ཕྱི་ཚེས་ ༣ ་ཉིན་ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་གོ་སྒྲིག་འོག ནོར་གླིང་ཉེ་འགྲམ་འཆི་མེད་དགའ་ཚལ་གླིང་དུ། བཙུན་དགོན་སྒྲོལ་མ་གླིང་གི་བཙུན་མ་གཙོས་ནོར་གླིང་ས་གནས་སེར་སྐྱ་མི་མང་རྣམས་འདུ་འཛོམས་ཐོག རྒྱལ་གཅེས་དཔའ་བོ་གཉིས་ཀྱི་ཆེད་དུ་སྨོན་ལམ་མཆོད་འབུལ་རྒྱས་པ་ཞིག་ཚོགས་ཡོད། དེ་ཡང་ཕྱི་ཚེས་ ༢ ཉིན་བོད་ནང་ཕྱི་དྲོའི་ཆུ་ཚོད་ ༣།༤༠ ཡས་མས་སུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་གྱིས་འདས་གྲོངས་སོང་བ་མདོ་སྨད་བླ་བྲང་བཀྲིས་འཁྱིལ་བསམ་ཆུ་རྫོང་འབོ་ར་ནས་ཡིན་པ་རྒྱལ་གཅེས་དཔའ་བོ་གཟུངས་འདུས་སྐྱབས་དང་། མདོ་སྨད་མགོ་ལོག་ནས་ཡིན་པ་རྒྱལ་གཅེས་དཔའ་བོ་བློ་བཟང་དགེ་འདུན་ལགས་ཀྱིས་རང་ལུས་མེར་བསྲེགས་བཏང་སྟེ་སྐུ་གྲོངས་ཡོད་པ་དེ་གཉིས་ཀྱིས་གཙོས་བོད་རྒྱལ་ཁབ་དང་མི་རིགས། བསྟན་སྲིད་བཅས་ཀྱི་ཆེད་དུ་རང་གི་གཅེས་པའི་ལུས་ལ་ཕུལ་བ་རྣམས་ལ་བསྔོ་སྨོན་མཆོད་འབུལ་ཞིག་གོ་སྒྲིག་ཞུས་པར་། མི་མང་ཉིས་བརྒྱ་བརྒལ་བ་འདུ་འཛོམས་བྱུང་ཡོད་པ་དང་། མཆོད་འབུལ་བསྒྲུབ་བསྟུན་བོད་མི་མང་སྤྱི་འཐུས་སྒྲོལ་དཀར་སྐྱབས་མཆོག་ལ་གོ་སྒྲིག་པའི་ངོས་ནས་གཏམ་བཤད་གནང་རོགས་ཞུས་དོན་ལྟར། སྤྱི་འཐུས་ཁོང་གིས། ང་ཚོ་བཙན་བྱོལ་བོད་མིའི་ལས་འགན་ནི་བོད་ཕྱི་ནང་གཉིས་སུ་རྒྱལ་གཅེས་དཔའ་བོ་དཔའ་མོ་དགུ་བཅུ་ལྷག་གིས་རང་ལུས་མེར་བསྲེགས་ཀྱི་རྒྱུ་རྐྱེན་དང་དམིགས་ཡུལ་གང་ཡིན་མིན་འཛམ་གླིང་མི་མང་ཡོངས་ལ་གསལ་བཤད་བྱ་རྒྱུ་དང་། ༸གོང་ས་མཆོག་གི་བཀའ་སློབ་ལ་བརྩི་སྲུང་དང་། བོད་ཆོལ་ཁ་གསུམ་གཅིག་སྒྲིལ་གྱིས་རང་གི་རྒྱལ་ཁབ་དང་མི་རིགས་ཀྱི་འཐབ་བརྩོད་བྱེད་ན་རྒྱལ་གཅེས་དཔའ་བོ་དཔའ་མོ་རྣམས་ཀྱི་དམིགས་ཡུལ་གཅིག་སྒྲུབ་ཐུབ་པ་རེད། ཅེས་དང་། ཁོང་རང་ཉིད་ངོས་ནས་ལས་འགུལ་འདིར་རྒྱབ་སྐྱོར་དང་རྗེས་སུ་ཡིད་རང་ཞུ་རྒྱུ་མ་ཟད་ནོར་གླིང་ས་གནས་མི་མང་རྣམས་ཀྱང་རྒྱུན་དུ་མཉམ་བཞུགས་བྱེད་དགོས་པ་གལ་ཆེན་པོ་ཡིན་སྐོར་གསུངས་པ་དང་བོད་རྒྱལ་ཁབ་ཆེན་པོའི་རྒྱལ་གླུ་བཏང་ནས་མཇུག་སྒྲིལ་ཞུས། ནོར་གླིང་ས་གནས་བོད་རིགས་སྤྱི་མཐུན་ཚོགས་པའི་ངོས་ནས་དུས་ནས་དུས་སུ་བསྔོ་སྨོན་མཆོད་འབུལ་གོ་སྒྲིག་ཞུས་དང་ཞུ་བཞིན་པ་བཅས།
ནོར་གླིང་ས་གནས་བོད་རིགས་སྤྱི་མཐུན་ཚོགས་པས།
སྤྱི་ལོ་ ༢༠༡༢ ལོའི་ཟླ་བ ༡༢ པའི་ཚེས་ ༤ ལ།
