ས་ཟླའི་ངོ་སྤྲོད་ཚིག་ཉུང་མུན་སེལ་སྒྲོན་མེ།

Comments (6) on “ས་ཟླའི་ངོ་སྤྲོད་ཚིག་ཉུང་མུན་སེལ་སྒྲོན་མེ།”

1. བཀླགས་ནས་བུད་ཡོད། བཀའ་དྲིན་ཆེ།

2. སྐུ་བལྟམས་རང་བྱུང་མཛད་པ།།
   བདུད་རིགས་བཏུལ་བའི་མཛད་པ།
   །མངོན་རྫོགས་སངས་རྒྱས་མཛད་པ།།
   མྱ་ངན་འདས་པའི་མཛད་པ།།
   དུས་ཆེན་ལྔ་འཛོམས་ཡིན་ཞིང་།།
   ཞེས་དང་།
   དམིགས་བསལ་ཚེས་པ་བཅོ་ལྔ།།
   སྟོན་པ་སྐུ་བལྟམས་མཛད་པ།།
   མངོན་པར་སངས་རྒྱས་མཛད་པ།།
   མཐའ་མ་མྱ་ངན་མཛད་པ།།
   དུས་ཆེན་གསུམ་འཛོམས་་་་་་་་་ཞེས་གསུངས་འདུག་པས་་་་་

3. ༄༅།།དབྱངས་ཨ་ངེས་པའི་མཆོད་སྤྲིན་རྒྱ་མཚོ། །རྣམ་དཀར་ལས་ལ་འབད་པ་བཟང་དང་བཅས། །ཟླ་བྲལ་བླ་མ་ཟས་གཙང་སྲས་ཞབས་ལ། །ལྷག་བསམ་དག་པས་ཡང་ཡང་རབ་བསྔགས་སླད། །ས་ཟླར་མཛད་བཟང་ལྔ་བསྐྱངས་སྙན་དབྱངས་བཀླགས། །

4. ༄༅།།དབྱངས་ཨ་ངེས་པའི་མཆོད་སྤྲིན་རྒྱ་མཚོ། །རྣམ་དཀར་ལས་ལ་འབད་པ་དང་བཅས་ནས། །ཟླ་བྲལ་བླ་མ་ཟས་གཙང་སྲས་ཞབས་ལ། །ལྷག་བསམ་དག་པས་ཡང་ཡང་རབ་བསྔགས་སླད། །ས་ཟླར་མཛད་བཟང་ལྔ་བསྐྱངས་སྙན་དབྱངས་བཀླགས། །ཀ་བ་ལྟར་དྲང་རྣམ་ཐར་དག །ཁ་བ་གངས་ཅན་པ་རྣམས་ལ། །ག་པ་ག་སར་རབ་གསལ་བས། །ང་ཅག་ནང་པ་ཚད་ལྡན་ལགས།

