དེ་རིང་ཚེས་ ༢༨ ཉིན་ཨ་མདོ་རྔ་པ་ནས་རང་ལུས་མེར་བསྲེགས་ལས་འགུལ་གནས་ཚུལ།

Comments (14) on “དེ་རིང་ཚེས་ ༢༨ ཉིན་ཨ་མདོ་རྔ་པ་ནས་རང་ལུས་མེར་བསྲེགས་ལས་འགུལ་གནས་ཚུལ།”

1. ད་བོད་ཕྱི་ནང་གཉིས་ཀྱི་མི་མང་གི་རང་སྲེག་འདི་ལ་མགོན་དང་སྐྱབས་དང་སྣེ་ཁྲིད་ཅིག་མེད་དུས། ལོ་རྒྱུས་ཀྱིས་ཐར་བ་ཅི་ལྟར་གཏོང་ངམ། རྒྱལ་ཁབ་དང་གཞན་དང་སྲིད་གཞུང་མི་རིགས་གཞན་ལ་ཞེ་དྲག་ལོས་འདེད་བྱེད་ས་མེད་ཀྱང་། རང་རེའི་བཀའ་ཤག་གིས་འདི་ལ་གསལ་ཁ་མ་གནང་བར་ད་དངོས་གནས་རྒུམ་འདུག་ས་ཡོད་ཚོད་མི་འདུག

   བཀའ་བློན་ཁྲི་པས། “༢༠༠༨ ལོའི་ཞི་རྒོལ་ལ་ཞིབ་འཇུག་བྱས་ཏེ་མ་འོངས་པར་ཞི་རྒོལ་དེ་རིགས་བྱུང་ཚེ་ང་ཚོའི་གྲ་སྒྲིག་ཚད་ལྡན་བྱ་རྒྱུ་ཡིན་”ཞེས་གསུངས་འདུག ད་ལྟ། རང་སྲེག་འདི་ལ་ཞིབ་འཇུག་བྱས་ནས་གྲ་སྒྲིག་ཅིག་མ་གནང་ཚེ་དངོས་གནས་འགོ་ཁྲིད་ཡོད་དང་མེད་པའི་ཁྱད་པར་སུས་འབྱེད་ཐུབ་བམ། འདི་ལྟར་ཕྱིན་ན་ང་ཚོ་གང་དུ་སླེབས་རྒྱུ་རེད་དམ། བོད་གངས་ཅན་པ་རྣམས།

2. རྒྱལ་གཅེས་དཔའ་རྒོད་ཁྱོད་དག་ཞིང་ནས་སྐྱེས་པར་སྨོན།

3. བོད་ཆུ་འབྲུག་མ་རེད་མེ་འབྲུག་རེད། །ཚེ་སྲོག་མེ་རུ་སྒྲོན་ལོ་རེད། །ཡོད་ཚད་བློས་གཏོང་བྱེད་ལོ་རེད། །སྐད་གྲགས་གླིང་ལ་ཆོད་ལོ་རེད། །

4. གསོན་པོའི་མི་ལ་འགྲོ་འདུག་རང་དབང་མེད།།
   གྲོངས་པའི་བེམ་པོ་དུར་འཇུག་ཐོབ་ཐང་མེད།།
   ཀླ་ཀློའི་གདོང་ལ་ཚེ་སྲོག་སྦར་བའི་མེ།།
   ཆད་མེད་འབར་བའི་སྣེ་གཅིག་འདི་ན་ཡོད།།

   འདས་པོའི་བེམ་པོ་ཙམ་ཡང་མི་དབང་བའི།།
   རྒྱ་དམར་སྲིད་བྱུས་གདུག་ཅན་གཤེད་མ་འདིས།།
   ད་དུང་ཡང་ནི་ཚེ་སྲོག་མང་པོ་ཞིག།
   དམར་པོའི་མེ་ལ་དབང་མེད་འདེད་པར་འདུག།།

   བོད་ཁམས་ཡོངས་རྫོགས་འབར་བའི་མེ་ཤུགས་ཀྱིས།།
   རྒྱ་གཞུང་བྱུས་ངན་བསྲེགས་ལ་ཉེ་ན་ཡང་།།
   ཕོ་ཟད་མོ་ལ་ཐུག་པའི་འཐབ་མོ་ཡང་།།
   འབྱུང་བ་སྲིད་པས་ད་ཀོ་ཅི་ཞིག་བྱ།།

