མིག་ཆུ། བློ་བཟང་ཡེ་ཤེས།

ཕྱི་ལོ་ ༢༠༡༣   ཟླ་ ༡ ཚེས་ ༩ ཉིན་གྱི་མགྱོགས་བྲིས།

ཕྱི་ལོ་ ༢༠༡༣   ཟླ་ ༡ ཚེས་ ༩ ཉིན་གྱི་ཕྱི་དྲོར།    སྙིང་རླུང་ཆེན་པོ་ཞིག་གིས་བཏེགས་ཏེ།   དྲན་གདུང་གི་ཚོར་བ་གཅིག་རྗེས་གཉིས་མཐུད་དུ་རི་གཟར་གྱི་རྦབ་རྡོ་ལྟར་འགྲིལ་བྱུང་བས།   ཁང་སྒོ་གཏན་རྒྱུ་ཡང་གཏིང་བརྗེད་དུ་གྱུར་ཏེ།   ལམ་སང་རླངས་འཁོར་བསྐོར་ནས་ཐད་ཀར་མཛེས་སྡུག་ལྡན་པའི་སྤྱི་གླིང་ཆུང་ཆུང་དེར་བཞུད།   མཚོ་འགྲམ་གྱི་རྐུབ་སྟེགས་རིང་པོ་དེའི་ཐོག་བསྡད་ནས་བསམ་གཞིགས་ཀྱི་གྲོང་ཁྱེར་ཉུལ་མགོ་བརྩམས།  

གསལ་ལ་མི་གསལ་བའི་སེམས་ངོགས་སུ་ལང་ཚོ་མ་ཞིག་གིས།  ལ་རིང་ནག་པོ་ཞིག་གྱོན་ཏེ་རྐུབ་སྟེགས་རིང་པོ་དེའི་ཐོག་བསྡད་ནས།   རིང་ཐུང་རན་པའི་ནག་སྣུམ་གྱི་སྐྲ་ལོ་ལག་པས་བྱུག་བཞིན།   ཕོ་བརྒྱའི་སེམས་པ་དབང་མེད་དུ་འཕྲོག་པའི་དཀྱུས་རིང་མིག་ཟུང་གིས་མཚོ་ཆུང་དེར་བལྟས་ནས་ཅི་ཞིག་འཚོལ་བཞིན།  ཅི་ཞིག་ལ་རེ་སྒུག་བྱེད་བཞིན་བསྡད་འདུག  བསིལ་རླུང་འཇམ་པོ་ཞིག་གིས་ལང་ཚོ་མའི་ལུས་ཀྱི་དྲི་བསུང་ཡོད་ཚད་ཁྱེར་ཏེ་ངའི་ཕྱོགས་སུ་གཏོར་བས།   ལྷན་སྐྱེས་ཀྱི་དྲི་ངད་ལྡང་བའི་མཁའ་རླུང་དེ་རྔུབ་ཐེངས་གཅིག་གིས་མུད་ཅིང་།   ལུས་སེམས་ཀྱི་ཚོར་ཤུགས་ཡོད་ཚད་ལང་ཚོ་མ་དེའི་ཕྱོགས་སུ་གཏད།

ངའི་མདུན་གྱི་མཚོ་ཆུང་དེའི་ནང་དུ་གྲུ་གཟེངས་ཆུང་ཆུང་གཅིག་ལས་གཞན་ཅི་ཡང་མེད་ལ།  ཁོར་ཡུག་ཡོད་ཚད་སྟོང་འཇག་གེར་འདུག    གྲུ་གཟེངས་དེའི་ནང་དུ་ཁྱོ་ཤུག་གམ་ཡང་ན་དགའ་རོགས་ཕོ་མོ་གཉིས་ཀྱིས་ལྷང་ལྷང་གི་དགོད་སྒྲའི་ཁྲོད་གྲུ་ཆུང་དེ་ཁ་ལོ་སྒྱུར་བཞིན་ངའི་ཉེ་སར་སླེབས།   ང་དང་རྐུབ་སྟེགས་གཅིག་གི་ཐོག་བསྡད་ཡོད་པའི་ལང་ཚོ་མ་དེས་དལ་ལ་རིང་བའི་ཤུགས་རིང་ཞིག་འཐེན་བཞིན་ཡར་ལངས་ཏེ།  གཡོན་ཕྱོགས་ཀྱི་རི་ཆུང་དེའི་ཕྱོགས་སུ་གོམ་ཁ་བསྒྱུར།  ང་ཡང་རང་དབང་མེད་པར་ཡར་ལངས་ཏེ་ལང་ཚོ་མ་དེའི་རྐང་རྗེས་བསྙེགས།

ཡུད་ཙམ་གྱི་རྗེས་སུ་ལང་ཚོ་མ་དེ་ཕྱིར་འཁོར་ནས་ཡང་བསྐྱར་མཚོ་ཆུང་དེའི་ནང་དུ་བལྟས་ནས་འབྲལ་མི་ཐུབ་པ་ལྟ་བུའི་རྣམ་འགྱུར་ཞིག་ཕྱིར་མངོན།   དེ་དུས་ང་དང་ལང་ཚོ་མའི་བར་དུ་ཧ་ལམ་གོམ་པ་གཉིས་གསུམ་ཙམ་ལས་མེད།   ཁོ་མོས་ལག་ཁུག་དམར་སྨུག་ཞིག་ཕྲག་པ་གཡོན་པར་ཁུར་ཞིང་།   ལག་གཡས་པས་སྐེ་དཀྲིས་སྐྱ་བོ་དེ་ཡར་ཅུང་ཟད་འཐེན་པ་དང་མཉམ་དུ་མིག་ཆུ་རྡོག་པོ་གཉིས་ཕྲེང་ཐག་ཆད་པའི་ཤེལ་ཕྲེང་རྡོག་པོ་རེ་རེ་བཞིན་མར་འགྲིལ་ཏེ་དཀར་མདངས་ཆགས་པའི་མཁུར་ཚོའི་བརྒྱུད་པདྨ་ལྟར་དམར་བའི་མཆུ་འདབ་ཏུ་སླེབས།

རིམ་གྱིས་ཉི་མ་ཡང་ལ་ཁར་བསླེབས་ཅིང་།   གྲུ་ཆུང་ནང་གི་གཞོན་དུ་ཕོ་མོ་གཉིས་ཀྱང་གར་སོང་ཆ་མེད་དུ་གྱུར།   བྱ་བྱེའུ་ཚོས་ཀྱང་སྐད་ཅོར་སྒྲོག་བཞིན་སོ་སོའི་ཚང་དུ་ལོག་མགོ་བརྩམས།

ང་ག་ལེར་ཁོ་མོའི་ཉེ་སར་བཅར་དེ་ལག་གཉིས་ཀྱིས།  ཁོ་མོའི་མཆུ་འདབ་ཏུ་ཁྲ་ཆི་ལེར་འཁྱིལ་བའི་མིག་ཆུའི་ཐིག་པ་གཉིས་བླངས་ཏེ་དལ་གྱིས་སྐེ་འཇུ་དྲོན་མོ་ཞིག་བྱས་ནས།  “ཁྱེད་ཀྱིས་ཀྱང་ད་དུང་སྒུག་རྒྱུ་ཡིན་ནམ།”  ཞེས་དྲིས་པས།   ཁོ་མོས་གློ་བུར་དུ།  “མིན།  མིན།    ང་ཁ་སང་ནས་ཕྱིན་ཚར།   འདིར་ཁྱོད་རང་གཅིག་པོ་ལས་གཞན་སུ་ཡང་མེད།   འཇིག་རྟེན་ཐོག་གི་ཆེས་མཛེས་སྡུག་ལྡན་པའི་དངོས་པོ་ནི་དགོང་ཁའི་མཚམས་སྤྲིན་ཡིན།  ལྟོས་དང་”ཟེར།   དག་དག་སེར་མདངས་དང་ཉི་འོད་ཀྱིས་འཁྱུད་པའི་མཚམས་སྤྲིན་གྱིས་བྱང་ཕྱོགས་ཀྱི་ནམ་མཁའ་ཡོངས་སུ་ཁྱབ་འདུག

བལྟས་བལྟས་རིག་རིག་ལ།   ལང་ཚོ་མའི་གཟུགས་བརྙན་འཇའ་ཚོན་བཞིན་རིམ་གྱིས་ཡལ།  བདེན་པ་རེད།  ས་འདིར་ང་གཅིག་པོ་ལས་གཞན་སུ་ཡང་མི་འདུག  སྤྱི་གླིང་འདིར་ང་གཅིག་པོར་ལྷག་འདུག   ང་ད་དུང་ཤིང་སྡོང་ཞིག་ལ་འཐམ་ནས་ལུས་འདུག

མིག་ཆུ།  ངའི་མིག་ཆུ།  ཁྱེད་ཀྱི་མིག་ཆུ།

ཕྱི་ལོ་ ༢༠༡༣ ཟླ་ ༡  ཚེས་ ༩  ཉིན།