ཆིབ་ལབ་རིང་མོ། (ཚན་པ་གསུམ་པ།)

དོལ་སྨྱོན།
—སྙིང་སྡུག་གླེང་བ།

༡༽
སྙིང་དང་ཀླད་པའི་ཆ་ཤས་ན།།
དམར་ཆུང་སེམས་ཀྱི་གྲུ་ཟུར་ན།།
ལུས་ཟུངས་བདུན་གྱི་འཁོར་སྐྱོད་ན།།
ཁྱོད་ཀྱི་ཞལ་རས་འཛུམ་དམུལ་དམུལ།།

༢༽
མ་ལ་ཡ་ཡི་ནགས་ཀླུང་དེ།།
ལྗོན་ཤིང་རྩེ་ནས་རིམ་གྱིས་མཆེད།།
སྙིང་གི་ལྷ་མོའི་ཞལ་རས་དེ།།
དྲན་པའི་ཀློང་ན་ཆེམ་ཆེམ་གཡོ།།

༣༽
མུན་པས་ཁྱབ་པའི་མཚན་གཞུང་འདིར།།
བསིལ་ཟེར་ཟླ་བའི་འཛུམ་མདངས་ངོམ།།
གྲང་རང་སྐྱེན་པའི་ཁོར་ཡུག་འདིར།།
ཁྱོད་ཀྱི་རྐང་རྗེས་འོད་དུ་འཚེར།།

༤༽
རྐང་འཐུང་དབུ་རྩེ་དགུང་ལ་རེག།།
ཉི་མའི་ཟེར་ཐིགས་ས་གཞིར་ལྷུང་།།
སྟོན་རླུང་བསིལ་མོ་དལ་གྱིས་ལྡང་།།
ཡོད་ཚད་ཁྱོད་ཀྱི་དཔལ་དང་མཚུངས།།

༥༽
རི་རྩེར་འགྱིང་བའི་ཆུ་འཛིན་དེ།།
བསིལ་ཟེར་ཟླ་བའི་འཛུམ་ཞལ་དེ།།
བྱ་བྱིའུ་དག་གི་སྐད་སྙན་དེ།།
ཁྱོད་ཀྱི་མཛེས་སྡུག་མཚོན་ནུས་སམ།།

༦༽
འབུར་དུ་ཐོན་པའི་རི་བོ་དེ།།
དལ་གྱིས་རྒྱུ་བའི་གཙང་ཆུ་དེ།།
ལྷེམ་མེར་བཞད་པའི་མེ་ཏོག་དེ།།
ཁྱོད་ཀྱི་ལང་ཚོར་འགྲན་ནམ་ཅི།།

༧༽
སྦྲང་དཀར་རྩམ་པའི་བྲོ་བཅུད་དེ།།
རྒུན་ཆང་མངར་མོའི་བཟི་ཁ་དེ།།
ཀ་ར་ཀུ་ཤུའི་རོ་མཆོག་དེ།།
ཁྱོད་ཀྱི་དཔལ་ཡོན་མཚོན་ནུས་སམ།།

༨༽
དལ་གྱིས་རྒྱུ་བའི་རྣམ་པ་དེ།།
ཁྱུ་མཆོག་འགྲོས་དང་ཀུན་ནས་མཚུངས།།
ཡར་མར་གཡོ་བའི་ཕྱག་ཟུང་དེ།།
རླུང་གིས་བསྐྱོད་པའི་ལོ་མ་བཞིན།།

༩༽
དམར་ལ་མཐུག་པའི་མཆུ་སྒྲོས་དེ།།
བཞད་མ་ཐག་པའི་པདྨོ་དངོས།།
དཀར་ལ་འགྲིགས་པའི་སོ་འཕྲེང་དེ།།
རབ་མཛེས་གངས་རིའི་མུ་ཁྱུད་བཞིན།།

༡༠༽
དཀར་ལ་འཛུམ་པའི་ཞལ་རས་དེས།།
དམར་པོའི་སྙིང་ལ་ན་ཟུག་སྟེར།།
སྙན་ལ་འཇེབས་པའི་གསུང་སྐད་དེས།།
ཐོས་འཛིན་བུ་གར་སིམ་པ་སྟེར།།

