མུ་ཏིག་དང་སྦྱར་བ།

ཀླུ་སྨྱོན།
ཁྱེད་ཀྱིས།

མི་ཡུལ་ནས་མཛེས་སྡུག་གི་རིན་ཐང་དེ་ངོམ་ཆེད།

མཚོ་གཏིང་གི་ཞེན་ཆགས་ཡོད་ཚད་བློས་གཏོང་ནུས་ཀྱང་།

འཇིག་རྟེན་གྱི་མི་འདི་དག་གིས།

ཁྱེད་རང་བེད་སྤྱད་དེ་རང་གི་ལང་ཚོ་དང་རྒྱུ་ནོར་ངོམ་རྒྱུ་ཤེས་པ་ཙམ་ལས།

ཁྱེད་ཀྱིས་བློས་བཏང་བའི་རིན་ཐང་མང་པོ་ཞིག་ནམ་ཡང་ཤེས་ཐབས་བྲལ།

ཡིན་ན་ཡང་།

ཁྱེད་ཀྱི་འོད་འཚེར་བའི་མཛེས་སྡུག་དེ་ཁོ་ནས།

ང་དང་ང་ལྟ་བུའི་སྐྱེ་བོ་དུ་མ་ཞིག་མ་རིག་པའི་གཉིད་ལས་སློང་ཞིང་།

བརྗེད་ངེས་ཀྱི་ལམ་ལས་ལྡོག་པར་བྱེད་པ་དང་།

ཁྱེད་ལ་འཁོར་བའི་རྨོངས་སྲེད་ཀྱི་རྣམ་ཤེས་དུ་མ་ཞིག་ཀྱང་།

ཉི་འོད་དྲག་པོའམ་ཟླ་འོད་བསིལ་བོ་ཞིག་གི་ཀློང་ནས།

ཁྱེད་ཀྱི་ཚེ་སྲོག་གི་གསང་བ་དང་ཐག་ཉེ་རུ་བཅར་ཐུབ་པ་དང་།

ཁྱེད་ཀྱི་བློས་གཏོང་གི་གཏམ་རྒྱུད་སྙན་ཞིང་འཇེབས་ལ་སྨྲེང་བ་ཁོང་ནས་སློང་བ་དེར་ཉན་རྗེས།

མི་རེ་རེའི་མིག་མཐའ་ནས།

ཁྱེད་རང་ལྟ་བུའི་མཛེས་སྡུག་གི་གོང་བུར་ཆགས་པའི་མིག་ཆུ་རྡོག་པོ་རེ་བཞུར་སྲིད་པས།

ངའི་སྙིང་ཉེ་བའི་མུ་ཏིག་གི་ཚོགས་ལགས།

ངེད་ཅག་འགྲོ་བ་མིའི་རིགས་ལ་དགོངས་ཡངས་གནང་རོགས།

ངེད་ཅག་ཀླེན་ལྐུགས་ཀྱི་ཚོགས་འདི་ལ་སྙིང་རྗེ་སྒོམ་རོགས།

ང་རང་ནི་ཁྱེད་ཀྱི་ཆེད་དུ་རྒྱ་མཚོའི་ནང་དུ་ལྕེབས་མྱོང་བའི་སྲེད་པ་ཅན་དེ་མིན་ན་ཡང་།

ཁྱེད་ཀྱི་མཛེས་སྡུག་ལ་ལོངས་སུ་སྤྱོད་མྱོང་བའི་འཁྱམ་པོ་ཞིག་ཡིན་པས།

རང་ཡུལ་བཞག་སྟེ་མི་ཡུལ་དུ་འཁྱར་བའི་འུ་གཉིས་ཀྱི་གཏམ་རྒྱུད་འདིའི་ཁུག་པ་ནས།

ངས་ཁྱེད་ཀྱིས་བཞག་པའི་གསེར་མདོག་གི་ཞབས་རྗེས་རེ་རེ་དང་།

ངས་ཁྱེད་ཀྱིས་མྱངས་པའི་དཀའ་སྡུག་གི་ལོ་ཟླ་རེ་རེ་ངོ་འཕྲོད་ཐུབ་པ་དང་།

ཆེས་མཛེས་སྡུག་ལྡན་ཞིང་ཆེས་ཕྱིར་དྲན་བྱེད་འོས་པའི་ཉི་མ་ཞིག་ལ།

ཁྱེད་ཀྱང་རང་ཉིད་ཀྱི་ཕ་ས་སྟེ་རྒྱ་མཚོ་ཆེན་པོའི་འཇིངས་སུ་ཕྱིར་ལོག་ཐུབ་པ་དང་།

ང་ཡང་རང་ཉིད་ཀྱི་ཕ་ཡུལ་ཏེ་ཁ་བ་དཀར་པོའི་ཡུལ་གྲུ་དེར་འགྲུལ་བཞུད་ཅིག་བྱེད་ཆོག་ན་ཨང་།