   གངས་ཅན་སྐྱིད་པའི་གཤོང་ས་གོར་མོ་ན།།
   སྲིད་ཁྲིར་འགྱིང་བའི་མི་དབང་ཕོ་མོ་ཚོ།།
   ལམ་སྟོན་སྣེ་ཁྲིད་ཡོད་ན་གནང་རན་འདུག།
   གདོང་མཆོང་མདུན་སྐྱོད་བྱེད་ན་ད་ཚོད་དགོས།།

   ཤོག་བུའི་སྟེང་གི་འབོད་སྐུལ་གདུང་སེམས་དག།
   ཡང་ཡང་བསྒྲགས་པས་ཕན་པ་དཀའ་བ་སྟེ།།
   ལག་ལེན་རི་མོའི་ངོ་སོ་འཕྲོད་པ་ཞིག།
   ད་ཀོ་ཡོད་ན་གངས་རིའི་ཞིང་ལ་ཕོབས།།

5. ཐུགས་རྗེ་གཟིགས་ད་མཚམས་འཇོག་གནང་རོགས། གལ་སྟེ་ཐ་མེད་མཚམས་འཇོག་མ་བྱུང་བ་ཡིན་ན། དགོངས་པ་གཞན་ཞིག་ཐོག་ནས་བོད་མི་རེ་ནས་རྒྱ་མི་བཅུ་རེ་མེད་པ་བཟོ་ཐབས་དགོས། དེ་ལྟར་བྱས་པ་ཡིན་ན་ཉིན་གཅིག་རྒྱ་རྒན་དེ་ཡང་འུ་ཐུག་པ་ཞིག་བཟོ་ཐུབ། འཚེ་མེད་ཞི་བ་མཚམས་འཇོག་དགོས། འཚེ་མེད་ཞི་བས་ནུས་པ་ཐོན་མ་སོང་། ནུས་པ་ཐོན་པའི་ལས་འགུལ་གོང་དུ་ཞུ་པ་དེ་རང་ལེགས།

6. བཀའ་བློན་ཁྲི་པས། “༢༠༠༨ ལོའི་ཞི་རྒོལ་ལ་ཞིབ་འཇུག་བྱས་ཏེ་མ་འོངས་པར་ཞི་རྒོལ་དེ་རིགས་བྱུང་ཚེ་ང་ཚོའི་གྲ་སྒྲིག་ཚད་ལྡན་བྱ་རྒྱུ་ཡིན་”ཞེས་གསུངས་འདུག ད་ལྟ། རང་སྲེག་འདི་ལ་ཞིབ་འཇུག་བྱས་ནས་གྲ་སྒྲིག་ཅིག་མ་གནང་ཚེ་དངོས་གནས་འགོ་ཁྲིད་ཡོད་དང་མེད་པའི་ཁྱད་པར་སུས་འབྱེད་ཐུབ་བམ། འདི་ལྟར་ཕྱིན་ན་ང་ཚོ་གང་དུ་སླེབས་རྒྱུ་རེད་དམ།

