ཁྱེད་ཚོ་ལ་དགོངས་དག་ཞུ།

གསང་གྲོལ་གྱིས་བསྒྱུར།

༼ཨོ་སི་ཊི་ལི་ཡ་རུ་རྟེན་གཞི་བྱས་ཡོད་པའི་རྒྱ་རིགས་ཆིས་ཧྲི་ཐེབས་རྩ་ཁང་གིས་དོན་འགྲུབ་དབང་ཆེན་ལ་རྒྱ་ནག་ཡར་ཐོན་སྐུལ་འདེད་ཀྱི་དམིགས་བསལ་གཟེངས་རྟགས་ཕུལ་བའི་སྐབས་ཀྱི་ཞུ་ཚིག་བོད་བསྒྱུར་མ།༽

བཀུར་འོས་ཏྰ་ལའི་བླ་མ་མཆོག བཀུར་འོས་རྒྱལ་བ་ཀརྨ་པ་མཆོག བཀུར་འོས་སྲིད་བློན་བློ་བཟང་སེང་གེ་མཆོག བཀུར་འོས་སྐུ་མགྲོན་རྣམ་པ་དང་བོད་རིགས་གྲོགས་པོ་ཚོ། དེ་རིང་ཕྱི་ཟླ་ ༩ པའི་ཚེས་ ༢ ཉིན་ནི་བོད་མིའི་དམངས་གཙོ་དུས་ཆེན་ཡིན་ལ། ད་ལྟ་གཟབ་རྒྱས་ངང་མཛད་སྒོ་སྲུང་གཙི་བྱེད་བཞིན་པ་རེད། ངས་བོད་མིའི་དམངས་གཙོའི་ལྟེ་གནས་ངྷ་རམ་ས་ལ་ནས་ཨོ་སི་ཊི་ལི་ཡའི་ཆིས་ཧྲི་རིག་གནས་ཐེབས་རྩ་ཁང་གི་ཚབ་བྱས་ཏེ་ཐེངས་ལྔ་བའི་རྒྱ་ནག་ཡར་ཐོན་སྐུལ་འདེད་ཀྱི་དམིགས་བསལ་གཟེངས་རྟགས་འབུལ་རྒྱུ་ཡིན། བོད་ཀྱི་རྩོམ་པ་པོ་འོད་ཟེར་ལགས་ཀྱིས་འོས་སྦྱོར་གནང་བར་ཐུགས་རྗེ་ཆེ་ཞུ་བ་དང་། གཟེངས་རྟགས་འདི་བོད་ཀྱི་བརྙན་ལེན་མཁན་དང་བཟོ་སྐྲུན་པ་དོན་འགྲུབ་དབང་ཆེན་དང་ཁོང་གིས་ཕབ་པའི་འཇིགས་བྲལ་ཞེས་བའི་གློག་བརྙན་ལ་ཕུལ་བ་ཡིན། དོན་འགྲུབ་དབང་ཆེན་གྱིས་བོད་ནང་གི་བོད་མི་དཀྱུས་མ་བརྒྱ་ལྷག་གི་སེམས་གཏམ་ཟིན་ཐོར་བཀོད་ཡོད་ལ། དེ་ཡིས་བོད་མི་ཚོའི་རེ་འདོད་སྟེ་ཆོས་ལུགས་དད་མོས་རང་དབང་དང་རང་ཉིད་ཀྱི་རིག་གནས་རྒྱུན་འཛིན་གྱི་རང་དབང་། འཚོ་ཐབས་འདེམས་པའི་རང་དབང་བཅས་མཚོན་གྱི་ཡོད་ལ། ཁོང་ཚོས་ཏྰ་ལའི་བླ་མ་ཕྱིར་རང་ཉིད་ཀྱི་ས་ཆ་དང་རང་ཉིད་ཀྱི་གཞིས་ཁྱིམ་ལ་ཕེབས་པའི་དགོས་འདུན་བརྗོད་ཡོད་པ་རེད།
ཆིས་ཧྲི་རིག་གནས་ཐེབས་རྩ་ཁང་གིས་དོན་འགྲུབ་དབང་ཆེན་གྱི་སྙིང་སྟོབས་དང་ཁུར་ལེན་བསམ་བློ་ལ་བསྔགས་བརྗོད་བྱེད་ཀྱི་ཡོད། ཡིན་ནའང་། རྒྱུ་རྐྱེན་དེ་ལ་བརྟེན་ནས་དོན་འགྲུབ་དབང་ཆེན་ལ་མི་ལོ་དྲུག་རིང་བཙོན་དུ་ཚུད་པའི་ཆག་སྒོ་བྱུང་བ་དང་། ཁ་འཐོར་ཏུ་གྱུར་བའི་