གནས་ཚུལ་མཁོ་གཏོང་བ། སྤྱི་འཐུས་རོང་བོ་བློ་བཟང་སྙན་གྲགས།
བོད་ནང་གི་བོད་མི་ཚོར་སྐྱིད་སྡུག་མཉམ་མྱོང་དང་རང་ལུས་མེར་བསྲེགས་བཏང་སྟེ་འདས་ཟིན་པའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་ཆེད། ཕྱི་ལོ་༢༠༡༣ ཟླ་༢ ཚེས་༢༠ ཉིན་སླར་ཡང་ཇི་ནེ་ཝ་མཉམ་འབྲེལ་རྒྱལ་ཚོགས་ཀྱི་མདུན་དུ། སིད་སུ་གནས་སྡོད་ལྷུན་འགྲུབ་ཚང་ཀརྨ་བཀྲིས་ཚེ་རིང་དང་། སྟག་ཚང་དཀོན་མཆོག་ཁྱིམ་ཚང་གཉིས་ཀྱིས་ཞུ་གཏུག་གི་ལས་འགུལ་ཐེངས་ལྔ་བ་སྤེལ་འདུག་པ་མ་ཟད། བོད་བསྟན་སྲིད་མི་རིགས་ཆེད་རྒྱ་གཞུང་གི་ཆེས་གདུག་རྩུབ་ཅན་གྱི་སྲིད་བྱུས་ལ་ཆེས་ཚད་མཐོ་བའི་ཞི་རྒོལ་གནང་སྟེ། རང་གི་རྩ་ཆེའི་ལུས་སྲོག་མི་རིགས་འདིའི་ལས་དབང་གི་ཆེད་ཕངས་མེད་དུ་མེར་བསྲེགས་བཏང་ཟིན་པའི་གཞིས་བྱེས་གཉིས་ཀྱི་རྒྱལ་གཅེས་དཔའ་བོ་དཔའ་མོ་འདས་གྲོངས་སུ་གྱུར་བ་རྣམས་ཀྱི་ཆེད། གོང་ཚེས་ཉིན་བོད་མིའི་དབུས་སྒྲིག་འཛུགས་བཀའ་ཤག་གིས་འཛམ་གླིང་ཡུལ་གྲུ་གང་སར་གནས་སྡོད་བོད་མི་ཚང་མས་ཉིན་བརྒྱ་དུས་གཅིག་ཏུ་གདུང་སེམས་མཉམ་སྐྱེད་དང་། མཆོད་འབུལ་སྨོན་ལམ་རྒྱས་པ་ཞིག་གསུངས་དགོས་པའི་གཞུང་འབྲེལ་བཀའ་རྒྱ་ཕེབས་པ་བཞིན། ཇི་ནེ་ཝ་མཉམ་འབྲེལ་རྒྱལ་ཚོགས་ཀྱི་མདུན་དུའང་རྒྱལ་བའི་ཞབས་བརྟན་སོགས་བཏོན་ནས་བསྔོ་སྨོན་རྒྱ་ཆེར་བྱས་འདུག སྐབས་དེར་སུད་སི་ཇི་ནེ་ཝའི་བོད་རིགས་ཚོགས་ཆུང་གི་ཚོགས་མི་ཉི་ཤུ་ལྷག་གིས་ཀྱང་། བོད་ནང་གི་རྒྱལ་གཅེས་དཔའ་བོ་དཔའ་མོ་རྣམས་དང་གདུང་སེམས་མཉམ་སྐྱེད་ཀྱི་སྒོ་ནས་མཉམ་ཞུགས་གནང་འདུག དེ་བཞིན་ད་ལྟའི་བོད་ནང་གི་ཛ་དྲག་གི་གནས་སྟངས་དང་གཞིས་བྱེས་གཉིས་སུ་ང་ཚོ་བོད་དང་། མི་རིགས་འདི་འཚོ་གནས་སླད་རང་གི་གཅེས་པའི་ལུས་སྲོག་མེར་བསྲེགས་བཏང་བ་སོགས་འཛམ་གླིང་གི་བྱུང་རབས་ལོ་རྒྱུས་ཁྲོད་ཆེས་སྐྱི་གཡའ་ཞིང་འཇིགས་སུ་རུང་བའི་བོད་དང་བོད་མིའི་ལོ་རྒྱུས་ཀྱི་སྐྱོ་གར་ཞུ་གཏུག་ཆེད། སླར་ཡང་དགོས་འདུན་དོན་ཚན་ ༦ བཏོན་ཏེ་རྒྱལ་ཚོགས་དང་འགྲོ་བ་མིའི་ཐོབ་ཐང་ལས་ཁུངས་ལ་སྙན་ཞུ་ཕུལ་ཏེ་བོད་དོན་ཞུ་གཏུག་གི་ལས་འགུལ་ཞིག་སྤེལ་ཡོད་འདུག
