རྫུན་ཁུང་རང་རྡིབ་ཀྱི་དྲི་བ་བདུན་ལ་དགག་གཞག་ཀེ་ཏ་ཀ

ཐུབ་བསྟན་ལུང་རིགས། ༼ བཀའ་ཟུར། ༽

༄༅། ། ཆོས་མེད་རིང་ལུགས་ཙམ་དུ་མ་ཟད། ཆོས་ལ་དུག་དུ་ལྟ་བ་རབ་ཏུ་བྱུང་བར་རྐུན་མ་དམར་པོ་དང། བླ་མ་སྤྲུལ་སྐུར་ཇག་པ་སེར་པོའི་མིང་འདོགས་མཁན་གྱི་རྒྱའི་དབང་འཛིན་པས་ཆོས་བཤད་བྱས་པ་ནི་འུག་པ་ཆོས་བཤད་ཀྱི་དཔེ་ལྟར་ལ། ལན་བྱ་བ་དོན་ཡོད་པར་མ་མཐོང་ཡང། ༧རྒྱལ་དབང་ལྔ་བ་ཆེན་པོས། བྱང་བསྟན་ཕུག་པར་རྟ་ལྗང་ཅན་གྱི་ཟེར།། མི་འཇུག་དངོས་པོའི་གཤིས་ལ་བཅོས་མེད་ཀྱང།། ཕྱོགས་གཞན་བུག་པར་ཤར་བའི་སྣང་བ་ཡིས།། འཐིབས་བུའི་སྨག་རུམ་སེལ་བ་འགའ་བྱུང་སྙམ།། ཞེས་གསུངས་པ་བཞིན་ཞི བའི་མི་མང་མགོ་བོ་མི་རྨོངས་ཆེད་དགག་གཞག་ཀེ་ཏ་ཀ་འདིས་དྭངས་བར་བྱེད་ལ་སྤྲོ་བ་ཡིན།

དེ་ཡང་མི་སྒེར་དང་ཁྱིམ་ཚང། རྒྱལ་ཁབ་བཅས་སུ་ཡ་རབས་བཟང་སྤྱོད་རྒྱུན་འཁྱོངས་ཁྱབ་བརྡལ་བྱ་རྒྱུ་ནི་བོད་ཀྱི་ནང་ཆོས་ཚུད་པའི་འཛམ་གླིང་ཆོས་ལུགས་ཁག་ཚང་མའི་གཞི་རྩའི་དམིགས་འབེན་ཡིན་ལ། བོད་མི་རིགས་ནི་དམིགས་འབེན་འདི་ཉིད་དོན་དངོས་ལག་ལེན་གྱི་ཡང་རྩེར་སོན་པའི་མི་རིགས་ཤིག་ཆགས་ཡོད། ༢༠༠༩ ལོ་ནས་བོད་མི་ཚོས་རང་ལུས་གཞོམ་སྲེག་གིས་བོད་ཀྱི་བདེན་དོན་འཐབ་རྩོད་དང། བོད་མིའི་བསྒྲུབ་བྱའི་རང་དབང་གི་སྙིང་པོར་གྱུར་པའི་༧གོང་ས་མཆོག་བོད་དུ་གདན་འདྲེན་ཞུ་རྒྱུ་བཅས་ནི་བོད་མི་རིགས་འགྲོ་བ་མི་གྲལ་དུ་ཡུན་གནས་རྟག་བརྟན་དང། དེའི་ཚེ་སྲོག་གི་གཞི་རྩར་ངོས་འཛིན་གནང་བ་ནི་བོད་མི་རིགས་ཀྱི་བྱུང་རབས་ལོ་རྒྱུས་ནང་དེ་སྔ་བྱུང་མྱོང་མེད་པའི་རླབས་ཆེན་གྱི་ལེའུ་གསར་པ་ཞིག་ཏུ་གྱུར་ཡོད།

མི་སུ་ཞིག་ཡིན་ནའང་གཞན་གྱིས་བཙན་གནོན་དང། རྡུང་རྡེག་བཅས་ཀྱི་མནར་གཅོད་ཚད་ལས་བརྒལ་བ་བཏང་ན། དེ་ལ་སུ་རྒྱལ་སུ་ཕམ་གྱི་གནས་སྟངས་ཐག་གིས་གཅོད་པ་ཆོས་ཉིད་ཡིན་ནའང། ༧གོང་ས་མཆོག་གི་ལྟ་དགོངས་སྤྱོད་གསུམ་རྩ་བར་འཐིམས་པའི་བོད་ཀྱི་རིག་གནས་དང་། དེས་བཞེངས་པའི་བོད་མི་ཚོས་དེ་ལས་ལྡོག་སྟེ་རྒྱ་ནག་གཞུང་གིས་བོད་ཐོག་གསོད་གཏུབ་བཙོན་འཇུག སྙིང་ཕྱུངས་བ། རྒྱུ་མ་འདོན་པ། མིག་འབྲུ་བ། བཙན་གཡེམ་བྱེད་པ། སྦྲུམ་མ་དམར་བཤག་བྱེད་པ། གསོན་སྦས་བྱེད་པ། ཕ་མ་གསོན་སྦས་སྟེང་བུ་ལ་གར་འཁྲབ་དུ་བཅུགས་པ། ལྕེ་དང་ཕོ་མཚན་གཅོད་པ་སོགས་འགྲོ་བ་མིའི་ལོ་རྒྱུས་ནང་བྱུང་མ་མྱོང་བའི་ཀླ་ཀློ་དང་འདྲེ་སྲིན་དངོས་ཀྱི་བྱ་སྤྱོད་ལག་ལེན་བསྟར་ཡང། དེ་ལ་སེན་འབྲེད་ཙམ་གྱིས་འཚེ་བ་བྱེད་པ་ལྟ་ཅི། ཁོང་ཚོས་རང་གི་སྐུ་ལུས་ལ་མེ་བགོས་ཏེ་རྒྱ་ནག་གཞུང་གི་ཀླ་ཀློའི་སྤྱོད་པ་དེ་དག་མཚམས་འཇོག་ཡོང་བའི་སྐུལ་མ་གནང་བ་ནི་ཅི་འདྲའི་རིན་ཐང་བྲལ་བ་ཞིག་མ་རེད་དམ།

ནང་ཆོས་ཀྱི་ཐུན་མོང་མ་ཡིན་པའི་ཉམས་ལེན་བདག་གཞན་མཉམ་བརྗེ་སྟེ། གཞན་གྱི་སྡུག་བསྔལ་རང་གིས་ལེན་པ་དང་རང་གི་དགེ་བ་གཞན་ལ་གཏོང་བ། རང་ལ་གསོད་རྡུང་གཏུབ་གསུམ་བྱས་ཀྱང་གསོད་མཁན་ལ་མ་བཞིན་ལྟ་བའི་རྒྱལ་སྲས་སེམས་དཔའ་ཆེན་པོ་དེ་དག་གི་སྤྱོད་པ་དང་རྦད་དེ་གཅིག་མཚུངས་མ་རེད་དམ། བོད་མི་ཚོའི་དེ་ལྟ་བུའི་ཚེ་སྲོག་བློས་གཏོང་གི་ཚ་རླབས་དེས་འཛམ་གླིང་དང། པེ་ཅིང་ཀྲུང་ཧན་ཧའེ་བཅས་འདུག་བཟོད་ཁྱོན་ནས་མ་བདེ་བ་བཟོས་འཕྲལ། རྒྱ་ནག་གཞུང་གིས་བརྒྱུད་སྐུལ་བྱས་པའི་༧ཏཱ་ལའི་བླ་མར་བཏོན་པའི་དྲི་བ་བདུན་གྲགས་པ་འདི་ངོ་ཚ་ཞིང་ཡ་ང་བའི་ངང་འདོན་དགོས་བྱུང་འདུག་པས།

དྲི་བ་དང་པོའི་ལན། བོད་མི་ཚོས་རང་སྲེག་མི་གཏོང་མཐུ་མེད་བྱུང་བ་ནི་རྒྱ་ནག་གཞུང་གི་བྱེད་བབ་ཉག་ཅིག་ཡིན།