ཁྱིམ་ཚང་ཞིག་ཤུལ་དུ་ལུས། ཁོང་གི་ཆུང་མ་ཡིས་ན་ཡང་བརྩེ་བའི་ཁྱོ་ག་ཕྱིར་ལོག་པར་རེ་སྒུག་བྱེད་བཞིན་ཡོད་ལ། ཁོང་གི་བུ་མོ་ཡིས་ཉིན་མཚན་ཀུན་ཏུ་བྱམས་ལྡན་གྱི་ཨ་ཕ་དྲན་ནས་བསྡད་ཡོད། ང་ཚོས་རྒྱ་ནག་གཞུང་གིས་ཆ་རྐྱེན་ཅི་ཡང་མེད་པའི་སྒོ་ནས་དོན་འགྲུབ་དབང་ཆེན་ཀློད་གྲོལ་དགོས་བ་དང་འབྲེལ། ཁོང་གི་མཚན་མཐོང་བསྐྱར་གསོ་དང་གུན་གསབ་སྤྲོད་དགོས་བའི་འབོད་སྐུལ་བྱེད་ཀྱི་ཡོད།
བོད་མི་རིགས་ནི་མི་རབས་ནས་མི་རབས་སུ་བོད་ཀྱི་ས་ཐོག་ཏུ་འཚོ་བ་རོལ་བཞིན་ཡོད་ལ། ཁོང་ཚོ་ནི་བློ་གྲོས་ལྡན་པ་དང་གཞུང་དྲང་པ། བྱང་སེམས་ཅན་ཡིན། ཁོང་ཚོ་ལ་རང་ཉིད་ཀྱི་ཐུན་མོང་མ་ཡིན་པའི་རིག་གནས་དང་ཆོས་ལུགས། འཚོ་ཐབས་བཅས་ཡོད། ལོ་རྒྱུས་སྟེང་བོད་མི་རིགས་ཀྱིས་མི་རིགས་གཞན་ཞིག་ལ་བརྙས་བཅོས་བྱས་མྱོང་མེད་པ་རེད། ཡིན་ནའང་དེ་ལས་ལྡོག་སྟེ་རྒྱ་མི་རིགས་ཀྱིས་དུས་རབས་སྔོན་མའི་ལོ་རབས་ལྔ་བཅུའི་ནང་། དྲག་ཤུགས་དང་དབང་སྟོབས་ལ་བརྟེན་ནས་བོད་མི་རིགས་ཀྱི་སྔོན་ཆད་ཀྱི་ཡོད་ཚད་ལ་བཙན་གྱིས་འགྱུར་བ་གཏོང་སྟེ་དེ་རིང་བར་སླེབས་ཡོད་པ་རེད།
ཨོ་སི་ཊི་ལི་ཡའི་ཆིས་ཧྲི་རིག་གནས་ཐེབས་རྩ་ཁང་ནི་རྒྱ་མིའི་དམངས་ཁྲོད་ཀྱི་ཚོགས་པ་ཞིག་ཡིན་པའི་ཆ་ནས་ང་ཚོ་ངོ་ཚ་སྐྱེས་བ་དང་། གོ་སྐབས་འདི་བརྒྱུད་ནས་ས་ཡ་ཁ་ཤས་ཡོད་པའི་བོད་རིགས་ཕུ་ནུ་མིང་སྲིང་ཚོ་ལ་ང་ཚོས་ལྷག་བསམ་རྣམ་དག་གིས་འགྱོད་བཤགས་དང་བཅས་དགོངས་དག་ཞུ་ཡི་ཡོད། (We are Sorry!) ༢༠༡༢ ལོ་ནི་ཧ་ཅང་སྟབས་མི་ལེགས་པའི་ལོ་ཞིག་རེད། བོད་མི་ལྔ་བཅུ་ལྷག་གིས་རང་ལུས་མེར་བསྲེགས་གནང་པ་དང་། ཁོང་ཚོའི་ཁྲོད་ཀྱི་མང་པོ་ཞིག་ནི་ཚེ་སྲོག་གི་མེ་ཏོག་གཞི་ནས་བཞད་པའི་གཞོན་སྐྱེས་རེད། ཡ་ང་བའི་སྒོ་ནས་རང་ལུས་མེར་བསྲེགས་ཀྱིས་རང་ཉིད་ཀྱི་ཚེ་སྲོག་བློས་བཏང་པའི་རྣམ་པ་དེ་ཡིས་རང་དབང་ཆེད་སྲོག་འདོར་ཐུབ་པའི་ཁོ་ཚོའི་བསམ་བློ་དེ་མཚོན་གྱི་ཡོད་པ་རེད།
