ལོ་གསར་ཚེས་གཅིག་ལ་ཟས་བཅད་ཆུ་བཅད་ཀྱི་ངོ་རྒོལ་གནང་འདུག

གནས་ཚུལ་མཁོ་གཏོང་བ་རིག་པའི་ཁུ་བྱུག

ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་མ་༤༠ལྷག་ཅིག་གིས་བོད་ནང་གི་ཛ་དྲག་གི་གནས་སྟངས་ལ་གདུང་སེམས་མཉམ་བསྐྱེད་དང་། རྒྱ་གཞུང་གི་དྲང་བདེན་མིན་པའི་ཁྲིམས་ལུགས་ལ་ངོ་རྒོལ་ཆེད་ལོ་སར་ཚེས་གཅིག་ཉིན་ཆུ་ཚོད་༢༤ རིང་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་བཞིན་ཡོད་འདུག དེ་ཡང་ཟླ་འདིའི་ཕྱི་ཚེས་༡༡ཉིན་ཏེ་བོད་ཆུ་སྦྲུལ་ལོའི་ལོ་སར་ཚེས་གཅིག་གི་ཞོགས་པར་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་དང་བླངས་སློབ་མ་ཁག་ཅིག་གི་གོ་སྒྲིག་འོག མཐོ་སློབ་དེའི་སློབ་ཕྲུག་༤༠ ཡས་མས་ཤིག་གིས་མགོར་ལོ་སར་མི་གཏོང་ཞེས་བྲིས་པའི་ཐོད་རས་དཀར་པོ་རེ་དང་། ཁ་རས་ནག་པོ་རེ་བཏག་ནས་ཐེག་ཆེན་ཆོས་གླིང་གཙུག་ལག་ཁག་གི་ཉེ་འགྲམ་དུ་ཡོད་པའི་དཔའ་བོའི་རྗེས་དྲན་རྡོ་རིང་གི་མདུན་ཐང་དུ། ད་ལྟའི་བོད་ནང་གི་ཛ་དྲག་གི་གནས་སྟངས་ཡོངས་དང་། ལྷག་པར་དུ་རྒྱ་གཞུང་གིས་བོད་མིའི་རང་ལུས་མེར་སྲེག་གི་ཉེས་མིང་འོག་བོད་མི་ཚོ་གང་བྱུང་འཛིན་བཟུང་གིས། ཁྲིམས་ཐག་འདྲ་མིན་ཞིག་གཅོད་ཀྱི་ཡོད་པ་དེ་དག་ལ་གདུང་སེམས་མཉམ་བསྐྱེད། དེ་བཞིན་རྒྱ་གཞུང་གིས་ཁྲིམས་འགལ་སྣ་ཚོགས་བྱས་ཏེ་བོད་མི་ཚོར་སྡུག་སྦྱོང་བར་མ་ཆད་པར་གཏོང་གི་ཡོད་པ་རྣམས་རྒྱལ་སྤྱིར་གསལ་སྟོན་ཆེད་ངོ་རྒོལ་སྤེལ་བ་ཞིག་ཡིན་འདུག
པུར་སྒམ་གདན་ཞུ་གྲུབ་མཚམས་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་མྱ་ངན་གུས་འདུད་ཀྱི་ངག་བཅད་སྐར་མ་གཅིག་རིང་གནང་བ་དང་། དེ་རྗེས་ལས་འགུལ་བ་ཚོའི་ལག་པ་ནས་ཁྲག་འཐེན་དེ་རས་དཀའ་པོ་ཞིག་གི་སྟེང་ཉེ་ཆར་རྒྱ་གཞུང་གིས་ལོ་གཉིས་ཀྱི་རྗེས་སྲོག་ཐོག་གི་ཁྲིམས་ཆད་བཏང་བའི་བློ་བཟང་དཀོན་མཆོག་གི་མིང་བྲིས་ཏེ། རྒྱ་གཞུང་གི་དྲང་བདེན་མེད་པའི་སྲིད་ཇུས་ལ་ངོ་རྒོལ་དང་། བློ་བཟང་དཀོན་མཆོག་གིས་གཙོས་པའི་ཚེ་སྲོག་དང་དུས་ཡུན་འདྲ་མིན་གྱི་ཁྲིམས་ཐག་བཅད་པའི་བོད་མི་ཚོར་གདུང་སེམས་མཉམ་བསྐྱེད་ཡོད་པའི་མཚན་རྟགས་འགོད་གནང་ཡོད་འདུག ལས་འགུལ་མགོ་འཛུགས་གནང་སྐབས་སློབ་མ་ཚོས་པུས་མོ་བཙུགས་ཏེ་ཆུ་ཚོད་༡ གི་རིང་མྱ་ངན་དང་གུས་འདུད་མཚོན་ཐབས་གནང་ཡོད་པ་རེད།
ལོ་གསར་ཚེས་གཅིག་གི་དགོང་དྲོ་ཆུ་ཚོད་༥ བའི་སྟེང་མག་ལོར་རླངས་འཁོར་འབབ་ཚུགས་ནས་འགོ་འཛུགས་ཀྱིས་མར་མེ་ཁྲོམ་སྐོར་དང་། ཕྱི་ཚེས་༢ ཉིན་གྱི་ཞོགས་པའི་ཆུ་ཚོད་༡༡དང་ཕྱེད་ཀའི་སྟེང་དཔའ་བོའི་རྡོ་རིང་ནས་འགོ་འཛུགས་ཀྱིས་ཁྲོམ་སྐོར་གནང་རྒྱུ་སོགས་རེད་འདུག མར་མེ་ཁྲོམ་སྐོར་དང་ཁྲོམ་སྐོར་བཅས་སུ་མི་མང་མཉམ་ཞུགས་ཡོང་བར་འབོད་སྐུལ་ཤུགས་ཆེར་གནང་བཞིན་ཡོད་འདུག