རྩོམ་རྐུ་མཁན་ཇེ་མང་རེད།

ཨ་རིག་དགེ་མཐོང་།

ས་ཡི་གོ་ལ་ཟླུམ་པ་འདིའི་སྟེང་དུ་འཚོ་བཞེས་བྱེད་ཀྱིན་པའི་མི་རྣམས་ལ་མཚོན་ན་ལོ་འགའི་ཡར་སྔོན་བཤད་ན་ཕན་ཚུན་ཁ་ཐག་རིང་ཞིང་འབྲེལ་འདྲིས་ཉུང་བ་ཞིག་རེད། དེང་གི་དུས་སུ་ཤར་ནུབ་ཕྱོགས་བཞིའི་མི་རྣམས་ཀྱི་འབྲེལ་བ་ཐག་ཉེ་རུ་གྱུར་ཞིང་། ས་སྟེང་འདིའི་མཐོ་དཔོན་པོ་ནས་དམའ་སྤྲང་པོའི་བར་གྱིས་ཆ་རྐྱེན་གྱིས་འདང་མིན་ལ་མི་བལྟ་བར་བརྡ་འཕྲིན་བཀོལ་སྤྱོད་གཏོང་གིན་འདུག  དེ་འདྲ་ལ་བརྟེན་འཛམ་གླིང་ཇེ་ཆུང་དུ་སོང་བ་དང་རྙོག་འཛང་ཇེ་མང་དུ་སོང་བ་ལྟ་བུར་གྱུར།

དེ་རིང་ཡང་བརྡ་འཕྲིན་དར་བ་ལ་བརྟེན་རྩོམ་རྐུ་མཁན་ཇེ་མང་དུ་འགྲོ་བཞིན་པའི་སྐོར་ཏོག་ཙམ་གླེང་རྒྱུའི་འབད་བརྩོན་བྱ། གང་ཞེ་ན། དྲ་རྒྱའི་ཟིན་བྲིས་སམ་དྲ་བ་ཇེ་མང་དུ་སོང་བས་རྩོམ་དགའ་ཚོས་རང་གི་ཚོར་སྣང་གང་ཤར་ཁ་ཐུག་བྲིས་ཏེ་སྔོན་མ་བཞིན་དུས་དེབ་དང་ཚགས་པར་ཞིག་ལ་རེ་ལྟོས་མི་དགོས་པར་ཐད་ཀར་དྲ་ལམ་དུ་གཏོང་རྐྱང་བྱེད་ཆོག  དྲ་ལམ་ནས་གཞན་གྱི་དཔྱད་མཆན་དང་བལྟ་ཀློག་ཇི་ཙམ་བྱུང་འདུག་སོགས་དུས་ལྟར་ཤེས་པའི་ལེགས་ཆ་མཆིས། 
འོན་ཀྱང་རྩོམ་ཡིག་ལེགས་པོ་ཞིག་ལ་མཚོན་ན་དྲ་བ་ནས་དྲ་བ་གཞན་དུ་མི་གཞན་གྱིས་འདྲེན་བཀོད་བྱེད། ཁག་ཅིག་གིས་གནང་ཞུ་སྔོན་སོང་གིས་འདྲེན་པ་དང་།རེ་ཟུང་གིས་ཧམ་སེམས་ཀྱིས་ཁྱེར་འགྲོ། དེ་ཙམ་ལ་ཧང་སངས་དགོས་པ་ནི་མ་མཆིས་མོད། ཕར་འདྲེན་བཀོད་སྐབས་སུ་རྩོམ་པ་པོའི་མཚན་མི་འབྲི་བ་དང་། ཡོང་ཁུངས་གསལ་བཤད་མེད་པ་སོགས་ཀྱི་གནད་དོན་ཞིག་ལོ་རེ་ནས་ལོ་རེར་ཇེ་མང་དུ་འགྲོ་བཞིན་ཡོད།

