ཁ་སང་རེས་གཟའ་ཟླ་བར་དཔལ་རྒྱལ་བ་ཀརྨ་པ་མཆོག་གིས་གནས་མཆོག་རྡོ་རྗེ་གདན་ནས་གསུང་འཕྲིན་ཞིག་ཕེབས་པའི་ནང་བཀོད་དོན། “ ཉེ་དུས་ཐོན་པའི་ཛ་དྲག་གི་གནས་ཚུལ་ཞིག་ལ། བོད་ཤར་ཕྱོགས་སུ་ཉི་མ་གཅིག་གི་ནང་དུའང་བོད་མི་གསུམ་གྱིས་རང་ལུས་མེར་སྲེག་བྱས་ཡོད་འདུག་ཅིང། དེ་ནི་སྤྱི་ཟླ་དང་པོའི་ནང་དུ་བོད་མི་བཞིས་རང་ལུས་མེར་སྲེག་བྱས་པ་དང་། གཞན་རྣམས་སྐད་འབོད་ཁྲོམ་སྐོར་གྱི་ནང་དུ་འདས་གྲོངས་ཕྱིན་པའི་རྗེས་སུ་བྱུང་བའི་གནས་ཚུལ་ཞིག་རེད། གནས་སྟངས་ཉེན་ཁ་ཆེ་རུ་འགྲོ་བཞིན་ཡོད་ནའང་། རྒྱ་ནག་གཞུང་གི་ངོས་ནས་བསམ་གཞིག་དང་། འབྱུང་རྐྱེན་གང་ཡིན་རྟོགས་ཐབས་མ་བྱས་པར་དྲག་གནོན་ཇི་ཆེས་གདོང་ལེན་བྱེད་བཞིན་ཡོད། བོད་མི་རེ་གྲོངས་པའི་གནས་ཚུལ་གསར་པ་རེ་འབྱོར་དུས་ངའི་སེམས་ལ་ཚད་མེད་པའི་ན་ཟུག་དང་སྐྱོ་སྣང་སྐྱེ་ཡི་ཡོད་པས་ཉི་མ་གཅིག་གི་ནང་དུའང་མི་གསུམ་གྲོངས་པའི་གནས་ཚུལ་དེ་ནི་བཟོད་ཐབས་ཡོངས་སུ་བྲལ་བ་ཞིག་རེད། དེས་ན་ཁོང་རྣམ་པས་རང་སྲོག་བློས་གཏོང་གནང་བ་ཆུད་ཟོས་སུ་མ་སོང་བར་ད་ལྟའི་སྲིད་བྱུས་ལ་འགྱུར་བ་ཐེབས་ཏེ་བོད་རིགས་སྤུན་ཟླ་རྣམས་ཀྱིས་ཞི་བདེ་འཐོབ་པའི་རེ་སྨོན་བྱེད་ཀྱི་ཡོད།
ང་ལ་ཀརྨ་པའི་མཚན་ཡོད་པའི་ཆ་ནས། ལོ་ངོ་དགུ་བརྒྱ་ལྷག་པའི་ལོ་རྒྱུས་རིང་ཆབ་སྲིད་ཀྱི་གནད་དོན་གང་ལའང་ཞུགས་མྱོང་མེད་པའི་སྤྲུལ་བརྒྱུད་ཅིག་ཡིན་ཁར། སྒེར་ངོས་ནས་ཀྱང་སྲོལ་རྒྱུན་འདི་ཉིད་ལ་ནམ་ཡང་འགྱུར་བ་གཏོང་འདོད་མེད། འོན་ཀྱང་བོད་མི་ཞིག་ཡིན་པའི་ངོས་ནས་ངས་བོད་མི་དམངས་རྣམས་ལ་ཤ་ཚ་དང་དུངས་སེམས་ཆེན་པོ་ཡོད་པས་ཁོང་ཚོ་སྡུག་བསྔལ་ནང་ཚུད་བཞིན་པའི་སྐབས་ཁ་ཁུ་སིམ་མེར་སྡོད་པ་ནི་མི་འོས་པའི་བྱ་སྤྱོད་ཅིག་ཏུ་མཐོང་སྟེ། ཁོང་རྣམས་ཀྱི་བདེ་སྐྱིད་ནི་ངའི་སེམས་ཁུར་ཆེ་ཤོས་ཤིག་ཡིན།
