བོད་ཀྱི་ནམ་མཁའ།

བོན་རྒྱ་བསྟན་འཛིན་རབ་རྒྱས།

སྲིན་པོ་འབྲུག་གི་ལོའི་ཆིག་བཤད་ཐོག་མ།

སྲིན་འབྲུག་གི་ཁ་ཆུ་ནག་པོས་ཨེན་ཙམ་ཡང་བརླན་པར་མ་གྱུར་ལ།ཟུར་གསུམ་གྱི་སྤྲིན་པ་ནག་པོ་གདུག་རྩུབ་ཀྱིས་བརྒྱུགས་ནའང་རལ་བར་མ་གྱུར་བའི་ནམ་མཁའ་འདི།འབྲོང་རྒོད་ཀྱི་རུ་ཐུར་ཁོ་ནས་འདེགས་དགོས་པ་རྟེན་འབྲེལ་གྱིས་དེད་པའི་བཀའ་དབང་འབའ་ཞིག་ལ་གྱུར་ཡོད་ནའང་།གནམ་འོག་འདི་སྲིན་འབྲུག་དང་གྲོག་མ་སྔོན་པོའི་ཁྲོམ་ར་རྒྱ་ཆེན་ཞིག་ལ་གྱུར་བས། བོད་ཀྱི་གནམ་འོག་འདི་སུ་ཞིག་གི་རྒྱ་མཚོའི་གཏིང་ཡིན་ལ་དམྱལ་བའི་མཁར་ཡང་ཡིན་ནོ།། ངས་བོད་ཀྱི་ནམ་མཁའ་ལ་ཅེར་ནས་ཕོ་ལོ་ཉི་ཤུ་བརྒལ་བའི་དེ་རིང་།ང་དངོས་གནས་ངུ་སྙིང་སྤྲོ་ལ་ཤི་འདོད་ཀྱང་འདུག དེ་ནི་གཞན་ཅི་ཡང་མིན་ཏེ།བོད་པ་རེ་རེ་བཞིན་ཚོར་བ་ཅན་གྱི་མེ་རྡོ་རུ་གྱུར་ཅིང་།ཤེད་བུ་གསོན་ཚུགས་ཅན་རེ་རེ་ཡིས་གནམ་འོག་གི་མུན་པའི་ངོ་གདོང་ལ་ཁྲམ་རྟགས་དམར་ཙར་བ་རེ་རྒྱག་བཞིན་ཚེ་སྲོག་གི་གཉུག་སེམས་སད་བཞིན་པ་དེས་སོ། ། ཡང་གཅིག་བཤད་ན། བོད་ཀྱི་གནམ་འོག་ནི་ང་ལྟ་བུའི་བུ་ངན་སྡར་མ་དག་འདུག་ས་ཞིག་མིན་པར།དཔའ་སྙིང་རྡོག་རྡོག་ཅན་གྱི་བུ་རབས་འབའ་ཞིག་གི་བསྟི་གནས་ཡིན་པ་དེ་རེད།མ་མཐའ་ཡང་དམིགས་ཡུལ་དང་ཚེ་སྲོག་དོ་མཉམ་དུ་འཛིན་མི་ཐུབ་པའི་མི་ངན་ང་འདྲ་བ་དག་གི་སྐྱེ་རྒྱུན་རྦད་དེ་ཆད་ན་འོས་ཤིང་། ང་དང་ང་འདྲ་བ་དག་གི་ཚེ་ཡི་ཉག་ཐག་ཆད་པའི་ཉིན་མོ་དེ་ནི་གནས་ཚུལ་ཡོད་ཚད་ཐག་ཆོད་པའི་ཉིན་མོ་དེའང་རེད་བསམ་གྱིན་འདུག

