——དམངས་གཙོའི་ཐ་སྙད་ཀྱི་རྩེད་མོ་ཞིག་གི་མྱོང་བ།
ཤིས་ཚང་ལྗང་མྱུག
ཐོད་པའི་ཁ་ཡིག་འཁྱོག་འཁྱོག་འདྲ་བས།།
ལས་ཀྱི་ལམ་བུ་བཀུག་བཀུག་རེད་འདུག །
བསམ་པའི་མཁའ་མཐའ་སྨུག་པས་བཟུང་སོང་།།
རྐང་བའི་སྣེ་མོ་རྡོ་ལ་ཐོགས་སོང་།།
བློས་གཏོང་སྤོབས་པས་མཁར་ཞིག་བཞེངས་ཏེ།།
རྩིག་རྨང་གཏོར་བའི་ཤེད་ཅིག་སྦྱངས་ཏེ།།
མི་འདོད་ན་ཟུག་སེམས་ཀྱིས་མྱོང་བཞིན།།
ས་མཐའི་འཚོ་བར་ལུས་པོ་གླན་ཡོད།།
དམངས་གཙོའི་ཐ་སྙད་རྫོབ་པོ་ཞིག་གིས།།
ཟོལ་མའི་གར་གྱི་སྟངས་སྟབས་ངོམ་སྟེ།།
ང་དང་ང་འདྲའི་འཁོས་ཆུང་མི་ལ།།
ཐལ་རྡུལ་འཚུབ་པའི་ལམ་ཞིག་བསྟན་སོང་།།
དབང་ཡོད་མིན་པའི་བཙན་ཤེད་ཅིག་གིས།།
དཔྱ་ཁྲལ་མིན་པའི་ལས་ཤིག་བཀལ་སོང་།།
ཡི་ག་མེད་པའི་སྡིངས་ཆའི་སྟེགས་ལ།།
ཤེད་དང་ཤུགས་ཀྱིས་སྐྱེལ་དོན་ཅི་ཡིན།།
ཀ་ཡིས་ཟེར་ན་གནས་ལུགས་ཡོད་འདྲ།།
ཁ་ཡིས་བརྗོད་ན་བདེན་ཚུལ་མཆིས་འདྲ།།
ངོ་ཤ་འགུལ་བའི་ཚིག་གདངས་འཇམ་པོ།།
ང་རང་བསྒྱེལ་བའི་གཤེད་མ་ཡིན་འགྲོ།
འཇོན་དང་ནུས་པའི་རྒྱུ་མཚན་བསྙད་དེ།།
སྐད་ཆ་འཇམ་པོའི་དབྱངས་ལ་དྲངས་ཏེ།།
རྐང་སྣེ་ཟིན་པའི་གླགས་དང་བསྟུན་ནས།།
མཁའ་ལ་གཡུག་བཞིན་ས་ལ་བརྡབས་སོང་།།
ཤུགས་རིང་ནར་ནར་སེམས་པ་སྐྱོ་སྐྱོ།།
སྙིང་རླུང་ལྡང་ལྡང་ཨུ་ཤུ་འཚུབ་འཚུབ།།
གློག་འབྲུག་ཐོག་གསུམ་འཁྲིགས་པའི་མཚན་མོར།།
ང་ཡི་གཉིད་ལམ་སྙི་ལས་ཤོར་འདྲ།།
མེ་ཏོག་འཐུ་བའི་སྐྱེད་ཚལ་ངོགས་ན།།
སྙེ་མ་རྒུམ་པའི་ཞིང་ཚིགས་བར་ན།།
རྐང་བ་ཐོགས་སའི་རྡོ་ཞིག་ཡོད་པ།།
བསམ་པའི་ཡུལ་དང་མཁའ་ལ་མ་དྲན།།
མ་བསགས་ལས་ལ་འཕྲད་པའི་དཔེ་མེད།།
བྱས་པའི་ལས་ཤིག་གྲོན་པའི་གཏམ་མེད།།
གང་བྱས་ལས་ལ་བཅོལ་བའི་གཤིས་དེ།།
སེམས་པ་སངས་པའི་སྨན་དུ་བསྟེན་ཡོད།།
༢༠༡༢ ལོའི་ཟླ་ ༨ ཚེས་ ༤ དགོང་མོར་རང་ཤག་ཏུ་ཡིད་མུག་མུག་ངང་བྲིས།
བླ་རྒན་བརླ་ཤ་བདག་པོ་ཡག་པོ་རྒྱག་རོགས་་་་་་་་་་་་་མ་ཤེས་ཤེས་མདོག་མ་བྱེད་ཨ་ཁུ་གློ་ངོ་་་་་་་་་་་་གྲོང་གསེབ་གླེན་ནག་ཅིག་གིས་ཤེས་ཚོད་མ་རེད་་་་་་་་་་རང་རྒྱུད་དུག་གསུམ་ཁེངས་བའི་གླད་ལོགམགོ་མེད་་་་་་་་་་