བོད་ཀྱི་དུས་བབ་ནས་དྲངས།
ཕྱི་ཚེས་ ༡༨ ཉིན་འདི་གའི་གསར་འགོད་པའི་གནས་མཆོག་རྡོ་རྗེ་གདན་དུ། ཐེངས་འདིའི་དུས་འཁོར་དབང་ཆེན་གོ་སྒྲིག་ཚོགས་ཆུང་གི་ཚོགས་གཙོ་བླ་མ་ངག་དབང་ནོར་བུ་མཆོག་ལ། ད་ལྟའི་གོ་སྒྲིག་གི་གནས་སྟངས་དང་དཀའ་ངལ་གང་འདྲ་འཕྲད་ཀྱི་ཡོད་མེད་སྐོར་ལ་བཅར་འདྲི་ཞུས་ཡོད།
དྲི་བ། མི་འགྱང་པར་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་བཀའ་དབང་ཐེངས་ ༣༢ པ་གནང་འཆར་ཡོད་པ་དེའི་གོ་སྒྲིག་གི་གནས་བབ་ད་ཆར་གང་འདྲ་ཆགས་ཡོད་མེད་ངོ་སྤྲོད་གཅིག་གནང་རོགས།
ལན། བོད་པའི་གསར་འགོད་པ་ཚོའི་གྲས་ནས་ཁྱེད་ཅག་བོད་ཀྱི་དུས་བབ་འདིར་ཆེད་དུ་ཕེབས་པ་ཐོག་མའི་གྲས་རེད་ཐུགས་སྣང་ཆེན་པོ་གནང་བར་ཐུགས་རྗེ་ཆེ་ཞུ་རྒྱུ་ཡིན། རྩ་བའི་ཐེངས་འདིའི་དུས་འཁོར་དབང་ཆེན་ལ་བསྟན་པའི་སྦྱིན་བདག་ཁག་སུམ་ཅུ་སོ་གྲངས་ཤིག་ཡོད་པ་རེད། དེ་དག་ལས་གཙོ་བོ་ཨ་རུ་ན་ཅལ་སྤྱི་ཁྱབ་བློན་ཆེན་འདས་པོ་རྡོ་རྗེ་མཁའ་འགྲོ་དམ་པ་དེ་ཉིད་ཀྱི་ནང་མི་རེད། ཁོང་ཚོར་གྲ་སྒྲིག་གནང་མཁན་སྡེ་ཚན་གཅིག་དང་རྣམ་རྒྱལ་གྲྭ་ཚང་ལ་སྡེ་ཚན་གཅིག དགེ་ལྡན་སྨོན་ལམ་ཆེན་མོའི་སྡེ་ཚན་གཅིག་བཅས་སྡེ་ཚན་ ༣ ཐུན་མོང་གིས་ཕྱག་ལས་གནང་གི་ཡོད། ཐེངས་འདིའི་དུས་དབང་དང་བསྟུན་ཏེ་༼ རིས་མེད་སྨོན་ལམ་ཆེན་མོ ༽ ཞིག་འཕར་འཛུགས་གནང་གི་ཡོད། འདི་ལ་ཆོས་བརྒྱུད་ཁག་ཚང་མའི་སྐུ་ཚབ་ཕེབས་ཏེ་གོ་སྒྲིག་ཞུ་བཞིན་ཡོད། སྨོན་ལམ་ཆེན་མོ་དེའི་སྟེང་བོད་པའི་ཆོས་ལུགས་ཆོས་བརྒྱུད་གཡུང་དྲུང་བོན་དང་བཅས་པའི་བསྟན་བདག་བླ་ཆེན་རྣམ་པ་དང་རྗེས་འཇུག་སློབ་མ་མཉམ་ཞུགས་གནང་གི་ཡོད། དེའི་མཇུག་ཏུ་ལྷ་སྡེ་མི་སྡེ་ཡོངས་རྫོགས་ཟེར་ན་འདྲ། རྒྱལ་སྤྱིའི་བོད་བརྒྱུད་ནང་བསྟན་རྗེས་འཇུག་ཐུན་མོང་གིས་༧གོང་ས་མཆོག་ལ་བརྟན་བཞུགས་རྒྱས་པ་ཞིག་བསྟར་འབུལ་ཞུ་རྒྱུ་རེད། ད་ལྟའི་ཆར་ཕྱོགས་ཡོངས་ནས་གྲ་སྒྲིག་གང་ལ་གང་འཚམ་གྲུབ་ཚར་ཡོད། ཟླ་འདིའི་ཚེས་ ༢༥ ནང་ཚུད་དུ་གོ་སྒྲིག་ཡོངས་སུ་འགྲུབ་ཐུབ་པ་བྱ་རྒྱུ་ཡིན།
དྲི་བ། ༧གོང་ས་མཆོག་གིས་ད་བར་དུས་འཁོར་དབང་ཆེན་ཐེངས་ ༣༡ ཙམ་གནང་ཟིན་པ་རེད། ཐེངས་འདིའི་དུས་དབང་ལ་སྐབས་སྔོན་མ་དག་དང་མ་འདྲ་བའི་ཁྱད་ཆོས་དེ་འདྲ་ཡོད་དམ།
