས་གསལ་གྱི་ཕན་ཐོགས་པོ་བྱུང་སོང་བསམ་གྱི་ཡོད།
དེ་བཞིན་དུ་སློབ་གཉེར་ཁང་འདི་དང་ཕྱི་རྒྱལ་ཁབ་ཁག་ལ་ཐད་ཀར་འབྲེལ་བ་ཡོད་པ་དཔེར་ན། ཨ་རི་ལ་གཙུག་ལག་སློབ་གཉེར་ཁང་ལྔ་ཙམ་དང་རྒྱུན་ལྡན་འབྲེལ་བ་ཡོད་པ་དང་། ཨོ་སི་ཏྲི་ལ་ཡ་དང་ལྷོ་ཀོ་རི་ཡ་སོགས་གཙུག་ལག་སློབ་གཉེར་ཁང་མང་པོ་ཞིག་ནས་ཤེས་ཡོན་བརྗེ་ལེན་དང་སློབ་ཕྲུག་དང་མཁས་དབང་སོགས་ཕན་ཚུན་འགྲོ་འོང་ཡོདཔ་རེད། ང་རང་ལ་མཚོན་ན་སྐབས་དེ་དག་ཏུ་བོད་ཀྱི་གསོ་བ་རིག་པ་དེ་ག་འདྲ་ཞིག་ཡིན་པ་དང་ད་ལྟའི་གནས་སྟངས་གང་དུ་སླེབས་པ་སོགས་ངོ་སྤྲོད་ཕྲན་བུ་ཕྲན་བུ་ཞིག་བྱེད་རྒྱུའི་གོ་སྐབས་མང་དུ་བྱུང་བ་རེད། སློབ་གཉེར་ཁང་དེ་དག་གི་སློབ་ཕྲུག་ཡིན་ནའང་འདྲ། དེ་མིན་དགེ་རྒན་ལས་བྱེད་དག་ཡིན་ནའང་འདྲ། རྒྱུས་མེད་པ་དག་ལ་ངོ་སྤྲོད་ཕྲན་བུ་རེ་བྱེད་ཡོང་དུས་དོ་སྣང་ཆེན་པོ་ཞིག་ཡོང་གི་འདུག དོ་སྣང་བྱུང་བ་ནང་བཞིན་ཕན་ཐོགས་ཀྱི་རེད་ཅེས་ལམ་སང་ང་ཚོའི་རེ་བ་ནང་བཞིན་མི་བྱུང་ཡང་ག་ལེར་ག་ལེར་ཕན་ཐོགས་ཀྱི་རེད་བསམ་གྱི་འདུག
སྤྱིར་བཏང་ངའི་བསམ་ཚུལ་ལ་བོད་ཀྱི་གསོ་བ་རིག་པ་དེ་འཛམ་གླིང་འདིར་མ་ཉམས་པར་གནས་ཐུབ་པ་ཡིན་ན། འཛམ་བུ་གླིང་གི་མི་མང་གི་འཕྲོད་བསྟེན་ལ་ཕན་ཐོགས་ཀྱི་རེད་མ་གཏོགས་ང་ཚོ་བོད་མི་ཁ་ཤས་ཤིག་ལ་དེ་བརྒྱུད་ནས་ཕན་ཐོགས་ཆེན་པོ་དང་ཁེ་བཟང་ཆེན་པོ་ཞིག་ཡོང་གི་རེད་བསམ་པའི་དམིགས་ཡུལ་གང་ཡང་ཡོད་མ་རེད། སྤྱིར་འཛམ་གླིང་འདིར་བོད་ཀྱི་གསོ་རིག་ཙམ་མིན་པར། སྨན་བཅོས་རིང་ལུགས་མང་པོ་ཞིག་ཡོད་རེད། ཡིན་ནའང་ནད་པ་མང་པོ་ཞིག་ལ་བོད་སྨན་འདི་བརྒྱུད་ནས་ལུས་སེམས་གཉིས་ཀའི་འཕྲོད་བསྟེན་ལ་ཕན་ཐོགས་པོ་ཡོད་པ་དངོས་ཡོད་རེད་ལ། འཛམ་གླིང་གི་མཁས་པ་མང་པོ་ཞིག་གིས་ཀྱང་མཁྱེན་བཞིན་པ་རེད། གོང་ཞུས་ལྟར་ཁྲིམས་ཀྱི་ཐོག་ནས་ལག་ལེན་བསྟར་ཆོག་པ་ཞིག་བྱུང་བ་དང་འགྲོ་བ་མང་པོས་འདི་བེད་སྤྱོད་བྱེད་རྒྱུ་བྱུང་ན། མི་མང་པོ་ཞིག་གི་ལུས་སེམས་ཀྱི་འཕྲོད་བསྟེན་ལ་ཕན་ཐོགས་ས་རེད་བསམ་གྱི་ཡོད།