ལྷག་པར་ན་ནིང་དོ་ཚིགས་སུ་༼ facedook༽བོད་སྐད་དུ་ངོ་དེབ། ༼ wechat༽ བོད་སྐད་དུ་སྐད་འཕྲིན་ཟེར་བ་གཉིས་འཇིག་རྟེན་དུ་བྱོན་པས་རྩོམ་རྐུ་མཁན་གྱི་བསྟན་པ་དར་བ་རེད། རྒྱུ་ མཚན་ཕན་ཚུན་ལ་ལེགས་སྐྱེས་སམ་ཡང་ན་བོད་ཡིག་ལམ་ནས་འཕྲིན་གཏོང་སྐབས་རང་ཉིད་བོད་ཡིག་ལ་དགའ་མཁན་དང་ཤེས་མཁན་ཡིན་མདོག་མདོག་གི་རྣམ་པ་སྟོན་ཆེད་དུ་གཞན་གྱི་རྩོམ་ཡིག་གསལ་བཤད་མེད་པར་ཡར་མར་ལ་བསྐུར་བ་མ་ཟད། མཐའ་ན་རྩོམ་པ་པོའི་མིང་ཡང་མི་སྨོས་པར་རང་ཉིད་ཀྱི་ཡིན་མདོག་གིས་བསྐུར། དེར་མ་ཟད་སྐད་འཕྲིན་ནང་དུ་གཞན་རྩོམ་འཕྲུལ་དེབ་ཏུ་བཟོས་ཏེ་རང་མིང་མགོར་སྦྱར་བ་འདི་ཨ་ཙ་མ། 

དེང་སང་སྐད་འཕྲིན་སོགས་སུ་གཞན་རྩོམ་རང་ཉིད་ཀྱི་ཡིན་མདོག་མདོག་གི་བསྐུར་མཁན་མང་བ་མ་ཟད། ཞབས་འདྲེན་པ་ཁག་ཅིག་གུས་པས་ལག་ཟིན་བྱུང་། ག་འདྲ་བྱས་ནས་ཤེས་ཟེར་ན། ཁོ་བོ་ནི་བོད་ཕྱི་ནང་གི་དྲ་རྒྱ་ཁག་ཏུ་ཟིན་བྲིས་སྤེལ་མཁན་དང་དེ་ལ་དགའ་མཁན་གྱི་རིགས་ཡིན་པས་གཞན་གྱི་རྩོམ་ཡིག་ལེགས་པོའི་རིགས་ནི་ཕལ་ཆེ་བ་མཐོང་ཙམ་གྱིས་རྩོམ་པ་པོ་སུ་ཡིན་ཤེས། དེའི་ཕྱིར་མྱི་ཁག་ཅིག་བདག་གིས་ངོ་ཚ་ལ་གཏད་བ་ནི་ཁོ་ཚོ་ལ་དགོངས་སེལ་ཞུ་མ་འདོད་ཐལ། ཁོ་བ་ཚོར་བདག་གིས་གཞན་རྩོམ་ཡིན་པའི་སྒྲུབ་བཤད་ཀྱི་རྟགས་དང་གཏན་ཚིགས་འགའ་རེ་ཐོག་ལྟར་འཕངས་སྐབས། མི་འདོད་པའི་རྣམ་འགྱུར་ཙམ་སྟོན་རྒྱུ་ལས་མི་སྨྲ་བའི་བརྟུལ་ཞུགས་འཛིན་དགོས་བྱུང་བ་ནི་བདག་ལ་བདེན་པའི་གནས་ལུགས་ཡོད་པས་སོ། །

རང་རྩོམ་ལ་མཚོན་ན་ཡང་། མཁན་སྤྲུལ་གྱི་མིང་བཟུང་ཡོད་པའི་སྐྱེས་བུ་ཐ་ཤུལ་པ་ཞིག་གིས་གུས་པའི་རྩོམ་ཡིག་༼གྲྭ་གཟུགས་འདི་ཚོ་གཙང་ཕྱགས་བྱེད་རན༽་ཅེས་པ་ཁོ་རང་གིས་ཡིན་མདོག་བྱས་ཏེ་རང་གི་དྲ་གནས་སུ་སྤེལ་འདུག་པ་དང་། གུས་པའི་གྲོགས་པོ་ཁག་ཅིག་གིས་མཐོང་སྟེ་ཁ་འཛང་བྱས་པ་དང་། ང་ལ་ཡང་སྐབས་བབ་དེ་དག་ལ་ཐ་ཚིག་སྒྲོག་དགོས་པའི་འབོད་སྐུལ་བྱས་སོང་། དེའི་ག་ལ་ཚད་གུས་པའི་སྙན་རྩོམ་༼འགྱུར་མེད་ཀྱི་བརྩེ་དུངས་༽ཞེས་པ་ཡང་བུ་མོའི་པར་རིས་མགོ་ལ་བཞག་པའི་བཙུན་གཟུགས་ཁྱི་རྐུན་ཞིག་གིས་འཕྲུལ་དེབ་ཏུ་བཟོས་ཏེ་སྐད་འཕྲིན་བརྒྱུད་ངའི་དྲ་གྲོགས་མ་ཞིག་ལ་བཏང་འདུག་པ་དང་། ཁོ་མོས་ཁྱེད་ཀྱིས་འདི་ཡག་པོ་བྲིས་འདུག ག་དུས་བྲིས་ཡིན་ཅེས་ནན་གྱིས་དྲིས་སྐབས་ང་རང་ལ་དེ་འདྲའི་བརྩེ་དུངས་ཕྱོགས་ནས་དཀའ་ངལ་ཅིག་ཡོད། 

