ཨ་རིར་སྐྱབས་བཅོལ་ཆགས། སྐྱབས་བཅོལ་ཡིག་ཆ་ལ་བཅོལ།

ཁོང་གི་དབྱིན་ཡིག་དྲ་བ།
(ཁྲིམས་རྩོད་པ་བསྟན་འཛིན་དབང་རྒྱལ་ལ་བཅར་འདྲི།)
བཅར་འདྲི་ཞུ་མཁན། རིག་འབྱུང་དོན་གྲུབ་བཀྲ་ཤིས།

༡ ཐོག་མར། ཁྱེད་ནས་ཁྲིམས་ཀྱི་ལས་ཁུངས་དེའི་རྒྱབ་ལྗོངས་ལོ་རྒྱུས་ངོ་སྤྲོད་མདོར་ཙམ་བྱེད་རོགས།

ལན། ཁྲིམས་ཀྱི་ལས་ཁུངས་འདི་བཙུགས་ནས་ལོ་གཅིག་དང་བདུན་ཕྲག་གཉིས་ཙམ་འགྲོ་གི་ཡོད་རེད་། ཁྲིམས་ཀྱི་ལས་ཁུངས་འདི་བཙུགས་པའི་དགོས་དམིགས་གཙོ་བོ་དེ་། ༡ ནེའུ་ཡོག་གཅིག་པོར་བོད་མི་སྟོང་ཕྲག་བརྒྱད་བརྒལ་བ་ཙམ་ཡོད་མོད་། སྐྱབས་བཅོལ་ཡིག་ཆ་སོགས་མི་རིགས་གཞན་གྱི་ཁྲིམས་རྩོད་པ་བརྒྱུད་ནས་ཞུ་དགོས་ཐུག་གི་ཡོད་པ་རེད་། ༢ སོ་སོའི་མི་རིགས་མ་ཡིན་པའི། ཁྲིམས་རྩོད་པ་གཞན་ཞིག་བརྒྱུད་ནས་ཡིག་ཆ་སོགས་ཞུ་དགོས་དུས། སྐད་ཡིག་གི་གོ་བརྡ་མ་འཕྲོད་པའི་དཀའ་ངལ། དཀའ་ངལ་ཆུང་ཙག་རིགས་ལ་བརྟེན་ནས་གོ་ནོར་ཆེན་པོ་ཐེབས་པའི་རིགས། དངུལ་བླངས་བ་མ་གཏོགས་ལས་ཀ་ཡག་པོ་མ་བྱས་བའི་རིགས། ད་དུང་། བོད་རིགས་ཁ་ཤས་ལ་ཁྲིམས་རྩོད་པས་མཐོང་ཆུང་དང་ཁྱད་གསོད་བྱས་བའི་ལོ་རྒྱུས་སོགས་གནད་དོན་མང་པོ་བྱུང་འདུག ༣ ང་རང་གཅིག་ནས་བོད་མི་ཞིག་ཡིན་པ་དང་། བོད་རིགས་གཅིག་མཚུངས་ལྟར་སྐྱབས་བཅོལ་བ་ཡིན་པ། ཁྲིམས་ཀྱི་སློབ་གྲ་ཐོན་རྗེས་སོ་སོར་ཁྲིམས་རྩོད་ཀྱི་ཁོངས་སུ་ལོ་ཤས་རིང་ཉམས་མྱོང་ཡག་པོ་འཐོབ་ཡོད་པ་བཅས་རྒྱུ་མཚན་ལ་བཞག་ནས་ཁྲིམས་ཀྱི་ལས་ཁུངས་འདི་སྒོ་ཕྱེས་བ་ཡིན།