ལན། དུས་འཁོར་དབང་ཆེན་རང་སྟེང་ནས་མ་འདྲ་བ་གང་ཡང་ཡོད་པ་མ་རེད། སྔོན་མ་དག་དང་གཅིག་མཚུངས་རེད། འོན་ཀྱང་ཐེངས་འདིར་དམིགས་བསལ་ཅན་འགའ་ཞིག་ཡོད། དང་པོ། ཐེངས་འདིའི་དུས་འཁོར་དབང་ཆེན་གོ་སྒྲིག་ཚོགས་ཆུང་ནང་དུ་ཆོས་བརྒྱུད་རིས་མེད་གཡུང་དྲུང་བོན་དང་བཅས་པའི་སྐུ་ཚབ་ཕེབས་ཏེ་ཕྱག་ལས་གནང་གི་ཡོད་ལ། ལས་རིམ་དངོས་གཞིའི་སྐབས་གཡུང་དྲུང་བོན་དང་བཅས་པའི་ཆོས་བརྒྱུད་རིས་མེད་ལྷན་འཛོམས་ཀྱིས་སྨོན་ལམ་ཆེན་མོ་ཞིག་ཚོགས་རྒྱུ་རེད། འདི་ཕལ་ཆེར་ལོ་རྒྱུས་ཐོག་གི་ཐེངས་དང་པོ་ཆགས་ཀྱི་ཡོད་པ་རེད། གཉིས་པ། ༧རྒྱལ་དབང་སྐུ་ཕྲེང་ལྔ་པ་ནས་བཅུ་བཞིའི་བར་བོད་པའི་ཆོས་སྲིད་ལུགས་གཉིས་ཀྱི་ཐུགས་འགན་བཞེས་ཏེ་ཡོང་བ་རེད། སྐུ་ཕྲེང་བཅུ་བཞི་བ་ཆེན་པོ་མཆོག་དགུང་གྲངས་ ༧༦ ལ་ཕེབས་ཏེ་བོད་པའི་ཆབ་སྲིད་ཀྱི་ཐུགས་འགན་ཡོངས་རྫོགས་མི་མང་གིས་འོས་འདེམས་བྱས་པའི་དབུ་ཁྲིད་དག་ལ་རྩིས་སྤྲོད་གནང་སྟེ། དགའ་ལྡན་ཕོ་བྲང་གི་ཆོས་ཕྱོགས་ཁོ་ནའི་གདན་ཐོག་ནས་དུས་འཁོར་དབང་ཆེན་གནང་བ་ཐེངས་དང་པོ་དེ་ཆགས་ཀྱི་ཡོད་པ་རེད། འདི་ཡང་དམིགས་བསལ་ཞིག་ཡིན་བསམ་ཡོད། གསུམ་པ། ཚེས་ ༡༠ ཉིན་རྒྱལ་སྤྱིའི་བོད་བརྒྱུད་ནང་བསྟན་གྱི་རྗེས་འཇུག་སློབ་མ་ཐུན་མོང་གིས་བརྟན་བཞུགས་བསྟར་འབུལ་དང་འབྲེལ་ཏེ་གཟེངས་རྟགས་ཤིག་འབུལ་བཞིན་ཡོད། གཟེངས་རྟགས་འདི་རིས་མེད་ཆོས་བརྒྱུད་ཚང་མའི་ངོས་ནས་༼ ཡོངས་རྫོགས་བསྟན་པའི་བདག་པོར་བསྐྱར་གནོན་གྱི་མངའ་གསོལ་རྟེན་འབྲེལ་མཛད་སྒོ ༽ཞིག་ཆགས་ཀྱི་ཡོད། རྟེན་འབྲེལ་མཛད་སྒོའི་ཐོག་བྷེ་ཧར་(Bihar)མངའ་སྡེ་སྤྱི་ཁྱབ་བློན་ཆེན་(Nitish Kumar)མཆོག་དང་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་(Nabam Tuki)མཆོག དེ་བཞིན། ཧི་མ་ལ་ཡའི་རི་རྒྱུད་ཀྱི་མངའ་སྡེ་སྤྱི་ཁྱབ་བློན་ཆེན་གཞན་ཁག་ཅིག་ཀྱང་ཕེབས་འཆར་ཡོད་པ་རེད།
དྲི་བ། རིས་མེད་སྨོན་ལམ་ཆེན་མོ་ཟེར་བ་དེར་ཆོས་ལུགས་ཆོས་བརྒྱུད་ག་ཚོད་ཚུད་ཀྱི་ཡོད་པ་དང་། བོད་པའི་ཆོས་བརྒྱུད་ཁག་གི་བླ་ཆེན་སུ་དག་ཞབས་སོར་འཁོད་ཀྱི་ཡོད།