5. ས་ཟླའི་ངོ་སྤྲོད་ཚིག་ཉུང་མུན་སེལ་སྒྲོན་མེ།

   ཆབ་མདོ་ངག་ཕུན།

   བོད་ཟླ་བཞི་པ་འདི་ལ། །ས་ག་ཟླ་བ་ཟེར་ཞིང་།།
   ཟླ་བ་འདི་ཡི་ནང་དུ། །སྟོན་པ་ཤཱཀྱ་ཐུབ་པས།།
   གདུལ་བྱ་ཐར་པའི་ལམ་ལ། །འགོད་མཛད་བསམ་མི་ཁྱབ་པའི།།
   མཛད་པ་བཞེས་པའི་ནང་ནས། །སྐུ་བལྟམས་རང་བྱུང་མཛད་པ།།
   བདུད་རིགས་བཏུལ་བའི་མཛད་པ། །མངོན་རྫོགས་སངས་རྒྱས་མཛད་པ།།
   མྱ་ངན་འདས་པའི་མཛད་པ། །དུས་ཆེན་ལྔ་འཛོམས་ཡིན་ཞིང་།།
   དམིགས་བསལ་ཚེས་པ་བཅོ་ལྔ། །སྟོན་པ་སྐུ་བལྟམས་མཛད་པ།།
   མངོན་པར་སངས་རྒྱས་མཛད་པ། །མཐའ་མ་མྱ་ངན་མཛད་པ།།
   དུས་ཆེན་གསུམ་འཛོམས་འདི་ལ། །རྣམ་དཀར་དགེ་བའི་བྱ་བ།།
   སྤེལ་ན་བྱིན་རླབས་ཕན་ཡོན། །ཆེ་བའི་དུས་སྟོན་རྩ་ཆེན།།
   བརྩི་བའི་ལུགས་སྲོལ་ཡོད་ཅིང་། །དེ་སྔ་རང་བཙན་ཡོད་སྐབས།།
   བཅོ་ལྔའི་་ཉིན་མོ་དེ་ལ། །བོད་གཞུང་མཛད་གཙོ་ཡོངས་རྫོགས།།
   འཛོམས་ཏེ་ལྷ་སའི་གཙུག་ལག །ར་མོ་ཆེ་དང་ནོར་གླིང་།།
   པོ་ཏ་ལ་སོགས་དགོན་གནས། །མཆོད་མཇལ་གླིང་སྐོར་ཕེབས་པ།།
   དེར་ཉིན་ལྷ་སའི་གྲོང་མི། །ཞོགས་པ་སྔ་པོར་བཞེངས་ནས།།
   ཕྱག་དང་མཆོད་པ་བྱེད་ཅིང་། །དེ་དག་རིམ་གྱིས་གྲུབ་རྗེས།།
   ལུས་ལ་གཟབ་མཆོར་སྤྲས་ནས། །ཇ་ཆང་ཞིམ་ཟས་ཁྱེར་ཏེ།།
   རྫོང་རྒྱབ་ཀླུ་ཁང་ཕྱིན་ཏེ། །ཀོ་གྲུར་ཞུགས་ནས་མཚོ་སྐོར།།
   གླུ་གཞས་རྣམ་ཐར་ལ་སོགས། །བཏང་ནས་སྤྲོ་སྐྱིད་གཏོང་སྲོལ།།
   དེ་བཞིན་དུས་ཆེན་ཉིན་དེར། །རང་གཞུང་རྩིས་ལས་ཁང་ནས།།
   ཇོ་ཤཱག་རྣམ་གཉིས་གཙོས་པའི། །གདན་ས་གཙོ་གྱུར་དགོན་སྡེའི།།
   རྟེན་གཙོ་ཡོངས་ལ་ས་ཟླའི། །མཆོད་སྤྲིན་ཞེས་བྱ་ཞལ་གསེར།།
   སྤྱན་འབྱེད་མཆོད་འབུལ་སྙན་དར། །རྒྱ་ཆེར་གནང་སྲོལ་ཡོད་ཅིང་།།
   དེ་བཞིན་དགེ་འདུན་ཚོགས་ལ། །བསྙེན་བཀུར་ཞབས་ཏོག་གཟབ་རྒྱས།།
   ཞུ་བའི་ལུགས་སྲོལ་ཡོད་སྐད། །ལྷག་དོན་རང་གཞུང་ཕྱོགས་ནས།།
   སྲོག་གཅོད་སྤོང་པའི་ཁྲིམས་ལུགས། །བསྡམས་ཏེ་ཁྲོམ་གཞུང་ཁག་ལ།།
   ཤ་ཁྲོམ་འདོན་མཁན་མེད་ཅིང་། །ལྷག་དོན་གཞུང་སྒེར་གཉིས་ནས།།
   ངན་སློང་སྦྱིན་པ་གཏོང་བ། །དགེ་འདུན་བསྙེན་བཀུར་བྱེད་ཅིང་།།
   ར་ལུག་གཡག་དང་བྱིའུ། །ལ་སོགས་ཚེ་ཐར་གཏོང་བ།།