༢ ཁྱེད་ནས་ཁྲིམས་ཀྱི་གནད་དོན་གཙོ་བོ་གང་དང་གང་གི་སྐོར་ལ་ཕྱག་ནས་གནང་གི་ཡོད་དམ།

ལན། ངས་ལས་ཀའི་བརྒྱ་ཆ་དྲུག་ཅུ་དེ་སྐྱབས་བཅོལ་གྱི་གནད་དོན་སྒང་ལ་ཡིན། འདིའི་ཁོངས་སུ་གཙོ་བོ་། སྐྱབས་བཅོལ་བའི་ཡིག་ཆ་ཞུ་ཡ་དང་གཏན་སྡོད་ཡིག་ཆ་རེག་ཐབས་སོགས་བརྩིས་བའི་གཙོ་བོ་ཁྲིམས་མཐུན་ཡིག་ཆ་ཐོབ་ཐབས་ཀྱི་ལས་ཀའི་སྒང་ལ་ཡིན། ལས་ཀའི་བརྒྱ་ཆ་སུམ་ཅུ་ཙམ་ནང་མིའི་རྩོད་རྙོག་དང་བཟའ་ཚང་ཕན་ཚུན་གྱི་གནད་དོན། བཟའ་ཚང་ཁ་བྲལ་གྱི་གནད་དོན་སོགས་ཀྱི་སྒང་ལ་བྱེད་ཀྱི་ཡོད་། དེ་ནས་ལྷག་མ་བརྒྱ་ཆ་བཅུ་ཙམ་སྤྱིར་བཏང་གི་ཁྲིམས་ཀྱི་གནད་དོན་སྒང་ལ་ཡིན། འདིའི་ཁོངས་སུ་། ཟ་ཁང་དང་ཚོང་ཁང་སོགས་ལ་ཁྲིམས་མཐུན་ཡིག་ཆ་རེག་ཐབས་ཀྱི་གནད་དོན་སྐོར་ལ་ཡིན།

༣ ཁྱེད་ནས་ལས་ཀ་ཞིག་རྩིས་བླངས་ཚར་བའི་རྗེས་ལ། དེ་ལ་ཕྱག་ལས་ཇི་ལྟར་གནང་གི་ཡོད་།

ལན། ངས་བརྩིས་བླངས་བའི་ལས་ཀ་ཞིག་ཡིན་ན། ༡ དོ་བདག་གི་མཉམ་དུ་ཁ་ནས་བཤད་པ་ཙམ་མ་ཡིན་པར་ཚང་མ་བརྟན་པོ་ཡོང་བའི་ཆེད་དུ་ཡིག་ཐོག་ལ་འཇོག་གི་ཡོད་། ༢ དཀའ་ངལ་ག་རེ་ཡིན་ན་ཡང་། དེའི་གནད་འགག་དེ་ཚོའི་སྒང་ལ་དུས་ཚོད་མང་བ་གཏོང་གི་ཡོད་མ་གཏོགས་འབྲེལ་མེད་ཀྱི་རིགས་ལ་དུས་ཚོད་གཏོང་གི་མེད་། དེ་ལྟར་བྱས་ན། དོ་བདག་ལ་ཕན་གི་འདུག་ལ་དོ་བདག་གི་དུས་ཚོད་ཀྱང་འཕྲོ་བརླག་ལ་འགྲོ་གི་ཡོད་མ་རེད་། ༣ ངས་དོ་བདག་གིས་ཚུར་འབྲེལ་བ་བྱས་བ་ཙམ་མ་ཡིན་པར་། དུས་ཐོག་ལ་ཕར་ལ་ཡང་ཡིག་ངག་གཉིས་ཐོག་ནས་འབྲེལ་བ་ཞུ་གི་ཡོད་། ༤ ང་རང་བོད་མི་ཞིག་ཡིན་པ་དང་སྐྱབས་བཅོལ་བའི་གནས་སྟངས་ངོ་འཕྲོད་མཁན་ཞིག་ཡིན་ཙང་། གང་ནུས་གང་ཡོད་ཀྱིས་དོ་བདག་གི་དཀའ་ངལ་དེ་སེལ་བར་ལས་ཀ་བྱེད་གི་ཡོད་། གོང་གི་གནད་དོན་འདི་ཚོ་ཞུ་དགོས་བའི་རྒྱུ་མཚན་གཞན་ཞིག་ནི། བོད་པ་ཁ་ཤས་ཀྱིས་མི་རིགས་གཞན་པའི་ཁྲིམས་རྩོད་པ་དེ་འདྲ་གླས་ནས་དཀའ་ངལ་མང་པོ་འཕྲད་པའི་ལོ་རྒྱུས་འདུག དཔེར་ན། ཁྲིམས་རྩོད་པ་བོད་པའི་གནས་སྟངས་ལ་རྒྱུས་མེད་པའི་དབང་གིས། གནད་དོན་ཆུང་ཚགས་དེ་འདྲའི་རིགས་ལ་དུས་ཚོད་མང་པོ་གཏོང་བ། ཁྲིམས་རྩོད་པ་ངོ་མས་ལས་ཀ་མ་བྱས་བར་འོག་གི་ལས་རོགས་དེ་འདྲར་རྩིས་སྤྲད་ནས་ལས་དོན་མ་འགྲུབ་པ། ལས་ཀ་ཉིན་འགྱངས་ཞག་འགྱངས་བྱུང་བ། ད་དུང་། ཕན་ཚུན་གོ་བརྡ་མ་འཕྲོད་པའི་དབང་གིས་ནོར་འཁྲུལ་ཚབས་ཆེན་བྱུང་བ་དེ་སོགས་གནད་དོན་མང་པོ་འདུག དཔེར་ན། ཉེ་སྔོན་བོད་མི་ཞིག་ལ་གཞུང་ནས་ཡི་གེ་སླེབས་པ་དེས། སོ་སོའི་ཁྲིམས་རྩོད་པར་གཞུང་གི་ལས་ཁུངས་སུ་འགྲོ་དགོས་མིན་དྲིས་པར་། ཁྲིམས་རྩོད་པས་འགྲོ་ན་འགྲིག་རེད་ཟེར་ནས་། བོད་མི་དེ་རྒྱ་གར་དུ་ཕྱིར་བསློགས་པའི་གནས་སྟངས་བྱུང་འདུག