དེའི་ཕྱིར་འདི་འདྲ་ཞིག་འབྲི་ཁུལ་བྱས་ཞེས་ཁེངས་སྐྱུང་ཁུལ་གྱིས་བཤད་པ་ན། བདག་གི་དྲ་གྲོགས་མས་ཁ་ཐུག་ངོ་ཚ་མེད་པ་ཁྱོད། འདི་ནི་བོད་ཕྱི་ནང་གི་དྲ་ཚིགས་མང་བོར་སྤེལ་ཟིན་པའི་རྩོམ་རྙིང་ཞིག་རེད། མི་བདེན་གི་བསམ་ན་བོད་ཀྱི་དུས་བབ་དང་སེང་རྡོར་དྲ་བ། མཚོ་སྔོན་པོའི་ཨ་རིག་དགེ་མཐོང་གི་ཟིན་བྲིས་སུ་ལྟོས་ལབ་པ་ན། ཁོ་རང་གིས་ཅི་བཤད་འདི་བཤད་མེད་པར་རྩོམ་འདི་སྣང་བ་འགྲོ་སོང་། དེའི་ཕྱིར་འཕྲུལ་དེབ་ཏུ་བཟོས་པ་ཡིན་ཅེས་ཟེར། སྐབས་དེར་ང་ལ་དྲ་གྲོགས་མས་འབྲེལ་བ་བྱས་སོང་། འདི་དང་འདི་ལྟ་བུའི་རིགས་གང་མང་མང་ཞིག་ཡོད་ཀྱང་། ད་ལྟ་ཁོ་བོ་རང་ལ་འཕྲད་པའི་སྐོར་ལས་གཞན་གྱི་དེ་ཚོ་གླེང་གིན་མེད། 
གཞན་ཁྱེད་ཅག་ལ་ཏན་ཏན་གནད་དོན་འདིའི་རིགས་འབྱུང་ཡོད་པས་ཀུན་གྱིས་ད་ནས་བཟུང་རང་ས་ནས་བསམ་བློ་བཏང་སྟེ་རྐུ་བྱེད་པའི་ལས་འདི་མཚམས་འཇོག་རོགས། ད་ནི་སུ་ཞིག་གིས་དེ་འདྲའི་བྱ་ངན་གྱི་སྦྱོར་བ་རྩོམ་པ་མཐོང་ཚེ་ཡོངས་ཁྱབ་གསལ་བསྒྲགས་བྱ་རྒྱུའི་ཁ་དན་ཡོད།