སྐད་ཆའི་འགོ་བཙུགས་མ་ཐག་རྫུན་གཏམ་ཁུང་བརྡོལ་བ་ནི་”༢༠༡༢ལོའི་ཟླ་༢ཚེས་༢༢ཉིན། ཏཱ་ལའི་ཡིས་རྒྱ་གར་གྱི་རྡ་རམ་ས་ལ་ནས་ཞོགས་པའི་སྨོན་ལམ་འཚོགས་ཤིང་། བོད་མི་རྣམས་ལ་རང་སྲོག་གཏོང་མཁན་རྣམས་ལ་བསྔོ་བ་སྨོན་ལམ་ཞུ་དགོས་པ་ལས་ལོ་གསར་མི་གཏོང་བའི་འབོད་སྐུལ་བྱས།”ཟེར་བ་འདི་རེད། ༢༠༡༢ ། ༢ །༢༢ ། ཉིན་སྟེ་ཆུ་འབྲུག་ལོ་གསར་ཚེས་གཅིག་ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་རྒྱུན་གྱི་ཆོས་ཕྱོགས་ཀྱི་མཛད་སྒོ་ཚུགས་ཏེ། ཚོགས་ལངས་གྲུབ་མཚམས་༧གོང་ས་མཆོག་ཕོ་བྲང་དུ་ཆིབས་བསྒྱུར་གནང་བ་ཀུན་གྱིས་དངོས་དང་བརྒྱུད་པས་མཇལ་ཡོད། ཉིན་དེར་བོད་མི་ཙམ་མ་ཟད་ཨིན་ཇི་བ་སོགས་སེར་སྐྱ་མི་མང་ ༢༠༠༠ ལྷག་གིས་ཀྱང་༧གོང་ས་མཆོག་གིས་ཉིན་དེར་ལོ་གསར་མི་གཏོང་རྒྱུར་བཀའ་སློབ་ཚིག་གཅིག་གསན་རྒྱུ་ཕར་ཞོག སྐབས་དེའི་ལོ་གསར་གྱི་ཆོས་ཕྱོགས་མཛད་སྒོའི་ཐོག་༧གོང་ས་མཆོག་གིས་ཆོས་སྲིད་གང་ཐད་ཀྱི་བཀའ་སློབ་གཅིག་ཀྱང་གསུངས་མེད་བཞིན། རྒྱ་གཞུང་གིས་རྫུན་གཏམ་འདི་ལྟར་སྨྲ་རྒྱུའི་ཧམ་པ་དང་སྨྱོ་བཤད་འདི་ཅི་ཞིག་ཡིན་ནམ། གསུངས་ཡོད་ན་དེ་ལྟར་གསུངས་པའི་ཁུངས་གང་དུ་ཡོད་དམ། འདིར་མི་འདྲེན་པའི་རྒྱུ་མཚན་ཅི་ཞིག་ཡིན། བོད་མི་རང་གི་གོམས་སྲོལ་ལ་ནང་མི་གཉེན་ཉེ་འདས་གྲོངས་སུ་ཕྱིན་པ་ཡིན་ན་ལོ་དེར་མྱ་ངན་མི་བྱེད་པར་ལོ་གསར་གཏོང་བའི་སྲོལ་རྒྱུན་ཡོད་པ་རྒྱ་ནག་གཞུང་གིས་གང་དུ་མཐོང་སོང་ངམ། དེ་འདྲའི་གནས་ཚུལ་ཐབས་རྡུག་འབྱུང་བཞིན་དུ་སྲོལ་ལུགས་ལ་ཁ་གཡར་སྟེ་དགའ་དགའ་སྤྲོ་སྤྲོ་བྱེད་པ་བྱུང་ན། དངོས་འབྲེལ་ཁྱེད་ཚོས་ཟེར་བ་བཞིན་མཆིལ་མ་དོར་དགོས་པ་ཞིག་ཡིན།

ད་ལོར་ལོ་གསར་དགྱེས་སྟོན་ཚབ་ལ་མྱ་ངན་བྱས་པ་ནི་བོད་མི་ཚོས་རང་གི་མི་རིགས་དང་རིག་གཞུང་གི་ཆེད་དུ་རང་སྲེག་བཏང་སྟེ་བདེན་དོན་རྩད་པས་རེད། བོད་མི་ཚོས་སྐུ་ལུས་མེ་ལ་སྦར་བཞིན་ཞལ་ནས་ཅི་ཞིག་འབོད་ཀྱི་འདུག་གམ། མེ་ཕུང་དམར་པོའི་ཀློང་དུ་སྨོན་པ་ཅི་ཞིག་འདོན་གྱི་འདུག་གམ། དེ་དག་རྒྱ་ནག་གཞུང་གིས་མཁྱེན་ཨེ་ཡོད། ཁོང་ཚོས་༧གོང་ས་མཆོག་གི་དགོངས་གཞིའི་སྙིང་པོ་འཇིག་རྟེན་ཞི་བདེ་དང། ཡུན་རིང་ཐུགས་སྨོན་གནང་པའི་རྒྱ་བོད་འཆམ་མཐུན་གྱི་གཞི་རྩ་དམ་དུ་བཟུང་སྟེ། བོད་མིའི་ཁྱད་ནོར་ ༧གོང་ས་མཆོག་རྒྱང་འབོད་བྱེད་པ་དང་། ༧གོང་ས་མཆོག་རང་གི་ཕ་ཡུལ་དུ་གདན་འདྲེན་ཞུ་དགོས་པའི་རེ་འདུན་དམར་ལྷབ་ལྷབ་ཞུ་བཞིན་པ་དག་ལ་ཤུལ་ལུས་བོད་མི་ཡོད་དོ་ཅོག་གིས་ཅིས་ཀྱང་མྱ་ངན་ཞུ་འོས་པ་ཞིག་ལོས་ཡིན།

མཚམས་འདིར་ཚོར་བ་ཆེན་པོའི་ཐོག་དྲི་བ་གཏོང་འདོད་པ་ནི་བོད་མི་དཔའ་བོ་དཔའ་མོ་འདི་དག་གིས་བཏོན་པའི་རེ་འདུན་རྡོག་པོ་དེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བའི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་གང་ལ་འགལ་འདུག་གམ་ཞེས་པ་འདི་ཡིན།

བོད་མི་ཚོ་ཅིའི་ཕྱིར་གཞི་རྩ་མེད་པ་དང་དངོས་ཡོད་གནས་ཚུལ་དང་མི་མཐུན་པའི་ཀླ་ཀློའི་སྲིད་བྱུས་འོག་དུས་རབས་ཕྱེད་ཀ་ལྷག་གནས་དགོས་བྱུང་བ་རེད། བོད་མི་ཚོ་ཅིའི་ཕྱིར་མི་རུ་མ་བརྩིས་པ་རེད། འདི་ལྟར་བསམ་ཞིབ་བྱས་འོང་དུས། རྒྱ་ནག་གཞུང་གིས་བོད་མི་རྣམས་མི་གྲལ་དུ་མ་བཞག་པས་བོད་མིས་རང་སྲེག་བཏང་བ་རེད་ཅེས་སྐད་གསེང་མཐོན་པོས་བཤད་ཆོག

སྔོན་ཁྱེད་ཚོའི་ལེའུ་ཧུའུ་ལན་དང་ཏུང་ཚོན་རུས་སོགས་ཀྱིས་རང་སྲོག་བློས་བཏང་རྗེས་དཔའ་བོ་དཔའ་མོ་ཞེས་མིང་བཏགས། འདྲ་འབག་རྡོ་རིང་བཞེངས། སྦྱར་པར་བཀྲམས། སློབ་མའི་སློབ་དེབ་ཚུན་ཆད་དུ་བཀོད་དེ་མི་རིགས་ཆེན་པོའི་རིང་ལུགས་ཀྱིས་རྒྱ་ནག་གི་གནམ་སའང་ཁ་སྦྱར་གྲབས་བྱས་པ་དེ་ལས། བོད་མི་ཚོས་བོད་རྒྱ་གཉིས་ཕན། འཇིག་རྟེན་ཞི་བདེ་བཅས་ལ་འགན་འཁུར་བའི་ཐོག་ནས་རང་སྲོག་བློས་བཏང་གནང་བ་དག་ལ་མྱ་ངན་རྗེས་དྲན་བྱེད་མི་ཆོག་པ་ཅི་ཞིག་ཡིན་ནམ། མི་རིགས་དང་བདེན་དོན་གྱི་ཆེད་དུ་གཅེས་སྲོག་བཏང་བ་འདྲ་མཉམ་ཡིན་ན་ང་ཚོས་ཅིའི་ཕྱིར་མྱ་ངན་ཙམ་ཡང་ཞུ་མ་ཆོག་པ་རེད། རེབ་འདིར་ལོ་གསར་མི་གཏོང་བ་ནི་དྲིན་དྲན་པ་དང་གསབ་པ། བྱས་པར་ཡི་རངས་བྱེད་པ་སོགས་བོད་ཀྱི་རྒྱུ་འབྲས་རིག་གནས་ཀྱིས་བསྐྱེད་པའི་རྒྱུན་ལྡན་གྱི་བསམ་སྤྱོད་བསྒྱུར་ཏུ་མེད་པ་ཞིག་ཡིན་པ་རྒྱ་ནག་གཞུང་གིས་ཤེས་རྟོག་མེད་པ་ག་ལ་སྲིད།

དོན་སྙིང་༧གོང་ས་ཏཱ་ལའི་བླ་མ་མཆོག་ནས་གལ་ཏེ་རང་སྲོག་གཏོང་རྒྱུའི་བཀའ་ཟུར་ཙམ་ཞིག་ཕེབས་པའི་དབང་དུ་བཏང་ན། རི་ཉིལ་བ་ཐག་པས་མི་འདུམ་པའི་དཔེ་ལྟར་ཆགས་རྒྱུ་ལས། ད་ལྟ་བཞིན་རྒྱལ་གཅེས་པའི་ཕུང་པོ་ཁྱེད་ཚོས་སྦས་སྐུང་དང་བཙན་གཉེར་བྱེད་པ་སྤྲོས་བྲལ་ཡིན།

