ཨ་ཕྲེང་འདོད་གཏམ་གྱི་དཀྱིལ་འཁོར།

སྤྲུལ་སྐུ།

ཨ་རིའི་ལྷོ་ནུབ་ཀྱི་མངའ་སྡེ་ཕྱུག་མོ་ནས།།
ཨ་ཅེ་དབྱིན་མོ་ཞིག་སྣང་བར་འགྲོ་དྲགས་ཏེ།།
ཧ་ཅང་མངོན་མིན་གྱིས་ཟུར་མིག་རེ་འཕངས་པས།།
ཧ་ལམ་གོ་མདོག་གིས་རྣམ་འགྱུར་བསྟན་ནས་བྱུང་།།

ས་ལན་འཁོར་ལུགས་ཀྱིས་སྐད་ཆ་བཤད་བསམ་ཡང་།།
ཤ་སྐྱི་སྲབ་མོ་དེར་ངོ་ཚས་སྙིང་ཕུད་ནས།།
ལ་མོར་གདོང་ཐུག་གྱི་སྤོབས་པ་བྲལ་ན་ཡང་།།
ར་སྤྲོད་གནང་མཁན་ཞིག་བཙལ་ནས་མཇལ་རྒྱུ་བྱུང་།།

ཡ་རབས་གཤིས་བཟང་གིས་གུས་ཞབས་འཚམས་འདྲི་བཅས།།
འ་གཉིས་མིག་ཟུར་གྱིས་གྲོགས་པོ་ཡིན་ལབ་ཏེ།།
ཟ་ཟིས་མགོ་རྨོངས་ཀྱི་བོད་མོའི་ལུགས་བྲལ་ནས།།
ཞ་ཉེས་ལྕགས་བསྡུས་ལྟར་གཅིག་སེམས་གཅིག་མཐུན་བྱུང་།།

ཝ་ལེར་ཕྱི་ནང་གི་གནས་ཚུལ་ཞིབ་བཤད་ཅིང་།།
ཛ་དྲག་གནད་འགག་གི་གསང་བའི་གནས་སྟངས་སྐོར།།
ཚ་བྲོས་ཟས་སྣ་བཞིན་ཕན་ཚུན་ཡིད་བསྲུབས་ནས།།
ཙ་ར་ཀ་བཞིན་གྱིས་འཐམ་འཁྱུད་ལྟ་གོན་བྱས།།

མ་གིའི་དཀྱིལ་འཁོར་ལ་ཐིག་ལེས་ཚོམ་བཀོད་ཅིང་།།
བ་གླང་མ་རྒན་ཚོས་བེའུ་ཕྲུག་ལྡག་བྱས་ཤིང་།།
ཕ་མཆོག་ཡི་དམ་ལྟར་ཕྱག་རྒྱས་སྟངས་སྟབས་བཅས།།
པ་ཎཾ་ཁྲུས་གསོལ་གྱི་ཆོ་ག་ལེགས་གྲུབ་མཛད།།

ན་པ་ཚབ་ཆེན་གྱིས་སྐད་གདངས་ལྟ་བུ་དང་།།
ད་ལྟ་ཤི་ལ་ཁའི་ངོ་མདོག་བཞིན་འགྱུར་ནས།།
ཐ་ཁུག་དཀྲུགས་པ་ཡིས་རྫས་ལ་མི་བཟོད་པར།།
ཏ་རེ་དཀར་མོ་དེ་ཁྲོ་མོའི་བཞིན་ལ་བརྫུས།།

ཉྭ་རྒྱུས་ལྷུ་ཚིུགས་ཀུན་རུས་མེད་ལྟར་བསྒྱུར་ཏེ།།
ཇ་འོ་མངར་མོ་ལྟར་དབུགས་ཐེངས་རེ་རེས་ནང་།།
ཆ་གཉིས་ཡུ་བ་དེ་ངོམས་མེད་རྔུབ་འཐུང་གིས།།
ཅ་ཅོ་འུར་ཟིང་འདི་དབྱངས་ཅན་ངག་ལས་སྙན།།

ང་རྒྱལ་རྭ་ཅོ་ཡི་རྩ་མདུད་ཡོངས་གྲོལ་ཞིང་།།
ག་ཁྲལ་འོ་ཞོ་ཡི་མཆོད་པས་ཐུགས་དགྱེས་ནས།།
ཁ་གཅིག་ཡིད་བཞིན་གྱི་འཁོར་ལོའི་གཙོ་མོ་དེ།།
ཀ་དག་སྟོང་ཉིད་ཀྱི་ངང་ལ་བརྒྱལ་ནས་བཞུགས།།