སྔོན་ཆད་སྤྱི་ལོ་༧༠ལོར་རོ་མ་བཙན་རྒྱལ་གྱིས་ཡ་ཧུ་དཱ་པའི་རྒྱལ་ས་བཙན་འཕྲོག་གྱིས་མངའ་འོག་ལ་འཇུག་སྐབས།ཡ་ཧུ་དཱ་པའི་མི་༦༩༠ལྷག་ཙམ་གྱིས་མཱ་ས་ཏའི་བཙན་རྫོང་ནས་ལོ་གསུམ་གྱི་རིང་རོམ་གྱི་དམག་དཔུང་ལ་འཐབ་ཡ་དང་རྒོལ་ལན་སྤྲད་ཅིང་།སྤྱི་ལོ་ ༠༠༧༣ ལོའི་ཟླ་ ༠༤ པའི་ཚེས༡༥ཉིན། མཁར་རྫོང་ནང་གི་ཡ་ཧུ་དཱ་པ་རྣམས་ཀྱིས་སྡེབ་གཅིག་ཏུ་རང་སྲོག་གཅོད་རྒྱུའི་གྲོས་ཐག་བཅད་དེ། ཐོག་མར་ཁོ་ཚོས་རྒྱན་འཕངས་ནས་དཔའ་རྒོད་༡༠་བདམས་ཏེ་འཆར་གཞི་ལག་བསྟར་བྱེད་མཁན་ཏུ་བསྐོས། དེ་ནས་ཡང་ལག་བསྟར་པ་བཅུ་བོ་ལས་མི༡བདམས་ཏེ་གཞན་དགུ་བོ་གསོད་དུ་བཅུག་ཤུལ་གྱི་མི་གཅིག་པོ་དེའི་ལས་འགན་ནི་མཁར་རྫོང་ཧྲིལ་བོ་མེར་བསྲེགས་ཏེ་རང་སྲོག་གཅོད་རྒྱུ་དེ་རེད།

ཕྱི་ཉིན་ཞོགས་པར། རོམ་གྱི་དཔུང་ཚོགས་མཁར་ནང་ལ་སླེབས་དུས་ཁོ་ཚོའི་བློ་ཡུལ་ལས་འདས་པ་ནི་མཁར་རྫོང་ནང་འབྲུ་རིགས་དང་འཐུང་ཆུས་འདང་ཡང་མི་གསོན་པོ་གཅིག་ཀྱང་མེད་པའི་སྣང་ཚུལ་ཡ་མཚན་ཅན་དེ་རེད།

ངག་རྒྱུན་ལྟར་ན་ཡ་ཧུ་དཱ་པ་ཚོས་རང་སྲོག་བཅད་པའི་མཚན་མོ་དེར། མཁར་སྲུང་འགོ་གཙོ་ཡེ་ལཱ་ཙེར་པིན་ཡེར་ཞེས་པས་དཔའ་ཉམས་དང་བཅས་གསུང་བཤད་ཅིག་གནང་བ་འདི་ལྟ་སྟེ། ང་ཚོ་ནི་རོམ་རྒྱལ་ཁབ་ལ་ངོ་རྒོལ་བྱེད་མཁན་ཆེས་སྔ་བ་ཡིན་ལ། ཆེས་མཐའ་མཇུག་བར་ཏུ་རྒྱུན་འཁྱོངས་བྱེད་མཁན་ཡང་ཡིན། སང་ཉིན་ནམ་ལངས་རྗེས། ང་ཚོས་མུ་མཐུད་དུ་འགོག་རྒོལ་བྱེད་རྒྱུ་མིན། སྐྱབས་མགོན་གྱིས་ང་ཚོར་རང་གི་སྙིང་ཉེ་བའི་མི་དང་མཉམ་དུ་འཆི་རྒྱུ་གདམ་གསེས་བྱེད་པའི་སྐལ་པ་གཟི་བརྗིད་ཅན་འདི་གནང་བར་ཐུགས་རྗེ་ཆེ་ཞུ། ང་ཚོས་རང་གི་ཆུང་མས་གཞན་གྱིས་བརྙས་དམོད་མི་མྱོང་བ་དང་། ང་ཚོའི་བྱིས་པ་གཞན་གྱི་བྲན་གཡོག་བྱེད་མི་དགོས་པའི་ཆེད་དུ་ད་ལྟ་ཉིད་དུ་རང་སྲོག་བློས་གཏོང་བར་བྱ། ཤུལ་ནས་རྒྱུ་ནོར་མཁར་རྫོང་དང་བཅས་པ་མེར་བསྲེགས་ཏེ་ཐལ་བའི་རྡུལ་ཏུ་རློགས་ཤིག ཡིན་ནའང་། འབྲུ་རིགས་བསྲེགས་མི་དགོས། དེས་དགྲ་བོ་ལ་ང་ཚོ་ནི་ལྟོགས་སྐོམ་གྱི་དབང་གིས་འུ་ཐུག་པ་མ་ཡིན་པར་ནམ་ཡིན་རུང་རང་དབང་གི་ཆེད་དུ་འཆི་དགོས་ཀྱང་གཞན་དབང་གི་བྲན་གཡོག་མི་བྱེད་པའི་ཆོད་སེམས་སྟོན་ཏུ་འཇུག་ཐུབ་པ་དེའོ། །ཞེས་གཏམ་བཤད་སྤེལ་བ་རེད། དོན་ངོ་མར་བོད་ཀྱི་གནམ་འོག་ནས་མི་ཞིག་བྱེད་ན་སྙིང་སྟོབས་འདི་དང་ཆོད་སེམས་འདི་དགོས་ཀྱི་འདུག