དྲིས་ལན་གཉིས་པ། ༧གོང་ས་མཆོག་གིས་རང་སྲེག་བྱུང་རྐྱེན་ངོས་འཛིན་གནང་བ་ནི་རྦད་དེ་དངོས་བྱུང་ཇི་བཞིན་གསུངས་པ་རང་རེད།

༢༠༡༡ ལོའི་ཟླ ༡༡ ཚེས ༧ ཉིན༧གོང་ས་མཆོག་གིས་ཉི་ཧོང་དུ་1″ངོས་སྒེར་གྱི་བསམ་ཚུལ་ལྟར་ན་བོད་མི་ཚོས་རང་ལུས་མེར་སྲེག་བཏང་བ་དེའི་ཆབ་སྲིད་དང་ཆོས་ཕྱོགས། དེ་བཞིན་ལྟ་གྲུབ་ཀྱི་རྒྱབ་ལྗོངས་བཅས་ལ་བསམ་ཞིབ་ནན་པོའི་ཐོག་ནས་ལྟ་དགོས་པ་ཡིན། རྒྱ་ནག་གཞུང་གིས་བོད་ལ་ལོ་ངོ་དྲུག་ཅུ་ལྷག་ཙམ་རིང་དབང་བསྒྱུར་བྱས་པའི་དོན་དངོས་གནས་སྟངས་གང་འདྲ་ཡིན་མིན་དོན་རྐྱེན་དེ་དག་ནས་གསལ་པོར་རྟོགས་ཐུབ། འུ་ཐུག་ཐབས་ཟད་ཀྱིས་རང་ལུས་མེར་སྲེག་བཏང་བའི་བྱ་སྤྱོད་དེ་ལ་བརྟེན་ནས་བོད་མི་ཚོས་རང་དབང་དང་དྲང་བདེན་རྩོད་བཞིན་ཡོད་པ་དང། རྒྱ་ནག་གི་དཔོན་རིགས་ཚོས་དོན་རྐྱེན་དེ་དག་ཛ་དྲག་ལ་བརྩིས་ཏེ་བོད་མི་ཚོའི་དཀའ་ངལ་སེལ་ཐབས་བྱེད་དགོས་པ་དང། བོད་ཀྱི་དངོས་ཡོད་གནས་སྟངས་ཁས་ལེན་བྱེད་དགོས་པ་རེད”ཅེས་གསུངས་ཡོད་ཀྱང་། ད་བར་བོད་ནང་གི་དངོས་ཡོད་གནས་སྟངས་དང་མངོན་འདོད་བཅས་པར་རྒྱ་ནག་གཞུང་རང་ངོས་ནས་ཞིབ་འཇུག་བྱེད་རྒྱུ་ཕར་ཞོག རང་དབང་ཅན་གྱི་ཚོགས་སྡེ་གཞན་ལའང་ཞིབ་འཇུག་བྱེད་དུ་མི་འཇུག་པའི་རྒྱུ་མཚན་ཅི་ཞིག་ཡོད།

གཞན་དུ་སྐབས་འདིར་ཁོང་ཚོས་རང་ནོངས་ཐོད་དུ་བླངས་ནས་སྨྲས་པ་ལྟར་བོད་ཀྱི་རིག་གནས་རྨེག་མེད་གཏོང་མཁན་ནི་རྒྱ་ནག་གཞུང་རང་ལས་གཞན་དུ་འཇོག་རྒྱུ་མེད། རྒྱ་ནག་གཞུང་གིས་བོད་བཙན་ཟོས་བྱས་པ་ནས་གཡོ་ཧམ་དྲག་སྤྱོད་ལ་བརྟེན་ཏེ་བོད་མིའི་རིགས་རུས་དང་སྐད་ཡིག དད་མོས་སེམས་ཁམས་སོགས་བོད་ཀྱི་ངོ་བོ་རྩ་མེད་གཏོང་བའི་གཡོ་བྱུས་ལ་འགྱུར་བ་གང་ཡང་ཕྱིན་མེད་མོད་། ད་དུང་སུ་ཞིག་གིས་བོད་ཀྱི་རིག་གནས་རྩ་མེད་བཟོ་བཞིན་འདུག་ཅེས་ལྡོག་འདྲི་འདི་འདྲ་བྱེད་རྒྱུར་རྒྱ་ནག་གཞུང་གི་ཁོག་ལ་དྲན་ཡང་ཁ་ནས་ཅི་ལྟར་ཤོར་སོང་ངམ།

བོད་བརྒྱུད་ནང་བསྟན་གྱི་གཞི་རྟེན་དུ་གྱུར་པའི་བོད་ཀྱི་རིག་གནས་ནི་གོ་ལ་ཆེན་པོའི་སྣོད་བཅུད་ཀྱི་ཞི་བདེར་མེད་དུ་མི་རུང་བ་ཞིག་ཡིན་པ་དེར་རྒྱ་གཞུང་གིས་བསམ་བཞིན་འཁྱོག་བརྗོད་ཅི་ལྟར་བྱས་ཀྱང། འཇིག་རྟེན་ཁམས་ཀྱི་གཟུར་གནས་ཚན་རིག་པ་དང་མཁས་པ་དག་གིས་བོད་ཀྱི་རིག་གནས་འདི་བཞིན་ཆེས་མཆོག་ཏུ་གྱུར་པ་ཞིག་ལ་གདེང་འཇོག་གནང་གི་ཡོད་པ། དཔེར་ན། ༧གོང་ས་མཆོག་འཛམ་གླིང་ཤར་ནུབ་ཀྱི་རྒྱལ་ཁབ་གང་དུ་ཕེབས་ཀྱང་མི་ཚོགས་ས་ཆེན་པོ་གཡོ་བ་ལྟར་འདུ་འཛོམས་འབྱུང་གི་ཡོད་པ་ནི། ཁོང་གི་ཞལ་ཞེ་གཉིས་མེད་ཀྱི་སྤྱིར་འཇིག་རྟེན་ཡོངས་དང། བྱེ་བྲག་བོད་རྒྱ་གཉིས་སྨན་གྱི་དགོངས་གཞི་དགོངས་པ་བོད་ཀྱི་ཆོས་དང་རིག་གནས་ཀྱི་འགུག་ཤུགས་ལ་བརྟེན་ཏེ་བྱུང་བ་ཡིན་པ། ༧གོང་ས་མཆོག་གི་ཞལ་སྔ་ནས་ཀྱང་3″རིམ་པས་ནང་ཆོས་སློབ་གཉེར་བྱས་པས་རྟེན་ཅིང་འབྲེལ་བར་འབྱུང་བ་དང་མཐའ་མེད་པའི་སྙིང་རྗེ་བཅས་ཀྱི་ལྟ་གྲུབ་ལ་གོ་རྟོགས་འཕེལ་བའི་དབང་གིས་ཀུན་ཁྱབ་ཀྱི་སེམས་ཁུར་དང༌། འཚེ་བ་མེད་པ། ཆོས་ལུགས་མཐུན་ལམ་བཅས་ཀྱི་གལ་འགངས་ཤེས་རྟོགས་བྱུང༌། ལྟ་གྲུབ་གྱི་རྒྱུ་མཚན་འདི་དག་ལ་བརྟེན་ནས་ངས་མིའི་གཞི་རིམ་གྱི་བཟང་སྤྱོད་སྤེལ་རྒྱུའི་འབད་བརྩོན་མུ་མཐུད་བྱེད་ཀྱིན་ཡོད། ཐབས་ཚུལ་འདིས་དཀའ་ངལ་ཧ་ཅང་ཆེ་བའི་བོད་མི་རིགས་ཀྱི་འཐབ་རྩོད་ཀྱང་འཚེ་མེད་ཞི་བའི་ལམ་ནས་བྱེད་ཐུབ་པའི་ལམ་སྟོན་ཐོབ་བྱུང༌།” ཞེས་གསུངས་ཡོད།

