སྤྲུལ་སྐུ་དབང་ཆེན།
ཁ་བ་ནག་པོའི་བུ་ཡུག །
སྒེའུ་ཁུང་བརྒྱུད་ནས་བརྡོལ་བྱུང་།།
ཉི་མ་དམར་པོའི་ཚེ་སྲོག །
རི་མགོའི་གྲིབ་མས་གཏུབ་བྱུང་།།
གོས་ཡུག་དམར་པོས་བཏུམ་པའི།།
ཤ་སེམས་རྡོ་ལས་འཁྱག་རེད།།
ཙནྡན་ཕྲེང་བ་དཀྲིས་པའི།།
སོར་མོ་ཟངས་ལས་གྲུབ་པ།།
སྤྲིན་པ་ནག་པོས་ཁུར་བའི།།
དུག་རླུང་ཞེ་རྒོད་འཚུབ་པ།།
བཟེ་རེའི་འདོད་རྔམས་ནག་པོས།།
བསམ་པ་གློག་ལས་མྱུར་བ།།
རི་སྤྱང་ལ་ཁའི་སོ་བས།།
བརྩེ་སེམས་ལུག་ཁྱུ་འཚོ་བ།།
གཤེད་མ་ལུས་ལ་གཟན་པས།།
ལག་གཉིས་ཐལ་སྦྱར་ཕྱག་རྒྱ།།
སོ་ལས་ཁྲག་ཞག་འཐུལ་བ།།
བརྩེ་བ་སེམས་ནས་ངོམས་འདྲ།།
ཁ་ནས་མཆིལ་ཞག་འདེབས་པ།།
སྐྱབས་སྦྱིན་དྲིན་གྱིས་སྐྱོང་འདྲ།།
བཙོན་ཁང་མིག་གིས་བྲིས་པ།།
ལྕགས་སྒྲོག་ཚེར་མ་ངོམས་བྱུང་།།
མཚོན་ཆ་སེམས་ལ་གཟེངས་པ།།
གོས་ཀྱི་རྒྱལ་མཚན་འདར་བྱུང་།།
བརྩེ་བའི་ལ་མོ་བརྒྱབ་པས།།
རྩེད་མོ་འཇའ་ལ་ཐིམ་སོང་།།
རྩོད་པ་སེམས་ལ་བཀལ་བས།།
གཙང་པོའི་ཆུ་དང་འདྲེས་བྱུང་།།
རྡོ་ལ་མཆོད་པ་མི་འབུལ།།
བྲག་ལ་རི་མོ་མི་འབྲི།།
ཡ་ཆུང་སེམས་པའི་དཀྱིལ་ལ།།
ཡིད་ཀྱིས་སྨོན་ལམ་བཏབ་ཆོག །
དགའ་སྡུག་བཞིན་ལ་མི་སྲུང་།།
ཞི་དྲག་གཏམ་ལ་མི་ཉན།།
རང་སེམས་ཡིད་བཞིན་ནོར་བུ།།
རང་ལ་དབང་འདི་བསྲུང་ཡོད།།
དེ་རིང་ཉི་མ་ནུབ་ཀྱང་།།
སང་ཉིན་ཞོགས་པ་ཤར་ཡང་།།
དོ་དགོང་མུན་ཁུང་ནག་པོ།།
གློག་སྒྲོན་མར་མེས་བསལ་ཆོག །
༡༢/༡༥/༡༢ ཉིན་བྲིས།
ཚིག་དུ་ཁོ་བླུགས་བཞག་གི། དོན་དུ་ཁོ་བསྐུངས་བཞག་གི།
ཆི་ཟིག་ཟེར་གི་ཡོད་ནི་མི་ཤེས་འི། ཨ་སྤྲུལ་བ་ཅན་པོ།
ཁ་བརྡ་ཚང་ལ་དག་བཅོས་གནང་བར་བཀའ་དྲིན་ཆེ།
ཞུ།