བརྩམས་ཆོས་སམ་རྩོམ་ནི་མི་སྒེར་བས་འབད་པའི་རྩོལ་བ་ལས་བྱུང་བ་རེད། དེ་འདྲ་ཞིག་གཞན་གྱིས་དོན་མེད་དུ་ཁྱེར་ན་རྒྱལ་ཁབ་ཚད་ལྡན་ཞིག་ལ་མཚོན་ན་ཁྲིམས་ཐོག་ནས་རྩོམ་པ་པོར་རྒྱལ་ཁ་ཐོབ་ངེས་རེད། མདོར་ན། གཞན་རྩོམ་སྣང་བ་འགྲོ་བའི་རིགས་དྲ་གནས་གཞན་དང་རང་གི་ཟིན་བྲིས་སུ་འོས་སྦྱོར་དང་འདྲེན་བཀོད་བྱས་ཆོག་མོད། དེ་དག་ལ་གཞན་རྩོམ་ཡིན་པའི་གསལ་བཤད་དང་། འཕྲུལ་དེབ་ཏུ་བཟོས་ན་དེ་ནི་རྩོམ་དེ་ཀུན་གྱིས་མཐོང་བདེ་བས་ལེགས་ཆ་རེད་མོད། དེ་ལ་རྩོམ་པ་པོའི་མིང་མ་བྲིས་ན་ཁྱེད་ཀྱིས་མགོ་མཇུག་ལ་གསལ་བཤད་ཅིག་ལོགས་སུ་བྲིས་ཡོད་ཀྱང་། གང་ཟག་གཉིས་པ་ཞིག་གིས་འདྲེན་བཀོད་སྐབས་གསལ་བཤད་དེ་ལྷག་པས་ཡང་དཀའ་ངལ་འདི་འཕྲད་ཀྱིན་འདུག མ་གཞི་ཀུན་གྱིས་རང་ས་ནས་རང་རྩོམ་ལ་བདག་རྒྱུ་དང་། གཞན་རྩོམ་རྐུ་བའི་རིགས་མཐོང་ན་ཁ་ཐུག་གསལ་བསྒྲགས་བྱ་རྒྱུ་སོགས་ནི་ད་ལྟའི་དུས་སུ་ཧ་ཅང་གལ་ཆེའོ། །

དེ་ནས་ཡང་བསྐྱར་ཞུ་རྒྱུ་ཞིག་ལ་ཁོ་བོས་བསམ་འཆར་འདི་བྲིས་ནས་མཇུག་རྗོགས་ཏེ་ངལ་གསོ་ཏོག་ཙམ་བྱེད་བཞིན་པའི་སྐབས་སུ། སྐད་འཕྲིན་ནང་གི་ཚོགས་པ་ཞིག་གི་ནང་དུ་༼སྐུ་ཞབས་སེང་རྡོར་གྱི་འབྲོག་མོ་ཞེས་པའི་རྩོམ་དེ་སྐད་འཕྲིན་ནང་དུ་སྤེལ་བྱུང་། ངས་ཏོག་ཙམ་བསྒུག་ནས་གསལ་བཤད་འདྲ་ཨེ་ཡོད་བལྟས་ཡིན། གསལ་བཤད་མེད་པ་མ་ཟད་ཁོ་རང་གིས་དོ་ནུབ་ཁོས་འདི་འཆད་ཁྲིད་བྱེད་རྒྱུ་ཁྱེད་ཅག་ལ་མོས་འཐད་ཨེ་ཡོད་ཅེས་ཟེར། དེ་ནས་ངས་ཐོག་མར་རྩོམ་ཡིག་འདི་ཁྱེད་རང་གིས་བྲིས་པ་ཡིན་ནམ། གསལ་བཤད་རྒྱོབས་ལབ་ཡིན།
སྐབས་དེར་མིན་སེང་རྡོར་རེད་ཟེར། ངས་སྐུ་ཞབས་སེང་རྡོར་ལ་སྐད་འཕྲིན་བརྒྱུད་རྩོམ་ཡིག་འདིའི་ཁ་བྱང་མི་འདུག དེའི་ཁ་བྱང་གསུངས་རོགས་ལབ་ཡིན། ཁོང་གིས་འབྲོག་མོའི་སྐོར་གྱི་སྔ་དུམ་ཡིན་ཅེས་ལན་སློག འདི་ལ་གཟིགས་དང་རྩོམ་གྱི་ཁ་བྱང་ཡང་བཀོད་མེད་པ་དང་རྩོམ་པ་པོའི་མིང་ཡང་སྨོས་མི་འདུག གོང་གི་རྩོམ་ཡིག་དེ་སྤེལ་སྐབས་རྒྱ་གར་གྱི་ཆུ་ཚོད་བདུན་དང་སྐར་ཆ་བཅུ་གསུམ་སྟེང་རེད་ལ།  མི་སུ་ཡིན་ཡང་གསལ་བོར་ཤེས་ཡོད། འོན་ཀྱང་དེ་རིང་ནི་དམིགས་བསལ་གྱིས་མིང་བཟུང་དོན་བཟུང་དང་ཁོ་པའི་པར་བཅས་དྲ་ལམ་དུ་བཏང་མེད། ཕྱིན་ཆད་ལྟད་མོ་ལྟོས་དང་འདི་འདྲའི་རིགས་མཐོང་ཚེ་ཐེར་འདོན་མཐའ་གཅིག་ཏུ་བྱེད་ངེས་སོ། །