རྡོ་རྗེ་དབང་ཕྱུག་གིས།
མཁས་དབང་དགེ་འདུན་ཆོས་འཕེལ་ནི། ཡབ་རིག་འཛིན་རྣམ་རྒྱལ་དང་ཡུམ་པདྨ་སྐྱིད་གཉིས་ཀྱི་སྲས་སུ། བོད་རབ་བྱུང་བཅོ་ལྔ་པའི་ཆུ་མོ་ཡོས་(ཕྱི་ལོ་ ༡༩༠༣)ལོའི་ཧོར་ཟླ་ ༣ ཚེས་ ༢༣ ཉིན་མདོ་སྨད་རེབ་གོང་ནས་འཁྲུངས་ཤིང༌། དགུང་གྲངས་ཞེ་དགུ་བཞེས་པ་སྟེ། བོད་ལྕགས་ཡོས་(ཕྱི་ལོ་ ༡༩༥༡)ལོའི་ཟླ་ ༨ ཚེས་ ༡༤ ཉིན་བོད་ཀྱི་རྒྱལ་ས་ལྷ་ས་ནས་དགོངས་པ་རྫོགས།
དགུང་གྲངས་བཞི་པ་ནས་ཡི་གེ་འབྲི་ཀློག་ནས་དབུ་ཚུགས་འབྲེལ་སློབ་གཉེར་གྱི་མགོ་བརྩམས་ཤིང༌། སྔ་རྗེས་སུ་གཡའ་མ་བཀྲ་ཤིས་འཁྱིལ་དང༌། རྡི་ཚ་བཀྲ་ཤིས་ཆོས་ལྡྀངས། བླ་བྲང་བཀྲ་ཤིས་འཁྱིལ། འབྲས་སྤུངས་སྒོ་མང་བཅས་ནས་གཞུང་ཆེན་ཁག་ལ་ཐུགས་གཉེར་རྡོ་རུས་ཐུག་པ་གནང་སྟེ། རིག་པའི་གནས་མཐའ་དག་ལ་མཁས་པའི་རྒྱལ་ཐབས་བདག་གིར་མཛད་ཅིང༌། སྙན་པའི་གྲགས་པ་བོད་དབུས་སུ་ཆེས་ཆེར་རྒྱས་བཞིན་པའི་སྐབས་ན། འཕགས་ཡུལ་གྱི་ནང་པའི་པཎ་ཊི་ཏ་ར་ཧུ་ལ་ཞུ་བ་ཁོང་བོད་དབུས་སུ་གནའ་དཔེ་འཚོལ་བསྡུར་ཕེབས་པ་དེས། དགེ་ཆོས་ཀྱི་ཐུགས་རིག་དང་སྙན་པ་ཐོས་པས་ཡིད་འཕྲོག་འབྲེལ། རྒྱ་བོད་བར་ལོ་པཎ་མཁས་པ་མང་པོའི་རྒྱུ་འགྲུལ་གྱི་རྒྱུན་ཆད་ནས་ཡུན་རིང་སོང་བ་ཐུགས་ཀྱིས་མ་བཟོད་ནས། དམ་པ་འདིར་རྒྱ་གར་དུ་ཕེབས་བཞུད་ཀྱིས་ལེགས་སྦྱར་ལ་སྦྱངས་པ་མཛད་ནས་ལོ་ཙཱ་བ་ཞིག་གནང་རེ་དང་སྐུལ་མ་སྟབས་གཅིག་མཛད་པ་དང༌། ཁོང་ལའང་ཆུང་ངུ་ནས་ནང་པའི་ཕ་ས་འཕགས་པའི་ཡུལ་དུ་ཕེབས་བཞུད་ཀྱི་འདུན་པ་ཡོད་པ་གཉིས་གཅིག་ཏུ་བབ་འོག པཎ་ཊི་ཏ་དེ་ཉིད་ལས་ལེགས་སྦྱར་གྱི་སྐད་སྦྱོང་བའི་དབུ་འཛུགས་དང་བཅས་ཏེ། བལ་ཡུལ་བརྒྱུད་ཕྱི་ལོ་ ༡༩༣༤ ལོར་རྒྱ་གར་དུ་ཕེབས་ནས་ལེགས་སྦྱར་ཙམ་མ་ཡིན་པར། དབྱིན་ཡིག་དང་བཅས་པར་ཡང་ཐུགས་གཉེར་མཐའ་འཁྱོངས་གནང་བའི་འབྲས་བུར། ཕྱི་ནང་དང་གནའ་དེང་གི་རིག་གནས་གང་ཅིར་གཞན་འགྲན་བྲལ་བའི་མཁྱེན་པའི་ཀློང་བརྡོལ།
