ཕྱི་ལོ་ ༢༠༡༢ ཟླ་ ༡ ཚེས་ ༡༤ ཉིན་གྱི་བོད་ནང་གི་དུས་ཚོད་ ༡།༣༠ ཙམ་ལ་བོད་ཨ་མདོ་རྔ་པའི་ཨ་འདུས་ཥེ་བ་སྡེ་བའི་རྒྱ་མཚོ་ཚང་གི་ཕ་རྒྱ་མཚོ་དང་མ་ལྷ་ཆུང་གཉིས་ཀྱི་བུ་བློ་བཟང་འཇམ་དབྱངས། རང་ལོ་ ༢༢ ཡིན་པ་ཁོང་གིས་རྔ་པ་རྫོང་མཁར་གྱི་བཞི་མདོའི་གསང་སྤྱོད་ཅིག་གི་ནང་ནས་ལུས་ཡོངས་ལ་ས་སྣུམ་བྱུགས་ཤིང་རང་ལུས་མེ་རུ་བསྒྲོན་ཏེ(༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག བོད་ལ་རང་དབང་དགོས་)ཞེས་པའི་འབོད་ཚིག་སྒྲོག་བཞིན་གོམ་བགྲོད་བྱས་ཡོད་པ་དང་། སྐབས་དེར་གཡས་གཡོན་གྱི་ཉེན་རྟོག་པ་དང་དམག་མི་རྣམས་ཀྱིས་ཁོང་ལ་ལྕགས་མདུང་འཛེར་མ་ཅན་སོགས་ཀྱིས་མེ་གསོད་རྒྱུའི་ཚབ་ཏུ་གཅར་རྡུང་དྲག་པོ་བཏང་བ་དང་། རས་དཀར་པོ་ཞིག་གིས་བཀབ་ནས་ཉེན་རྟོག་པ་དམག་མིས་རྡོག་རྫིས་བྱས་པ་སོགས་དེར་ཡོད་བོད་མི་རྣམས་ཀྱིས་བཟོད་ཐབས་བྲལ་ནས་རང་སྲོག་ལ་མ་འཛེམ་པར་གོ་མཚོན་ཆ་འགྲིག་ཡོད་པའི་དམག་དཔུང་གི་གི་གདོང་ལ་ལངས་ནས་ཁོང་ང་ཚོ་ལ་རྩིས་སྤྲོད་དགོས་ཚུལ་ཤུགས་ཆེ་བཤད་དེ་ཁོང་བཙན་ཁྲིད་བྱེད་པའི་ལམ་ཁ་རང་ནུས་གང་ཡོད་ཀྱིས་བཀག་ཀྱང་། མི་མང་གི་རེ་འདུན་ལ་ཉན་འཇོག་རྩ་བ་ནས་མ་བྱས་པར་མ་ཟད། མི་མང་གང་བྱུང་འཛིན་བཟུང་དང་གཅར་རྡུང་བྱས་ཤིང་། ལྕགས་མདུང་འཛེར་མ་ཅན་བེད་སྤྱོད་ཀྱིས་གཅར་རྡུང་ཐེབས་པའི་མི་མང་པོ་རྨས་སྐྱོན་ཚབ་ཆེན་ཕོག་ཡོད་ལ། རྨེའུ་རུ་མའི་རུ་ཆེན་གཉིས་པའི་དགའ་ཚང་གི་ཆོས་ཀྱི་ཟླ་བ་རྔ་པ་རྫོང་སྨན་ཁང་དུ་ཡོད་ཀྱང་ཕལ་ཆེར་གསོན་པོ་ཡོང་རེ་མེད་པ་ལྟ་བུའི་གནས་སྟངས་ཛ་དྲག་ཏུ་གྱུར་ཡོད་པ་དང་། དེ་བཞིན་ཕོ་སར་གཉིས་ལ་གཅར་རྡུང་སྐབས་རྨས་སྐྱོན་ཚབས་ཆེན་ཕོག་ཡོད་ཅིང་། བུད་མེད་ཅིག་གི་མིག་ཡ་གཅིག་ལོང་བ་བཟོས་ཡོད་འདུག མེ་མདས་རྨས་སྐྱོན་ཕོག་པ་བུད་མེད་གཉིས་ཡོད་པ་ལས་གཞན་གསལ་པོ་ཤེས་རྟོགས་མ་བྱུང་ཡང་མི་མང་པོས་དེ་ལས་མང་བ་ཡིན་པའི་ཚོད་དཔག་བྱེད་ཀྱིན་ཡོད་པ་དང་། མི་མང་གི་མཐོང་སར་མི་མང་པོ་ཞིག་འཛིན་བཟུང་བྱས་ཡོད་ཀྱང་མིང་སོགས་གསལ་པོ་ཤེས་རྟོགས་མ་ཐུབ།