དྲི་བ་གསུམ་པའི་ལན། བོད་རྒྱ་གཉིས་ལོ་རྒྱུས་སྟེང་མཆོད་ཡོན་གྱི་འབྲེལ་བ་མིན་ན་གང་ཡིན།

ལོ་རྒྱུས་ཀྱི་དངོས་བྱུང་ཇི་བཞིན་སྨྲ་རྒྱུ་ནི་༧གོང་ས་མཆོག་གིས་འཇིག་རྟེན་ཁྱོན་ཡོངས་ལ་བཅངས་བའི་དྲང་བདེན་གྱི་ཆ་ཤས་ཤིག་ཡིན་པས། མན་ཇུ་དང་བོད་བར་ལབ་ནའང་འདྲ་ལ། གསེར་བུམ་དཀྲུག་འདོན་གྱི་བྱུང་ཚུལ་ནས་བཤད་ནའང་འདྲ། གང་ལྟར་རྒྱ་བོད་མཆོད་ཡོན་གྱི་འབྲེལ་བ་ནི་ལོ་རྒྱུས་ཀྱི་དོན་དངོས་ཤིག་ཡིན་པས། དེར་བསྒྱུར་བཅོས་བྱ་མི་ཐུབ་པ་དང་། ད་བར་ཡང་ནས་བསྐྱར་དུ་རྒྱུ་མཚན་ཁུང་ལུང་ཏན་ཏིག་དང་བཅས་རྒྱ་གཞུང་གི་ཞལ་དུ་ཅི་ལྟར་བསྟབས་ཀྱང། རྫུན་མ་སྟོང་བཟློས་ཀྱིས་སུན་སྣང་ཡེ་ནས་མེད་ཚོད་ལ་ལྟོས་ན་སྐབས་འདིར་བྱུང་བ་ངོ་སྤྲོད་བྱ་རྒྱུ་ལས་དྲི་བ་འགའ་བཏང་བར་འདོད་དེ། མན་ཇུ་དང་བོད་ཀྱི་མཆོད་ཡོན་སྐོར་ཅུང་ཙམ་སྤྲོ་བ་ལ།

ཆིང་ངམ་མན་ཇུ་དང་བོད་གཉིས་མཆོད་ཡོན་གྱི་འབྲེལ་བ་མིན་ན་མན་ཇུའི་གོང་མ་ལྷ་སྐྱོང་ངམ་གོང་མ་ཆན་ལུང་སྲིད་དབང་དར་རྒྱས་རྩེ་མོར་སོན་སྐབས་༧རྒྱལ་མཆོག་སྐུ་ཕྲེང་བརྒྱད་པར་ཕུལ་བའི་གཡང་ཀྲིའི་མཇའ་སའི་ནང་། ༧གོང་ས་མཆོག་གི་མཛད་པར་ཆེ་བརྗོད་དང་བསྟོད་བསྔགས་ཚད་མེད་གནང་འདུག་པ་མ་ཟད། ” སྐུ་གོང་མ་ཏཱ་ལའི་བླ་མའི་ལུགས་སྲོལ་བཞིན་ཐུགས་བསྐྱེད་རྒྱ་གང་ཆེ་དང་། སྨོན་འདུན་བཟང་པོས་ཁྱད་འཕགས་ཀྱི་སྒོ་ནས་ཆབ་སྲིད་སྐྱོང་བ་དང་། འགྲོ་བ་ཀུན་ལ་ལེགས་ཚོགས་སྩལ་ཏེ་”ཞེས་མན་ཇུས་བདག་སྐྱོང་བྱས་ཡོད་ན། ༧གོང་ས་སྐྱབས་མགོན་ཆེན་པོར་ཆབ་སྲིད་སྐྱོང་རྒྱུ་ཞིག་གང་ནས་ཡོང་ངམ།

མན་ཇུའི་ཆན་ལུང་གི་རྗེས་སུའང་ ༡༨༤༤ ལོར་བོད་རྗེ་སྲིད་སྐྱོང་ཚེ་སྨོན་གླིང་ངག་དབང་འཇམ་དཔལ་ཚུལ་ཁྲིམས་ཁྲི་བཤོལ་ཚབ། གནས་སྐབས་རིང་པཎ་ཆེན་བསྟན་པའི་ཉི་མས་ཆབ་སྲིད་བསྐྱངས་པ་དང་། ༡༨༦༢ ལོར་བོད་རྗེ་རྭ་སྒྲེང་དང་དགའ་འབྲས་འགལ་ཟླ་བྱུང་རྗེས། བཤད་སྒྲ་དབང་ཕྱུག་རྒྱལ་པོར་བོད་ཀྱི་སྡེ་སྲིད་བསྐོས་པ། སྲིད་སྐྱོང་དེ་མོ་ཧོ་ཐོག་ཐུ་ལས་ཁུར་དགོངས་པ་ཞུས་མཚམས། གཞུང་འབངས་སེར་སྐྱ་སྤྱི་མགྲིན་ནས་གསོལ་བ་བཏབས་པ་ལྟར་༡༨༩༥ ལོར་༧གོང་ས་བཀའ་དྲིན་ཟླ་མེད་བཅུ་གསུམ་པ་ཆེན་པོས་གངས་ལྗོངས་ཆོས་སྲིད་ཀྱི་ཐུགས་འགན་བཞེས་པ་སོགས་བོད་ཀྱི་ཆབ་སྲིད་ཀྱི་གནད་དོན་གལ་ཆེའི་རིགས་འཕོ་འགྱུར་སྐབས་བོད་གཞུང་མང་གིས་རང་ཐག་བཅད་པ་ལས་མན་ཇུས་ཐེ་བྱུས་སྤུ་ཙམ་བྱས་མེད་པ་ལས་ཀྱང་རྟོགས་ཐུབ་བོ།

དེ་བཞིན་སྐབས་དེའི་བོད་ཀྱི་ཕྱི་སྲིད་ཐད་ནས་ཀྱང་༡༨༥༨ མན་ཇུ་དང་ཨིན་ཇིའི་བར་བཞག་པའི་ཆིངས་ཡིག་ནང་དུའང། ཨིན་ཇི་བོད་ནང་འགྲུལ་བསྐྱོད་ཆོག་པའི་ཐོབ་ཐང་སྤྲད་དོན་ལྟར། ༡༨༨༥ ལོར་ཨིན་ཇིའི་མི་སྣ་གམ་པ་རྫོང་དུ་འབྱོར་སྐབས་བོད་གཞུང་གིས་མན་ཨིན་ཆིངས་དོན་ཁས་མ་བླངས་པར་ཨིན་ཇི་གམ་པ་རྗོང་ནས་བོད་དུ་ཡོང་མ་བཅུག་པ། ༡༨༩༠ ལོར་འབྲས་ལྗོངས་དང་རྒྱ་གར་ཨིན་གཞུང་གཉིས་ཀྱིས་ས་མཚམས་སྐོར་ཆིངས་ཡིག་ཅིག་བཞག་པ་དང་། ༡༨༩༣ ལོར་དེའི་མཇུག་སྐྱོང་མན་ཨིན་གཉིས་ཀྱིས་རྡོར་གླིང་དུ་གྲོས་མཐུན་བཞག་པའི་ནང་གྲོ་མོར་ཚོང་རྭ་བཙུགས་ཏེ་ཨིན་ཇིའི་མི་ཁོངས་ཚོང་ལས་བྱེད་ཆོག་པ་དང་། ཨིན་གཞུང་གི་ལས་བྱེད་གྲོ་མོར་བསྡད་ཆོག་པ་འཁོད་ཀྱང། ཅི་ལྟར་བྱས་ཏེ་དེ་དོན་ལག་ལེན་དོན་འཁེལ་མ་བྱུང་བ་རེད་དམ་ཞེ་ན། དེའང་བོད་གཞུང་གིས་ཞལ་བཞེས་མ་གནང་བ་ལས་བྱུང།

གཞན། གོར་ཁས་ ༡༧༩༣ ལོའི་ཆིངས་དོན་བརྩིས་མེད་ཀྱིས་ ༡༨༥༥ ལོར་བོད་སར་བཙན་འཛུལ་བྱེད་སྐབས་མན་ཇུའི་ཐེ་བྱུས་གང་ཡང་མེད་པ་དང་། ལྷག་པར ༡༩༠༤ ལོར་ཨིན་དམག་བོད་དུ་འཛུལ་སྐབས་མན་ཇུའི་རོགས་རམ་ཕར་ཞོག ལྷ་སྡོད་ཨམ་བན་ནས་ཨིན་ཇིར་ཟུར་གསོས་ཕུལ་སྟེ་སྣེ་ལེན་ཞུས་པ་རྣམས་ནག་བསུབ་བཏང་བ་ཡིན་ནམ།

སྨྱུག་འཛིན་པས་མཚམས་འདིར་ནན་གྱིས་བཤད་འདོད་པ་ཞིག་ནི། རྒྱ་བོད་འབྲེལ་འདྲིས་ཀྱི་དུས་ཡུན་རིང་ཤོས་དང། རྒྱ་ནག་གིས་སོ་འཇོག་སུན་བཙེར་གནང་བྱེད་དུ་བཞག་པའི་ལྷ་སྡོད་ཨམ་བན་ཟེར་བ་དག་གི་ལྐོག་གཡོ་ངན་ཇུས་ཀྱི་བྱས་ཤུལ་ཐར་ཐོར་རེར་མགོ་རྨོངས་ཨ་འཐས་བྱེད་པ་ལས། ༧གོང་ས་སྐྱབས་མགོན་ཆེན་པོ་དང་མན་ཇུ་གོང་མའི་བར་འདྲ་མཉམ་གྱི་གནས་བབ་བྱུང་བ་རྣམས་ཡང་དག་ངོས་འཛིན་ཐུབ་ན་། དེ་ནི་རྒྱ་བོད་མི་རིགས་གཉིས་ཀྱི་བར་ལ་མཛའ་མཐུན་འབྱུང་གཞི་མ་རེད་དམ་ཞེས་ཞུ་ཡི་ཡོད།