   སྣང་ཤག་ལས་ཁུངས་མདུན་གྱི། །ནག་ཅན་བཙོན་པ་གློད་གྲོལ།།
   སེམས་ཅན་འཚེ་བ་མི་ཡོང་། །དམར་ཟས་སྤོང་ཞིང་དགེ་སྒྲུབ།།
   མ་ཎི་དྲུང་ཕྱུར་གསོགས་པ། །ཕྱག་འཚལ་སྐོར་སྦྱོང་བྱེད་པ།།
   བཀའ་བསྟན་ལྗགས་ཀློག་ལ་སོགས། །རྣམ་དཀར་དགེ་ལས་བརྩོན་པ།།
   དེང་སྐབས་བཙན་བྱོལ་ནང་ལ། །བོད་མིའི་སྒྲིག་འཛུགས་འོག་ནས།།
   སྔ་སྲོལ་བཟང་པོའི་མཇུག་སྐྱོང་། །ཆོས་སྲིད་ཡར་ངོ་ཟླ་ལྟར།།
   འཕེལ་རྒྱས་ཡོང་བའི་ཆེད་དུ། །ཐེག་ཆེན་ཆོས་གླིང་ཆོས་རར།།
   སྲིད་ལས་མགོ་དམངས་ཡོངས་གཙོས། །འདིར་ཡོད་མི་མང་འཛོམས་ནས།།
   བཀའ་ཆོས་ཞུ་བ་ལ་སོགས། །ལྷ་རྒྱལ་རི་ལ་རླུང་རྟ།།
   དར་འཛུགས་བྱེད་སྲོལ་ཡོད་ཅིང་། །དེ་ཉིན་རྒྱ་གར་གྲོང་གསེབ།།
   ཁག་ནས་སྤྲང་པོ་བརྒྱ་ཕྲག །གཙུག་ལག་ཁང་གི་སྐོར་ལམ།།
   གཡས་གཡོན་སྤྲང་པོས་ཡོངས་ཁེངས། །སྐབས་རེར་སྤྲང་པོ་དེ་དག །
   སྒོར་རྡོག་ཁ་ཤས་དོན་དུ། །སྤྲང་པོ་ཕན་ཚུན་འཁྲུག་འཛིང་།།
   མཐོང་དུས་ཨ་ཁ་བསམ་ཞིང་། །སྙིང་རྗེ་ཚད་མེད་སྐྱེ་བ།།
   བོད་མི་རྒན་དར་གཞོན་གསུམ། །སྤྲང་པོར་བྱམས་སེམས་ཆེན་པོས།།
   དངུལ་དངོས་སྦྱིན་གཏོང་གནང་བ། །དེ་བཞིན་ཉེ་འཁོར་དགོན་སྡེ།།
   དགོན་པར་བཅར་ནས་སྨོན་ལམ། །འདེབས་པ་ལ་སོགས་མཆོད་འབུལ།།
   ས་ཟླའི་དུས་ཆེན་ཉིན་དེར། །རྣམ་དཀར་ལས་ལ་བརྩོན་ནས།།
   དགེ་བའི་ཆོས་ལ་འབད་དོ། །འདི་ནི་བོད་ཀྱི་དུས་ཆེན།།
   ངོ་སྤྲོད་ཅེས་པའི་དེབ་ལ། །གཞི་རྩར་བཟུང་ནས་བསྒྲིགས་ཡོད།།
   ཚར་གཅིག་ཀློག་ན་ཕན་ལས། །གནོད་པའི་གནས་ནི་མེད་དོ།།
   ཀུན་གྱིས་དེ་དོན་རྟོགས་མཛོད།།ཡིག་འབྲུ་དྲུག་བརྒྱ་དོན་གཅིག །
   ཚིགས་སུ་བཅད་ནས་སྤེལ་ཡོད། །འདི་ཡི་དགེ་བའི་རྒྱུ་ཚོགས།།
   འཛམ་གླིང་སྐྱེ་འགྲོ་ཡོངས་དང་། །ཡང་སྒོས་གངས་ཅན་པ་རྣམས།།
   དཀའ་སྡུག་གནས་ལས་གྲོལ་ནས། །རང་དབང་བདེ་སྐྱིད་དཔལ་ལ།།
   རྟག་རོལ་ཡོང་བའི་སྨོན་འདུན། །བདག་གི་སྙིང་ནས་གསོལ་འདེབས།

6. ས་ག་ཟླ་བ།
   ལྷུམས་སུ་བཞུགས་དང་སྐུ་བལྟམས་ནས། །
   བདུད་བཏུལ་མངོན་པར་སངས་རྒྱས་ཤིང་། །
   མྱ་ངན་འདས་པའང་ས་ཟླར་འཁེལ། །
   དེས་ན་དུས་ཆེན་དྲུག་འཇོམས་པས། །
   ས་ཟླའི་དུས་ཆེན་ཨེ་མ་ཧོ། །