འཇམ་དབྱངས་ནོར་བུས་སླར་ཡང་བོད་རང་བཙན་ཁུངས་སྐྱེལ་བྱས།

༼དུས་བབ་ཀྱི་དྲ་རྒྱ་ནས་བཤུས། གཤམ་གྱི་འབྲེལ་ཐག་འདི་ན་འདུག འབྲེལ་ཐག་ལ་བསྣུན་ན་པར་དང་བཅས་པ་མཐོང་ཐུབ།༽

http://tibettimes.tibethosting.com/news.php?showfooter=1&id=1389

རང་བཙན་འཐབ་རྩོད་པ་དང་རྩོམ་པ་པོ་འཇམ་དབྱངས་ནོར་བུ་ལགས་ཀྱི་ལྷག་བསམ་དང་ལར་ཞེན། སྙིང་སྟོབས་བཅས་ལ་ཉམས་པ་མེད་པར་ལོ་མང་རིང་དཀའ་སྤྱད་འབད་བརྩོན་བརྒྱུད་དེ། བོད་རྒྱལ་ཁབ་ཆེན་པོའི་རྒྱལ་དར་དང་རྒྱལ་གླུ། ས་ཁྲ། དངུལ་སྒོར། ཕྱིར་སྐྱོད་ལག་ཁྱེར། རྒྱལ་ཁབ་བར་གྱི་ཆིངས་ཡིག རྒྱལ་ཁབ་ནང་ཁུལ་གྱི་སྒྲིག་འཛུགས་བཅས་ཕྱོགས་བདུན་གྱི་ཐད་ནས་བོད་རང་བཙན་གཙང་མ་ཡིན་པའི་ཁུངས་སྐྱེལ་དཔང་རྟགས་འཚོལ་བསྡུ་བྱས་ཏེ། འཛམ་གླིང་མི་དམངས་ལ་དྲ་ཚིགས་དང་བརྙན་འཕྲིན་བརྒྱུད་དེ་ངོ་སྤྲོད་བྱ་མགོ་བརྩམས་ཡོད།

ཕྱི་ཚེས་ ༡༨ ཉིན་ངྷ་ས་ཡོངས་གླིང་སློབ་གྲྭའི་ཚོགས་ཁང་ནང་། བོད་རང་བཙན་སློབ་ཕྲུག་ཚོགས་པའི་གོ་སྒྲིག་འོག བཞུགས་སྒར་ཁུལ་གྱི་སེར་སྐྱ་མི་དམངས་སུམ་བརྒྱ་ཡས་མས་ཤིག་ལ། བོད་རང་བཙན་འཐབ་རྩོད་པ་དང་རྩོམ་པ་པོ་འཇམ་དབྱངས་ནོར་བུ་ལགས་ཀྱིས་༼རང་བཙན་དོན་དངོས་ཀྱི་ལོ་རྒྱུས་༽ ཞེས་པའི་བརྗོད་གཞིའི་ཐོག་གཏམ་བཤད་དང་དྲི་བར་ལན་འདེབས། བོད་རང་བཙན་སྐོར་ཁུངས་སྐྱེལ་སྐོར་གྱི་རྒྱུ་ཆ་གལ་ཆེན་ཁག་ཅིག་བརྙན་འཕྲིན་བརྒྱུད་སྤྲོད་བཅས་གནང་སོང་ལ། ཁོང་མུ་མཐུད་དུ་བཙན་བྱོལ་བོད་མིའི་གཞིས་སྒར་གཞན་ཁག་ཅིག་ཏུའང་འགྲོ་རྒྱུ་ཡིན་སྐོར་ཡང་གསུངས་སོང་། ཁོང་གིས་ (www.rangzen.net) ཞེས་བའི་དབྱིན་ཡིག་གི་དྲ་ཚིགས་ཤིག་གསར་དུ་སྒོ་འབྱེད་བྱས་ཏེ། རྒྱལ་སྤྱིའི་སྤྱི་ཚོགས་ལ་སླར་ཡང་བོད་རང་བཙན་དག་སྐྱེལ་བྱེད་མགོ་བརྩམས་ཡོད་པ་མ་ཟད། དབྱིན་ཡིག་ཐོག་༼བོད་རང་བཙན་གྱི་བཅའ་ཁྲིམས་༽ཞུ་བ་ཞིག་གསར་རྩོམ་གནང་སྟེ། ད་ལྟ་བོད་རང་བཙན་སློབ་ཕྲུག་ཚོགས་པས་བོད་སྒྱུར་བྱེད་བཞིན་ཡོད་པ་དང་། མི་འགྱངས་པར་ཁྱབ་བསྒྲགས་བྱ་འཆར་ཡོད་འདུག

སྐབས་དེར་འཇམ་དབྱངས་ནོར་བུ་ལགས་ཀྱིས་གསུངས་དོན། ང་རང་རྩོམ་པ་པོ་ཞིག་ཡིན་སྟབས་འདས་པའི་ལོ་མང་རིང་། བོད་རང་བཙན་དང་འབྲེལ་བའི་རྒྱུ་ཆ་མང་པོ་ཞིག་འཚོལ་བསྡུ་བྱས་ཡོད། སྤྱི་ལོ་ ༡༩༤༩ ལོར་རྒྱ་དམག་ཁམས་དང་ཨ་མདོར་སླེབས་པ་རེད། དུས་ཚོད་དེ་ཧ་ཅང་གནད་འགག་རེད། འཛམ་གླིང་དམག་ཆེན་གཉིས་པའི་རྗེས་སུ་འཁེལ་ཡོད་སྟབས། ཨ་རི་དང་ཡུ་རོབ་སོགས་ཀྱི་རྒྱལ་ཁབ་ཕལ་ཆེ་བ་དབུལ་བོ་རེད། རྒྱ་གར་དང་རྒྱ་ནག ཉི་ཧོང་སོགས་ཀྱི་གནས་སྟངས་སྐྱོ་བོ་དང་རྙོག་འཛིང་ཆེན་པོ། ཐ་ན་མི་མང་པོ་ལྟོགས་ཤི་ཐེབས་ཀྱིན་ཡོད། སྐབས་དེར་བོད་ནི་རྒྱལ་ཁབ་ཅིག་གི་ངོ་བོར་བསྡད་ཡོད་པ་མ་ཟད། དྲ་རྒྱས་པོ་མེད་ཀྱང་ཟས་གོས་གཉིས་ཀར་དཀའ་ངལ་མེད། དམངས་གཙོ་སྤུས་དག་མེད་ཀྱང་ཁྲིམས་དང་འགྲོ་སྟངས་ཆ་ཚང་ཡོད། སྤྱི་ལོ་ ༡༩༡༢ ལོར་མན་ཇུ་བོད་ནས་ཕྱིར་ཕུད་བཏང་སྟེ། བོད་རང་བཙན་གསལ་བསྒྲགས་གནང་བ་མ་ཟད། བཙོན་པ་ཉེས་ཅན་ཡིན་རུང་སྲོག་ཁྲིམས་མེད་པ་གཏན་འབེབས་བྱས་ཡོད། དེ་འདྲའི་ཁྲིམས་བཟོ་མཁན་འཛམ་གླིང་ནང་བོད་པ་སྔ་གྲས་རེད། རྒྱལ་དབང་ལྔ་བའི་སྐབས་ནས་རི་སྐྱེས་སྲོག་ཆགས་དང་ཁོར་ཡུག་ལ་བདག་གཅེས་ཀྱི་ཁྲིམས་བཟོས་ཡོད། དེ་ཡང་ཡིག་ཐོག་ནས་ཁྲིམས་གཏན་འབེབས་བྱེད་མཁན་བོད་པ་སྔ་གྲས་རེད། ཅེས་གསུངས་བྱུང་།