དྲིས་ལན་བཞི་པ། དོན་དམ་མི་རིགས་བར་འགལ་ཟླ་བཟོ་མཁན་ངོ་མ་སུ་རེད་དམ།

མགོ་བསྐོར་བསླུ་བྲིད་དང་རྫུན་ནག་དྲག་སྤྱོད་ཀྱི་ཐབས་ལམ་ཁོ་ནར་བརྟེན་ནས། མངའ་འབངས་འཛིན་སྐྱོང་གི་སྲིད་གཞུང་ཞིག་ལ་མཚོན་ན། ཆེས་ཞེད་སྣང་དགོས་ས་དེ་རྒྱལ་ཁོངས་མི་མང་གིས་སྲིད་གཞུང་མངོན་སུམ་དུ་མཐོང་བའི་དུས་ཚོད་དེ་ཡིན་ལ། སྐབས་དེ་ནི་ཁོང་ཚོར་འཇིགས་རུང་གི་ཉམས་སུ་མགོ་རྟིང་ལོག་འགྲོ་བས་མཐའ་མའི་དུས་ཚོད་དེ་ཡིན་པའི་རྐྱེན་གྱིས་སོ།

ཁོང་ཚོའི་དྲི་བ་བཞི་པ་ཟེར་བའི་ཐོག་མར། ཕྱི་ལོ ༢༠༡༡ ལོའི་ཟླ ༧ པར་༧གོང་ས་མཆོག་གིས་ཨ་རིའི་རླུང་འཕྲིན་ཁང་གི་བཅར་འདྲིར་བཀའ་ལན་བསྐྱོན་སྐབས། “པེར་ལན་གྱི་རྩིག་གྱང་ལོག་ནས་ང་ཚོས་རྒྱལ་ཁབ་གང་ཡིན་ཡང་མི་མང་ལ་གཏོགས་པ་ལས། སྲིད་ཏང་གང་ཞིག་གམ། རྒྱལ་བོ་གང་ཞིག་ཡང་ན་བསམ་བློའི་འགོ་ཁྲིད་སུ་ཞིག་ཡིན་ཡང་དབང་མི་སྲིད་པ་མཐོང་བྱུང། “ཅེས་གསུངས་བ་དེ་ལུང་དུ་དྲངས་ནས། བཀའ་སློབ་དེས་ནི་མི་རིགས་ཕན་ཚུན་བར་ལ་འགལ་བ་སླངས་པ་རེད་ཅེས་འུར་བརྗོད་ཆེན་པོ་ཞིག་བྱས་འདུག

༧གོང་ས་མཆོག་གི་བཀའ་སློབ་དེའི་མཐའ་མའི་བསྟན་དོན་སྙིང་པོ་ནི་ཚོགས་སྒེར་གང་ཡང་རུང་བའི་སྒེར་སྤྱོད་སྲིད་གཞུང་ཞིག་གི་འོག་ནས་རང་དབང་ཟེར་བ་དེ་གླེང་ཐབས་མེད་ལ། རང་དབང་མེད་པའི་བདེ་སྐྱིད་ཟེར་བ་ཞིག་དེ་བས་མེད་ན། མི་རྣམས་ངེས་པར་མང་གཙོར་བསྐྱོད་དེ། རྒྱལ་ཁབ་དམངས་ལ་དབང་བ་ཞིག་བྱེད་ཐུབ་པ་དགོས་ཞེས་གསུངས་ཡོད་པ་ལས། དེར་མི་རིགས་ཕན་ཚུན་འགལ་འབྲེལ་ལ་ཤུགས་རྐྱེན་ཐེབས་པའི་བཀའ་སློབ་ཅིག་གསུངས་མེད་པ་འདི་རེད། ཡིན་ནའང། དམངས་ལ་དབང་བའི་རྒྱལ་ཁབ་ཟེར་དུས། སྒེར་སྤྱོད་དབང་བསྒྱུར་མཁན་ཚོའི་སྙིང་ལ་གྲི་བཙུགས་པ་ལྟ་བུའི་ན་ཟུག་སྐྱེ་ཡོད་ཕྱིན། དམངས་ལ་དབང་བའི་རྒྱལ་ཁབ་བམ། ཐམས་ཅད་དམངས་ཀྱིས་ཐག་གཅོད་དགོས་པའི་ལམ་ལུགས་ཐད་ལ་སྐུལ་སློང་བྱས་ཡོང་དུས། སྒེར་སྤྱོད་དབང་བསྒྱུར་མཁན་ཚོར་ཞེད་སྣང་དངངས་འཚབ་དང་བཅས་ཏེ་གཞན་དུ་ཁ་བསྒྱུར་གྱི་བྱེད་སྟངས་གསར་པ་ཞིག་འགོ་བརྩམས་ཡོང་བ་ནི་ཁོང་ཚོའི་རྩ་བའི་ལངས་ཕྱོགས་ཡིན།

དོན་ངོ་མའི་མི་རིགས་ཕན་ཚུན་བར་ལ་འགལ་བ་སློང་མཁན་རྒྱ་ནག་གཞུང་ལས་གཞན་པ་གང་ན་ཡོད། དཔེར་ན། ཕྱི་ལོ ༢༠༠༨ ལོའི་ཞི་རྒོལ་དོན་རྐྱེན་སྐབས་སུ་ལྷ་སར་གནས་སྡོད་རྒྱ་རིགས་ཚོང་པ་ཁ་ཤས་འདས་གྲོངས་སུ་ཕྱིན་པ། བོད་མིས་ཆེད་མངགས་དམར་གསོད་བཏང་བ་རེད་ཅེས་གསར་འགྱུར་བརྒྱུད་ལམ་ཁག་ལ་ཚད་མེད་འུར་སྒྲོག་བྱས་ཏེ་འགལ་བ་ག་ཚོད་ཅིག་བཟོས་ཡོད། དེ་བཞིན་༧གོང་ས་མཆོག་གིས་ལོ་དེའི་ཨའོ་རྩེད་འགྲན་ཚོགས་རྒྱ་ནག་ཏུ་ཚོགས་རྒྱུར་སྔ་ཕྱིར་འཛམ་གླིང་ཡོངས་གྲགས་ཀྱིས་རྒྱབ་སྐྱོར་ག་ཚོད་གནང་བས་དངོས་བདེན་ཤེས་བཞིན་དུ། དེ་ལས་ལྡོག་སྟེ་ཨའོ་རྩེད་རྒྱ་ནག་ཏུ་ཚོགས་རྒྱུར་༧གོང་ས་མཆོག་གིས་བར་ཆད་བཏང་རབས་རྒྱ་ནག་གཞུང་གིས་རྫུན་གཏམ་བསྟུན་མར་སྤེལ་སྟེ་བོད་རྒྱ་མི་རིགས་བར་ལ་ཆེད་མངགས་ཞེ་འཁོན་ག་ཚོད་སླངས་པ་འཇིག་རྟེན་ཀུན་གསལ་ཡིན།

ཡང་དེར་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་ནང་”མངོན་སུམ་འཛེམ་མེད་ངང་བོད་རིགས་ཕུད་མི་རིགས་གཞན་རྣམས་བོད་ནས་ཕྱིར་འབུད་བྱེད་རྒྱུ་བསྒྲགས།”ཞེས་པ་ཞིག་ཡིག་ཆ་དེའི་མགོ་མཇུག་བར་གསུམ་གང་དུའང་མེད་པ་ཡོད་པར་སྨྲ་བའི་མངོན་སུམ་ལ་བསྙོན་པའི་འཁྱོག་བརྗོད་ཀྱིས་རྒྱ་བོད་མི་རིགས་བར་འགལ་ཟླའི་པེར་ལན་རྩིག་གྱང་ཞིག་བསྐྲུན་དགོས་དོན་ཡང་གང་ཡིན་ནམ།

བཙན་བྱོལ་བོད་གཞུང་གིས་སྐབས་དེར་སྤྲད་པའི་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་བསམ་འཆར་ནང་4″བོད་ནང་གཏན་དུ་གཞིས་ཆགས་པ་དང། དུས་ཡུན་རིང་པོ་ནས་གནས་སྡོད་འཚར་ལོངས་བྱས་པ་རྣམས་ཕྱིར་འབུད་བྱེད་རྒྱུ་ང་ཚོའི་ཀུན་སློང་མིན། ང་ཚོའི་སེམས་འཚབ་བྱེད་གཞི་རྒྱ་རིགས་གཙོས་པའི་མི་རིགས་གཞན་འབོར་ཆེན་སྤོ་ཤུགས་བྱེད་རྒྱུའི་སྐུལ་སློང་བྱེད་པའི་དབང་གིས་ད་ཡོད་སྤྱི་ཚོགས་ལ་འཕོ་འགྱུར་དང། བོད་མི་རྣམས་གྲངས་ཉུང་ཆགས་པ། ཧ་ཅང་འཇིག་སླ་བའི་བོད་ཀྱི་རང་བྱུང་ཁོར་ཡུག་ལ་ཉེན་ཚབས་བཟོས་ཀྱི་ཡོད་པ་དེ་དག་ཡིན་”ཞེས་གསལ་པོར་འཁོད་ཡོད་པ་མ་མཐོང་བ་ག་ལ་ཡིན།