དགོས་འདུན་དོན་ཚན་ཁག་ནི།
དང་པོ། ཕྱི་ལོ་ ༡༩༥༩ དང་ ༡༩༦༡ ། ༡༩༦༥ སོ་སོར་འཛམ་གླིང་མཉམ་འབྲེལ་རྒྱལ་ཚོགས་ཀྱིས་བོད་དོན་ཐོག་བཞག་པའི་གྲོས་ཆོད་ཁག་སླར་ཡང་མཉམ་འབྲེལ་རྒྱལ་ཚོགས་ནས་གླེང་སློང་དང་ལག་བསྟར་མཇུག་གནོན་གནང་རྒྱུ་དང་།
གཉིས་པ། བོད་ཡུལ་འདི་སྔར་བཞིན་རང་དབང་ལྡན་པའི་ཞི་བདེ་བག་ཕེབས་ཀྱི་ཡུལ་ཞིག་ཏུ་བསྐྲུན་རྒྱུ།
གསུམ་པ། འདས་ཟིན་པའི་རྒྱལ་གཅེས་དཔའ་བོ་དཔའ་མོ་ས་ཡ་གཅིག་དང་འབུམ་གཉིས་ལྷག་གིས་བོད་མི་རིགས་ལ་ཤུལ་དུ་བཞག་པའི་ལོ་རྒྱུས་དང། རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་འབོད་སྒྲ་དང་ཞལ་ཆེམས། དེ་བཞིན་གཞིས་ལུས་རྒྱ་ཆེའི་མི་མང་གི་གལ་གནད་ཆེ་བའི་སེམས་ཀྱི་མངོན་འདོད་ལྟར། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གང་མགྱོགས་བོད་དུ་ཕེབས་རྒྱུར་མཐུན་འགྱུར་གནང་ཐབས།
བཞི་བ། ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཆོག་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་གཙོས་བོད་ནང་གི་ཆབ་སྲིད་བཙོན་པ་ཡོངས་རྫོགས་ཆ་རྐྱེན་གང་ཡང་མེད་པར་གློད་ཐབས།
ལྔ་བ། བོད་ནང་རང་ལུས་མེར་བསྲེགས་ཀྱི་ཛ་དྲག་གི་དོན་རྐྱེན་བྱུང་དང་འབྱུང་བཞིན་པའི་ཐད། མཉམ་འབྲེལ་རྒྱལ་ཚོགས་ཀྱི་ངོས་ནས་རང་དབང་ལྡན་པའི་རྟོག་ཞིབ་ཚོགས་ཆུང་ཞིག་ཛ་དྲག་གིས་བོད་དུ་ཆེད་གཏོང་གནང་རྒྱུ།
དྲུག་པ། བོད་ཀྱི་གནད་དོན་འདི་བཞིན་བོད་མི་ས་ཡ་དྲུག་གི་གནད་དོན་ཡིན་པས། བོད་མིའི་སྒྲིག་འཛུགས་དང་རྒྱ་གཞུང་དབར་ཐད་ཀར་ཞི་མོལ་འགོ་འཛུགས་ཀྱིས་བོད་ཀྱི་བདེན་མཐའ་གསལ་ཐབས་གནང་རྒྱུ་བཅས་ཡིན་འདུག