ལན། རིས་མེད་སྨོན་ལམ་ཆེན་མོ་དེ་ཟླ་འདིའི་ཚེས་ ༣༡ ཉིན་ནས་དབུ་འཛུགས་ཀྱིས་ཟླ་རྗེས་མའི་ཚེས་ ༦ ཉིན་བར་ཚོགས་གཏན་འཁེལ་ཡོད། སྨོན་ལམ་ཆེན་མོ་དེའི་ཐོག་རིས་སུ་མ་ཆད་པའི་ཆོས་ལུགས་ཆོས་བརྒྱུད་ཁག་ཚང་མ་མཉམ་ཞུགས་གནང་གི་ཡོད་པ་རེད། བོད་པའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་རྣམ་པ་ཕེབས་ཀྱི་ཡོད། ས་སྐྱ་བདག་ཁྲི་རིན་པོ་ཆེ་མཆོག་དང་རྙིང་མའི་ཞེ་ཆེན་རབ་འབྱམས་རིན་པོ་ཆེ། བཀའ་བརྒྱུད་ཀྱི་དཔལ་རྒྱལ་བ་ཀརྨ་མཆོག་དང་སྟག་ལུང་ཞབས་དྲུང་རིན་པོ་ཆེ། བོན་གྱི་སྨན་རི་ཁྲི་འཛིན་རིན་པོ་ཆེ། དགེ་ལུགས་པའི་དགའ་ལྡན་ཁྲི་པ་རིན་པོ་ཆེ་བཅས་ཕེབས་ཀྱི་ཡོད། འབྲི་གུང་ཆེ་ཚང་རིན་པོ་ཆེའི་སྐུ་ཚབ་ཕེབས་ཀྱི་ཡོད་པ་རེད། དེ་མིན། འབྲུག་ཆེན་རིན་པོ་ཆེ་དང་སྟག་ལུང་མ་སྤྲུལ་གཉིས་ཕེབས་ཐུབ་ཀྱི་ཡོད་ས་མ་རེད། ཕྱི་ཚེས་ ༤ ཉིན་༧གོང་ས་མཆོག་གི་བླ་གཟའ་དང་བསྟུན་ཏེ་རྡོར་གདན་མཆོད་རྟེན་ཆེན་མོའི་མདུན་དུ། འཛམ་གླིང་སྤྱི་དང་བྱེ་བྲག་བོད་ནང་བསྟན་སྲིད་མི་རིགས་ཀྱི་སླད་དུ་ཚེ་སྲོག་བཏོར་ཟིན་པ་དག་གི་ཆེད་དུ་༧གོང་ས་མཆོག་དབུ་བཞུགས་ཐོག་ཆོས་བརྒྱུད་ཁག་གི་བླ་ཆེན་རྣམ་པ་དང་གྲྭ་བཙུན་འདུས་མང་ཡོངས་ནས་མཆོད་འབུལ་འབུམ་ཚོགས་ཤིག་ཚོགས་རྒྱུ་རེད། ཉིན་དེར་དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱིས་ཀྱང་དམིགས་བསལ་མཆོད་འབུལ་ཞིག་གནང་རྒྱུ་རེད།
དྲི་བ། ཐེངས་འདིའི་དུས་འཁོར་དབང་ཆེན་གྱི་ལས་རིམ་ཐོག་མ་གསལ་བསྒྲགས་བྱས་པ་གཞིར་བཟུང་བསྡད་ཡོད་མེད་དང་། གལ་སྲིད་འགྱུར་བ་ཕྱིན་ཡོད་ན་ལས་རིམ་གང་དག་ལ་ཕྱིན་ཡོད་དམ།
ལན། རྩ་བའི་ཐེངས་འདིའི་དུས་འཁོར་དབང་ཆེན་གྱི་ལས་རིམ་ལ་འགྱུར་བ་གཅིག་ཀྱང་ཕྱིན་ཡོད་པ་མ་རེད། འདི་ལོའི་ཕྱི་ཟླ་ ༤ པའི་ཚེས་ ༦ ཉིན་ལ་ང་ཚོས་༧གོང་ས་མཆོག་ལ་དོན་ཚན་ ༩ སྙན་གསེང་ཞུས་ཡོད། དེའི་ཁྲོད་དུས་འཁོར་དབང་ཆེན་གཙོ་བྱས་ཏེ་རིས་མེད་སྨོན་ལམ་ཆེན་མོ་དང་། ལྷ་སྡེ་མི་སྡེ་ཡོངས་ནས་བརྟན་བཞུགས་བསྟར་འབུལ། ༧གོང་ས་མཆོག་ལ་ཡོངས་རྫོགས་བསྟན་པའི་བདག་པོར་བསྐྱར་གནོན་གྱི་མངའ་གསོལ་རྟེན་འབྲེལ་མཛད་སྒོ་ཞིག་གི་ཐོག་ནས་གཟེངས་རྟགས་སོགས་རེད། ཉིན་རེའི་ལས་རིམ་གྱི་ཐད་ནས་རེ་ཟུང་ཕར་ཚུར་ཕྲན་བུ་འགྱུར་བ་འགྲོ་སྲིད་པ་རེད། སྤྱིར་མི་མང་དང་འབྲེལ་བའི་ཉིན་རེའི་མཛད་རིམ་ཕལ་ཆེ་བ་ཉིན་རྒྱབ་རེད། ཕྱི་ཟླ་ ༡༢ ཚེས་ ༣༡ ནས་ཟླ་ ༡ ཚེས་ ༢ བཅས་སུ་ཞོགས་པ་ཆུ་ཚོད་ ༦ ནས་དབུ་འཛུགས་ཀྱིས་ཕྱི་དྲོའི་ཆུ་ཚོད་ ༢ བར་དཀྱིལ་འཁོར་གྱི་ས་ཆོག་གནང་དགོས་པ་རེད། ཚེས་ ༣ ། ༤ ། ༥ བཅས་སུ་ཞོགས་པའི་ཆུ་ཚོད་ ༦ པ་ནས་ཉིན་གུང་ཆུ་ཚོད་ ༡༡ བར་༧གོང་ས་མཆོག་གིས་དཀྱིལ་འཁོར་གྱི་བསྒྲུབ་བཞག་གནང་དགོས་པ་རེད། ཉིན་རྒྱབ་སྔོན་འགྲོའི་བཀའ་ཆོས་རེད། ཕྱི་ཚེས་ ༦ ཉིན་ཆོས་གར་དང་། ཚེས་ ༧ ཉིན་སྟ་གོན། ཚེས་ ༨ ། ༩ བཅས་ཀྱི་ཉིན་རྒྱབ་དུས་འཁོར་གྱི་བཀའ་དབང་དངོས་གཞི་རེད།
དྲི་བ། གོ་སྒྲིག་ཚོགས་ཆུང་གི་ངོས་ནས་ཐེངས་འདིར་ཆོས་ཞུ་བ་ག་ཚོད་ཅིག་འཛོམ་རྒྱུར་ཚོད་དཔག་བྱེད་ཀྱི་ཡོད་པ་དང་། མངའ་སྡེ་གཞུང་དང་ས་གནས་མི་མང་གི་ངོས་ནས་མཐུན་འགྱུར་གནང་སྟངས་ག་འདྲ་འདུག་གམ།
ལན། ད་ལྟའི་ཆར་ཆོས་ཞུ་བ་འབུམ་གཉིས་ ༢༠༠༠༠༠ ཙམ་འཛོམ་རྒྱུ་རེད་བསམ་གྱི་ཡོད། ད་ལོའི་ཕྱི་ཟླ་ ༧ པའི་ནང་༧གོང་ས་མཆོག་གིས་ཨ་རིར་དུས་འཁོར་དབང་ཆེན་གནང་སྐབས། ཕྱི་རྒྱལ་ཁག་ནས་ཕེབས་མ་ཐུབ་ན་ཨུ་ཚུགས་མ་བསྐྱོན་རོགས། ད་ལོར་རྡོ་རྗེ་གདན་དུ་ཡོང་ཆོག་གི་རེད་གསུངས་པ་དེ་ལ་གཞི་བཞག་སྟེ་མང་པོ་ཞིག་ཕེབས་ཀྱི་ཡོད་ས་རེད། དེ་བཞིན་བོད་ནང་དང་ཨ་རུ་ན་ཅལ་ཕྱོགས་ནས་ཆོས་ཞུ་བ་ཕོན་ཆེན་པོ་ཞེ་དྲག་ཡོང་གི་ཡོད་ས་རེད། འདི་ག་ས་གནས་མངའ་སྡེ་བློན་ཆེན་དང་ང་ཚོ་ཐེངས་ཁ་ཤས་ཐུག་རྒྱུ་བྱུང་། སྐབས་དེར་ཁོང་གིས་དུས་འཁོར་དབང་ཆེན་ལམ་ལྷོངས་འབྱུང་ཆེད་ཆུ་དང་གློག་གི་མཐུན་རྐྱེན་དང་། མི་མང་ཡར་མར་ཕེབས་སྐྱོད་ཀྱི་ཆ་རྐྱེན་ཆ་ཚང་གཞུང་འབྲེལ་ཐོག་ནས་འགན་ལེན་གནང་གི་ཡིན་གསུངས་སོང་། དེ་བཞིན་ས་གནས་གྷ་ཡཱའི་བློན་ཆེན་གྱིས་ཀྱང་ང་ཚོ་ལ་ཐུན་འགྱུར་གང་ཐུབ་ཞུ་བཞིན་ཡོད།
དྲི་བ། གསུང་ཆོས་ར་བ་དང་ཆོས་ཞུ་བའི་སྡོད་གུར་གཉིས་ཅུང་བར་ཐག་རིང་པོ་ཆགས་ཡོད་པ་དེ་ག་རེ་ཡིན་ནམ།
ལན། གསུང་ཆོས་ར་བ་དང་ཆོས་ཞུ་བའི་བཞུགས་ཡུལ་སྡོད་གུར་བར་སྤྱི་ལེ་ ༣ མ་ཟིན་ཙམ་ཞིག་འདུག ཐོག་མའི་ང་ཚོའི་གྲ་སྒྲིག་སྐབས་གསུང་ཆོས་ར་བ་དང་བར་ཐག་ཉེ་བའི་ཆུ་བོ་ནཱ་རན་ཛ་རཱའི་འགྲམ་རྒྱུད་ཀྱི་ས་ཆ་ཞུས་པ་རེད། ཤཀྱཱ་མི་ནེའི་རྒྱབ་ལོགས་ཀྱི་མི་སྒེར་བའི་ས་ཆ་སྐྱབས་འཇུག་ཞུས་ཀྱང་། གུར་ཧ་ཅང་མང་པོ་ཞིག་རྒྱག་དགོས་དུས་ས་ཆ་དེ་དག་གིས་འདང་གི་མི་འདུག