དྲིས་ལན་ལྔ་པ། ༧གོང་ས་མཆོག་ལས་ལྷག་པའི་བོད་མིའི་ཚབ་མཚོན་ཞིག་གང་ན་འདུག

ད་ལྟའི་བར་རྒྱ་ནག་གཞུང་གིས་བོད་མི་རྣམས་ལ་ལྟ་སྟངས་གཅིག་ཡོད་པ་ནི་བོད་མི་རྣམས་ནི་ཆོས་དད་པས་ཁོང་ཚོའི་འཇིག་རྟེན་གྱི་ཐོབ་དབང་ལ་གྱོང་གུད་དང་ཚོད་འཛིན། དབང་བསྒྱུར་ཐེབས་ཀྱིན་ཡོད་པར་འདོད་ཀྱི་ཡོད་ལ་བསྒྲགས་བཞིན་པའང་རེད། ལྟ་སྟངས་འདིས་བོད་མི་རྣམས་ལ་”རྨོངས་དད་ཡོད་པ་དང། བླ་མས་དབང་སྒྱུར་གྱིན་ཡོད་པ། རྗེས་ལུས་ཀྱི་བསམ་བློ་ཡོད་པར་”ཧམ་བཤད་བྱ་རྒྱུ་ནི་རྒྱ་ནག་མི་མང་གིས་བོད་མི་མང་ལ་ལྟ་ཚུལ་འགྱུར་བ་ཐེབས་གཞི་གཙོ་བོ་ཞིག་ཆགས་པར་རེ་བ་ནི་ཧ་ཅང་གསལ་བོ་རེད། ཡིན་ནའང་གུང་བྲན་ཏང་གི་བྱ་འཕུར་བ་ལྟ་བུའི་སྤྱི་ཚོགས་ཡར་རྒྱས་འགྲིམས་ཤིང་ལྷ་ཡུལ་ལྟ་བུའི་བདེ་སྐྱིད་མྱོང་བཞིན་པར་བསྙད་པའི་”རྨོངས་དད་མེད་པ་དང་བོད་མིའི་རྗེས་ལུས་ཀྱི་བསམ་བློ”མེད་པའི་བོད་མི་གུང་བྲན་ཏང་མི་རྣམས་ལ་ཉིན་བརྒྱ་དུས་གཅིག་ཏུ་རང་དབང་ཐོག་བོད་ཀྱི་ཚབ་མཚོན་པ་སུ་ཡིན་མིན་འོས་ཤོག་འཕེན་བཅུག་པ་ཡིན་ན། ཉིན་མོ་དེར་གུང་བྲན་སྲིད་གཞུང་ལ་བློ་བསྐྱེད་གསར་པ་ཞིག་འབྱུང་ངེས་ལ། སྔར་འགྱོད་ཕྱིས་སྡོམ་གྱི་མདུན་ལམ་གསར་པ་ཞིག་ཀྱང་འབྱུང་ངེས་པ་ནི་ཐེ་ཚོམ་མེད་པ་ཞིག་རེད།

༢༠༠༢ ནས་ཚུགས་པའི་རྒྱ་བོད་འབྲེལ་མོལ་གྱི་བརྒྱུད་རིམ་ཁྲོད་དམིགས་བསལ་སྐུ་ཚབ་མཆོག་གིས་ཀྱང། རྒྱ་ནག་གཞུང་གི་དཔོན་རིགས་ཚོར་བོད་མིའི་ཚབ་མཚོན་སུ་ཡིན་ལྟ་འདོད་ཡོད་ན་འོས་འཕེན་དུ་བཅུག་དང་ཞེས་གོ་བརྡ་གསལ་པོར་སྤྲད་པ་བཞིན། ཅི་སྟེ། ཁྱེད་ཚོར་བློ་རྒྱ་ཡོད་ན། ༧གོང་ས་མཆོག་བོད་མི་རིགས་ཀྱི་མགྲིན་ཚབ་པ་ཡིན་མིན་བོད་མི་ཚོར་བསམ་ཚུལ་འདྲི་རྒྱུའམ། ཡང་ན་རྒྱ་ནག་གཞུང་དང་༧གོང་ས་མཆོག་གཉིས་ལས་སུ་ཞིག་བོད་མིའི་མགྲིན་ཚབ་པ་ཡིན་མིན་རང་དབང་གི་འོས་ཤོག་འཕེན་དུ་བཅུག་དང། དེ་དུས་བོད་མི་རིགས་ཀྱིས་ས་ས་མལ་དང་རྡོ་རྡོ་མལ་གྱི་དཔེ་རུ་བསྐྱལ་སྟེ་ཁྱེད་ཚོའི་ཁ་ལྕེར་རྡོ་རྗེ་རྒྱ་གྲམ་གྱིས་གཏན་དུ་གཡོ་བ་མེད་པའི་གནས་སུ་འགོད་ངེས་པ་ཡིན་པས། ཕར་ཚུར་རྩོད་རྙོག་གི་གཞི་མ་ཅི་གང་ལྷག་མི་སྲིད་པ་ཡིན་ནོ་ཞེས་བཤད་རྒྱུ་ཡིན།

དྲིས་ལན་དྲུག་པ། ༧གོང་ས་མཆོག་གིས་ཐུགས་སྨོན་གནང་བར་དེ་འདྲ་ཞེད་དོན་ཅི།

དངོས་གནས་གོང་དུ་ཞུས་པ་བཞིན། བོད་མི་ཚོས་ཤི་གསོན་གྱི་མཐའ་མའི་ཐག་གཅོད་ཀྱང་༧གོང་ས་མཆོག་དང་༧གོང་ས་མཆོག་གི་ལྟ་དགོངས་སྤྱོད་གསུམ་བོད་དུ་གདན་འདྲེན་ཞུ་རྒྱུ། བོད་ཀྱི་རང་དབང་གི་ཆེད་གནང་གི་ཡོད་ན། བོད་མི་ཚོ་ཚེ་སྲོག་ལས་ལྷག་པའི་གལ་ཆེན་ཞིག་ཡོད་པ་དེ་༧གོང་ས་མཆོག་དང་། ཡང་ན་༧གོང་ས་མཆོག་གིས་སྙིང་པོ་བྱས་པའི་རང་དབང་ཁོ་ན་མ་རེད་དམ། གནད་དོན་འདི་གཅིག་པུས་༧གོང་ས་མཆོག་གིས་བོད་ཀྱི་དཀྱིལ་སྙིང་མཚོན་ཐུབ་མིན་དངོས་ར་གསལ་སྤྲོད་བྱས་འདུག་པས་ད་དུང་དྲི་བ་གཏོང་དགོས་ཅི་ལ་ཐུག