ཁོང་གིས་བོད་ཀྱི་རྒྱལ་དར་སྐོར་ནས་བོད་རང་བཙན་བསྒྲུབས་དོན། སྤྱི་ལོ་ ༡༩༡༦ ལོར་རྒྱལ་དབང་སྐུ་ཕྲེང་བཅུ་གསུམ་པས་བོད་ཀྱི་རྒྱལ་དར་གཏན་འབེབས་བྱས་ཏེ་ལྷ་སའི་དམག་སྒར་དུ་བསྒྲེངས་འཛུགས་བྱས་འདུག སྐབས་དེར་རྒྱལ་དར་གྱི་མཐའི་མཚོན་མདོག་སེར་པོ་དེ་མེད་པ་འདྲ། རྗེས་སུ་ཆོས་མཚོན་བྱེད་དུ་ཁ་སྣོན་བྱས་ཚུལ་བཤད་སྲོལ་འདུག སྤྱི་ལོ་ ༡༩༣༦ ལོར་བོད་ཀྱི་རྒྱལ་དར་དེ་རྒྱལ་སྤྱིའི་སྟེང་སླེབས་པ་རེད། ལོ་དེར་ཨ་རིའི་གསར་དེབ་ཟེར་བ་ཞིག་ཏུ་འཛམ་གླིང་རྒྱལ་ཁབ་ཁག་གི་རྒྱལ་དར་བཀོད་འདུག དེའི་ནང་བོད་པའི་རྒྱལ་དར་ཡང་ཚུད་འདུག སྤྱི་ལོ་ ༡༩༣༣ ལོར་འཇར་མན་གྱི་ཐ་མག་ཅིག་གི་རྒྱབ་ངོས་སུ་འཛམ་གླིང་རྒྱལ་ཁབ་ཁག་གི་རྒྱལ་དར་བཀོད་པའི་ཁྲོད་བོད་པའི་རྒྱལ་དར་བཀོད་འདུག སྤྱི་ལོ་ ༡༩༤༧ ལོར་རྒྱ་གར་རྒྱལ་ས་ལྡི་ལིར་ཨེ་ཤ་ཡའི་རྒྱལ་ཁབ་ཁག་གི་ཚོགས་འདུ་ཞིག་འཚོགས་ཏེ། སེམས་དཔའ་ཆེན་པོ་གྷན་ངྷི་མཆོག་གིས་གསུང་བཤད་གནང་འདུག སྐབས་དེར་བོད་གཞུང་ཕྱི་སྲིད་ལས་ཁུངས་ཀྱི་སྐུ་ཚབ་གཉིས་ཚོགས་ཞུགས་གནང་འདུག་ལ། ཚོགས་ཁང་ཕྱི་རོལ་གྱི་རྒྱལ་ཁབ་ཁག་གི་རྒྱལ་དར་ཁྲོད་དུ་བོད་ཀྱི་རྒྱལ་དར་ཡང་བསྒྲེངས་འདུག

ཡང་འཇམ་ནོར་གྱིས་བོད་ཀྱི་རྒྱལ་གླུའི་ཐད་ནས་གསུངས་དོན། སྔོན་མ་འབྲས་སྤྱི་བློན་ཆེན་གྱིས་དེབ་ཅིག་བྲིས་པའི་ནང་། བོད་ལ་གངས་རི་ར་བ་ཟེར་བའི་རྒྱལ་གླུ་རྙིང་པ་ཞིག་ཡོད། ཞེས་བཀོད་འདུག སྤྱི་ལོ་ ༡༧༤༥ ཡས་མས་སུ་མི་དབང་ཕོ་ལྷ་བ་བསོད་ནམས་སྟོབས་རྒྱལ་མཆོག་གིས་བོད་ཀྱི་རྒྱལ་གླུ་ཐོག་མར་བརྩམས་འདུག