གཙོ་བོ་ ༧སྐྱབས་མགོན་རིན་པོ་ཆེས་བོད་པ་གཅིག་པུ་མིན་པར་འཛམ་གླིང་སྤྱིའི་ཞི་བདེ་དང་ལུས་སེམས་བདེ་ཐང་ལ་ཐུགས་ཁུར་ཞེ་དྲགས་གནང་གི་ཡོད་རེད། དེ་ལྟ་བུའི་རླབས་ཆེན་གྱི་ཐུགས་ཁུར་འོག་ནས་བོད་ཀྱི་ཆོས་དང་རིག་གཞུང་ཡོད་ཚད་ལ་འཛམ་གླིང་ཡོངས་ནས་དོ་སྣང་ཤུགས་ཆེར་གནང་གི་ཡོད་རེད། དེའི་ཡ་གྱལ་ལམ་ཆ་ཤས་ལྟ་བུའི་བོད་ཀྱི་གསོ་བ་རིག་པ་དེ་ལའང་འཛམ་གླིང་མི་མང་ནས་དོ་སྣང་དང་ཐུགས་ཁུར་གནང་གི་ཡོད་རེད། བྱས་ཙང་དེའི་རྒྱུད་འཛིན་ནམ་ལས་འགན་ལྟ་བུ་ང་རང་ཚོ་ཆགས་སྡད་ཡོད་རེད། སོ་སོས་སློབ་སྦྱོང་བྱེད་པ་དང་མི་ལ་ངོ་སྤྲོད་བྱེད་པ། དེའི་སྟེང་ནས་ལག་ལེན་བྱེད་རྒྱུ་སོགས་མི་རིགས་གཞན་ལས་ཀྱང་བོད་ཀྱི་མི་རིགས་འདི་ལ་འགན་ཆེ་བ་ཆགས་བསྡད་ཡོད་རེད། དེ་འདྲ་ཡིན་དུས་གོང་ཞུས་ལྟར་བོད་མི་ཁ་ཤས་ཤིག་གི་ལྟོ་གོས་ཆེད་དུ་མ་ཡིན་པར། རིང་ལུགས་དང་ལག་ལེན་དག་མ་ཉམས་པར་འཛམ་གླིང་འདིར་མུ་འཐུད་ནས་གནས་པ་ཡིན་ན་འཛམ་གླིང་སྤྱིའི་འཕྲོད་བསྟེན་ལ་གཏན་གཏན་ཕན་ཐོགས་ཡོད་པ་དེ་རྨོངས་དད་དང་ཡིད་ཆེས་ཙམ་མ་རེད། རིག་པ་དེའི་གཞུང་ལུགས་དང་ལག་ལེན་གང་ལ་བལྟས་ཀྱང་འཛམ་གླིང་མི་མང་ལ་དགོས་མཁོ་ཡོད་པའི་རིག་གཞུང་ཞིག་གཏན་གཏན་ཆགས་སྡད་ཡོད་རེད། བྱས་ཙང་དེ་ལ་རྒྱུས་ཡོད་བྱེད་པ་དང་ཁྱབ་སྤེལ་བྱེད་པ། མ་ཉམས་པར་རྒྱུན་འཛིན་བྱེད་པ་དེ་སྤྱིར་འཛམ་གླིང་སྤྱི་ལ་འགན་ཡོད་རེད་དེ། ཁྱད་པར་དེ་དང་འབྲེལ་བ་ཡོད་པའི་བོད་མི་རིགས་ལ་དམིགས་གསལ་འགན་ཡོད་པ་རེད། གཞན་ཅང་མི་འདུག གང་ལྟར་བསམ་པ་བཟང་པོ་ཙམ་ཞིག་རེད། གཞན་རེ་བ་ནང་བཞིན་ནུས་པ་ཞིག་ཐོན་གྱི་མི་འདུག དེ་འདྲ་ཞིག་རེད།།
—-མུ་འགོད།