བོད་མི་རྣམས་ཀྱིས་སྐད་འབོད་ཁྲོམ་སྐོར་དང་རང་ལུས་མེར་སྲེག་བྱེད་པ་ནི་སེམས་གཏིང་གི་འདོད་བློ་མ་ཁེངས་པའི་ཟུག་རྔུ་ལ་གཞན་གྱིས་ངོས་ལེན་མ་བྱས་པར་ལུས་པའི་ནད་རྟགས་ཤིག་རེད། གལ་སྲིད་དངོས་གནས་བོད་མི་རྣམས་ལ་འདོད་པ་དང་མཐུན་པར་སོ་སོའི་སྐད་ཡིག་དང་། ཆོས་ལུགས། རིག་གཞུང་རྣམས་སྲུང་སྐྱོབ་བྱེད་བཞིན་འཚོ་བ་སྐྱེལ་ཆོག་པའི་གོ་སྐབས་ཤིག་ཡོད་པ་ཡིན་ན་གྱེན་ལངས་བྱེད་ཀྱི་མ་རེད་ལ་རང་སྲོག་ བློས་གཏོང་དེ་བས་ཀྱང་བྱེད་ཀྱི་མ་རེད།
སྤྱི་ལོ་ ༡༩༥༩ ནས་བཟུང་ང་ཚོ་བོད་མི་རྣམས་ལ་བསམ་ཡུལ་ལས་འདས་པའི་ཕུང་ཚབས་ཆེན་པོ་བྱུང་མོད། ཕྱོགས་གཞན་ནས་རྐྱེན་ངན་གྲོགས་འཆར་གྱི་ཕན་འབྲས་ཀྱང་སོན་པ་སྟེ། ང་ཚོ་མི་ཉུང་བ་ཞིག་ལ་རང་ཉིད་བོད་རིགས་ཤིག་ཡིན་པའི་རང་ངོ་འཕྲོད་པ་དང། ཆོལ་གསུམ་བོད་མི་རྣམས་གོང་བུ་གཅིག་གྱུར་གྱི་ཚོར་འདུན་སྐྱེད་ཅིང་། དེ་བཞིན་༧གོང་ས་༧སྐྱབས་མགོན་ཆེན་པོ་ལྟ་བུའི་གཅིག་གྱུར་དབུ་འཁྲིད་ཀྱི་རིན་ཐང་ཡང་མཐོང་ཡོད། རྒྱུ་རྐྱེན་དེ་དག་གིས་ང་ཚོར་རེ་བ་ཆེན་པོ་བྱེད་ཆོག་པའི་རྨང་གཞི་རླབས་ཆེན་ཞིག་བསྐྲུན་ཡོད་པ་རེད།
རྒྱ་ནག་གཞུང་གིས་བོད་ལ་ཡར་རྒྱས་བཏང་རབས་ཤོད་ཀྱི་ཡོད་ལ། ང་རང་བོད་ལ་ཡོད་དུས་ཀྱང་ཕྱི་དངོས་པོའི་བདེ་སྐྱིད་གང་འཚམས་ཡོད་པ་ཤེས་ཀྱི་ཡོད། འོན་ཏེ་དཔལ་འབྱོར་དང་ཡར་རྒྱས་དེ་དག་གིས་བོད་མི་རང་ངོས་ནས་རྩ་ཆེར་འཛིན་པའི་གནད་དོན་ཐད་ཕན་ཐོགས་མ་བྱུང་ཞིང་། ནང་སེམས་ཀྱི་བློ་ཁ་མ་རྫོགས་པའི་ཕྱི་དངོས་པོའི་ཆ་རྐྱེན་ཙམ་གྱིས་ཆོག་ཐབས་མེད་ལ། བོད་མི་རྣམས་རྒྱུན་དུ་སོ་སོའི་རང་ཚུལ་དང་མཐུན་པའི་སྤང་བླང་གོ་ལྡོག་