བོང་སྟག་རིལ་ལུའི་སེམས་ཁུག་ཞིག་གླེང་བ།
འབྲོང་ཕྲུག
བོང་སྟག་རི་ལུས་དཔེ་དེབ་ཅིག་པར་བསྐྲུན་བྱ་རྩིས་ཡོད་པའི་ཁ་པར་དེ་ཟླ་བ་བཞི་ལྔ་ཞིག་གི་ཡར་སྔོན་ལ་སླེབས་བྱུང་ལ། ཟླ་བ་བཞི་ལྔ་ཞིག་གི་རིང་ལ་བདག་གིས་ཀྱང་འབོལ་རྩོམ་དང་སྙན་ངག་བསྡུས་པའི་དཔེ་དེབ་ཅིག་གི་མ་ཕྱི་བསྒྲིགས་ཟིན། དུས་ཚོད་འདིའི་ནང་དུ་ང་ལ་སེམས་ཁུར་ཞིག་ཡོང་པ་ནི་ངས་ཀློག་མཁན་དག་གི་འདོད་བློ་བསྐོང་ཐུབ་མིན་དེ་རེད། བར་སྐབས་འདིར་བོང་སྟག་རི་ལུས་རྒྱང་རིང་ནས་ང་ལ་སེམས་ཁུར་ཞིག་བསྐུར་ཡོང༌།
དུས་རྒྱུན་པར་རང་གི་ཀློག་མཁན་དག་གི་འདོད་བློ་བསྐོང་རྒྱུ་དེ་ཆུང་མ་དང་བུ་ཆུང་གི་འདོད་བློ་བསྐོང་རྒྱུ་ལས་ཀྱང་གལ་ཆེ་བར་བསམ་ན་ཡང༌། ཞིབ་འདང་རེ་བརྒྱབ་ན། ངས་ད་དུང་གཞན་སུ་ཞིག་གི་འདོད་བློ་ཡང་བསྐོང་ཐུབ་ཀྱིན་མི་འདུག འོན་ཀྱང་བོང་སྟག་རི་ལུ་ང་དང་མི་འདྲ་སྟེ། ཁོས་རང་ཉིད་ཀྱིས་བཤད་པ་ནང་བཞིན་ཁོའི་ཀློག་མཁན་གྱི་གྲས་སུ་མཐོ་བ་དཔོན་པོ་དང་མཁས་པ་ཡོད་ལ། དམའ་བ་ཡིག་རྨོངས་པ་སེལ་བར་བརྩོན་ཞིང༌། ཁོའི་སྙན་ངག་གིས་སྒྱུ་རྩལ་གྱི་ཕོ་བྲང་བཞེངས་བར་བྲེལ་བ། ཁོའི་འབོལ་རྩོམ་གྱིས་རྟོགས་སད་ཀྱི་དུང་བརྡ་འབུད་པར་རྔམ་པ་བཅས་ཀྱིས་མཚོན་ནུས་པ་དེའོ།།
དེ་ཐེངས་རྒྱལ་སྤྱིའི་རིག་གནས་དཔེ་སྐྲུན་ཁང་ནས་པར་བསྐྲུན་བྱས་པའི་༼སེམས་ཀྱི་ཁུར་བོ༽ ཅེས་པའི་དཔེ་དེབ་འདི་ནི། ན་གཞོན་སྙན་ངག་པ་བོང་སྟག་རི་ལུའི་༼ང་རང་ངོ་མ་འཚོ་འདོད༽ དང་༼ཤ་ཚ་བའི་གཏམ་ལ་སྙན་མོ་མེད༽ ཅེས་པ་གཉིས་ཀྱི་འཕྲོར་བརྩམས་གྲུབ་བྱུང་བའི་དཔེ་དེབ་གསུམ་པ་ཡིན་ལ། འདིའི་ནང་དུ་རྩོམ་པ་པོས་ཉེ་བའི་ལོ་འདི་གའི་རིང་ལ་བརྩེ་དུང་དང་བྱ་བཞག འཚོ་གནས་བཅས་སུ་སེམས་ཁུར་བྱས་པའི་གནད་དོན་ཁ་ཤས་སྟེ། ༼ལུག་རྫི་བུ་མོ༽ དང་༼ཉིན་གཅིག་གི་ལུག་རྫིའི་ཟིན་ཐོ༽༼སྒྲོལ་མར་ཕུལ་བའི་སྙན་ངག༽༼ང་དང་ངའི་རོ་སྒམ༽༼སྙན་ངག་འདི་འདྲ་མི་འབྲི་ག་མེད་བྱུང་སོང་༽བཅས་ཀྱིས་མཚོན་པའི་སྙན་ངག་དང་༼ང་ཚོ་སྐྲག་དགོས་ས་དེ་འདྲེ་མ་རེད༽ དང་༼མི་རིགས་ཀྱི་འདུ་ཤེས་མེད་པའི་ཕྱི་རབས་པ་ཚོ༽༼སྙིང་རྗེ་སྐྱེ་འོས་པའི་ལུ་གུ་ཆུང་ཆུང་༽༼རང་སྐྱོན་ངོས་ལེན༽༼དཔེ་ཆ་མི་དགོས་པའི་དཔེ་ཆ་བ་ཚོ༽བཅས་ཀྱིས་མཚོན་པའི་འབོལ་རྩོམ་གྱིས་གྲུབ་ཡོད་པས། རྩོམ་པ་པོའི་སྐད་ཆ་གཅིག་ནང་བཞིན་༼དགོད་སྤྱད་དགོད་སྤྱད་ཅིག་ལ་དེའི་ནང་ན་ད་དུང་གོ་རྒྱུ་ཞིག་ཀྱང་ཡོད༽འདུག
ངས་དཔེ་དེབ་བཀླགས་མ་ཚར་གོང་དུ་དགེ་གྲོགས་ཞིག་གིས་གཡར་སོང་ནས་མགོ་ནས་མཇུག་བར་ཐེངས་གཅིག་བཀླགས་རྗེས་སེམས་འགུལ་ཆེན་པོས། བོང་སྟག་རི་ལུ་ཟེར་བ་ར་དཻ་བུ་ངར་བ་ཞིག་རེད་ཅེས་བཤད་སོང་ལ། ཆུང་མས་ཀྱང་ཚར་གཅིག་བལྟས་རྗེས་ཞི་ལི་འདིས་སྐྱིད་པོ་དག་བཤད་ཡོང་ཁུ་ཟེར། སྤྱིར་བཏང་གི་སྐད་ཆ་འདི་གཉིས་ཀྱིས་ངས་བོང་སྟག་རི་ལུར་བརྗོད་དགོས་པའི་སྐད་དེ་དག་སྤྱི་བསྡོམས་བྱས་ཟིན་པས་ན། ངས་བརྗོད་འདོད་པ་ནི། གྲོགས་པ་ལགས། བུ་ངར་གི ད་དུང་མུ་མཐུད་དུ་སྐྱིད་པོ་ཏག་ཏག་འབྲི་དགོས། ཞེས་པ་ནི་ཁ་མིན་ཁོག་གི་སྐད་ཆའོ།།
སྐུ་ཞབས་བོང་སྟག་རི་ལུའི་རྩོམ་དེབ་<>ཞེས་པ་དེ་ཉིག་ཡོར་ལ་རྩེ་དཔེ་མཛོད་ཁང་དུ་བལྟ་རྒྱུ་ཡོད་དམ།