ཁོང་བླ་མ་དང་གྲྭ་བ་དེ་འདྲ་མ་རེད། མི་སྐྱ་རེད། ཁོང་ལ་སྡེ་སྲིད་ཀྱི་གོ་གནས་ཡོད་པ་རེད། ད་ལྟའི་བཀའ་བློན་ཁྲི་པ་ལས་གོ་གནས་མཐོན་པོ་རེད། རྗེས་སུ་ང་ཚོ་སྐྱབས་བཅོལ་དུ་འབྱོར་སྐབས། རྒྱལ་བའི་ཡོངས་འཛིན་ཁྲི་བྱང་རིན་པོ་ཆེ་མཆོག་གིས་མའེ་སོར་ནས་བོད་ཀྱི་རྒྱལ་གླུ་གསར་བ། ད་ལྟ་གྱེར་འདོན་བྱེད་བཞིན་པའི་སྲིད་ཞིའི་ཕན་བདེ་ཟེར་བ་འདི་ལྗགས་རྩོམ་གནང་བ་རེད། ཅེས་གསུངས་བྱུང་།

ཁོང་གིས་མུ་མཐུད་དུ་བོད་ཀྱི་ས་ཁྲའི་ཐད་ནས་བོད་རང་བཙན་དག་སྐྱེལ་བྱས་དོན། སྤྱི་ལོ་ ༡༦༨༠ ལོར་ཧྥ་རན་སིའི་ས་རྒྱུས་མཁས་པ་ཞིག་གིས་ས་ཁྲ་བྲིས་པའི་ནང་བོད་ཆེན་པོ་ Great Tibet ཞེས་ལོགས་སུ་བྲིས་འདུག དེའི་ནུབ་ཕྱོགས་སུ་ད་ལྟའི་ལ་དྭགས་ལ། བོད་ཆུང་བ། ཞེས་བྲིས་འདུག ཟུར་དུ་འབྲུག་ཡུལ་བྲིས་འདུག འབྲུག་ཡུལ་གྱི་མིང་ལ་རྒྱལ་སྤྱིའི་སྟེང་། བྷོད་ཊྲན་ Butan ཟེར་གྱིན་ཡོད། བྷོད་ཟེར་བ་བོད་ཀྱི་དོན་དང་། ཊྲན་ཟེར་བ་སམ་ཊི་ཏའི་སྐད་ནང་སྒོ་ཞེས་པའི་དོན་རེད། དེ་གཉིས་སྦྱར་བ་ཡིན་ན་བོད་ཀྱི་སྒོ་ཟེར་བ་རེད། སྤྱི་ལོ་ ༡༨༢༧ ལོར་ཨ་རི་ནས་ས་ཁྲ་ཞིག་བྲིས་པའི་ནང་དུའང་བོད་དེ་རྒྱ་ནག་ལས་ལོགས་སུ་བཏོན་ཡོད། དེ་བཞིན། མན་ཇུའི་སྔོན་ལ་རྒྱ་ནག་རང་གིས་བཏོན་པའི་ས་ཁྲ་དག་ཏུའང་བོད་དེ་རྒྱ་ནག་གི་ས་ཁོངས་སུ་བཀོད་མེད། མན་ཇུའི་གོང་མ་ཁཱང་ཤིས་ཡི་ཤུ་ཆོས་སྤེལ་མཁན་ཕྱི་གླིང་བ་གཉིས་ལ་རྒྱ་ནག་རྒྱལ་ཡོངས་ཀྱི་ས་ཁྲ་བཟོ་རུ་བཅུག་ཅིང་། བོད་ཡང་རྒྱ་ཁོངས་སུ་བསྡུ་དགོས་པའི་བཀའ་གནང་ཡོད་ཀྱང་། ཁོང་གཉིས་ཕྱི་རྒྱལ་བ་ཡིན་སྟབས་བོད་ནང་འགྲོ་མ་ཐུབ་པར་སོག་པོའི་གྲྭ་བ་གཉིས་གསང་སྟབས་ཀྱིས་བོད་ནང་བཏང་འདུག སྤྱི་ལོ་ ༡༤༩༢ ལོར་བཟོས་པའི་སའི་གོ་ལའི་དབྱིབས་གཟུགས་ཅན་གྱི་འཛམ་གླིང་གི་ས་ཁྲ་རྙང་ཤོས་དེ་འཇར་མན་གྱི་རྒྱལ་སར་ཡོད། དེའི་ནང་བོད་གསལ་བོར་བཀོད་ཡོད། ཅེས་ངོ་སྤྲོད་གནང་བྱུང་།