བྱེད་དགོས་པ་དང་། ༧གོང་ས་༧སྐྱབས་མགོན་ཆེན་པོར་མཚན་སྨད་བྱེད་དགོས་པའི་བློ་དྭོགས་ཀྱི་འཇིགས་སྣང་ངང་གནས་དགོས་ཐུག་ཡོད། རྒྱ་ནག་གཞུང་གིས་ཡང་ནས་ཡང་དུ་༧གོང་ས་༧སྐྱབས་མགོན་ཆེན་པོ་མཆོག་ནི་དགྲ་བོ་ཡིན་པའི་བསྙོན་འཛུགས་བྱེད་པ་དང་། ༧གོང་ས་མཆོག་གིས་བོད་རྒྱའི་དཀའ་རྙོག་སེལ་བར་འཚེ་བ་མེད་པ་དང་ཞི་འགྲིག་གི་འབད་བརྩོན་གནང་བ་ཐམས་ཅད་དྭང་ལེན་མི་བྱེད་ཅིང་། བོད་མི་ཡོངས་ཀྱིས་སྙིང་ཐག་པ་ནས་༧གོང་ས་༧སྐྱབས་མགོན་ཆེན་པོར་ཡོད་པའི་དད་པ་དང་དམ་ཚིག་རྣམས་སྣང་མེད་དུ་གཏོང་གི་ཡོད། ༧གོང་ས་༧སྐྱབས་མགོན་ཆེན་པོ་བྲོས་བྱོལ་དུ་ཕེབས་རྗེས་བོད་དུ་སྐྱེས་པའི་བོད་མི་རྣམས་ཀྱིས་ཀྱང་༧གོང་ས་མཆོག་ནི་འདི་ཕྱིའི་སྐྱབས་གནས་དང་ལམ་སྣ་འདྲེན་མཁན་ཞིག་ཏུ་ངོས་འཛིན་བྱེད་ཀྱི་ཡོད་པས་ནམ་ཡིན་ཀྱང་སྡང་ཟུག་ཆེན་པོས་བསྙོན་འཛུགས་བྱེད་པ་ནི་སུ་ལ་ཡང་ཕན་ཐོགས་མེད་པ་ཞིག་ཡིན། དོན་དངོས་ལ་བོད་མི་རྣམས་ཀྱི་སེམས་གཏིང་གི་དད་པར་ཕོག་ཐུག་གཏོང་བ་དེས་བོད་མི་རྣམས་ཀྱིས་རྒྱ་ནག་གཞུང་ལ་ཡིད་ཆེས་རྙེད་པའི་གོ་སྐབས་གཏོར་གྱི་ཡོད། དེ་ནི་ཁེ་ཕན་ཡོད་པ་དང་སྤྱང་གྲུང་ལྡན་པའི་བྱ་བ་ཞིག་མ་རེད།
ང་རང་སྒེར་ངོས་ནས་རྒྱ་ནག་དབུས་གཞུང་གི་དཔོན་རིགས་རྣམས་ལ་འབོད་སྐུལ་ཞུ་རྒྱུར། ས་གནས་ཀྱི་དཔོན་རིགས་ཚོའི་འགྲེལ་བཤད་ཙམ་ལ་ཆ་འཇོག་མ་བྱས་པར་བོད་ནང་གི་བོད་མི་རྣམས་ཀྱི་སེམས་ནང་གི་ན་ཟུག་གང་ཡིན་པ་ངོས་ཟིན་པར་བྱས་ཏེ། དངོས་ཡོད་གནས་སྟངས་གང་ཞིག་འབྱུང་བཞིན་པ་དེར་འགན་ཁུར་གཙང་ལེན་གནང་ན་དེ་ནི་བོད་མི་དང་རྒྱ་ནག་གཞུང་ཕན་ཚུན་བློ་གཏད་ཡིད་ཆེས་ཀྱི་རྨང་གཞི་བཟང་པོ་ཞིག་ཏུ་འགྱུར་གྱི་རེད། བོད་མིའི་གནས་སྟངས་འདི་ཉིད་རྒྱ་ནག་གཞུང་གི་ངོས་ནས་རང་ཕྱོགས་དང་འགལ་བའི་ཆབ་སྲིད་ཀྱི་གནད་དོན་ཞིག་ཏུ་མི་འཛིན་པར་མིའི་རིགས་ཀྱི་ཕན་བདེའི་གཞི་རྩར་ཐུག་པའི་གནད་དོན་ཞིག་ཏུ་ངོས་འཛིན་གནང་ན་གང་ལས་ཀྱང་ཕན་རླབས་ཆེ་བ་ཡིན།