ཁོང་གི་སྙན་གྲགས་འཛམ་གླིང་གི་བོད་རིག་པའི་མཁས་པའི་ཁྲོད་བརྡལ་ཁྱབ་ཀྱི་དུས་སྐབས་ནི། ཁོང་སྐུ་གཤེགས་ནས་དུས་ཡུན་གང་འཚམ་སོང་བའི་རྗེས་ཏེ། དུས་རབས་སྔ་མའི་དུས་སྨད་དུ་འཛམ་གླིང་ཤར་ནུབ་དང་ལྷག་པར་གངས་རིའི་ལྗོངས་འདིར་སྔར་བས་སྙན་པ་རྒྱས་པ་བྱུང་ཡོད། དེ་ནི་ཁོང་གིས་མིང་དོན་མཚུངས་པའི་རྣམ་དཔྱོད་གཅིག་ཏུ་སྤུངས་གནང་བའི་གསུང་རྩོམ་ཁག་གི་བླ་ན་མེད་པའི་རིན་ཐང་ལ་བརྟེན་ནས་བྱུང་ཡོད། དེ་ཡང་འཛམ་གླིང་ལ་ཁ་ཕྱོགས་པའི་ཁོང་གི་རྟོགས་སད་ཀྱི་བསམ་བློ་གསར་པ་དང་ལྟ་བ་གསར་པར་ཀུན་གྱིས་གདེང་འཇོག་ཚད་མེད་ཞུས་པའི་རྨང་གཞི་བརྟན་པོ་ཞིག་གི་སྟེང་ནས་ཡོངས་སུ་རྒྱས་ཤིང༌། ད་ཕན་དགེ་ཆོས་གླེང་མཁན་མང་པོས། དུས་རབས་གསར་པའི་སྤྱི་ཚོགས་ཀྱི་སྣེ་ཁྲིད་པ་དང༌། བློ་འབྱེད་ཀྱི་མཁན་པོ། དུས་རབས་ཉི་ཤུ་པའི་ནང་སྔོན་རབས་མཁས་པ་དང་ལོ་ཙཱ་པའི་རྣམ་དཔྱོད་ལ་སྙེགས་པ་ལ་དགེ་འདུན་ཆོས་འཕེལ་ནི་ཕྱི་རབས་པ་ཀུན་གྱི་སྔ་ཐོག་ཏུ་བཞེངས་པ་ཞིག་ཡིན་པར་བཤད་དང་ཤོད་ཀྱིན་པ་འདི་རེད།
ཁོང་གིས་དགུང་གྲངས་བཅུ་གསུམ་གྱི་སྟེང་ནས་རྩོམ་པའི་ལས་མཛད་པ་དང༌། རིམ་པས་འཆད་རྩོད་རྩོམ་གསུམ་གྱི་བགྱི་བ་རྒྱ་ཆེར་སྤེལ་ཡོད་པ་ནི་མཁས་པར་ཁས་འཆེ་བ་དག་གི་རྩོམ་པ་དང་ཡེ་མི་མཚུངས་པ་སྟེ། གཞུང་ལུགས་ཀྱི་མཐིལ་མ་རྟོགས་པར་ཚིག་གི་ཟུར་ཙམ་ལ་འཇུས་ཏེ་ཁེངས་དྲེགས་ཀྱི་མགོ་འཕངས་མཐོ་བ་དག་རྣམ་དཔྱོད་རྩལ་གྱིས་བཅོམ་ཞིང༌། རྣམ་རིག་མཁྱེན་སྟོབས་ཀྱིས་དེང་རབས་ཚན་རིག་གི་དེ་ཉིད་ཚུན་བསྔོགས་པའི་བསྟན་དོན་བསྡུས་པའི་གསུང་རྩོམ་ཁག་གི་རིན་ཐང་ནི་ཕལ་བས་བློས་མི་དཔོག་པའི་ཚོད་དུ་ཡོད་པ་ཡིན་སྟབས། རྒྱལ་སྤྱིའི་བོད་རིག་པའི་ཞིབ་འཇུག་མཁས་པ་དང་ཉམས་ཞིབ་པའི་སྤྱི་ཚོགས་ནང༌། ཁོང་གི་མཛད་འཕྲིན་ལ་ཞིབ་འཇུག་དང༌། དགོངས་དོན་ལ་ཞིབ་འཇུག