༢༠༠༩ ནས་བོད་ཕྱི་ནང་གཉིས་སུ་བོད་མི་ ༣༥ རང་ལུས་མེར་སྲེག་བཏང་བས་བོད་མིའི་བློས་གཏོང་དང་སེམས་ཐག་ཆོད་པོར་འཛམ་གླིང་མི་མང་ཡིད་སྨོན་སྐྱེ་བཞིན་ཡོད། ཁོང་ཚོས་ཚེ་འདིའི་ལུས་སྲོག་བློས་གཏོང་གིས་བོད་ཀྱི་བདེན་དོན་རྩོད་ཀྱིན་པས། བོད་མི་རིགས་ཀྱི་བླ་ན་མེད་པའི་རྒྱུ་འབྲས་རིག་གནས་ཀྱི་ངོས་ནས་བཤད་ན། ཁོང་རྣམ་པ་ཚོར་ཕྱི་མའི་རྟེན་བཟང་ཐོབ་རྒྱུར་སྨོན་ལམ་རྒྱག་པ་ལ་དྲི་བ་གཏོང་དགོས་པ་ཞིག་རེད་དམ། བོད་མི ༣༥ རང་སྲེག་གཏོང་དགོས་པའི་རྒྱུ་མཚན་ལ་གོ་ཤེས་ཉན་འཇོག་ཁྱོན་ནས་མེད་པར། ད་དུང་བོད་མི་ཚོས་བསྔོ་བ་སྨོན་ལམ་བྱས་ན་ནོར་འཁྲུལ་ཡོད་ཚུལ་དང་ལོག་བཤད་བྱ་རྒྱུར་འཇིག་རྟེན་འདིར་ངོ་ཚ་ཁ་སྐྱེངས་ཅུང་ཙམ་མེད་པ་འདི་ནི་ཟེར་རྒྱུས་ཕོངས་པ་མིན་ན་ཅི་ཞིག་ཡིན་ནམ།
རང་སྲེག་བཏང་བའི་བོད་མི་ཚོར་ཚེ་སྲོག་ཀྱང་གཏོང་གཏོང་ཆོག་གི་སྙིང་སྟོབས་ཡོད་ན། ཁོང་ཚོར་འཇིག་རྟེན་འདིར་འཇིགས་སྣང་བྱེད་ས་ཅི་ཞིག་ཡོད་དམ། ཁོང་རྣམ་པས་ཅིའི་ཕྱིར་རང་གི་ཚེ་སྲོག་གིས་རྒྱ་བོད་ཞི་འགྲིག་གཞི་རྩ་འབོད་བཞིན་པ་རེད་དམ། མི་རིགས་འདྲ་མཉམ་གྱི་དར་ཆ་འཕྱར་བ་རེད་དམ། སྐད་ཡིག་རང་དབང་གི་སྲོག་ཤིང་བསླངས་བ་རེད་དམ། འདི་འདྲའི་རླབས་ཆེན་གྱི་རང་སྲོག་བློས་གཏོང་ལ་༧གོང་ས་མཆོག་གིས་ཐུགས་སྨོན་མཚམས་སྦྱོར་གནང་མི་ཆོག་པ་ག་རེ་ཡོད་དམ།
༢༠༠༨ ཟླ ༥ ཚེས་ ༡༢ ཉིན་ཟི་ཁྲོན་དུ་འབྱུང་བའི་གོད་ཆགས་བྱུང་སྐབས་ཟླ་དེའི་ཚེས ༡༥ ཉིན་འཇར་མན་དུ་༧གོང་ས་མཆོག་ནས་”གནས་ཚུལ་དེ་ཐོས་པ་དང་པར་སོགས་མཐོང་མ་ཐག་ངོས་རང་སེམས་པ་ཤིན་ཏུ་སྐྱོ་བོ་བྱུང། འབྱུང་ཁམས་གོད་ཆག་དེའི་ཆེད་དེ་རིང་སང་ཉིན་གང་མགྱོགས་ང་ཚོས་སྨོན་ལམ་མཆོད་འབུལ་ཞུ་རྒྱུ་ཡིན་”ཞེས་གསུངས་པ་དང། ཟླ ༦ ཚེས ༤ ཉིན་བཙན་བྱོལ་བོད་གཞུང་ཆོས་རིག་ལས་ཁུངས་ཀྱི་བཀོད་སྒྲིག་འོག་ཐེག་ཆེན་ཆོས་གླིང་གཙུག་ལག་ཁང་དུ་ཟི་ཁྲོན་ཝུན་ཁྲོན་དུ་ས་ཡོམས་བྱུང་བར་བསྔོ་སྨོན་སྐྱབས་འཇུག་ཞུས་ཡོད་ཀྱང། ཁྱེད་ཚོས་”༢༠༠༨ལོའི་ཟླ་༥ཚེས་༡༢ཉིན་གྱི་སི་ཁྲོན་ཝུན་ཁྲོན་ས་ཡོམ་ཆེན་པོ་བྱུང་ནས་མི་མང་པོ་ཤི་རྨས་ཐེབས་པ་དང་། བོད་རིགས་མི་ཉུང་བ་ཤི་གསོན་ཧ་མ་གོ་བའི་སྐབས་དེར། ཏཱ་ལའི་འཇར་མན་དུ་སོང་ཞིང་། མིའི་རིགས་ཀྱི་འཇིགས་པ་ཆེན་མོ་འདིའི་སྐོར་ཚིག་གཅིག་ཀྱང་མ་བཤད་ལ། ལྷག་པར་དུ་ལུས་དང་སེམས་ཀྱི་སྡུག་བསྔལ་ཚད་མེད་མྱོང་བཞིན་པའི་བོད་རིགས་སྤུན་ཟླ་རྣམས་ལའང་སྙིང་རྗེ་རྩ་བ་ནས་མཚོན་མེད་པ་རེད།”ཅེས་བཤད་པ་ནི་མིའི་རིགས་ཀྱི་སྐད་ཆ་བཤད་སྟངས་ཤིག་རེད་དམ།

ད་དུང་སྐབས་དེའི་གཞུང་འབྲེལ་མཆོད་འབུལ་སྨོན་ལམ་གྱི་སྐྱབས་ཐོའི་ནང་དུའང” བར་ལམ་༢༠༠༨། ༥། ༡༢། ཟི་ཁྲོན་ཝུན་ཁྲོན་དུ་ས་ཡོམས་ཀྱི་གོད་ཆགས་བྱུང་སྟེ་མི་༦༩༠༡༩ (དྲུག་ཁྲི་དགུ་སྟོང་བརྒྱ་མེད་བཅུ་དགུ)་རྐྱེན་འདས་ཕྱིན་པ་དང་། མི་མང ༣༧༣༥༧༣ ལ་རྨས་སྐྱོན། མི་མང་ ༡༨༦༢༧ གར་སོང་ཆ་མེད། མི་མང་ས་ཡ་ ༡༥.༡༥ གནས་སྤོས་བྱེད་དགོས་པ་སོགས་མདོར་ན་མི་མང་འབུམ་ ༡༥༠ ལྷག་ཙམ་ལ་གོད་ཆག་གི་སྡུག་བསྔལ་བཟོད་དཀའ་བྱུང་བ་རྣམས་ཀྱི་སླད། རྟེན་མཆོག་སྤྱན་སྔར་མཆོད་བཤམས་དང་༧སྤྱི་ནོར་༧གོང་ས་སྐྱབས་མགོན་ཆེན་པོ་གདན་ཞུས་དང་དགེ་འདུན་པ་རེར་སྐུ་འགྱེད་ཧིན་སྒོར་ ༡༠༠ རེ་ཕུལ་སྟེ། ཟི་ཁྲོན་ཝུན་ཁྲོན་དུ་ས་ཡོམས་གོད་ཆག་འོག་འདས་གྲོངས་ཕྱིན་པ་རྣམས་ཀྱི་སྡིག་ལྟུང་བྱང་སྟེ་རྟེན་བཟང་རིམ་བརྒྱུད་རྣམ་མཁྱེན་ཐོབ་པ་དང་། ཤུལ་ལུས་ནང་མི་རྣམས་ཀྱི་སེམས་ངལ་སངས་པ་ཚེ་འཇུག་བདེ་སྐྱིད་ཡོངས་ཐབས་མཆོག་གསུམ་རྒྱལ་བ་རྒྱ་མཚོར་བསྔོ་སྨོན་ཤུགས་དྲག་ཞུ་ན་”ཞེས་འཁོད་འདུག་པ་དང། གཞན་༧གོང་ས་མཆོག་གིས་སྐབས་དེར་ཟི་ཁྲོན་ཝུན་ཁྲོན་དུ་སྐུ་དངོས་སུ་ཕེབས་འདོད་ཡོད་པའི་ཐུགས་རེ་གནང་བ་སོགས་རྒྱ་རིགས་མི་མང་གིས་གསལ་གཟིགས་ཐུབ་པའི་རེ་བ་བྱེད་ཀྱི་ཡོད།

དྲིས་ལན་བདུན་པ། རྒྱ་ནག་གཞུང་གིས་སྒོར་མོས་དྲ་དམངས་བསླུ་ཉོ་བྱེད་ཀྱི་ཡོད་པ་སུས་མི་ཤེས།

“སྒོར་ཟུར་ལྔ་པ་”ཞེས་ན་དེང་སང་འཛམ་གླིང་དུ་ཡོངས་གྲགས་ཆགས་ཟིན་སྟབས། རྒྱ་ནག་གཞུང་གིས་བསླུ་ཉོ་བྱས་པའི་དྲ་དམངས་ལ་གྲངས་ཀ་ཞིག་གང་དུ་ཡོད་དམ། གླེང་ཕྱོགས་རྫུན་མ་བཟོ་བ་དང་གུང་བྲན་ལ་ཆེ་བསྟོད་ཀྱིས་འུར་རྒྱག་པ་སོགས་ནི་ཧུའུ་ཅིན་ཐའོས་དབུ་ཁྲིད་པའི་ཏང་ཀྲུང་དབྱང་གི་མཐའ་བསྐོར་དུ་ཚིང་ཁ་ཤིག་ཤིག་ཡོད་ནའང་། དེས་སྐུ་ཞབས་ཧུའུ་ཅིན་ཐའོར་དོན་དངོས་འཆམ་མཐུན་གྱི་གཞུང་དམངས་བསྐྲུན་སོང་ངམ། ཡང་ན་སྤྱི་ཚོགས་བརྟན་བརླིང་བསྐྲུན་སོང་ངམ། དེ་ལ་ཏང་ཀྲུང་དབྱང་རང་ཉིད་རྒྱུས་ཡོད་ཆེ་ཤོས་ཡིན་སྟབས་ཁ་གསང་ནས་གསུང་ཐུབ་ཀྱི་ཡོད་དམ།