གཉན་འཕྲང་ཆེ་བའི་དུས་འདིར། ངས་བོད་དུ་ཡོད་པའི་བོད་མི་རྣམས་རང་ཚུགས་མ་ཤོར་བར་བྱས་ཏེ། དཀའ་ངལ་ལ་བཟོད་བསྲན་དང་། ཕུགས་རྒྱང་རིང་པོའི་དམིགས་ཡུལ་བཅང་ནས། ནམ་ཡིན་ཡང་རང་ཉིད་འགྲོ་བ་མི་ཞིག་དང་བོད་མི་ཞིག་ཡིན་པའི་རིན་ཐང་མ་བརྗེད་པ་གནང་རོགས་གྱིས་ཞེས་ཞུ་རྒྱུ་ཡིན།
བོད་ཀྱི་ལོ་སར་བསླེབ་ལ་ཉེ་བའི་སྐབས་འདིར། ངས་བོད་རིགས་དང་རྒྱ་རིགས་ཀྱི་སྤུན་ཟླ་ཕོ་མོ་རྣམས་དང་། རྒྱ་གར་སོགས་འཛམ་གླིང་གང་སར་ཡོད་པའི་ང་ཚོའི་གྲོགས་པོ་དང་། རྒྱབ་སྐྱོར་རོགས་རམ་གནང་མཁན་ཚང་མར། གཏན་གྱི་བདེ་སྐྱིད་དང་། དོན་དམ་པའི་ཞི་བདེ་འཐོབ་པའི་རེ་སྨོན་ཞུ་རྒྱུ་དང་། གཞན་ཡང་ལོ་སར་པ་འདི་ཉིད་འཆམ་མཐུན་གྱི་དུས་སྐབས་ཤིག་ཏུ་གྱུར་ཏེ། ང་ཚོ་ཐུན་མོང་གི་ཁྱིམ་གཞིས་འཛམ་གླིང་འདི་ཉིད་དང་། གང་ཟག་ཕན་ཚུན་གཅིག་གིས་གཅིག་ལ་གུས་བརྩི་དང་བྱམས་བརྩེའི་དཔལ་ཡོན་རྒྱས་པའི་སྨོན་འདུན་ཞུ” ཞེས་བསྟན་འདུག
ཡོངས་ཁུང་བོད་ཀྱི་དུས་བབ།
དམིགས་བསལ་སྲིད་འགན་བཞེས་པའི་མཛད་པ་མ་བསྐྱངས་ན་ཡང་སྲིད་ཕྱོགས་ལ་འདི་ལྟར་འགན་འཁུར་དགོས་པ་བླ་ཆེན་རྣམ་པའི་འོས་འགན་ཡང་ཅི་ལ་མིན། ད་དུང་རྒྱ་ནག་གི་རྩ་ཁྲིམས་དང་བཅའ་ཁྲིམས། དབུ་མའི་སྲིད་ཇུས་གང་ཐད་ནས་བཀའ་སློབ་ཟབ་མོ་རིམ་བཞིན་གནང་རྒྱུར་སྙིང་ནས་སྨོན་ནོ།།
རྒྱལ་དབང་ཀརྨ་པས་གསུང་འཕྲིན་འདི་བོད་རིགས་སྤུན་ཟླ་ཚོའི་སྙིང་གི་གོང་བུ་དུ་འཆང་འོས་པ་ཞིག་རེད་འདུག