ཕྱི་ཚེས་ ༡༥ ཉིན་རྔ་པའི་ཁྲོམ་གཞུང་སོགས་ལ་བོད་མི་ཚོར་འཇིགས་སྐུལ་གྱི་སྦྱར་ཡིག་ཆེན་པོ་མང་པོ་སྦྱར་ཞིང་། དམག་མི་དང་ཉེན་རྟོག་པས་ཁྲོམ་གཞུང་སོགས་ལ་དོག་ཟོན་ནན་མོ་བྱས་ནས་ཡོད་ཀྱང་ཉིན་དེར་རྔ་པའི་ཁྲོམ་གཞུང་སོགས་ལ་བོད་མི་ཚོས་ལོ་སར་ཚེས་གཅིག་ཉིན་ཚོང་ཁང་དང་ཟ་ཁང་ཚང་མ་སྒོ་ཕྱེ་དགོས་པ་དང་། མི་མང་གིས་ཁྲོམ་གཞུང་ནས་ལྟོ་སྐྱ་གོས་ཧྲིལ་བྱས་ཏེ་མྱ་ངན་གྱིས་ལོ་གསར་པ་བསུ་དགོས་ཚུལ་འཁོད་པའི་ཡི་གེ་མང་པོ་གཏོར་ཡོད་འདུག
གོང་དུ་བཤད་པ་ལྟར་རང་ལུས་མེར་སྲེག་གཏོང་མཁན་ཁོང་སྐབས་ཐོག་དེར་ཉེན་རྟོག་པ་སོགས་ཀྱིས་གཅར་རྡུང་ཚོད་མེད་བྱས་པ་སོགས་ལ་བརྟེན། ཕྱི་ཚེས་ ༡༦ ཉིན་ཁོང་འབར་ཁམས་ནས་སྐུ་གྲོངས་ཡོད་པ་དང་། ཕྱི་ཚེས་ ༡༧ ཉིན་ཁོང་གི་ཕ་དམ་པ་རྒྱ་མཚོ་དང་གཉེན་ཉེ་སྐོར་ཞིག་འབར་ཁམས་ལ་སྐུ་ཕུང་ལེན་ཏུ་སོང་ཡོད་ཀྱང་ལག་སོན་བྱུང་ཡོད་མེད་ཤེས་རྟོགས་མ་ཐུབ།
རང་ལུས་མེར་སྲེག་གཏོང་མཁན་རྒྱལ་གཅེས་དཔའ་བོ་བློ་བཟང་འཇམ་དབྱངས་ལགས་ཆུང་ཆུང་སྐབས་ཨ་འདུས་དགོན་པར་གྲྭ་བ་བྱས་ཤིང་། རྗེས་སུ་རྔ་པ་རྫོང་བོན་ཚེ་སློབ་གྲྭ་༼སློབ་ཆུང་གསུམ་པ་༽སོགས་སློབ་མཐར་ཕྱིན་ཡོད་པ་དང་། ཕྱི་ལོ་ ༢༠༡༡ ལོར་མང་ཚོགས་རང་བཞིན་གྱི་ཕ་སྐད་གཙང་མའི་བགྲོ་གླེང་ཞིག་ཥེ་བ་སྡེ་བར་འཚོགས་པའི་གོ་སྒྲིག་བྱེད་མཁན་གྱི་ཕ་སྐད་རྒྱུན་འཛིན་ཚོགས་པའི་ཚོགས་མི་གཙོ་བོ་ཞིག་དང་། སྐབས་དེའི་བགྲོ་གླེང་གོ་སྒྲིག་བྱེད་སྐབས་རྒྱ་མིས་གནོན་ཤུགས་དང་འཇིགས་སྐུལ་མང་པོ་བྱེད་མྱོང་སའི་བོད་མི་ཞིག་ཡིན་པ་དང་།