ཨེ་ད་སུད་སིར་གནས་པའི་བོད་རིགས་ཚོས་མ་གཟབ་ན། སུད་སི་ན་ཡོད་པའི་དཀོན་རྡོར་བླ་མ་ཟེར་བ་དང་། ལྟ་སྲས་ཚུལ་ཁྲིམས་ཟེར་བ་སོགས་ཀྱིས་ཁྱེད་ཚོ་རྒྱ་དམར་ལ་རྩིས་སྤྲོད་བྱེད་ངེས་རེད། སུད་སིར་དེ་སྔོན་ནས་རྒྱ་དཔོན་ཧུ་ཅིན་ཐའོ་སོགས་ཡོང་སྐབས་ཁ་བཏགས་བཟུང་ནས་རྒྱུགས་མཁན་དང་། བོད་རྒྱ་མིའི་ཆ་ཤས་ཡིན་པར་ཁས་ལེན་མཁན་གྱི་རྒྱ་གཞུང་གི་གསོས་ཕྲུག་དང་། དོལ་ཕྲུག་ཁ་ཤས་ཡོད་པ་རེད་དཱ།
ཁྱིམ་ཚང་གཉིས་ཀྱི་ལས་འགུལ་འདི་འདྲ་སྤེལ་བར་བསྔགས་བརྗོད་ཞུ།
བོད་ཕྱི་ནང་གཉིས་ནས་འདི་ལྟར་རང་སོ་སོས་གང་ནུས་ཀྱིས་བོད་དོན་ཐད་ལ་ལས་འགུལ་ཆེ་ཕྲ་གང་དང་ཅི་སྤེལ་གལ་ཆེ་ཞིང་། དེ་ཡང་མདོར་དེད་ན་རང་སོ་སོས་བོད་མི་རིགས་དང་རིག་གཞུང་དང་། རྒྱལ་ཁབ་དང་འབངས་མི་ལ་ཕུལ་བའི་ལྷག་བསམ་དང་བརྩེ་བ་ཆེ་བའི་ལོས་ཡིན།
དགོས་འདུན་དང་པོ་དང་གཉིས་པ་གཉིས་ལ་ཤུགས་སྣོན་རྒྱག་རྒྱལ་དང་དེར་གྲུབ་འབྲས་འཐོན་པར་བོད་མི་ཕྱི་སྡོད་པ་ཚོས་གཏུགས་བཤེར་རབ་དང་རིམ་པས་བྱ་དགོས་གལ་ཆེ་ཞིང་། དེ་ལྟར་ན་བོད་དོན་འདི་རྒྱལ་སྤྱིའི་གདེངས་ཆའི་ཐོག་ན་སྔར་ཡང་གླེང་སློང་བྱེད་དགོས་པ་ཞིག་ཆགས་རེ་ཆེ་ཞིང་། དེ་མིན་བོད་དོན་ནི་ཚོགས་པ་སྒེར་བ་རེ་གཉིས་དང་གཞུང་འབྲེལ་ལས་སྣེ་ཟུར་བ་རེ་གཉིས་ཀྱི་ཁ་ནས་གླེང་ཙམ་བྱེད་པ་ལས་འཛམ་གླིང་གི་རྒྱལ་ཁབ་ཁག་གི་ཆེས་མཐོའི་དཔོན་པོ་ཚོའི་ཁ་དང་མིག་ལས་ག་ལེར་ཡལ་ཉེན་ཆེ་བར་སྙམ།
གང་ལྟར་ཁྱིམ་ཚང་གཉིས་ཀྱི་ལས་འགུལ་ལ་སེམས་གཏིང་ནས་རྒྱབ་སྐྱོར་ཞུའོ།།
ཐུགས་རྗེ་ཆེ། ཕྱོགས་སོ་སོ་ནས་བོད་དར་འཛིན། བོད་དོན་གླེང་། ཁྱིམ་ཚང་སྟོང་གཅིག་ཡོད་ན་ཅི་མ་རུང་། ཁྲི་གཅིག་ཡོད་ན་ཅི་མ་རུང་། ཡུལ་ལ་འདུག་ནི་དང་ནག་ལ་འགྲོ་ནི་གཉིས་ཀ་དགོས། རྒྱལ་ཞེན་གྱིས་ཕྱུག་པའི་བོད་གངས་ཅན།