ང་ཚོས་ཤེས་གསལ་ལ་རྒྱ་ནག་ནང་ཁུལ་དུ་”སྒོར་ཟུར་ལྔ་པ་”མིན་པའི་དྲ་ཞུགས་པའི་གནས་ཚུལ་ལ་ལྟ་རྟོགས་བྱ་ཆེད་ངོ་སྤྲོད་ལག་ཁྱེར་བརྒྱུད་ཐོ་འགོད་བྱ་དགོས་པ་དང་། ངོ་སྤྲོད་ལག་ཁྱེར་མེད་ན་དྲ་བར་ཞུགས་ཐུབ་ཀྱི་མེད་པའི་གནས་ཚུལ་ཐབས་རྡུག་མང་པོ་ཉིན་རེར་ཇེ་མང་དུ་འགྲོ་ཡི་འདུག ག་རེ་བྱས་ནས་རྒྱ་ནག་གཞུང་གིས་རང་གི་མི་མང་ལ་ཡིད་ཆེས་མ་རྙེད་པ་རེད་དམ། གཞན་སྒོར་ཟུར་ལྔ་པས་རྒྱ་ནག་ནང་ཁུལ་གྱི་རྙོག་གླེང་ཆེད་དཀྲོག་གཏམ་སྣ་ཚོགས་སྤེལ་རྒྱུར་འགྲོ་སོང་ག་ཚོད་གཏོང་གི་མེད་དམ། ༧གོང་ས་མཆོག་ནས་རྒྱ་ནག་གི་རྒྱལ་སྲུང་ལས་ནང་ཁུལ་གྱི་རྙོག་གླེང་ལ་དཔལ་འབྱོར་འགྲོ་སོང་ཕོན་ཆེ་གཏོང་བཞིན་པར་ཧ་ཅང་ཐུགས་འཚབ་གནང་གི་ཡོད་ལ། རྒྱ་རིགས་ནམ་འཕྲད་ལ་ནང་ཁུལ་འཆམ་མཐུན་གྱི་རྩ་བ་ཡིད་ཆེས་ལ་ཐུག་ཡོད་པའི་བོད་དང་༧གོང་ས་མཆོག་གི་རིག་གནས་གཞི་རྩར་དྲངས་ནས་བསླབ་བྱ་ལམ་སྟོན་གནང་གི་ཡོད་པས། འཆམ་མཐུན་དང་མཐུན་སྒྲིལ། གཞུང་མང་བར་ཡིད་ཆེས་དགོས་ན་ངེས་པར་དུ་༧གོང་ས་མཆོག་གི་ལམ་སྟོན་སྙིང་པོ་ལས་བརྒལ་ཐབས་མེད་པས། སྲིད་བློན་ཝུན་ཇ་པོས་བཤད་པ་ལྟར་ཆབ་སྲིད་བསྒྱུར་བཅོས་མ་བྱས་ཚེ་གུང་བྲན་གྱིས་བསླུ་ཉོ་བྱས་པའི་དྲ་དམངས་ཉོག་གཏམ་རུ་ཁག་གིས་གུང་བྲན་ལ་རྫུན་བསྟོད་བྱས་ནས་གུང་བྲན་གྱི་རྒྱལ་སྤྱིའི་མཚན་ཉིད་སྔར་བཞིན་སྲུང་དགོས་ཤར་ཚེ་ནམ་རིང་སྒྲུང་གིས་མི་འཁྱོལ་བ་ས་རིས་ཐང་གསལ་རེད་མི་འདུག་གམ། ད་དུང་ཡ་ང་བག་ཚ་གང་ཡང་མེད་པར་རང་གིས་བསླུ་ཉོ་བྱས་པའི་དྲ་དམངས་ཉོག་གཏམ་རུ་ཁག་གི་སྐད་ཆ་དྲངས་ནས་༧གོང་ས་མཆོག་ལ་སྡུག་དམོད་གཏོང་ཁུལ་འདི་ནི་”ཐབས་ཟད་གཏི་ཐུག་གི་ལས་ཀ་”མིན་ན་གཞན་དུ་མིང་ཞིག་འདོག་རྒྱུ་གཏན་ནས་མི་འདུག་གོ།

དེས་ན་མཐའ་སྡོམ་དྲ་དམངས་ཀྱི་སྐད་ཆ་མ་ཡིན་པའི་འཛམ་གླིང་འདིར་སྐད་གྲགས་ས་ཁྱབ་གནམ་ཁྱབ་ཏུ་ཕྱིན་པ། ལྟ་སྤྱོད་གཉིས་ལ་འཛམ་གླིང་ནང་ཆ་འཇོག་ཡོད་པའི་ཞི་བདེའི་དེད་དཔོན་ཆེན་པོ་བཅུ་གཉིས་ཀྱིས་དེ་རིང་༢༠༡༢ ཟླ ༤ ཚེས ༣ ཉིན་སྐུ་ཞབས་ཧུའུ་ཅིན་ཐའོར་ཕུལ་བའི་སྙན་ཞུའི་སྙིང་དོན་འདིར་དྲངས་ན། “བོད་མི་ཚོས་ཡུན་རིང་ནས་དོན་དམ་གྱི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད། ཁོང་ཚོས་འཚེ་བ་མེད་པ་དང་གྲོས་མོལ་གྱི་ལམ་ནས་དགོས་འདུན་དེ་དག་སྒྲུབ་ཐབས་བྱས་ཡོད་ཀྱང་ད་བར་གྲུབ་འབྲས་གང་ཡང་བྱུང་མེད་སྟབས། ད་ཆ་ཞི་རྒོལ་བྱེད་དགོས་ཐུག་གི་ཡོད། ང་ཚོའི་ཆོས་གྲོགས་བོད་ཀྱི་༧སྐྱབས་མགོན་ཏཱ་ལའི་བླ་མ་མཆོག་གིས་རྒྱ་ནག་དང་ཁ་བྲལ་རྩོད་ཀྱི་མེད། རྒྱ་ནག་དབུ་ཁྲིད་ཚོས་བོད་ཀྱི་༧སྐྱབས་མགོན་ཏཱ་ལའི་བླ་མ་མཆོག་གིས་བོད་ཀྱི་གནད་དོན་དེ་བཞིན་ཞི་མོལ་གྱི་ལམ་ནས་སེལ་རྒྱུའི་གོ་སྐབས་དེ་འཛིན་དགོས། དེའི་ཆེད་གྲོས་མོལ་གྱི་བརྒྱུད་རིམ་ཚར་གཅིག་འགོ་བཙུགས་ཚར་བ་དེ་བར་མ་ཆད་པ་ཞིག་དང་འཁྲུག་ཆ་དོད་པོ། དོན་ཕན་སོན་པ་ཞིག་དགོས”ཞེས་འཁོད་དོན་ལྟར།

ད་ནི་རྒྱ་ནག་གཞུང་གིས་དོན་དམ་གྱིས་བོད་མི་རིགས་ལ་དུས་རབས་ཕྱེད་ཀ་ལྷག་རིང་བཙན་བཟུང་གིས་གསོད་རྡུང་རྨས་གསུམ་ཚད་མེད་བྱས་དང་བྱེད་བཞིན་པའི་ལོ་རྒྱུས་ཀྱི་སྐྱོ་གར་མཚམས་འཇོག་བྱས་ཏེ། རྒྱ་བོད་མི་རིགས་གཉིས་འདྲ་མཉམ་གཞི་མཐུན་མཉམ་གནས་ཡོང་གཞིའི་མ་གདན་ཞིག་བསྐྲུན་ན་གོ་སྐབས་ཏག་ཏག་ཤར་འདུག་སྙམ་བྱུང།

༢༠༡༢། ༣། ༤། ཉིན་ཤར་མར་བྲིས།
མུ་འགོད།

1) ༧གོང་ས་མཆོག་གི་བཀའ་སློབ་ལུང་འདྲེན་གྱི་ཁུངས། http://www.gyalwarinpoche.com/newsdetail.php?recordID=111
2)ཞི་བདེའི་དེད་དཔོན་ཆེན་པོ་བཅུ་གཉིས་ཀྱིས་ཧུའུ་ཅིན་ཐའོར་ཕུལ་བའི་སྙན་ཞུ།
http://bod.asia/2012/04/
3) ཨ་རི་གསེར་གྱི་རྟགས་མའི་གཟེངས་རྟགས་མཛད་སྒོར་སྩལ་བའི་བཀའ་སློབ་ནས་དྲངས།
4) རང་སྐྱོང་བསམ་འཆར་གྱི་ཤོག་ངོས ༢༠ སྟེང་གི་ཐིག་ཕྲེང ༡༠ ནས་ ༡༥ པར་གསལ།