གྲོང་འཁྱེར་འདིའི་མཐའ་འཁོར་གྱི་ཞང་ཁ་དག་ལ་འབྲས་དང་གྲོ་འདེབས་པའི་བར་མཚམས་སུ་འཁེལ་ཡོད་པ་རེད། ཁོང་ཚོའི་འབྲུ་རིགས་ཀྱི་རིན་འབབ་ང་ཚོས་སྤྲད་ཆོག་ཀྱང་། ཞིང་ཁ་རེ་རེའི་བར་མཚམས་སྲེ་ཉན་གྱི་མི་འདུག དེར་བརྟེན་རྡོ་རྗེ་གདན་ཉེ་འཁོར་ནས་ས་ཆ་རག་ཡོད་པ་མ་རེད། མཐའ་མར་ད་ལྟ་སྡོད་གུར་བརྒྱབ་ཡོད་པའི་མཱ་གྷ་ངྷི་(Magadh University)ཟེར་བའི་ས་ཆ་དེ་བདམས་པ་རེད། སྤྱིར་ས་ཆ་དེ་ཧ་ཅང་རྒྱ་ཆེན་པོ་ཡོད་ཀྱང་། གུར་བརྒྱབ་ནས་ཡོང་དུས་ས་ཆ་དེར་ཡང་ཤོང་གི་མི་འདུག ཨ་རུ་ན་ཅལ་ཕྱོགས་ནས་ཕེབས་མཁན་ཚོར་ཀརྨ་པ་དགོན་པའི་ཉེ་འགྲམ་དུ་གུར་ ༤༥༠ ལྷག་བརྒྱབ་ཡོད་པ་རེད། ཕྱི་རྒྱལ་ནས་ཕེབས་མཁན་ཚོར་གུར་ཁག་གཉིས་བརྒྱབ་ཡོད། ༧གོང་ས་མཆོག་གི་གསུང་ཆོས་ཕལ་ཆེ་བ་ཉིན་རྒྱབ་ཆགས་ཡོད་སྟབས་ཕར་འགྲོ་ཚུར་འོང་གི་དུས་ཚོད་མ་འདང་བའི་དཀའ་ངལ་ཡོང་གི་མ་རེད་ལ། རྒན་མགོ་དང་ནད་པ་ཚོར་དམིགས་ཏེ་རླངས་འཁོར་ཆེ་བ་བཅུ་གྲངས་ཤིག་ཀྱང་གོ་སྒྲིག་ཞུ་དགོས་བསམ་ཡོད།
དྲི་བ། སྡོད་གུར་མང་ཆེ་བ་དེ་སྔ་ནས་མངགས་ཚར་ཡོད་པའི་སྐད་ཆ་འདུག ད་དུང་ཆོས་ཞུ་བའི་གྲངས་འབོར་ཉིན་རེ་བཞིན་འཕེལ་གྱི་ཡོད་སྟབས་སྡོད་གུར་གྱིས་མ་འདང་བའི་དཀའ་ངལ་འཕྲད་སྲིད་དམ།
ལན། ད་ལོའི་ཕྱི་ཟླ་ ༡༠ པའི་ནང་ལ་ང་ཚོས་གུར་ ༢༠༠༠ ལྷག་ཅིག་གྲ་སྒྲིག་གིས་མི་མང་ལ་སྔོན་མངགས་གསལ་བསྒྲགས་བསྐྱངས་པ་རེད། རིམ་བཞིན་ཇེ་མང་དུ་ཕྱིན་ཏེ་རྗེས་སུ་གུར་ ༣༠༠༠ ཙམ་ལ་སྤར་དགོས་བྱུང་བ་རེད། ཡིན་ནའང་ད་སྔ་གུར་ག་ཚོད་བརྒྱབ་ཡོད་པ་ཚང་མ་མངགས་ཚར་འདུག ད་དུང་མི་མང་པོ་ཞིག་ལ་གུར་མ་འདང་བ་ཡོང་གི་ཡོད་པ་དངོས་ཡོད་རེད། ང་ཚོས་ཀྱང་ད་དུང་མུ་མཐུད་དུ་གུར་རྒྱག་བཞིན་པ་ཡིན། ད་ལྟ་ཧ་ལམ་གུར་ ༤༠༠༠ ལས་བརྒལ་འགྲོ་བཞིན་ཡོད་པ་རེད། གསང་སྤྱོད་འཁྲུས་ཁང་དང་། ཆུ་གློག་སོགས་བཟོ་བཞིན་པ་རེད། ཕྱི་ཚེས་ ༢༥ ཉིན་བར་གྲ་སྒྲིག་ཡོངས་རྫོགས་ཚར་བ་བྱས་ཏེ་མི་མང་ལ་གུར་སྤྲོད་ཐུབ་པ་བྱ་དགོས་པ་རེད། སྡོད་གུར་སྔོན་མངགས་བྱས་ཡོད་པ་ཡོངས་རྫོགས་ཕྱི་ཚེས་ ༢༥ བར་སྒྲིག་ཨང་གསར་བྱས་རྗེས། དེའི་རྗེས་ལ་སྐབས་བསྟུན་གྱིས་གུར་རྒྱག་རྒྱུ་ཡིན་ལ། ད་དུང་ཉུང་མཐར་ཡང་གུར་བརྒྱ་གཉིས་བརྒྱ་ཞིག་རྒྱག་དགོས་ས་རེད།