ཀརྨ་པ་ཁོང་ནི།་༧ གོང་ས་མཆོག་གིས་ཐུགས་ཕུག་བཏད་ས་ཡང་རེད་ལ། གཞིའི་བཞུགས་བོད་མི་ཡོངས་ཀྱིས་རེ་བ་ཞུ་ས་ཡང་རེད་འདུག
ཁོང་གི་རླབས་ཆེན་གྱི་ཐུགས་བཞེད་ཐ་དག་གེགས་མེད་མྱུར་འགྲུབ་ཡོང་བའི་སྨོན་འདུན།
རྒྱ་ཆེ་བོད་མི་རྣམས་ཀྱིས་གནང་དགོས་སྙམ་མོ།
བཀའ་སློབ་ཡག་པོ་གནང་འདུག ཡིན་ན་ཡང་རྒྱ་ནག་གིས་བོད་ལ་བཙན་འཛུལ་དང་བོད་རང་བཙན་སྐོར་ཅི་ཡང་གསུངས་མི་འདུག
དཔལ་ཀརྨ་པ་ཕྱག་འཚལ་ལོ། བླ་མའི་གཟི་བརྗིད་དང་སྐུའི་ཡོན་ཏན་ལའང་ཕྱག་འཚལ་ལོ། གསུང་འཕྲིན་གནང་བའང་ཡག་པོ་འདུག འོན་ཀྱང་དཔལ་མཆོག་བཀའ་ཤག་གི་ཁ་ལ་མ་རྒྱུགས། རང་ཉིད་སྒེར་གྱི་བསམ་ཚུལ་འདོན་ཐུབ་ན་དེ་བས་ཀྱང་དཔེ་མི་སྲིད་ཡག་པོ་རེད། དེ་ཙམ་མ་གཏོགས་ཞུ་རྒྱུ་མི་འདུག
སྐུ་ཚེ་བརྟན་ཅིང་མཛད་འཕྲིན་རྒྱས་གྱུར་ཅིག
ཁ་བའི་རྡུལ་ལགས། བོད་རང་བཙན་གསུང་བ་ཙམ་གྱིས་ཕན་གྱི་རེད་དམ། ཁྱེད་ཚོས་དག་གིས་ཚོར་བ་སྣ་འགོར་བཟུང་ནས་མ་ཕེབས་དང་། སློབ་སྦྱོང་ཡག་པོ་གྱིས།
དཔལ་རྒྱལ་བ་ཀརྨ་པ་ལ་གུས་ཕྱག་སྔོན་སོང་དང་བཅས།
ལོ་ངོ་དགུ་བརྒྱ་ལྷག་པའི་ལོ་རྒྱུས་རིང་ཆབ་སྲིད་ཀྱི་གནད་དོན་གང་ལའང་ཞུགས་མྱོང་མེད་པའི་སྤྲུལ་བརྒྱུད་ཅིག་ཡིན་པ་ལ་རྒྱུན་སྐྱོངས་གནང་བའི་རེ་སྨོན་དང་ཁོང་གིས་བཞེད་དོན་མྱུད་དུ་འགྲུབ་པར་ཤོག
ད་རེས་ཀྱི་བཀའ་སློབ་ཡག་པོ་གསུངས་འདུག་ཡིད་རང་ཡོད། འོན་ཀྱང་དེ་སྔོན་བོད་མི་རང་ལུས་མེ་བསྲེགས་ཀྱི་སྐོར་ལ་གསུངས་པ་ཁ་ཅིག་ལ་ཡིད་རངས་བྱེད་ཐུབ་ས་མ་རེད།
བོད་གངས་ཅན་གྱི་་སྐྱེས་བུ་རང་རེད་འདུག་སྔགས་བརྗོད་ཡོད། ཀརྨ་པ་མཁྱེན་ནོ།
བཀའ་སློབ་རིན་ཐང་དང་ལྡན་པ་གནང་འདུག མངོན་པར་བསྟོད་དོ།