༤ ད་ཕན་ཁྱེད་ནས་ལས་ཀ་བྱས་བ་དེ་ཚོར་གྲུབ་འབྲས་ག་འདྲ་བྱུང་སོང་ངམ།

ལན། སྐྱབས་བཅོལ་གྱི་ཡིག་ཆ་ཞུ་ཡའི་ཐོག་ལ་ལས་ཀ་བྱེད་རྒྱུ་དེ་། ཉིན་མ་གཅིག་གཉིས་ཀྱི་ནང་ལ་གྲུབ་འབྲས་སྟོན་རྒྱུ་ཡོད་པ་དེ་འདྲ་མ་རེད་། དེ་ལ་དུས་ཚོད་འགོར་གི་ཡོད་པ་རེད་། ངས་བརྩིས་བླངས་བའི་ལས་ཀ་མང་པོ་ཞིག་སྤྱི་ལོ་༢༠༡༣ལ་ཐག་ཆོད་པ་དེ་འདྲ་ཡང་ཡོད་རེད་། གང་ལྟར་། ངས་བརྩིས་བླངས་ཚར་བའི་རྗེས་ལ་། ལས་ཀའི་འགོ་མཇུག་བར་གསུམ་བརྟན་པོ་དང་ཚགས་ཚུད་པོ་། ཡིད་ཆེས་འཕེར་བ་བྱེད་གི་ཡོད་། དཔེར་ན། ཉེ་ཆར་བོད་མི་ཞིག་གིས་ལས་ཀ་ཤོར་ནས་ལས་མེད་ཀྱི་སྐྱོབ་གསོ་མ་རེག་པའི་གནད་དོན་ཞིག་ངས་བརྩིས་བླངས་ཏེ་ཁྲིམས་ཐོག་ནས་རྩོད་བརྒྱབ་ཏེ་ཁོང་ལ་སྐྱོབ་གསོ་རེག་པའི་གནས་སྟངས་བྱུང་ཡོད་། ད་དུང་། ཨ་རི་བ་ཞིག་གིས་རང་གི་ཆུང་མ་བསད་ནས་ལོ་བཅོ་ལྔར་བཙོན་དུ་ཚུད་པ་དེ་། ལོ་བཅོ་ལྔའི་རྗེས་སུ་ཁོང་གློད་གྲོལ་གཏོང་དགོས་མིན་གྱི་གནད་དོན་དེ་ཐག་གཅོད་པ་ལ། ཁོང་གློད་པ་ཡིན་ལ་མ་འོངས་པར་སྤྱི་ཚོགས་ནང་དཀའ་ངལ་བཟོ་མིན་དང་ཁོང་ཡར་རྒྱས་ཕྱིན་ཡོད་མེད་། ཁོང་གློད་འོས་མིན་སོགས་ཀྱི་གནད་དོན་དེ་ཁྲིམས་ཐོག་ཏུ་སླེབས་པ་དེ་འདྲ་ཞིག་ལ་ཡང་གུས་བས་བརྩིས་བླངས་ནས་། མཐའ་མ་དེར་ཁོང་གློད་ཐུབ་པ་བྱུང་བ་རེད་།