དྲི་བ། སྡོད་གུར་མང་ཆེ་བ་བརྒྱབ་ཟིན་ཡོད་ཀྱང་མི་མང་ལ་མ་སྤྲད་པའི་དབང་གིས། ཆོས་ཞུ་བ་མང་པོ་ཞིག་སྔ་ས་ནས་འབྱོར་ཏེ། རྡོར་གདན་ཉེ་འཁོར་གྱི་མགྲོན་ཁང་དང་ཡུལ་མིའི་ཁང་པ་སོགས་ལ་རིན་གོང་མཐོན་པོ་སྤྲད་དེ་སྡོད་དགོས་པ་ཆགས་ཀྱི་ཡོད་པ་དེ་གང་འདྲ་རེད་དམ།
ལན། ང་ཚོ་དུས་འཁོར་དབང་ཆེན་གོ་སྒྲིག་ཚོགས་ཆུང་ལ་གུར་ཡོད་པ་མ་རེད། ཕྱི་ལོགས་ནས་གླ་དགོས་པ་རེད། ཉིན་གྲངས་རྒྱས་བཅད་ཀྱིས་གུར་གླ་སྤྲོད་དགོས་ཀྱི་ཡོད་དུས། ཟླ་འདིའི་ཚེས་ ༢༨ ནས་ཟླ་རྗེས་མའི་ཚེས་ ༡༤ བར་གུར་རེར་ཧིན་སྒོར་ ༣༥༠༠ ཆགས་ཀྱི་ཡོད་པ་རེད། འོན་ཀྱང་ང་ཚོས་འབོད་སྐུལ་ཞུས་ཏེ་ཚེས་ ༢༥ ནས་གཏོང་རྒྱུ་བྱས་པ་རེད། ང་ཚོས་ཐོག་མ་གུར་སྔོན་མངགས་བྱེད་དུས་ནས་ཟླ་ ༡༢ པའི་ཚེས་ ༢༥ བར་གཏོང་རྒྱུ་མིན་པ་ཡིག་ཆའི་ཐོག་གསལ་བོར་བཀོད་ཡོད། ང་ཚོས་ཚེས་བཅུ་བཅོ་ལྔ་ནས་མི་མང་ལ་གུར་བཏང་བ་ཡིན་ན་གུར་གླ་ཕོན་ཆེན་པོ་འཕར་འགྲོ་བཞིན་ཡོད། མི་མང་པོ་ཞིག་ད་ལྟ་ནས་འབྱོར་ཡོང་གི་ཡོད་སྟབས་སྡོད་ས་མ་རག་པ་དང་། རྒྱ་གར་ཁང་པ་དང་མགྲོན་ཁང་སོགས་ལ་གོང་མཐོན་པོ་སྤྲད་དེ་དཀའ་ངལ་འཕྲད་ཀྱི་ཡོད་པ་ང་ཚོས་མཐོང་གི་ཡོད། ང་ཚོས་ཆོས་ཞུ་བ་ཚོའི་དཀའ་ངལ་ལ་བལྟས་ཏེ་གསུང་ཆོས་ར་བའི་གཡས་གཡོན་དུ་འཕྲལ་སེལ་གྱིས་སྡོད་ས་གྲ་སྒྲིག་ཞུ་ཐུབ་མིན་ཐོག་གོ་བསྡུར་བཞིན་ཡོད།
དྲི་བ། མི་མང་གི་འཕྲོད་བསྟེན་དང་བཅའ་དངོས་བདག་ཉར་སོགས་ཆོས་ཞུ་བ་དག་གི་བདེ་འཇགས་ཐོག་གྲ་སྒྲིག་གང་འདྲ་ཡོད་དན།
ལན། འཕྲོད་བསྟེན་ཐོག་ལ་གདན་ས་ཁག་གི་འཕྲོད་བསྟེན་སྨན་ཁང་མང་ཆེ་བ་ཕེབས་ཀྱི་ཡོད་པ་རེད། དེ་བཞིན་ངྷ་རམ་ས་ལའི་སྨན་རྩིས་ཁང་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་སོགས་ཕེབས་ཀྱི་ཡོད། དེ་བཞིན་རྒྱ་གར་གཞུང་ངོས་ནས་ཀྱང་ཆོས་ཞུ་བ་ཚོར་ཆེད་དུ་འཕྲོད་བསྟེན་སྨན་ཁང་ཞིག་འཛུགས་བཞིན་ཡོད་པ་རེད། བདེ་འཇགས་སྲུང་སྐྱོབ་ཐད་ནས་ཀྱང་གསུང་ཆོས་ར་བ་དང་ཆོས་ཞུ་བའི་སྡོད་གུར། དེ་བཞིན་འགྲུལ་ལམ་སོགས་སུ་རྒྱ་གར་གཞུང་གི་ཉེན་རྟོག་པ་འགྲེམས་འཇོག་དང་། ང་ཚོ་དུས་དབང་གོ་སྒྲིག་ཚོགས་ཆུང་གིས་ཀྱང་དམིགས་བསལ་གྱིས་དང་བླངས་ཞབས་ཞུ་བ་ ༡༠༠ ལྷག་གོ་སྒྲིག་ཞུས་ཡོད། ཆོས་ཞུ་བའི་སྡོད་གུར་ཡོད་སར་དང་བླངས་པ་ ༤༠ ལྷག་ཆེད་འཛུགས་བྱ་འཆར་ཡོད་ལ། ཡར་མར་འགྲུལ་སྐྱོད་རླངས་འཁོར་ནང་དུའང་ལས་ཀ་བྱེད་མཁན་གོ་སྒྲིག་ཡོད། ཆོས་ཞུ་བ་ཚོའི་དངུལ་དངོས་གལ་ཆེན་རིགས་ཆེད་དུ་ཉར་ས་གོ་སྒྲིག་ཞུས་ཡོད།
