འོད་སྣང་དང་མུན་པ། གཅན་འོད་འབར།

མུན་པའི་སྲང་རས་གྱོན་ནས།
སྐར་ཚོགས་ཀྱི་མིག་ཟུང་སྒྲིབ་པའི་མཆོད་མེར་བལྟས།
ཕྱོགས་བཞི་མཚམས་བརྒྱད་ནས་བཞད་ཀྱིན་པའི་འོད་ཀྱི་མེ་ཏོག
སྐྱེས་ཆེན་སུ་ཞིག་གི་ཕྱག་རྗེས་ལས་འཚེར་བ་དང་འདྲ་བར།
ཚོར་བས་མི་ཟིན་པའི་ཚོར་བ་མང་པོ་ཞིག
དད་པའི་མིག་ཟུང་གི་མཆི་མར་གྱུར་ཞིང་།
རེ་བའི་ལག་ཟུང་གི་སྒྲོན་མེར་སྣང་ཡང།
ཁ་མི་གྲགས་པའི་རྩིག་ངོས་ཀྱི་སྐུ་འདྲ་དེས།
མི་རབས་མང་པོ་ཞིག་ལ་སེམས་གསོའི་སྐད་ཆ་མ་བཤད་ལ།
ཞལ་མི་འཛུམ་པའི་མེ་ལོང་གི་གཟུགས་བརྙན་དེས་ཀྱང་།
དུས་ཡུན་རིང་པོ་ཞིག་ལ་བརྩེ་བའི་ལག་བརྡ་བསྟན་མ་བྱུང།
ཡང་སྙིང་འོད་སྣང་ནི་མིག་གོང་གི་གྲིབ་གཟུགས་རབ་རིབ་ཅིག་རེད་ལ།
མཆོད་མེ་ནི་སེམས་ཁོང་གི་སྣང་བརྙན་མག་མོག་ཅིག་རེད།ཁེར་རྐྱང་གི་ཁ་དབུགས་མཐུག་པོར་ཆགས་ཤིང།
མྱ་ངན་གྱི་རླུང་བུ་གྲང་མོར་རྒྱུ་བའི་དོ་དགོང།
མུན་པ་འཐིབས་པའི་ཁང་ཆུང་འདི་ལ།
རྨི་ལམ་སྦྲུམ་པའི་མཛེས་སྡུག་གི་འོད་ཟེར་ཞིག་ཨེ་འཕྲོ་སྙམ།
ལྷིང་འཇགས་ཀྱི་མཚན་ལྗོངས་འདིར།
འོད་ཀྱི་གོང་བུར་འཐིམ་པའི་ཉམ་ཆུང་གི་ཚེ་སྲོག་དག་ལ།
མཐའ་མཇུག་གི་རང་དབང་ཐོབ་པའི་སྨོན་ལམ་ཞིག་རྒྱབ་ཆོག་ཆོག་ཡིན་མོད།
མུན་པའི་ཟོལ་གྱིས་འཐིབ་འོངས་བའི་ཐེ་ཚོམ་ཞིག་གིས།
ལྷ་འདྲེ་སུ་ཞིག་ལ་སྐྱབས་སུ་འགྲོ་དགོས་མིན་ཤེས་མ་སོང་ལ།
བདེན་རྫུན་གང་ཞིག་ལ་ཡིད་ཆེས་དགོས་མིན་ཡང་རྟོགས་མ་བྱུང།
མུན་པར་འཁྱུད་པའི་རྣམ་ཤེས་དེ་ཚོ་དངོས་ནས་སྙིང་རེ་རྗེ་ཨང།

མུན་པ་དང་འོད་སྣང་གཉིས་འདྲེས་མཚམས་སུ་ལངས་དུས།
རང་ལ་མི་དབང་བའི་ལག་པ་ཐུང་ཐུང་འདི་མཁའ་རུ་བརྐྱངས་ནས།
སྐྲ་ལོ་འདི་རླུང་གིས་ཕྱོགས་སུ་བཅུག་ཆོག་པའི་ཡུལ་གྲུ་དེ་གང་ན་ཡོད་དམ་སྙམ་ལ།
རང་ལ་མི་མ་བདག་པའི་མགོ་བོ་ཆུང་ཆུང་འདི་གནམ་ལ་བཏེགས་ཏེ།
ཀི་སོས་རི་ལུང་དཀྲོགས་སུ་བཅུག་ཆོག་པའི་དུས་ཚོད་དེ་ནམ་ཞིག་ཡིན་ནམ་བསམ།
འོད་སྣང་གི་ཚུལ་དུ་ཤར་ཡོང་བའི་མུན་པས་བཤད་ན།
མུན་པ་འདིའི་རྒྱབ་ན་འོད་སྣང་གི་དག་ཞིང་ཞིག་ཡོད་ཟེར།
མུན་པའི་ཟོལ་གྱིས་འཐིབ་འོངས་བའི་འོང་སྣང་གིས་སྨྲས་ན།
འོད་ཟེར་འདིའི་གཞུགས་ན་མུན་པའི་འཇིག་རྟེན་ཞིག་ཀྱང་ཡོད་ཟེར།
གང་ལྟར་མུན་པ་འདིའི་འཐིབ་སྟངས་ལས།
ངས་སུ་ཞིག་གི་ངོ་གདོང་གི་གཉེར་མ་མཐོང་ལ།
འོད་ཟེར་འདིའི་མཆེད་ཚུལ་ལས།
གང་ཞིག་གི་མིག་གོང་གི་མཆི་མ་ཡང་རིག་མ་བྱུང།
༢༠༡༢།༡༢།༩