ཁྲིམས་རྩོད་པ་བསྟན་འཛིན་དབང་རྒྱལ་གྱི་ངོ་སྤྲོད་མདོར་བསྡུས།

ཁྲིམས་རྩོད་པ་བསྟན་འཛིན་དབང་རྒྱལ་ལགས་ནི། རྒྱ་གར་དུ་སྐྱེས་ཤིང་རྡ་ཤོད་བོད་ཁྱིམ་ནས་འཛིན་རིམ་བཅུ་བ་ཐོན། རྡ་སྟེང་བོད་ཁྱིམ་ནས་འཛིན་རིམ་བཅུ་གཉིས་ཐོན། བོད་གཞུང་བརྒྱུད་དབྱིན་ཡུལ་དུ་ལོ་གཉིས་ཀྱི་ཤེས་ཡོན་སློབ་སྦྱོང་ཐོབ། ཨ་རིའི་མེས་སྒྲེལ་རྦ་རིས་གཙུག་ལག་སློབ་ཁང་(Meddlebury College)དུ་དཔལ་འབྱོར་དང་སྤྱི་ཚོགས་ཚན་རིག་ཐོག་སློབ་ཐོན་གནང་། དེའི་རྗེས་སུ་། ཁྲིམས་རྩོད་པའི་ལས་རོགས་ཀྱི་ཕྱག་ལས་ལོ་གསུམ་ལ་གནང་། ཕྱི་ལོ་༢༠༠༨ནས་༢༠༡༠བར་། སྦོ་སི་གྲོན་བྱང་ཤར་ཁྲིམས་ཀྱི་གཙུག་ལག་སློབ་ཁང་(Northeastern University School of Law) དུ་ཁྲིམས་ཀྱི་སློབ་སྦྱོང་ལོ་གཉིས་གནང་། དེའི་རྗེས་སུ་དུས་གཅིག་ལ་ནེའུ་ཡོག་དང་སྦོ་སུ་གྲོན་དུ་ཁྲིམས་ཀྱི་ལས་ཀ་བྱས་ཆོག་པའི་(Bar Exam) ཡིག་ཚད་ལེགས་འགྲུབ་བྱུང་བ་བཅས་ལོ་རྒྱུས་མདོར་བསྡུས་ཙམ་། ད་དུང་། ཁོང་ནི་བོད་ཀྱི་ཆབ་སྲིད་བསྐྱར་ཞིབ་དྲ་བའི་རྩོམ་སྒྲིག་པ་བཞིའི་གྲས་ཀྱི་གཅིག་ཡིན།

འབྲེལ་གཏུགས་ཁ་བྱང་།

NEW YORK
40-29 27th Street
Long Island City, NY 11101
Ph: (718) 303-0255
tenzin@WangyalLaw.com

MASSACHUSETTS
(By Appointment Only)
One Mifflin Place – Harvard Square
119 Mt. Auburn Street, Suite 400
Cambridge, MA 02138
Ph: (617) 312-0249
tenzin@WangyalLaw.com