རྔ་བ་རྒྱལ་ཁམས་པ།
—————
ཆེད་བརྗོད།
ཚན་འཕྲུལ་གྱི་བྱ་དངོས་ཡར་རྒྱས་ཕྱིན་པ་ལ་བརྟེན་ནས། ང་ཚོའི་འགྲོ་འདུག་སྤྱོད་གསུམ་གྱི་འཚོ་བའི་ཆ་ཤས་མང་བོ་ཞིག་གི་ཐད། སྟབས་བདེའི་མཐུན་རྐྱེན་གང་ལེགས་འཛུགས་སྐྲུན་བྱེད་ཐུབ་པ་བྱུང་ཡོད། ལྷག་པར་རྡོ་སྣུམ་བཀོལ་སྤྱོད་བྱེད་པའི་འཕྲུལ་ཆས་རིགས་དང་། ྐློག་ྐླད། རྡུལ་ཕྲན་གྱི་ནུས་པ་སོགས་གསར་གཏོད་བྱས་པ་ལས། སའི་གོ་ལའི་ཁྱོན་འདི་ཙམ་དུ་མ་ཟད། ཟླ་བ་སོགས་གཟའ་སྐར་གཞན་གྱི་ཐོག་འགྲོ་བསྐྱོད་ཐུབ་པའི་འགྲིམ་འགྲུལ་གྱི་ནུས་པ་གོང་ནས་གོང་དུ་སྤེལ་བཞིན་ཡོད། གཅིག་བྱས་ན། འབྱུང་འགྱུར་གྱི་དུས་རབས་ངེས་ཅན་ཞིག་གི་མཚམས་ནས། རང་ཅག་གི་མཁའ་དབྱིངས་དགུ་ཚུགས་ཀྱི་ངོགས་ན། ཁྱུ་ཚོགས་བྱས་པའི་གཟའ་སྐར་གྱི་གོ་ལའི་འཇིག་རྟེན་དུང་ཕྱུར་མང་བོ་ཡོད་པ་དེ་དག་ཀྱང་། ད་ལྟ་རང་རེས་སའི་གོ་ལའི་ཤར་ལྷོ་ནུབ་བྱང་གི་བར་འགྲིམ་འགྲུལ་བྱེད་བཞིན་པ་ནང་བཞིན། ཕན་ཚུན་ཐུག་ཕྲད་བཟང་ངན་གང་རུང་གི་འབྲེལ་ལམ་འཛུགས་སྲིད་པའི་དུས་ཤིག་ཤར་ལས་ཆེ། དེང་སང་ཚན་རིག་པ་དག་གིས་བྱ་དངོས་གང་རུང་ཞིག་གི་ཐོག་བརྟག་ཞིབ་བྱས་ཏེ། བདུན་ཕྲག་རེའི་ནང་དུའང་དངོས་རིགས་རྙེད་སོན་བྱུང་བའི་གསར་འགྱུར་ངོ་མཚར་ཅན་མང་བོ་ཞིག་མཐོང་རྒྱུ་ཡོད། འདས་པའི་དུས་རབས་མང་བོ་ཞིག་གི་ནང་། དངོས་ཁམས་རིག་པ་གཙོ་བོར་གྱུར་པའི་ཚན་རིག་གི་ཁྱབ་ཁོངས་མང་བོ་ཞིག རང་བཞིན་མཚན་ཉིད་རིག་པའི་ཆ་ཤས་གཙོ་བོ་ཞིག་ཏུ་ངོས་འཛིན་མཛད་ནས། ཨ་རེ་སི་ཁྲོ་ཁྲལ་དང་། ཕི་ལེ་ཁྲོ་སོགས་གནའ་རབས་ཀྱི་མཚན་ཉིད་པ་ཆེན་མོ་དག་གིས་གཏན་ལ་ཕབ་པ་ལྟར། རོ་མན་ཀ་ཏོ་ལིག་གཙོ་བོར་གྱུར་བའི་ཆོས་བརྒྱུད་མང་བོ་ཞིག་གིས་རང་རང་གི་ལྟ་གྲུབ་ཀྱང་། མཁས་པ་དེ་དག་གི་ལྟ་ཚུལ་དང་གང་མཐུན་མཐུན་གྱི་ལམ་ནས་འགྲེལ་བཤད་བྱས་ཡོད། དུས་རབས་བཞི་ཡས་མས་ཤིག་གི་སྔ་རོལ་ནས། ད་ལྟའི་ཨི་ཏྲ་ལིའི་རྒྱལ་ཁབ་ཀྱི་གྲོང་ཁྱེར་རོམ་ནི། འཛམ་གླིང་རོ་མན་ཀ་