འཇམ་ནོར་གྱིས་མུ་མཐུད་དུ་བོད་རང་བཙན་སྐབས་ཀྱི་དངུལ་སྒོར་ངོ་སྤྲོད་གནང་དོན། སྔོན་མ་བོད་ལ་ཊམ་ཀ་དང་ཟངས་ཀྱི་སྒོར་མོ་བཅས་གཉིས་ཡོད། སྐབས་དེར་ཊམ་ཀ་མང་ཆེ་བ་བལ་ཡུལ་ནས་བཟོ་བཞིན་ཡོད། མན་ཇུའི་བཙན་འཛུལ་སྐབས་བོད་དང་མན་ཇུའི་མཉམ་འབྲེལ་ཐོག་ཊམ་ཀ་ཞིག་བཟོས་མྱོང་། མན་ཇུའི་འོག་ནས་རང་བཙན་ཐོབ་མ་ཐག དགའ་ལྡན་ཕོ་བྲང་གི་དངུལ་སྒོར་གཏན་འབེབས་བྱས་པ་རེད། དངུལ་དེར་ཐུན་མིན་གྱི་ཁྱད་ཆོས་ཤིག་ཡོད་པ་ནི། ཨང་གྲངས་ལག་པས་བྲིས་པ་རེད། དེ་ནི་གཞན་གྱིས་རྫུན་མ་བཟོ་མི་ཐུབ་པའི་སྲིད་བྱུས་ཤིག་ཡིན་པ་འདྲ། སྤྱི་ལོ་ ༡༩༥༡ ལོར་རྒྱ་མི་ལྷ་སར་སླེབས་ཏེ་རྒྱ་སྒོར་བེད་སྤྱོད་གཏོང་རྒྱུར་བཙན་སྐུལ་བྱས་ཀྱང་། བོད་མི་ཚོས་རྩ་བ་ནས་རྒྱ་སྒོར་བེད་སྤྱོད་བཏང་མི་འདུག ཐ་ན་ང་དགུ་ལོར་སྐྱབས་བཅོལ་དུ་ཡོང་སྐབས་ཀྱང་། བོད་པའི་དངུལ་མང་པོ་ཉར་ཏེ་ཡོང་ཡོད་སྟབས། རྒྱ་གར་ནང་བེད་སྤྱོད་མེད་པར་གྱོང་རག་ཡོད་པའི་སྐད་ཆ་ཡོད།

ཡང་ཁོང་གིས་བོད་པའི་ཕྱིར་སྐྱོད་ལག་ཁྱེར་ཐད་ནས་གསུངས་སོན། སྤྱི་ལོ་ ༡༦༨༨ ལོར་བོད་གཞུང་གིས་ལྷ་ས་ནས་ཨར་མེ་ནའེ་ཡན་ཟེར་བའི་ཨུ་རུ་སུའི་ས་མཚམས་སུ་ཡོད་པའི་ཚོང་པ་སྐད་གྲགས་ཅན་ཞིག་ལ་ཐོངས་མཆན་སྤྲད་འདུག རྒྱ་གར་ལ་དབྱིན་ཇུ་ཐོག་མར་སླེབས་སྐབས། ཚོང་རྒྱག་མཁན་གྱི་སྐུ་ཚབ་རྒྱ་གར་བ་ཞིག་ལ། ལྷ་སར་ཡོང་ཆོག་པའི་ཐོངས་མཆན་སྤྲད་འདུག དེ་བཞིན། སྤྱི་ལོ་ ༡༩༢༡ ལོར་དབྱིན་ཇུ་བས་ཇོ་མོ་གླང་མའི་རྩེར་འཛེགས་རྒྱུ་བྱས་ཀྱང་བལ་ཡུལ་གྱིས་བཏང་མེད། དེའི་རྗེས་འབྲས་སྤྱི་བློན་ཆེན་ལྷ་སར་ཡོང་སྟེ། བོད་གཞུང་ལ་བཀའ་འཁྲོལ་ཞུས་ཏེ། བོད་གཞུང་གིས་ཐོངས་མཆན་སྤྲད་འདུག ཐོངས་མཆན་ཡི་གེ་དེ་ད་ལྟ་རྡོ་རྗེ་གླིང་གི་གངས་འཛེགས་ཚོགས་པའི་འགྲེམ་སྟོན་ཁང་དུ་ཡོད། ཇོ་མོ་གླང་མའི་རི་རྩེར་འཛེགས་མཁན་ཐེངས་ ༤ ཙམ་བྱུང་བ་དག་ལ་བོད་གཞུང་གི་ཐོངས་མཆན་སྤྲོད་ཀྱིན་ཡོད། དེ་མིན། བོད་ཡུལ་དུ་ཉམས་ཞིབ་བྱེད་མཁན་ཨི་ཊ་ལི་དང་འཇར་མན་པ་བཅས་ཡོང་སྐབས་བོད་གཞུང་གིས་ཐོངས་མཆན་སྤྲད་ཡོད། ཅེས་བསྟན་བྱུང་།

འཇམ་དབྱངས་ནོར་བུ་ལགས་ཀྱིས་བོད་དང་རྒྱལ་ཁབ་གཞན་ཁག་ཅིག་བར་གྱི་ཆིངས་ཡིག་སྐོར་གསུངས་དོན། སྤྱི་ལོ་ ༨༢༡ ལོར་བོད་རྒྱ་གཉིས་བར་དམག་འཁྲུག་ཆེན་པོ་བྱུང་སྟེ། ལྷ་སའི་ཇོ་ཁང་མདུན་དང་རྒྱ་ནག་གི་རྒྱལ་ས་ཁྲཱང་ཨན། བོད་རྒྱའི་ས་མཚམས་བཅས་སུ་རྡོ་རིང་བཞེངས་ཡོད། དེའི་ནང་། བོད་བོད་ཡུལ་དུ་སྐྱིད། རྒྱ་རྒྱ་ཡུལ་ན་སྐྱིད། ཅེས་གསལ་བོར་བཀོད་ཡོད། སྤྱི་ལོ་ ༡༩༠༤ ལོར་བོད་དང་དབྱིན་ཇུའི་བར་རྙོག་ཟིང་སྐབས། དབྱིན་གཞུང་དང་མཉམ་དུ་རྩེ་ཕོ་བྲང་ནས་ཆིངས་ཡིག་བཞག་ཡོད། སྤྱི་ལོ་ ༡༨༥༦ ལོར་བལ་ཡུལ་དང་ཆིངས་ཡིག་བཞག་ཡོད། ཡ་མཚན་པ་ཞིག་ལ། བལ་ཡུལ་མཉམ་འབྲེལ་རྒྱལ་ཚོགས་ནང་འཛུལ་སྐབས། བོད་དང་ཆིངས་ཡིག་བཞག་པ་དེ་བལ་ཡུལ་རང་བཙན་རྒྱལ་ཁབ་ཡིན་པའི་ཁུངས་སྐྱེལ་དུ་དྲངས་འདུག སྤྱི་ལོ་ ༡༩༡༣ ལོར་བོད་སོག་བར་ཆིངས་ཡིག་བཞག་པའི་ནང་། རང་རེ་བོད་སོག་གཉིས་མན་ཇུའི་རྒྱལ་ཁབ་ཀྱི་མངའ་འོག་ནས་ཐོན། རྒྱ་ནག་པོ་དང་བྲལ་ཏེ་བོད་སོག་སོ་སོར་རྒྱལ་ཁབ་རང་བཙན་དུ་གྱུར། ཞེས་བཀོད་ཡོད། ད་ལྟ་རྒྱ་དཀར་ནག་གཉིས་ཀྱི་ས་མཚམས་སྐོར་ལ་གྲོས་མོལ་བྱེད་ཀྱིན་ཡོད་མོད། ཐག་གིས་གཅོད་ཐུབ་རྩ་བ་ནས་ཡོད་པ་མ་རེད། མེག་མོ་ཧན་ས་ཐིག་ཟེར་བའི་རྩོད་གཞི་དེར་སྔོན་མ་བོད་གཞུང་གི་སྐུ་ཚབ་དང་དབྱིན་གཞུང་གི་སྐུ་ཚབ་ཀྱིས་ཐམ་ག་བརྒྱབས་ཏེ་ས་རྟགས་སྐྱོན་ཡོད། ཅེས་གསུངས་བྱུང་།

མཇུག་མཐར་ཁོང་གིས་སྔར་གྱི་བོད་གཞུང་གི་སྒྲིག་འཛུགས་ཐད་ནས་བོད་རང་བཙན་ཁུངས་སྐྱེལ་བྱས་དོན། སྤྱི་ལོ་ ༡༩༤༡ ལོར་བོད་གཞུང་ཕྱི་སྲིད་ལས་ཁུངས་བཙུགས་ཡོད། རྒྱ་ནག་གོ་མིན་ཏང་གིས་སྤྱི་ལོ་ ༡༩༣༤ ལོར་བོད་དུ་གཞུང་ཚབ་བཙུགས་ཤིང་། དབྱིན་གཞུང་གིས་སྤྱི་ལོ་ ༡༩༣༦ ལོར་བོད་ནང་གཞུང་ཚབ་བཙུགས་འདུག རྒྱ་ནག་གི་སྲིད་འཛིན་མའོ་ཙེ་ཏུང་ལ་ཕྱག་འཕྲིན་ཞིག་བསྐུར་བའི་ནང་། ཁྱེད་ཀྱི་དམག་མི་དང་ལས་བྱེད་ཚོས་བོད་པའི་ས་མཚམས་སུ་གང་བྱུང་བྱེད་པ་དེ་རྩ་བ་ནས་འགྲིག་གིན་མེད། ཁྱེད་ཀྱིས་ཁོང་ཚོར་དེ་ལྟར་བྱ་མི་ཆོག་པའི་བཀའ་གསལ་བོ་གནང་དགོས། ཞེས་བཀོད་འདུག འཛམ་གླིང་དམག་ཆེན་གཉིས་པའི་སྐབས་སུ་བོད་པས་བར་གནས་རྒྱལ་ཁབ་ཡིན། ཞེས་དམག་ནང་ཞུགས་མེད། སྤྱི་ལོ་ ༡༩༢༧ ལོར་ལྷ་སར་གློག་ཁང་བཙུགས་པ་མ་ཟད། སྦྲག་ཁང་ཡང་བཙུགས་ཏེ་སྦྲག་ཟམ་ཐོག་སྦྱར་བྱང་ཡང་བོད་རང་གིས་བཟོས་འདུག སྤྱི་ལོ་ ༡༩༢༣ ལོར་རྒྱལ་རྩེ་བར་དར་འཕྲིན་འཐེན་འདུག སྤྱི་ལོ་ ༡༩༤༨ ལོར་ལྷ་སའི་རླུང་འཕྲིན་ཟེར་བ་དེ་བཙུགས་པ་རེད། སྐབས་དེར་བོད་རྒྱ་དབྱིན་གསུམ་ནང་གསར་འགྱུར་རྒྱང་སྲིང་བྱེད་ཀྱིན་ཡོད་ལ། རྒྱ་ཡིག་ནང་གསར་འགྱུར་ཀློག་མཁན་སྟག་ལྷ་ཕུན་ཚོགས་བཀྲ་ཤིས་རེད། ཅེས་གསུངས་བྱུང་།