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་ ༢༠༡༢ ཟླ་ ༡ ཚེས་ ༡༧ ལ།
གང་ན་དྲགས་གནོན་ཡོད། དེ་ལ་ངོ་རྒོལ་ཡོད།
བོད་མི་ཚོ་ཉལ་ནས་མ་འདུག་ཡར་ལོངས་ཤིག
བོད་མི་ཚོ་ཉན་ནས་མ་འདུག་ཡར་ལོངས་ཤིག
ང་ཚོས་དྲང་བདེན་གྱི་དར་ཆ་སྒྲེངས་ནས།
ང་ཚོས་བདེན་ལུགས་ཀྱི་ཁུ་ཚུར་ཕྱར་ནས།
མཐུན་སྒྲིལ་གྱི་དཔུང་བ་མཉམ་སྦྲེལ་ནས།
ཚུར་རྒོལ་ལ་གནོད་ཤུགས་སྤྲོད་དགོས།
ང་ཚོའི་རྒྱལ་ཁབ་དང་མི་མང་གི་ཆེད་དུ།
འཇིགས་སྐྲག་དང་འཆི་བ་ལ་གདོང་ལེན་བྱེད་དགོས།
རང་ལ་གཅེས་སྲོག་གཏོང་བའི་བློ་སྤོབས་དང་ཆོད་སེམས་མེད་བཞིན། གཞན་དག་མགོ་བོ་འཁོར་དུ་མ་འཇུག་རོགས། འོན་ཀྱང་ལྷག་བསམ་དང་བསྟོད་བསྔགས་གནང་བ་ལའང་ཕན་པ་ལོས་ཡོད།
ངས་ཇ་མ་ལགས་ལ་ཞུས་པ་མིན། སྤྱིར་བསམ་ཚུལ་ཙམ་བཤད་པ་ཡིན། གནས་ཚུལ་ཡག་ཉེས་གང་ཡང་བཤད་དགོས་ལ། མི་མང་མགོ་གོ་རྨོངས་སུ་མི་འཇུག་པར་འདས་མ་འོངས་དོན་རྐྱེན་གསལ་པོར་ངོ་སྤྲད་ནས་ལས་དོན་སྒྲུབ་འཇུག་རྒྱུ་དེ་ནི་ནམ་ཡང་འགྱོད་པ་སྐྱེ་མི་སྲིད་པའི་རང་བཞིན་ཅན་ཞིག་ཡིན།
ལས་དོན་གང་ཞིག་ང་ཚོས་སྒྲུབ་མི་ནུས་ངེས་ཅན་ཞིག་ཡིན་ན་གནས་སྐབས་རིང་མི་མང་ཉེན་ཁ་ལས་ཡོལ་ཐབས་བྱེད་རྒྱུ་གལ་ཆེ། ནམ་ཞིག་དཔལ་འབྱོར་དང་སྲིད་ཀྱི་འཕོ་འགྱུར་སོགས་ཕྱོགས་ཡོངས་ནས་གོ་སྐབས་བརྙེད་པའི་རེ་བ་བྱུང་ཚེ་ལས་དོན་གང་ཡང་འཇིགས་ཞུམ་མེད་པར་སྒྲུབ་དགོས།
དབྱིན་ཇི་མི་མང་འབུམ་གཅིག་ཙམ་གྱིས་རྒྱ་གར་གྱི་རང་བཙན་ལོ་སུམ་བརྒྱར་ཉལ་བའི་ལོ་རྒྱུས་ལ་བལྟས་ན་ང་ཚོས་གནས་སྟངས་འདི་ལས་སླ་བོ་ཞིག་རྩ་བ་ནས་མིན། དེས་ན་མི་མང་གི་གཅེས་སྲོག་མེ་ལ་སྦར་བ་འགོགས་ཐབས་བྱེད་དགོས་པ་ལས། དེ་ལ་རྗེས་སུ་ཡི་རང་དང་བསྟོད་བསྔགས་སྣ་ཚོགས་ཕུལ་ནས་གཞན་ཡང་ལམ་དེར་འཇུག་པའི་སྲིད་དོན་སྒྲུབ་ན་མི་ལེགས་པ་འདྲ།