ཏོ་ལིག་ཆོས་བརྒྱུད་ཀྱི་ལྟེ་བ་ཡིན་པ་ལྟར་ད་ལྟའང་ཡིན་ལ། སྐབས་དེའི་ཡི་ཤི་གཙུག་ལག་ཁང་གི་དབང་འཛིན་པ་རྣམས། སྤྱི་ཚོགས་དེའི་ཉིན་རེའི་འཚོ་བའི་ནང་དབང་ཤུགས་ཧ་ཅིང་ཆེན་པོ་ཡིན་རྐྱེན། གལ་ཏེ་ཚན་རིག་གམ་ཚན་རིག་སྐོར་གྱི་དྲི་བ་གང་ཞིག་བཏོན་ཚེ། ཁོང་ཚོར་ཁ་ཐད་བྱས་པའི་ཉེས་མིང་བསྒྲགས་ཏེ་སྲོག་ཐོག་གཏོང་བའམ། ཡང་ན། ཚེ་བཙོན་བྱས་པའི་གནས་ཚུལ་ཐབས་སྐྱོ་བོ་མང་བོ་ཞིག་བྱུང་ཡོད། རྩིས་དང་། དངོས་ཁམས། གནམ་རིག་བཅས་ལ་མཁས་པར་གྲགས་པའི་གནའ་བོའི་ཨི་ཏྲ་ལིའི་ཚན་རིག་པ་ཆེན་པོ། སྐུ་ཞབས་དགའ་ལི་ལེའོ་མཆོག་ཕེབས་ནས། སྐབས་དེར་ཆོས་སྲིད་གང་ཞིག་གི་བཀའ་རྒྱ་ཡོད་མེན་ལ་མ་ལྟོས་པར། རང་ཉིད་ཀྱི་ལྟ་ཚུལ་གཞི་ལ་བཟུང་ནས། ཚན་རིག་དང་ཆོས་རིག་གི་སྲོལ་རྒྱུན་རིག་གཞུང་ཐོག བསྐྱར་ཞིབ་ཚོད་དཔགས་གཟབ་ནན་བཏང་སྟེ། རྩིས་ཀྱི་རིག་པ་ལ་བརྟེན་ནས་དེ་དག་གི་གྲུབ་དོན་ཐད་ཟབ་སྦྱོང་ལེགས་སྤེལ་ཉེས་འགོག་གི་དགོངས་པ་གང་མང་ཞིག་བཏོན་ཞིང་། སའི་གོ་ལ་འདི་བཞིན་འཇིག་རྟེན་གྱི་ལྟེ་བ་འཕོ་འགྱུར་བྲལ་བ་ཞིག་མ་ཡིན་པར། དེ་ཉིད་ཀྱིས་ཉི་མའི་གོ་ལར་སྐོར་བཞིན་ཡོད་ཚུལ་གསལ་བརྗོད་བྱས་པས། རོ་མན་ཀ་ཏོ་ལིག་ཆོས་བརྒྱུད་ཀྱི་མཚང་ལ་ཕོག་སྟེ། ཁོང་གི་སྐུ་ཚེ་ཧྲིལ་བོ་བཙོན་ཁང་ནས་བསྐྱལ་དགོས་པའི་གནས་ཚུལ་སྐྱོ་བོ་དེ་འདྲ་བྱུང་ཡོད། སྐུ་ཞབས་དགའ་ལི་ལེའོ་མཆོག་ནི་རྒྱང་ཤེལ་ལ་བརྟེན་ནས་མཚན་མོར་ནམ་མཁའི་གོ་ལར་གཟིགས་རྟོགས་ཉམས་ཞིབ་གནང་མཁན་གྱི་ཚན་རིག་པ་ཐོག་མ་དེ་ཡིན་ཞེས་གྲགས་ལ། ཁོང་གིས་བརྟག་དཔྱད་བརྒྱུད་གཟའ་སྐར་གྱི་བཀོད་དབྱིབས་སྣ་ཚོགས་པ་ཞིག་གསར་རྙེད་བྱུང་བ་མ་ཟད། ཁོང་རང་ཉིད་ལས་སྔ་ཕེབས་ཀྱི་སྲོལ་རྒྱུན་བསམ་བློའི་ར་བ་ལས་ཆེས་ཆེར་བརྒལ་ཏེ། ཚན་རིག་གི་རིག་པའི་བགྲོད་ཕྱོགས་ཀྱི་ལམ་ཁ་གསར་བ་ཞིག་རྩ་འཛུགས་ཡར་རྒྱས་ཕྱིན་པ། ང་ཚོའི་ད་ལྟའི་ཚན་རིག་མདུན་བསྐྱོད་ཀྱི་གོམ་ཁ་དང་མེད་ན་མི་འབྱུང་གི་འབྲེལ་བ་དམ་པོ་ཞིག་ཆགས་ཡོད། ལར་ནས་སྤྱི་ལོའི་སྔོན་གྱི་ལོ་༣༨༤ནས༣༢༣ནང་ཕེབས་པའི་གནའ་བོའི་དགུ་རིག་གི་མཚན་ཉིད་པ་ཆེན་པོ། སྐུ་ཞབས་ཨ་རེ་སི་ཁྲོ་ཁྲལ་མཆོག་གི་དགོངས་པ་ལྟར་གྱི་༼རང་བཞིན༽དང༼རང་བཞིན་མ་ཡིན་པའི༽གཡོ་འགུལ་གྱི་ཆོས་ཉིད་གཉིས་ཀྱིས། འདས་པའི་མི་ལོ༡༨༠༠ལྷག་གི་རིང་། ཚན་རིག་གི་བསམ་བློའི་ལྟེ་བའི་སྲོག་གནད་ལྟ་བུ་ཞིག་བཟུང་འདུག་ཅིང་། དེ་ཉིད་ཀྱིས་འདོད་པའི་༼རང་བཞིན་གྱི་ཆོས་ཉིད༽ཅེས་པའང་། དངོས་རིགས་གང་ཞིག་ཡང་ན་ཡར་ལ་འཕགས་པའམ། ཡང་ན་མར་ལ་ལྷུང་བ་སྟེ། དཔེར་ན། རྡོ་རིགས་ལྟ་བུ་རང་བཞིན་གྱིས་མར་ཐང་དུ་ལྷུང་བ་དང་། དུ་བ་ལྟ་བུ་རང་བཞིན་གྱིས་ཡར་གྱེན་དུ་འཕགས་ངེས་ཡིན་ཚུལ་རྒྱུ་མཚན་བཅས་འགྲེལ་བཤད་མཛད་ཅིང་། ༼རང་བཞིན་མ་ཡིན་པའི་གཡོ་འགུལ་གྱི་ཆོས་ཉིད༽ཅེས་པའང་། འགུལ་བསྐྱོད་གང་ཞིག་དངོས་པོ་གང་ཞིག་གཡོ་འགུལ་བྱས་པ་ལས་བྱུང་བ་སྟེ། དཔེར་ན། རྡོ་ཞིག་ཐད་ཀར་འཕངས་ན་ཐང་དུ་ལྷུང་འགྲོ་བའི་འགུལ་བསྐྱོད་ལྟ་བུ་ཞིག་ཡིན་པར་སྣང་ལ། ཁོང་གིས་གཟའ་སྐར་རྣམས་གཅིག་གིས་ཅིག་སྐོར་བཞིན་ཡོད་པའི་གཡོ་འགུལ་གྱི་རང་བཞིན་དེ། དུས་ནམ་ཡང་འགྱུར་ལྡོག་བྲལ་ཞིང་ཕུན་སུམ་ཚོགས་པ། ང་ཚོའི་གོ་ལ་འདིའི་ཐོག་གི་གཡོ་འགུལ་དང་གཏན་མི་འདྲ་བ་ཞིག་ཡིན་པར་བཤད་ཅིང་། སྐུ་ཞབས་དགའ་ལི་ལེའོའི་སྐབས་སུ་ལྟ་ཚུལ་དེ་བཞིན་རོ་མན་ཀ་ཏོ་ལིག་ཆོས་བརྒྱུད་ཀྱིས་འདོད་པ་ལྟར་གྱི་འཇིག་རྟེན་དཀོན་མཆོག་གིས་བཀོད་པ་དང་། གཟའ་སྐར་རྣམས་དེ་ཉིད་ཀྱི་ཕུན་སུམ་ཚོགས་པའི་འཕྲིན་ལས་ཀྱི་བཀོད་པ། དུས་དང་ནམ་པ་ཀུན་ཏུ་འགྱུར་ལྡོག་མི་ཐུབ་པ་ཞིག་ཡིན་པ་དང་། འགྲོ་བ་མིའི་རྐྱེན་ལས་ས་གཞི་འདིའི་ཐོག་གི་ཆོས་རྣམས་དེ་ལྟར་མ་ཡིན་པར། རང་བཞིན་མ་ཡིན་པའི་གནས་ཚུལ་མང་བོ་ཞིག་འབྱུང་གི་ཡོད་པར་བཤད་པའི་ལྟ་ཚུལ་དང་ཡང་ཧ་ཅིང་མཐུན་པོ་ཡིན་པར་གྲགས་ལ། དགའ་ལི་ལེའོ་མཆོག་གིས་རང་གི་ལྟ་ཚུལ་དང་། ཚན་རིག་གི་རིག་པའི་གཞུང་ལུགས་འཐད་ལྡན་གཉིས་དཔངས་པོར་བཙུགས་ཏེ། འདོད་ཚུལ་དེ་དག་ལ་དགག་བཞག་སྤོང་གསུམ་གྱི་སྤྲོས་པ་རྒྱ་ཆེར་བསྐྱངས་འདུག་གོ་ མུ་འགོད།