དོལ་སྨྱོན་ལགས་ཀྱིས་དྲི་བ་ཡག་པོ་བཏོན་འདུག རྒན་ཁོང་གི་གསོ་རིག་དཔྱད་རྩོམ་གཅེས་བསྡུས་ཀྱི་དེབ་དེ་ན་ནིང་ཐེངས་གཅིག་ལ་བལྟས་མྱོང་། རྒྱ་གར་ཚེ་ཡི་རིག་བྱེད་དང་བོད་ཀྱི་གསོ་རིག་གཉིས་ཀྱི་སྐོར་ལ་ཞིབ་འཇུག་གནད་དུ་ཁེལ་བ་གནང་འདུག རྒན་ཁོང་ལྟ་བུ་གཞུང་དང་ལག་ལེན་གཉིས་ལ་མཁས་བ་ཉུང་ཉུང་རེད།སྐུ་ཚེ་བརྟན།།
རྒན་རིན་པོ་ཆེ་ལགས་ནས་གནད་དུ་ཁེལ་བ་ཞྀག་གསུངས་གནང་འདུག ཐུགས་རྗེ་ཆེ་ཞུ།
རྒན་རག་རྡོ་བློ་བཟང་བསྟན་འཛིན་རིན་པོ་ཆེ་ཐུགས་སེམས་ཆུང་ལ་སྐུ་ཡོན་ཆེ་ཞིང་། ལྷག་པར་དུ་སྤྱི་སེམས་ཆེ་བའི་སློབ་དཔོན་ཚད་ལྡན་ཞིག་ཡིན་པ་གོ་བྱུང་། སྐུ་ཉིད་ཀྱི་བསམ་དོན་ལྷུན་གྱིས་གྲུབ་པའི་སྨོན་ལམ་ཞུ།
གོ་ཐོས་ཙམ་ཡིན་བདེན་པ་ཡིན་མིན་རྒན་གྱིས་གསལ་བཤད་གནོངས་རོགས། རྒན་འདི་པ་ཐབས་ཤེས་དང་རིགས་པ་བཟང་བས། རྒྱ་གར་དབུས་གཞུང་གི་བོད་སྨན་ཁས་ལེན་བརྟག་དཔྱད་ཞིབ་འཇུག་ཚོགས་ཆུང་ཝ་ནར་ཡོད་དུས། རྒྱ་གར་མཁས་དབང་རྒན་པོ་འགའི་མཇེ་དེ་ཚོ་རྒས་ནས་མཁྲེགས་པོ་ཡོང་གི་མེད་སྟབས། རྒན་ལ་རྩེད་མོ་དང་སྦྲགས་བོད་སྨན་ལ་མཁྲེགས་གྱུར་གྱི་སྨན་ཡོད་དམ་ཟེར་དུས། རྒན་ནས་སྨན་སྦྱོར་གནང་ནས་དམིགས་བསལ་རྒྱ་གར་རྒན་པོ་ཚོའི་ཁམས་དང་བསྟུན་ནས་བཟོས། རྒྱ་གར་དེ་ཚོ་སྔར་མཇེ་མི་ལངས་བར་ལོ་ཤས་འགྲོ་མཁན་ཚོར་མཇེ་གསར་པ་ཞིག་ཐོབ་ནས་དགའ་སྤྲོས་ཁེངས། ཁོང་ཚོ་སྐད་ཤོར་ནས། བོད་སྨན་འདི་ལ་ངོ་མ་ནུས་པ་འདུག་ཟེར་བ་གོ་མྱོང་།
་་་་ རྒན་ལ་རྩེད་མོ་དང་སྦྲགས་བོད་སྨན་ལ་མཁྲེགས་གྱུར་གྱི་སྨན་ཡོད་དམ་ཟེར་དུས། རྒན་ནས་སྨན་སྦྱོར་གནང་ནས་དམིགས་བསལ་རྒྱ་གར་རྒན་པོ་ཚོའི་ཁམས་དང་བསྟུན་ནས་བཟོས། རྒྱ་གར་དེ་ཚོ་སྔར་མཇེ་མི་ལངས་བར་ལོ་ཤས་འགྲོ་མཁན་ཚོར་མཇེ་གསར་པ་ཞིག་ཐོབ་ནས་དགའ་སྤྲོས་ཁེངས། ཁོང་ཚོ་སྐད་ཤོར་ནས། བོད་སྨན་འདི་ལ་ངོ་མ་ནུས་པ་འདུག་ཟེར་བ་གོ་མྱོང་། ་་་་་་ཟེར།