རྟོག་གེ་པའི་མིག་ནང་གི་ཆོས་ལུགས་ཀྱི་འཇིག་རྟེན་ཞེས་པའི་སྐོར། ཧི་མ་ལ་ཡའི་འཕྲུལ་སྨྱུག

རྟོག་གེ་༼ཞེས་༽པའི་༼ཚིག་དོན་དེ་ནི། བོད་རྒྱ་ཚིག་མཛོད་ཆེན་མོ་ལས། དངོས་པོའི་གནས་ལུགས་ཇི་བཞིན་མ་མཐོང་བར་རྟོག་དཔྱོད་ཀྱི་རྗེས་སུ་འབྲང་མཁན་གྱི་རིག་པ་སྨྲ་བ་པོ་ཞེས་པ་ལྟར། རྩོམ་པ་པོ་ཚ་སྒང་བ་བློ་གྲོས་དཔལ་ལྡན་རང་གི་༽མིག་གི་༼ནང་དུ་ནང་༽ཆོས་༼ནས་གསུངས་པའི་གནས་༽ལུགས་ཀྱི་༼ཚིག་དོན་རྣམས་ཇི་ལྟ་བ་བཞིན་མ་རྟོགས་པའམ་གཡོ་ཟོལ་གྱིས་རྣམ་པ་བསྟན་པར་བརྟེན། ཕྱོགས་ལྷུང་རྟོག་དཔྱོད་ཀྱི་རྗེས་སུ་འབྲང་སྟེ།༽ འཇིག་རྟེན་༼འདིར་མཁས་རློམ་གྱི་དཔྱད་བརྗོད་གང་སར་སྤེལ་ཟིན་པ་ནི། མིག་ལྡན་གཡང་གཟར་དུ་མཆོང་བའི་ངང་ཚུལ་དེ་ཡང་རིམ་བཞིན་གསལ་བར་འགྱུར་ལ།

 འགྲེལ་ཚུལ་རྣམ་པ་གཞན་དུ་ན། དེང་འདིར་སངས་རྒྱས་པའི་རྗེས་འཇུག་ཕལ་མོ་ཆེ་ནས། ཐེག་པ་ཆེ་ཆུང་གསང་སྔགས་དང་བཅས་པའི་ནང་ཆོས་ཀྱི་གནས་ལུགས་རྣམས་ཇི་ལྟ་བ་བཞིན་རང་རྒྱུད་ལ་མ་སྦྱར་ཏེ།༽ རྟོག་གེ་པའི་༼ཤན་ཤུགས་སྒེར་གཅོད་བསམ་བློ་བེད་སྤྱད་དྲག་པར་བརྟེན། ཚ་སྨྱུག་པས་དམིགས་འབེམ་བཀར་ཡུལ་གཙོ་བོ་ནི། (ཆོས་ལུགས་དེ་ཆོས་ལུགས་ཀྱི་ཚད་དུ་མ་གཞག་པར། དངོས་ཡོད་ཀྱི་འཇིག་རྟེན་ཡོད་ཚད་ཆོས་ལུགས་ཀྱི་ཁ་འོག་ལག་འོག་ཏུ་འདུ་དགོས་པར་འདོད་པའི་རང་རེའི་རྒྱུད་ཀྱི་ཐལ་མཐའི་བསམ་བློ་འདི་ཡོ་བསྲང་བྱ་རྒྱུ་ཁ་ཚ་དགོས་གཏུག་ཡིན་པ་དང༌། རང་ཉིད་ཆོས་དད་ཆེ་མདོག་གིས་མི་གཞན་པའི་ཆོས་དད་ཀྱི་དབང་ཆ་བཙན་འཕྲོག་བྱེད་མཁན་གྱི་ཆོས་ལུགས་སྒེར་གཅོད་ཀྱི་མི་སྣ་དེ་ཚོའི་མགོ་ལ་སྟ་རེ་ཞིག་མ་བཞུས་ན་ཐབས་མེད་རེད་འདུག་པས་ཡིན)། ཞེས་པ་དང༌། (སངས་རྒྱས་ཆོས་ལུགས་ལ་སྒེར་གཅོད་ཀྱི་རང་གཤིས་མེད་པ་བདེན་ན། སོ་སོའི་བསམ་ཚུལ་ཤོད་མཁན་གྱི་མི་རེ་གཉིས་རིག་མ་ཐག ཆོས་པ་ཚོའི་ངོ་གདོང་དེ་ཇ་མཛོ་བཅོ་བརྒྱད་ཆུ་ལ་ཤོར་སོང་བ་ལྟར་ཅི་ལ་ལོག་འགྲོ་བ་རེད)། ཅེས་པ་བཞིན། སྐབས་དེ་དང་དེའི་ཆེན་པོར་རློམ་པ་ཚོའི་༽མིག་༼གི་༽ནང་གི་༼རྒྱ་མོ་བཞིན་མངོན་ཐོན་གྱི་གཅེས་སྤྲས་མཛད་ས་ནི། སོ་སོའི་༽ཆོས་ལུགས་༼དང་དགོན་པ་བླ་བྲང་བྱེ་བྲག་པ་རྣམས༽ཀྱི་༼ཁ་ལྕེ་དབང་ཐང་ཁོ་ནར་གཟིགས་པ་ཞིག་ཡིན་པའི་རྒྱུ་མཚན་ཡང༌། (ང་ཚོའང་མི་ལུས་བླངས་ཚར་བས་མི་ཚེ་སྐྱེལ་སྟངས་ཀྱི་རིག་གཞུང་ཞིག་ཅི་ལ་མི་མཁོ། ཡིན་ནའང་ང་ཚོ་ཆོས་ལུགས་ཀྱིས་བཟི་དྲགས་པས་ཡར་མར་གང་ལ་ཡང་བསམ་བློ་མ་བཏང་བར་ད་ལྟའི་བར་དུ་ནག་ཐོམ་མེར་ལུས་སོང་བ་རེད)། ཅེས་པ་ལ་བགམ་ན།༽ འཇིག་རྟེན་༼འདིར་མཉམ་སྡོད་མཉམ་གནས་ཀྱི་འཚོ་སྡོད་བྱེད་བཞིན་པའི་ཡར་ཐོན་གྱི་རྒྱལ་ཁབ་ཁག་ལྟར་གོམ་པ་མདུན་སྤོས་ས་འདྲ་འདྲ་དང༌། གནམ་མཉམ་མཉམ་སྤྱོད་མ་ཐུབ་པའི་སྐྱོ་གནས་ཤིག་གླེང་བར་མངོན་ནོ།།༽