7. བཀའ་ཁྲི་མཆོག་ལ་རང་སྲེག་ཐད་ཀྱི་དྲི་བ་གསུམ།

   བདུད་འདུལ་ཐོག་རྒོད།

   ད་དངོས་གནས་དྲི་བ་ཞིག་གཏོང་བའི་དུས་ཚོད་སླེབས་འདུག རང་སྲེག་ལ་གྲུབ་འབྲས་ཐོན་རྒྱུ་ཁེག་པོ་ཡོད་པ་༧གོང་ས་མཆོག་དང་ཟམ་གདོང་རིན་པོ་ཆེ་གཉིས་ཀྱིས་གསུངས་འདུག ཡིན་ནའང་སོ་སོར་ཆབ་སྲིད་ཀྱི་འགན་ཁུར་མེད་པས་ཅི་ཡང་བཤད་ཤེས་ཀྱི་མ་རེད་ཅེས་བཞུགས་ཡོད་པ་རེད། དེ་འགྲོ་བ་མིའི་ཐོབ་ཐང་རེད།
   ༡ ཡིན་ནའང་། ང་ཚོའི་བཀའ་ཁྲི་མཆོག་གིས་རང་སྲེག་ལ་གྲུབ་འབྲས་ཐོན་པར་ངོས་འཛིན་བྱེད་ཀྱི་ཡོད་དམ།
   ༢ མེད་ན། མེར་སྲེག་མཚམས་འཇོག་དགོས་ཚུལ་གསལ་བོ་ནན་གསུངས་མི་གནང་དོན་ག་རེ་ཡིན་ནམ།
   ༣ གལ་སྲིད་མ་འོངས་པར་མེར་སྲེག་འདི་བརྒྱུད་བོད་དོན་ལ་འགྱུར་བ་ཞིག་མ་ཐེབས་ཚེ་བཀའ་ཤག་གི་ད་ལྟའི་ཕོ་མིན་མོ་མིན་གྱི་རྣམ་འགྱུར་འདི་ལ་ཡོ་བསྲང་ཅི་ལྟར་བྱ་རྩིས་ཡོད་དམ།
   དྲི་བ་འདི་རྣམས་རང་ཕྱོགས་ཀྱི་ལས་དོན་དང་རྣམ་དཔྱོད་ལ་འབྲེལ་བ་ཡོད་སྟབས་ཕུལ་བ་ཡིན། དེ་གསལ་བོ་ཆགས་སོང་ན། བོད་གཞིས་བྱེས་མི་མང་ཚོར་མིག་འཛུགས་ས་གཅིག་ཡོད་པ་ནི་རྒྱ་ནག་གཞུང་ཁོ་ན་རེད། དེ་མིན་ང་ཚོ་ཚང་མ་བྱིས་ཕྲུག་ཐང་གཡུག་ལྟ་བུ་ཆགས་སོང་ན་ཡག་པོ་མ་རེད་ལ། ང་ཚོར་དབུ་ཁྲིད་ཡོད་པའི་ཡོད་གོ་མ་ཆོད་པ་རེད་འདུག་པས་དེ་གསལ་བོ་བཟོ་རྒྱུ་ཤིན་ཏུ་གལ་ཆེ་རེད། དེ་ནས་ང་ཚོ་མི་མང་གིས་རྡོག་རྩ་གཅིག་སྒྲིལ་གྱིས་དབུ་ཁྲིད་ལ་སྔར་ལས་རྒྱབ་སྐྱོར་བྱེད། དབུ་ཁྲིད་ཀྱིས་ཀྱང་དུས་ནས་དུས་སུ་མི་མང་ལ་ལམ་སྟོན་གནོང་། དེ་ལྟར་བོད་རང་དབང་ཐོབ་པར་བྱེད།
   ཁ་བརྡ་ཚང་གིས་འདི་དྲ་ངོས་སུ་འཇོག་རོགས།

8. རྒྱ་དམར་གཞུང་གིམངའ་འོག་ན་། གསོན་དུས་ཚེ་སྲོག་མི་དབང་གི་། ཤི་ན་བེམ་པོ་མི་དབང་གི་། བོད་ལ་དབང་བའི་དངོས་པོ་གཅིག་ཀྱང་མེད་།

9. སྐྱིད་སྡུག་མཉམ་མྱོང་ཡིན། ཁྱོད་ལ་སེམས་གཏིང་ནས་གུས་འདུད་ཞུ།

10. འདི་ལ་ངོ་མ་བསམ་བློ་བཏང་དགོས་ཀི་འདུག སྙིང་སྟོབས་ཅན་རྣམས་གཅིག་རྗེས་སུ་གཉིས་མཐུད་བུད་སོང་ན། སྤྱིར་བོད་མི་ཉུང་དང་གཅིག གཉིས་སྙིང་སྟོབས་ཅན་ཉུང་དང་གཉིས། ང་ཚོའི་དཔའ་རྒོད་རྣམས་རྩ་སྟོང་དུ་འགྱུར་རམ། ངོ་མ་སེམས་ཁུར་བྱེད་དགོས་པའི་དུས་གཅིག་རེད།