དྲི་བ། ཐེངས་འདིར་༧གོང་ས་མཆོག་གི་སྐུའི་འཕྲོད་བཞེས་དང་སྐུ་ཕྱྭའི་བདེ་འཇགས་སྲུང་སྐྱོབ་སོགས་ཀྱི་ཐད། མངའ་སྡེ་གཞུང་དང་གོ་སྒྲིག་ཚོགས་ཆུང་ལ་འགན་ལེན་ཁག་འཁུར་ག་འདྲ་ཡོད་དམ།
ལན། སྔོན་མ་ཐེངས་གཅིག་རྡོ་རྗེ་གདན་དུ་དུས་འཁོར་དབང་ཆེན་གོ་སྒྲིག་སྐབས། ༧གོང་ས་མཆོག་གི་སྐུའི་འཕྲོད་བཞེས་བདེ་མིན་གྱི་དབང་གིས་ཕྱིར་འཐེན་བྱ་དགོས་བྱུང་བ་རེད། ད་རེབ་དེ་འདྲ་མི་འབྱུང་བའི་ཡིད་ཆེས་དང་གྲ་སྒྲིག་གཉིས་ཀ་ཡོད། ཐོག་མ་ང་ཚོས་༧གོང་ས་མཆོག་ལ་སྙན་གསེང་ཞུས་པའི་དོན་ཚན་མཐའ་མ་དེར་ཐེངས་འདིའི་དུས་དབང་ལ་ཞབས་རིམ་ག་རེ་བསྒྲུབ་དགོས་པ་སྐུ་མདུན་རང་གིས་ཡེ་ཤེས་དབྱིངས་བྱེད་གནང་རོགས་ཞེས་ཞུས་པ་ཡིན། སྐབས་དེར་༧གོང་ས་མཆོག་ཐུགས་དགྱེས་ཚོར་ཆེན་པོས་དམིགས་བསལ་ཞབས་བརྟན་དགོས་ཀྱི་མི་འདུག དུས་འཁོར་གྱི་སྔགས་ཅུང་ཙམ་གསོག་རོགས། གལ་སྲིད་རྗེས་མ་དེ་འདྲ་དགོས་པ་བྱུང་ན་ངས་ཐུགས་དམ་གནང་སྟེ་ལན་སྤྲད་ཆོག་གསུངས་སོང་། གོ་སྒྲིག་ཚོགས་ཆུང་གི་ངོས་ནས་གདན་ས་གསུམ་དང་ཆོས་བརྒྱུད་རིས་མེད་ལ་ཞབས་རིམ་ཞིག་བསྒྲིབས་པ་ཡིན་ལ། རྗེས་སུ་ཡང་བསྐྱར་སྐུ་སྒེར་དྲུང་ཆེ་བརྒྱུད་དེ་གནས་ཆུང་ལ་ཐུགས་དམ་ལུང་བསྟན་ཞུ་དགོས་མིན་ཞུས་སྐབས། རྗེས་སུ་ལྷ་མོའི་བསྐང་གསོལ་ཁྲི་ཚར་དང་མགོན་པོའི་བསྐང་གསོལ་ཁྲ་ཚར་བསག་དགོས་པའི་བཀའ་བརྒྱ་ཕེབས་སོང་། དེ་དག་ཡོངས་རྫོགས་ཟིན་པ་ཡིན། དེ་བཞིན་སྐུའི་སྲུང་སྐྱོབ་ཐད་ནས་ཀྱང་རྒྱ་གར་དབུས་གཞུང་དང་མངའ་སྡེ་གཞུང་གི་ངོས་ནས་འགན་ཆེན་པོ་འཁྱེར་གྱི་ཡོད་ལ། བོད་གཞུང་བདེ་སྲུང་ལས་ཁུངས་དང་ང་ཚོ་གོ་སྒྲིག་ཚོགས་ཆུང་བཅས་ནས་གང་ཐུབ་ཀྱིས་དོ་ནན་ཞིབ་ཚགས་གནང་ཡོད་པ་རེད། དེར་བརྟེན། ཐེངས་འདིའི་དུས་འཁོར་དབང་ཆེན་གྱི་ཐོག་མཐའ་བར་གསུམ་དུ་༧གོང་ས་མཆོག་གི་སྐུའི་འཕྲོད་བཞེས་དང་སྐུ་ཕྱྭའི་སྲུང་སྐྱོབ་ཐོག་བགེག་བར་ཆད་ཕྲ་མོ་ཙམ་ཡང་མི་འབྱུང་བའི་ཡིད་ཆེས་ཡོད།
གསར་འགོད་པ། དོན་འགྲུབ་བཀྲ་ཤིས་ཀྱིས་གནས་མཆོག་རྡོ་རྗེ་གདན་ནས་སྤེལ།