༡༡༽
རླུང་གིས་བསྐྱོད་པའི་སྐྲ་ལོ་དེ།།
ཡར་མར་གཡོ་བའི་མིག་ཟུང་དེ།།
དྲི་ཞིམ་འཐུལ་བའི་མཆུ་སྒྲོས་དེ།།
དྲན་པའི་ཀློང་ན་ཡང་ཡང་འདར།།

༡༢༽
གླང་ཆེན་སྣ་ཞགས་ལས་བྱུང་བའི།།
དྭངས་གསལ་ཆུ་ཡི་ལྦུ་བ་བཞིན།།
ཁྱོད་ཀྱི་ལང་ཚོ་ལས་འཕྲོས་པའི།།
རྣམ་འགྱུར་འདི་ཀོ་སེམས་ཀྱི་བཅུད།།

༡༣༽
མ་བཅོས་བཞིན་གྱི་རྣམ་པ་དང་།།
མ་ལྷད་གཤིས་ཀྱི་སྤྱོད་པ་དང་།།
མ་བསྒྱུར་གཙང་བའི་ཀུན་སྤྱོད་སོགས།།
རྨི་ལམ་སྟོང་གི་མངལ་དུ་སྦྲུམ།།

༡༤༽
པདྨའི་མཚོ་ལ་ངང་པ་བཞིན།།
མེ་ཏོག་ཟེའུ་འབྲུར་བུང་བ་བཞིན།།
ལྟོགས་པའི་ཟས་ལ་མགྲོན་པོ་བཞིན།།
ཡོད་ཚད་ཁྱོད་ཀྱི་ཕྱོགས་ལ་ཤོར།།

༡༥༽
ཉི་མའི་ཟེར་ཐིགས་རེ་རེ་བཞིན།།
རྦབ་ཆུའི་ཟེགས་མ་རེ་རེ་བཞིན།།
མེ་ཏོག་འདབ་མ་རེ་རེ་བཞིན།།
ཁྱོད་ཀྱི་ཞལ་དང་ཀུན་ནས་མཚུངས།།

༡༦༽
དགུང་སྔོན་དབྱིངས་ཀྱི་སྐར་ཚོགས་དག །
རི་བོང་འཛིན་པ་གཅིག་གིས་བཞིན།།
མཛེས་མ་མཛངས་མའི་ཚོགས་དག་ཀྱང་།།
ཁྱོད་ཞལ་གཅིག་གིས་མོག་པོར་བྱེད།།

༡༧༽
དཀར་གསལ་གངས་རིའི་ཕུང་པོ་དང་།།
གསར་དུ་བཞད་པའི་ཆུ་སྐྱེས་གཉིས།།
གཅིག་ཏུ་བསྡོངས་པའི་ལང་ཚོས་ཀྱང་།།
ཁྱོད་ལ་འགྲན་པའི་སྐལ་བ་དབེན།།

༡༨༽
འབུར་དུ་ཐོན་པའི་མྱོས་བུམ་ཟུང་།།
འདོད་ལྡན་མིག་གི་བདུད་རྩིར་གྱུར།།
ཕྲ་ལ་ལྡེམ་པའི་སྤྱི་ཟུར་དེས།།
ཆགས་ཅན་སེམས་ལ་ཟུག་རྔུ་བསླངས།།

༡༩༽
བལྟས་ན་མཛེས་པའི་རྣམ་པ་དང་།།
མཐོང་ན་ཞི་བའི་ཀུན་སྤྱོད་གཉིས།།
གཅིག་ཏུ་འདྲེས་པའི་ལང་ཚོ་དེས།།
ཁོ་བོ་གཏན་དུ་བཟི་བར་བྱས།།

༢༠༽
ཁྱོད་ཀྱི་མཛེས་པའི་ལང་ཚོའི་ནང་།།
ཁོ་བོ་གཏན་དུ་འཐིམ་ན་འདོད།།
ཁྱོད་ཀྱི་པང་ཆུང་ཡངས་མོའི་སྟེང་།།
ཁོ་བོ་གཏན་དུ་གཉིད་ན་འདོད།།

༢༡༽
གསོ་རིག་བསྟན་པའི་མཛེས་རྒྱན་དུ།།
ཉམ་ཐག་ནད་པའི་མགོན་དཔུང་དུ།།
སྨྱོན་པ་ང་ཡི་སྙིང་དཀྱིལ་དུ།།
ཁྱོད་ཉིད་བརྟན་པར་བཞུགས་སུ་གསོལ།།