11. ང་ཚོས་རྒྱལ་གཅེས་པ་ཁོང་རྣམས་ལ་ངེས་པར་དུ་གུས་འདུད་ཡོད། འོན་ཀྱང་བོད་ནང་གི་དཔའ་བོ་ག་ཙམ་གྱིས་རང་ལུས་མཆོད་མེ་ཕུལ་སོང་། འདི་ལ་སྔར་ལས་ལྷག་པའི་གྲུབ་འབྲས་མངོན་གསལ་ཅི་ཡང་མ་མཐོང་སོང་། རྒྱུ་རྐྱེན་དེ་དོན་ངོ་མ་
    བཙན་བྱོལ་ནང་གི་བོད་མི་ཚོས་གོ་མ་ཆོད་པ་རེད། ལྷག་ཏུ་གཞུང་ཞབས་པ་རྣམས་ཀྱིས་འདི་ལ་དོ་སྣང་ཆེན་པོས་འགན་ལེན་བྱེད་རྒྱུ་དུས་སྐབས་འདིས་གཙོ་གནད་ཅན་དུ་འགྱུར་འདུག

12. སྒང་བ་ཚང་ལ་དཔའ་ཉམས་ཡོད་ཀྱང་རྒྱལ་སྲིད་མ་ཐུབ་གཞན་ལ་ཤོར།།གཞན་ཡུལ་འགྲིམས་ནས་ཨུ་ཚུགས་བྱས་ཀྱང་བདེན་པའི་འཇའ་ཚོན་རིང་དུ་ཡལ།།རིང་ནས་བསགས་པའི་ནད་ཀྱི་སྤྲང་པ་ལ་རྒྱའི་གྲི་ཡིས་གཤག་པ་ན།།ལ་རྒྱའི་མེ་ལྕེ་དགོང་དུ་མཆེད་ཅིང་འཇིག་རྟེན་ཀུན་ལ་བརྡ་ཞིག་སྤྲད།།

13. རྒྱལ་གཅེས་ཀྱི་དཔའ་བོ་དག་ལ་སྙིང་ཐག་ནས་གུས་འདུད་ཞི་ཁྱེད་རྣམས་ཀྱིས་ལ་རྒྱ་ཡི་མེ་ལྕེ་ནམ་མཁའི་དགོང་ལས་མཐོ་སོང་ཁྱེད་རྣམས་ཀྱིས་བཀའ་དྲིན་ལ་རྗེས་སུ་ཡི་རིང་ཡོད་བོད་རྒྱལ་ལོ།།།

14. ༡བློ་གྲོས་ཅན་ཚོས་རང་སྲེག་མཚམས་འཇོག་མཛོད།།
    ༢བཟང་གསུམ་ཐུགས་ཀྱིས་འཐབ་རྩོད་རྣམ་དཔྱོད་བསྟེན།།
    ༣ཤེས་བྱའི་གནས་དང་རྒྱ་གཞུང་ཕུགས་རེའི་དོན།།
    ༤རབ་ཏུ་དགོངས་ནས་ཚེ་སྲོག་གཅེས་འཛིན་འཚལ།།
    ཉེ་ཆར་༸གོང་ས་མཆོག་གི་གསུང་དོན་ལ་དཔག་ན་དེ་ཙམ་ཐུགས་ལ་མ་བབ་པའམ་ཐུགས་ཕངས་པའི་རྣམ་པ་གསལ་པོ་འདུག་པ་ནི། ངས་དེ་ནོར་འཁྲུལ་རེད་ཅེས་ལབ་ན་ཁོང་ཚོའི་ཕ་མ་སོགས་ནང་མི་སྤུན་མཆེད་དང་། དགའ་ཉེ་བློ་དཀར་རྣམས་སེམས་ཕངས་འགྲོ་གི་རེད། ལས་འགུལ་དེ་འགྲིགས་པ་རེད་ཅེས་ཟེར་བ་ལ། འབྲས་བུ་ཇི་ཡོང་ཚོད་དཔག་བྱེད་དཀའ་བ་ཞིག་རེད་ཅེས་གསུངས་པ་ལས་གསལ་པོར་རྟོགས་ཐུབ་པ་ནི། ༸གོང་ས་མཆོག་གི་ཐུགས་ངོར་རང་སྲེག་ལས་འགུལ་དེ་གནས་སྐབས་འཕྲལ་དུ་
    མཚམས་འཇོགས་གནང་སྟེ་ཐབས་ཤེས་ཟུང་དུ་སྦྲེལ་བའི་ལས་འགུལ་གཞན་ཞིག་སྤེལ་
    དགོས་པའི་ཐུགས་རེ་ཡོད་པ་ཟུར་བལྟས་ལེབ་མཐོང་མ་ཡིན་ནམ།།