གསུང་རྩོམ་ལ་ཞིབ་འཇུག་སོགས་ཀྱིས་མཚོན་པའི་གོ་གནས་ངེས་ཅན་བཟུང་ཡོད་པ་ཙམ་མ་ཡིན་པར། དགེ་ཆོས་ཞིབ་འཇུག་ཅེས་ཞིབ་འཇུག་རྣམ་གྲངས་ཤིག་ཏུ་ངོས་འཛིན་གྱིས་ཞིབ་འཇུག་ཞུ་ཡུལ་དུ་བཞག་དང་འཇོག་བཞིན་པ་འདི་འདྲ་ནི་ཁོང་གི་སྐབས་སུ་བྱོན་པའི་མཁས་པའི་ཁྲོད་ནས་སུ་གང་མ་བྱུང་ནས་འདུག་པ་ལྟ་བུ་ཆགས་ཡོད། ཕྱོགས་གཞན་ཞིག་ནས་བཤད་ན། མཁས་དབང་དགེ་ཆོས་ཀྱི་སྤྲུལ་སྐུར་རེ་ཞིང་དེ་ལུགས་སུ་འཚང་ཁ་རྒྱག་མཁན་བཅུ་གྲངས་བརྒལ་བ་བྱུང་མྱོང་བའང༌། ཁོང་གི་རྣམ་དཔྱོད་དང་སྙན་པས་བཀུག་པ་ཞིག་ཡིན་པར་བཤད་ཆོག
དེ་ལྟར་ནའང༌། ཤེས་རབ་ཀྱི་རྩལ་ཡོངས་སུ་མ་རྫོགས་པའི་རང་རིགས་སྐྱེ་བོ་རེ་འགས་དམ་པ་འདིའི་གསར་གཏོད་ཀྱི་བསམ་བློ་དང༌། རྣམ་དཔྱོད་དང་མཛད་འཕྲིན་གྱི་མཐིལ་མ་རྟོགས་པར་གང་གི་མཛད་སྤྱོད་ཀྱི་ཟ་ཟུར་ཙམ་རེ་ལོག་པར་བཟུང་སྟེ། མ་རངས་པའི་ངན་སྨྲས་སྐྱོན་བརྗོད་བྱས་དང་བྱེད་བཞིན་པའང་ཡོད་མོད་ཀྱང༌། དུས་རབས་ཀྱི་རྗེས་ཟིན་པའི་བསམ་བློ་གསར་པའི་འདུ་ཤེས་འཛིན་སྟངས་དང༌། མཛད་སྤྱོད་རླབས་ཆེན་ལ་ཕོག་ཐུག་གཏོང་ཕོད་མཁན་ལ་ནི་སུ་གང་མ་བྱུང་ནས་འདུག འདི་ནི་དམ་པ་འདིར་སུ་གང་གིས་ཀྱང་འགྲན་དུ་མེད་པའི་མཁྱེན་རླབས་ཤིག་ཡོད་པས་རེད། ཚུལ་འདིར་དམིགས་འབྲེལ། དམ་པ་ཁོང་གིས། རོ་དང་མཚུངས་པའི་ལུས་པོ་འདི།། ག་དུས་ཤི་ཡང་མི་འགྱོད་དེ།། གསེར་དང་མཚུངས་པའི་རྣམ་དཔྱོད་འདི།། མཉམ་དུ་ཤི་ན་ཤིན་ཏུ་ཕངས།། ཞེས་ཀྱང་གསུངས་གནང་ངོ༌།།
ཁོང་གིས་སྐུ་ཚེ་ཐུང་ངུའི་དུས་ཡུན་ནང༌། རྒྱལ་ཁམས་རིག་པའི་བསྐོར་བའི་གཏམ་རྒྱུད་གསེར་གྱི་ཐང་མ་དང༌། བོད་ཆེན་པོའི་སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་པོ་སོགས་བོད་རང་སྐད་དུ་གསར་རྩོམ་མཛད་པ་དང༌། ཕྱོགས་མཚུངས་༼རཱ་མ་ནིའི་རྟོགས་བརྗོད་༽དང་༼བྱ་ལེན་མ་མངོན་པར་དགའ་བའོ་ཟློས་གར༽ ༼དམ་ཚིག་སྒྲོལ་མའི་སྐོར༽ ༼ནག་པོ་སྤྱོད་པའི་གླུ༽ ལྷོ་བརྒྱུད་པས་ནང་པའི་གསུང་རབ་ཀྱི་མཆོག་དམ་པར་བརྩི་བ་༼ཆོས་སུ་ཚིགས་སུ་བཅད་པ༽སོགས་བོད་སྐད་དུ་བསྒྱུར་བ་དང༌། དེ་བཞིན་འགོས་ལོའི་༼དེབ་སྔོན་༽དང༌། ༼རྒྱལ་སྲས་བྱང་ཆུང་སེམས་དཔའི་སྤྱོད་པ་ལ་འཇུག་པ༽བོད་ཡིག་ལས་དབྱིན་སྐད་དུ་བསྒྱུར་གནང་བ་བཅས་ཀྱི་ཆ་ནས། ཁོང་ནི་ཕྱི་རབས་པའི་ཁྲོད་ནས་གནའ་རབས་ཀྱི་ལོ་པཎ་མཁས་པའི་ཐུགས་དཀྱེལ་རྫོགས་པའི་མཁས་པ་ཞིག་ཡིན་པར་གླེང་མཁན་ཚོ་ཤིན་ཏུ་ནས་མད་པའང་ཡིན།
འདི་ལྟ་བུའི་རྣམ་དཔྱོད་དང་སྙན་པ་འབར་བའི་མཁས་པ་ཁོང་ནི་སྐུ་ཚེ་ཐུང་ངུ་ཞིག་ལས་བཞུགས་མེད་ཅིང༌། ཐུང་ངུ་དེ་ཡང་འཚོ་གནས་ཀྱི་དཀའ་སྡུག་སྣ་ཚོགས་ལ་གདོང་ལེན་གྱི་མུར་བཞུགས་པའི་མཁས་པ་ཉམ་ཐག་ཅིག་ཡིན་ནའང༌། ཁོང་གིས་བོད་མི་རིགས་དང༌། རྒྱལ་ཁབ་ཀྱི་མངའ་ཐང༌། བཙན་པོ་རིམ་བྱོན་གྱི་བྱས་རྗེས་ཀྱི་རི་མོ་དག་འབད་པས་བཙལ་ཞིང༌། གང་བཙལ་ནས་རག་པ་དེ་དག་ཀྱང་ཚིག་དོན་གཉིས་ཐད་ནས་ཞུན་མཐར་གཏུགས་པའི་༼རྒྱལ་རབས་དེབ་ཐེར་དཀར་པོ༽ནི་ཁོང་ཉིད་བོད་མི་རིགས་དང་རྒྱལ་ཁབ་ལ་ལྷད་མེད་ལྷག་བསམ་ལྡན་པའི་དན་རྟགས་སུ་བགྲངས་ནས་རང་ཉིད་དག་འབུལ་གང་ཡོད་གནང་ཡོད་ནའང༌། མཐའ་མ་དེར། ཁོང་ལ་ཉེས་མེད་ཉེས་འཛུགས་དང་བཙོན་འཇུག་གིས་མཚོན་པའི་མནར་གཅོད་ཐེབས་འོག རྩོམ་པ་འཕྲོ་ཅན་དུ་ལུས་པའི་རྒྱལ་རབས་ཀྱི་མཇུག་བསྡུར། “རང་སྡེའི་རིགས་ལ་ཞེན་པ་དཀར་པོའི་མདངས།། རང་བྱུང་སྙིང་གི་དབུས་ན་གནས་པ་འདི།། རང་རིགས་ཁ་བ་ཅན་གྱི་རྗེ་འབངས་ལ།། རང་གི་ནུས་པས་སྲི་ཞུ་ཅུང་ཟད་བསྒྲུབས།།” ཞེས་དང༌། “ངའི་ཕ་གཞིས་འདི་ཁྱོད་ཀྱིས་ཉར་དགོས”་ཞེས་སྐབས་དེའི་གཞུང་འཛིན་པ་ཁག་ཅིག་ནས་ཕྱིར་སྩོལ་གནང་བའི་གསུང་རྩོམ་ཁག་རང་གི་བུ་སློབ་དད་དམ་དང་ལྡན་པ་ཧོར་ཁང་བསོད་ནམས་དཔའ་འབར་མཆོག་ལ་ཞལ་ཆེམས་དང་བཅས་ཞི་བར་མནལ། དེ་བས་ན་འདིར། མཁས་དབང་དགེ་ཆོས་དང་ལྷན་དུ་ཁོང་གི་གསུང་རྩོམ་ཁག་ཕྱི་རབས་པའི་མིག་རྒྱན་དམ་པར་སྤྱི་འགྲེམས་གནང་མཁན་ཞིང་གཤེགས་ཧོར་ཁང་བསོད་ནམས་དཔལ་འབར་མཆོག་ལའང་སྟབས་གཅིག་ཏུ་བཀའ་དྲིན་རྗེས་དྲན་ཞུའོ།། །།