མེ་ལྕེ་ཡིས་བོད་མི་འདི་ཚོའི་ཤ་ཁྲག་གི་ཕུང་བོ་སྲེག་བཞིན་པའི་སྐབས། ང་ཚོ་བོད་མི་ཡོངས་དང་ལྷན་དུ་ཡོད་ལ། ཁོང་ཚོའི་ན་ཟུག་ང་ཚོས་མྱོང་གི་ཡོད། ཚེ་སྲོག་གསོན་པོ་ཞིག་འཆི་བར་སྙེགས་པའི་ན་ཟུག་གི་བརྒྱུད་རིམ་མྱོང་གི་ཡོད་ལ། ང་ཚོའི་སེམས་པ་གདུང་བའི་གཟིར་ཡོད། རྒྱ་མི་རིགས་དང་བོད་མི་རིགས། ད་རུང་རྒྱ་ནག་ནང་ཁུལ་གྱི་གྲངས་ཉུང་མི་རིགས་གཞན་དག་གི་སྨྲ་བརྗོད་རང་དབང་དང་དད་མོས་རང་དབང་ལ་སྙིང་རྗེ་མེད་པར་བཤུ་གཞོག་དང་གནོད་འཚེ་གཏོང་གི་ཡོད་པས། ང་ཚོ་ངེས་བར་དུ་ལག་རྡང་མཉམ་སྤྲེལ་གྱིས་དྲང་བདེན་མིན་པའི་གནས་སྟངས་འདི་ལ་འགྱུར་བ་གཏོང་ཆེད་མཉམ་གཅིག་ཏུ་འབད་བརྩོན་བྱ་དགོས་བ་རེད།
ང་ཚོའི་རེ་བར་གཟེངས་རྟགས་འདིས་བོད་རྒྱ་མི་རིགས་བར་ཕན་ཚུན་རྒྱུས་ལོན་དང་བསམ་ཤེས། གུ་བཤངས་ཀྱི་ཕྱོགས་སུ་གོམ་གང་མདུན་དུ་སྤོས་བར་སྐུལ་འདེད་དང་། དེ་ལྟར་གནང་ཚེ་ད་བཟོད་འདྲ་མཉམ་གྱི་རྨང་གཞིའི་སྟེང་ནས་མི་རིགས་མཐུན་སྒྲིལ་རིམ་གྱིས་མངོན་འགྱུར་ཐུབ་ངེས་རེད།
ང་ཚོས་ངྷ་རམ་ས་ལའི་སྒྲིག་འཛུགས་ཀྱིས་ཐེངས་འདིས་གཟེངས་རྟགས་འབུལ་བ་དང་འཚམས་འདྲིའི་ཆེད་འབད་བརྩོན་གནང་བར་ཐུགས་རྗེ་ཆེ་ཞུ་བ་དང་། ལྷག་པར་ཏུ་ང་ཚོས་ཏྰ་ལའི་བླ་མའི་ཨོ་སི་ཊི་ལི་ཡའི་སྐུ་ཚབ་སྐུ་ཞབས་དྭགས་པོ་ལགས་དང་ལྕམ་ཟླ་སྒྲོན་གཉིས་ལ་ཐུགས་རྗེ་ཆེ་ཞུ། ཁོང་གཉིས་ཀྱིས་ཞིབ་ཚགས་སྒོས་གོ་སྒྲིག་རོགས་རམ་གནང་བར་བརྟེན་ཐེངས་འདིའི་ལས་འགུལ་མངོན་གྱུར་བྱུང་བ་རེད། ཆིས་ཧྲི་རིག་གནས་ཐེབས་རྩ་ཁང་གིས་གོ་སྐབས་འདི་བརྒྱུད་བོད་རིགས་ཕུ་ནུ་མིང་སྲིང་ཚོ་ལ་སེམས་གཏིང་ནས་དགོངས་དག་ཞུ་བ་དང་། (We are Sorry)ངྷ་རམ་ས་ལར་བཞུགས་པའི་སྙིང་སྟོབས་ཅན་གྱི་མང་ཚོགས་ལ་ཆེས་མཐོའི་གུས་བརྩི་དང་བཅས་ཁྱེད་ཚོ་ནི་རླབས་ཆེན་རེད་ཞུ་བ་ཡིན། (You are Great ! ) ཐུགས་རྗེ་ཆེ།

མ་ཡིག་འབྱུང་ཁུངས་འོད་ཟེར་གྱི་ཟིན་བྲིས་ཡིན། http://woeser.middle-way.net/2012/09/blog-post_4.html