བཀྲ་ཤིས་བདེ་ལེགས། མུ་མཐུད་དུ་སྤེལ་རོགས
དྲ་རྒྱ་འདིའི་སྟེང་ནས་མི་རེ་གཉིས་ཞིག་གིས་ཁ་གཡར་ལྕེ་གཡར་ཞིག་ལ་ཁག་བཞག་ནས་གྲུབ་མཐའི་ལ་རྒྱ་ཡོད་མདོག ཕུ་ནུའི་ཤ་ཞེན་ཆེ་མདོག་གིས་མི་གང་མང་མང་ཞིག་འུར་སྒྲོགས་ངན་བསྐུལ་བྱས་ཏེ་ཁ་ལ་ཇི་བྱུང་གིས་སྐྱེས་ཆེན་དམ་པ་རྣམ་ལ་སྐུར་འདེབས་བྱས། ལག་ཏུ་ཇི་བྱུང་གི་རྩོམ་ཡིག་ཐ་ཐོར་རེ་འབྲི་ཁུར་གྱིས་རང་འདྲོག་གཞན་དཀྲོག་གི་འུར་ལངས་ཏེ་ཉལ་གཉིད་མ་ཁུག འགྲོ་འདུག་མ་བདེ། རང་ངོ་མ་ཟིན། གཞན་ངོ་མ་ཤེས་ཇི་ཟེར་འདི་ཟེར་མེད་པ་རང་གིས་རང་ལ་ཅ་སུན་པོ་བཟོས་ནས་སྤུ་ཟེང་ངེ་ཡོད་པའི་སྐབས་འདིར།
རྔ་བ་རྒྱལ་ཁམས་པ་ཞུ་བ་ཁོང་གིས་གཞན་སྐྱོན་མ་གླེང་རང་བསྟོད་མ་བྱས་ཐུགས་ལྷོད་ལྷོད་དུ། ཕྱི་གླིང་པའི་ཚན་རིགས་པ་དང་མཚན་ཉིད་རིགས་པ་པ་སོགས་མི་སྣ་གྲགས་ཅན་གང་མང་ཞིག་གི་བྱུང་རིམ་ལོ་རྒྱུས་སོགས་དང་སྙན་ཚིག་སོགས་ཀྱིས་ཡིད་གཡོས་ཏེ་ངས་རྩམ་པ་དཀར་པོ་དང་མཉམ་དུ་སླར་ཡང་མུ་མཐུད་དུ་རེ་བསྐུ
ཡང་སྙིང་རྔ་བ་རྒྱལ་ཁམས་པ་ཟེར་བ་ཁོང་སུ་ཡིན་ནམ། ཁོང་གིས་བསྒྱུར་རྩོམ་སྣ་མང་སྤེལ་བར་ལེགས་གསོལ་ཡོད། འོན་ཀྱང་གཞན་གྱི་དྲི་མཆན་ལ་ལན་འདེབས་མེད་སྟབས་ཀློག་པ་པོའི་རྨོངས་དོགས་བསལ་རྒྱུར་ཕན་རླབས་ཆུང་བས་བློ་ཕམ་ཡོད། ཡིན་ནའང་ནུབ་ཕྱོགས་མི་ཁོམ་པའི་མཐའ་གླིང་ཞིག་ནས་རྒྱལ་ཁམས་པ་ཁོང་གིས་སྨྱུག་ཁ་ཕ་ས་གངས་རི་ལ་གཏད་པ་ནི་མ་ཡུམ་གངས་སེང་དཀར་མོའི་འོ་རིན་ཞིག་ལོས་ཡིན།
Hello! I want to thank you for your comments and I am feeling very regretful that I cannot respond your questions directly since I use the TCRC font. How ever, I will keep your recommendations in my heart.
Thank you once again. Tashi delek!