གནས་ཚུལ་གསལ་པོ་ཡག་པོ་བཀོད་འདུག་པས་དགའ་སྤྲོ་ཆེ། ཁོ་བོས་ཀྱང་ཐེངས་འདིའི་དུས་དབང་ལ་བར་ཆད་མ་ཕྲད་པའི་སྨོན་ལམ་ཡོད།
ཐེངས་༣༢པའི་དུས་དབང་སྐབས་རིས་མེད་སྨོན་ལམ་དང་། དེ་བཞིན་རིས་མེད་བརྟན་བཞུགས་སོགས་གང་སྤྱིར་ཨ་རུ་ན་ཅལ་སྔ་སྡེའི་བློན་ཆེན་དམ་པ་ཁོང་གི་བཀའ་དགོངས་ལྟར་རིས་མེད་ཅེས་པ་དེ་ཤུགས་ཆེ་ཙམ་ཞིག་གནང་རྒྱུ་ལས་བྱེད་ཕལ་མོ་ཆེ་ནས་རེ་བ་དང་ཕྱག་ལས་གནང་བཞིན་ཡོད་ཀྱང་། ས་སྐྱ་ཕྱོགས་ནས་སྐུ་ཚབ་གཏོང་རྒྱུ་རྗེས་ལུས་བྱུང་བ་དང་། རྗེས་སུ་སྐུ་ཚབ་གཅིག་རྡོར་གདན་ས་གནས་ནས་བསྐོས་ཀྱང་ཚོགས་འདུ་སོགས་མཉམ་ཞུགས་དེ་ཙམ་གནང་གི་མེད་སྐོར་གོ་ཐོས་འདུག ད་དུང་རིས་མེད་ཡིན་མིན་རྗེས་སུ་དུས་དབང་གྲུབ་ནས་བལྟ་རྒྱུ་ཡོད་དོ།
སྤྱིར་རིས་མེད་ཅེས་པའི་ཐ་སྙད་ནི་ཕན་ཚུན་ཕྱོགས་གཉིས་སུ་མ་ལྷུང་བར་གཟུ་བོར་གནས་པའི་དོན་ཡིན། དེས་ན་བོད་ཀྱི་ཆོས་ལུགས་རིས་མེད་དབྱངས་སུ་གྱེར་བ་དེའང་། ཆོས་ལུགས་དང་ཆོས་བརྒྱུད་བར་བརྩི་བཀུར་དང་ཕན་ཚུན་ཕྱོགས་རིས་མི་བྱེད་པའི་དོན་དུ་གོ་ན་ལེགས། དེ་མིན་རིས་མེད་ཀྱི་གླུ་དབྱངས་བླངས་ནས་བོད་ཀྱི་ཆོས་ལུགས་ཆོས་བརྒྱུད་ཡོངས་རྫོགས་ཀྱི་བླ་ཆེན་བསྟན་པའི་བདག་པོ་རྣམས། དུས་འཁོར་གྱི་དབང་འོག་ཏུ་འཛུད་ཐབས་བྱེད་པ་ལ་མོས་མཐུན་མེད། དེ་བས་ན་དཔལ་ས་སྐྱ་ཚང་གིས་ཀྱང་སྐུ་ཚབ་གཏོང་སྐབས་ཕན་ཚུན་གླེང་མོལ་འདྲ་མིན་བྱུང་ཡོད་སྲིད་དོ། འདི་ངའི་བསམ་ཚུལ་ཙམ་ཡིན།།
ལྡོང་གསེར་མིག་ལགས་དབང་ཞུ་དང་མ་ཞུ་རང་དབང་རེད་སུ་གང་གིས་བཙན་དབང་བྱེད་མཁན་མི་འདུག མ་གཞི་ནས་དུས་འཁོར་ནི་སྔགས་བླ་མེད་ཀྱི་རྒྱུད་སྡེ་ཞིག་ཡིན་པ་ལས་ཆོས་བརྒྱུད་བྱེ་བྲག་པ་གང་རུང་གི་སྒེར་ཆོས་ལྟ་བུ་མ་རེད་དེར་བརྟེན་དུས་འཁོར་གྱི་དབང་འོག་ཆོས་ལུགས་ཚང་མ་འཛུད་ཐབས་བྱེད་ན་ཟེར་བ་ནི་དུས་འཁོར་ཟེར་བ་ག་འདྲ་ཡིན་མིན་ཧ་མ་གོ་བས་རེད། མ་གཞི་ནས་སྐུ་ཚབ་ཕེབས་དང་མ་ཕེབས། སྨོན་ལམ་ཚོགས་དང་མ་ཚོགས་རང་དབང་རེད་འདུག་ཁྲིམས་དང་བཙན་གྱིས་དེད་མཁན་སུ་ཡང་མི་འདུག དེ་འདྲ་སོང་ཙང་ནད་མེད་པ་ལ་སྨན་གཏོང་བ་དང་གདོན་མེད་པ་ལ་གཏོར་མ་གཏོང་བ་མ་བྱེད་རོགས། ཐག་རིང་རྒྱུས་མེད་ཀྱིས་མཐོང་ན་ན་ཚ་དང་གདོན་སློང་སྲིད།