ཁ་བརྡ་དྲྭ་བ། ངས་རྒྱང་རིང་ནས་དུང་བའི་མིག་ཟུང་ཁྱོད་ལ་བཅེར་ཡོད།

དོལ་སྨྱོན།

སྤྱིར་སྔོན་ཐོན་རྒྱལ་ཁབ་ཀྱི་དྲྭ་རྒྱའི་ཁྱབ་ཚད་ལ་བལྟས་ན། རང་རེ་བོད་པའི་སྐད་ཡིག་གིས་བཀོལ་སྤྱོད་བྱེད་པའི་དྲྭ་རྒྱ་དག་ཆེས་ཉུང་ཉུང་ཡིན་མོད། འོན་ཀྱང་མི་རིགས་ཀྱི་ལ་རྒྱ་སྲོག་རྩར་བཟུང་ཞིང་རྣམ་དཔྱོད་ཀྱི་མེ་ལྕེ་འོད་དུ་འབར་ལ། ད་དུང་ཤེས་བྱའི་མེ་ཏོག་རྒྱན་དུ་སྤུད་པའི་རང་རེའི་མི་བུ་མི་ཉུང་ཞིག་གིས། ཆེས་ཐུང་བའི་དུས་ཡུན་ནང་། བོད་ཀྱི་ཁྱད་ཆོས་དང་ཡོང་སུ་འཚམས་ཤིང་། རིག་གཞུང་སྲུང་སྐྱོབ་ཀྱི་བསྟི་གནས་སུ་གྱུར་པ། ད་དུང་མདུན་སྐྱོད་དང་སྔོན་ཐོན་གྱི་རྗེས་སུ་སྙོགས་ཐུབ་པའི་དྲྭ་རྒྱ་མང་པོ་ཞིག་རང་རེའི་མིག་གི་ལོངས་སྤྱོད་དང་། སེམས་ཀྱི་ཟས་མཆོག་ཏུ་གྱུར་པ་དེ་དག་རེད།

དེ་ཡི་ནང་ནང་ནས་ཀྱང་ང་རང་དགའ་ཤོས་དང་སྣང་བར་འགྲོ་ཤོས་ནི་ཁ་བརྡ་དྲྭ་རྒྱ་འདི་རེད། རྒྱུ་མཚན་ནི། དྲྭ་རྒྱ་འདི་ཉིད་ཁྱབ་ཆེ་ཞིང་སྟབས་བདེ་ལ། ད་དུང་འདི་ཡི་ནང་དུ། སྣ་མང་རྩོམ་ཡིག་གི་མེ་ཏོག་གཡང་དུ་འཁྱིལ་ཞིང་། ཁམས་དང་མོས་པའི་མཆན་བུ་ཆར་ལྟར་འབེབས་པ། དགག་བཞག་སྤོང་བའི་རིག་ལམ་མེ་ལྟར་མཆེད་ཅིང་།དགའ་སྐྱོ་གདུང་བའི་འགྱུར་ཁྱུག་ཡོངས་སུ་རྫོགས་པ། ད་དུང་། དབྱངས་ཅན་ལྷ་མོའི་མགྲིན་པར་འགྲན་པའི་སྙན་ངག་པ་ཡོད་ལ། གཞུང་ལུགས་རབ་འབྱམས་ངག་ནས་གྱེར་བའི་མཁན་ཆེན་ཡོད། གཞན་ཡང་། གསར་འགྱུར་དང་ཆབས་སྲིད། གནའ་རབས་དང་དེང་རབས། ནང་ཆོས་དང་ཚན་རིག་སོགས། གང་ལའང་མཁྱེན་པ་བརྙེས་པའི་མི་བུ་མང་དག་ཅིག་ཁ་བརྡ་དྲྭ་བའི་མཛེས་རྒྱན་དུ་བཞུགས་ཡོད།

སྣ་མང་གི་བརྗོད་བྱ་གཡང་དུ་འཁྱིལ་ཞིང་། སྙན་ཚིག་གི་མེ་ཏོག་ཆར་དུ་བསྙིལ་བའི་དྲྭ་རྒྱ་འདི་ཉིད་མེ་ཏོག་ལྟ་བུའི་མཛེས་སྡུག་གཅིག་དང་། སྦྲང་རྩི་ལྟ་བུའི་རོ་མཆོག་གཅིག་ཏུ་བརྩི་ཞིང་ཡོད་མོད།བློ་ཕམ་པ་ཞིག་ལ། ད་ལྟ་ཁ་བརྡ་དྲྭ་བ་ནི། གསར་གྱུར་གྱི་བསྟི་གནས་གཙོ་བོ་ཞིག་ཏུ་གྱུར་འདུག་ལ། ཆབ་སྲིད་ཀྱི་སྟེགས་བུ་ཆེན་པོ་ཞིག་ཏུ་འཕོས་འདུག རིན་ཐང་ཆེ་བའི་ཚེ་སྲོག་དག འདི་ལྟར་ཟང་ཟིང་གི་བཅའ་དངོས་ལྟར། འཕང་མེད་དུ་གཅིག་རྗེས་གཉིས་འཐུད་ཀྱིས་འཇིགས་རྟེན་ཕ་རོལ་ཏུ་འགྲིམས་པའི་ད་ལྟའི་རང་རེ་བོད་ཀྱི་གནས་སྟངས་འདི་ལ་གཞིགས་ན། དེ་ལྟར་ཡིན་དུ་ཆོག་ཀྱང་། སྙན་ངག་གི་ལམ་ནས་ཀྱང་དེ་དག་གི་བརྗོད་བྱ་དག་འདྲེན་ཆོག་ལ། སེམས་ཚོར་དང་རྗེས་དྲན་ཡང་བྱེད་ཆོག་པས་ན། ཆེས་ཕུལ་ཏུ་བྱུང་བའི་ཁ་བརྡ་དྲྭ་རྒྱའི་དོ་ར་ཡང་མོ་འདིར། ཆེས་བཀུར་བར་འོས་པའི་སྙན་ངག་པ་ཡོངས་ལ། སྙན་ངག་གི་སྦྲང་ཆར་དག་ཀྱང་བར་བར་དུ་འཇོ་བའི་རེ་འབོད་ཞུ།