བོད་ཀྱི་གནམ་འོག་ནས་བཙན་པོ་ལྕགས་སྙིང་ཅན་དག་གི་རྣོ་ལ་གཟེང་བའི་སྙིང་གི་དཔའ་རྩིད་མཐོང་གི་འདུགམཁས་ཤིང་མཛངས་པའི་སྐྱེས་ཆེན་དམ་པ་དག་གི་གསེར་གྱི་གླེགས་བམ་ཡང་མཐོང་གི་འདུག ཡིན་ནའང་། ང་དང་ང་འདྲ་བའི་སྡར་མ་འདི་དག་གིས་བོད་ཀྱི་ནམ་མཁའ་མཐོང་གི་མི་འདུག བརྩེ་བའི་ཕ་མའང་མཐོང་གི་མི་འདུག ངའི་འགྲོ་ལམ་ཡོད་ཚད་ན་གྲོག་མ་སྔོན་པོའི་རྡོག་བྲོ་འཁྲབ་གི་འདུག སྲིན་འབྲུག་ནག་པོའི་ཁ་ཆུ་འཛར་གི་འདུག ཁྱི་འབྲུག་རྔ་ཆད་འདི་དག་གིས་ཁ་ནང་ནས་མེ་འབར་གི་འདུག སྣ་ནང་ནས་དུ་བ་འཕྱུར་གི་འདུག ད་ནི་ངའི་ལས་དབང་ལ་འཁང་ར་དང་བཅས་གྲོག་མ་སྔོན་མོའི་ཁ་གཏད་ལངས་ནའང་། ངའི་གངས་རི་དཀར་པོའི་བརྗིད་ཉམས་ཤོར་ཚར་འདུག ངའི་ཕོ་བྲང་མཐོན་པོའི་འགྱིང་ཉམས་ཀྱང་འཆོལ་ཚར་འདུག ད་ནི་ང་ལ་མཐའ་མཇུག་གི་གདམ་ག་གཅིག་རང་ལས་མེད། དེ་ནི། ངས་ཚེ་སྲོག་གི་གཉུག་སྐུད་ལ་ལག་པ་འཆང་རྒྱུ་དེ་རེད།

ངས་ད་ལྟ་ལོག་སྐད་ལ་གྱུར་ཚར་བའི་ཀ་ཁ་སུམ་ཅུ་དེ་སྦྱངས་འདོད་མི་འདུག ཁྲག་དམར་ཙར་ཙིར་འཛར་བའི་རྫ་བྲག་རི་གསུམ་གྱི་ལྟོ་བ་རལ་བོ་དེ་མཐོང་འདོད་མི་འདུག ངས་རྣོ་ལྕགས་ཀྱི་ལྡད་རོར་གྱུར་བའི་རི་ཞིང་ཆུ་ཞིང་དག་ཀྱང་མཐོང་འདོད་མི་འདུག ད་དུང་མངལ་ཁྲག་ཤོར་ཐལ་ཆེ་བའི་བུད་མེད་དེའི་མིག་འོད་ཀྱིས་ངའི་བརྩེ་དུང་གི་འཇིག་རྟེན་བརླག་སོང་། དྲན་པ་དང་སྐྱོ་བས་ཁེངས་པའི་ནམ་མཁའ་འདི་ད་ལྟ་རང་བརྡིབ་ན་ཤིན་ཏུ་འོས་མོད།འདི་ན་ད་དུང་ཡིག་དྲུག་གི་དབྱངས་རྟ་ཟ་ཟི་ཞིག་འཁོར་གིན་འདུག སྙིང་སྟོབས་ཀྱི་མེ་ལྕེ་ལྷམ་ལྷམ་ཞིག་ཀྱང་འབར་གྱིན་འདུག ཨ་བོད་ཀྱི་ནམ་མཁའ། སྲིན་འབྲུག་གི་ཁ་ཆུ་ཙར་ཙར་འཛར་ཡང་བརླན་པར་མ་གྱུར་བའི་ནམ་མཁའ། གྲོག་སྔོན་གྱི་ཁྲོམ་རར་གྱུར་བའི་བོད་ཀྱི་ནམ་མཁའ། སྲིན་འབྲུག་གི་ལོ་ཟླ་འདིར་ཁྱོད་རྦད་དེ་འབར་ན་འོས། ཕྱི་མིག་གི་ནོངས་འགྱོད་མེད་པར་འབར་ན་འོས།