༧གོང་ས་༧སྐྱབས་མགོན་ཆེན་པོར་མཚན་སྨད་བྱེད་དགོས་པའི་བློ་དྭོགས་ཀྱི་འཇིགས་སྣང་ངང་གནས་དགོས་ཐུག་ཡོད། རྒྱ་ནག་གཞུང་གིས་ཡང་ནས་ཡང་དུ་༧གོང་ས་༧སྐྱབས་མགོན་ཆེན་པོ་མཆོག་ནི་དགྲ་བོ་ཡིན་པའི་བསྙོན་འཛུགས་བྱེད་པ་དང་། ༧གོང་ས་མཆོག་གིས་བོད་རྒྱའི་དཀའ་རྙོག་སེལ་བར་འཚེ་བ་མེད་པ་དང་ཞི་འགྲིག་གི་འབད་བརྩོན་གནང་བ་ཐམས་ཅད་དྭང་ལེན་མི་བྱེད་ཅིང་། བོད་མི་ཡོངས་ཀྱིས་སྙིང་ཐག་པ་ནས་༧གོང་ས་༧སྐྱབས་མགོན་ཆེན་པོར་ཡོད་པའི་དད་པ་དང་དམ་ཚིག་རྣམས་སྣང་མེད་དུ་གཏོང་གི་ཡོད། ༧གོང་ས་༧སྐྱབས་མགོན་ཆེན་པོ་བྲོས་བྱོལ་དུ་ཕེབས་རྗེས་བོད་དུ་སྐྱེས་པའི་བོད་མི་རྣམས་ཀྱིས་ཀྱང་༧གོང་ས་མཆོག་ནི་འདི་ཕྱིའི་སྐྱབས་གནས་དང་ལམ་སྣ་འདྲེན་མཁན་ཞིག་ཏུ་ངོས་འཛིན་བྱེད་ཀྱི་ཡོད་པས་ནམ་ཡིན་ཀྱང་སྡང་ཟུག་ཆེན་པོས་བསྙོན་འཛུགས་བྱེད་པ་ནི་སུ་ལ་ཡང་ཕན་ཐོགས་མེད་པ་ཞིག་ཡིན། དོན་དངོས་ལ་བོད་མི་རྣམས་ཀྱི་སེམས་གཏིང་གི་དད་པར་ཕོག་ཐུག་གཏོང་བ་དེས་བོད་མི་རྣམས་ཀྱིས་རྒྱ་ནག་གཞུང་ལ་ཡིད་ཆེས་རྙེད་པའི་གོ་སྐབས་གཏོར་གྱི་ཡོད། དེ་ནི་ཁེ་ཕན་ཡོད་པ་དང་སྤྱང་གྲུང་ལྡན་པའི་བྱ་བ་ཞིག་མ་རེད། ་་་་་་་གནད་དུ་འཁེལ་བའི་གསུང་ཉིད་དོ།
དུས་དང་དགོས་དབང་གི་དཔྱད་གཏམ་དང་བསམ་ཚུལ་སྤེལ་རོགས། འདི་བགྲོ་གླེང་མ་རེད། དེ་དབྱེ་འབྱེད་བྱེད་རོགས། མིན་ཚེ་རྩོམ་སྒྲིག་པས་སྟངས་འཛིན་བྱ་རོགས། རྡོར་གདན་ནས་གུས་སློབ་གྲགས་པས།
དཔལ་རྒྱལ་བ་ཀརྨ་པ་ཐུགས་རྗེ་ཆེ།
བཀའ་སློབ་འདི་འདྲའི་གནང་ན་ང་ཁྱེད་ལ་སེམས་བསམ་བའི་དཀྱིལ་ནས་དད།།
གང་ལྟར་༧རྒྱལ་དབང་བཅུ་བདུན་པ་འདི་ཉིད་༧གོང་ས་སྐྱབས་མགོན་ཆེན་པོ་མཆོག་གི་ཕྱག་རོགས་ཤིག་ཡོང་ཐུབ་པར་གཞིས་བཞུགས་བོད་མིའི་ཕལ་ཆེར་བའི་རེ་དོན་ཡིན།
རྩོམ་འདིར་མཆན་སྒོ་བརྒྱབ་ཡོད་།
ཁ་བརྡ་རྩོམ་སྒྲིག་པས།
http://www.khabdha.org
khabdha@gmail.com