དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན།
ངོས་ནས་བརྡ་ཁྱབ་འདི་བཞིན་བོད་མིའི་ཆབ་སྲིད་ཀྱི་གཞུང་འཛིན་ལ་འགྱུར་བ་ཕྱིན་པས་དབང་གིས་ངོས་རང་ཉིད་དང་དེ་འབྲེལ་ལས་དོན་ལ་ཤུགས་རྐྱེན་ཇི་ཆགས་དང་འབྲེལ་བའི་ཐོག་ནས་བཏོན་པ་ཞིག་ཡིན།
མཁྱེན་གསལ་ལྟར་༧གོང་ས་༧སྐྱབས་མགོན་ཆེན་པོ་མཆོག་ནས་དགོངས་ཡངས་དཀྱེལ་ཆེའི་ཐོག་ཁོང་གི་ཆབ་སྲིད་ཀྱི་ཐུགས་འགན་ཆ་ཚང་འོས་འདེམས་བྱས་པའི་བོད་མིའི་འགོ་ཁྲིད་ལ་རྩིས་སྤྲོད་གནང་ནས་བོད་མི་རྣམས་འགན་དབང་ཆེ་རུ་འགྲོ་བའི་མདུན་བསྐྱོད་རླབས་ཆེན་གནང་བ་ནི། ཕྱི་ལོ་ ༢༠༡༡ ཕྱི་ཟླ་ ༥ པའི་ནང་བཙན་བྱོལ་བོད་མིའི་བཅའ་ཁྲིམས་ཀྱི་འབྲེལ་ཡོད་དོན་ཚན་ཁག་ལ་འགྱུར་བ་བཏང་ཞིང་། དེ་རྗེས་ཕྱི་ཟླ་ ༦ པའི་ནང་འགན་དབང་ཆེ་རུ་ཕྱིན་པའི་བོད་མི་མང་སྤྱི་འཐུས་གསར་པ་ལྷན་ཚོགས་གནང་བ་དང་། དེ་བཞིན་ཕྱི་ཟླ་ ༨ པའི་ནང་འགན་དབང་ཆེ་རུ་ཕྱིན་པའི་བཀའ་བློན་ཁྲི་པ་གསར་པའི་མཛད་འཁུར་དབུ་འཛུགས་གནང་བ་བཅས་ཀྱིས་ལས་རིམ་དེ་ད་ཆ་ཡོངས་སུ་གྲུབ་ཡོད།
ཕྱི་ལོ་ ༡༩༩༠ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་རྒྱལ་སྤྱིའི་འབྲེལ་ལམ་གྱི་ལས་དོན་ཆེ་ཁག་ཞུ་རྒྱུའི་ཆེད་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞིས་ཐོག་གུས་ལ་ཁོང་གི་དམིགས་བསལ་སྐུ་ཚབ་ཏུ་བསྐོ་གཞག་སྩལ་བྱུང་། ཕྱི་ལོ་ ༡༩༩༡ ལོར་བཙན་བྱོལ་བོད་མིའི་བཅའ་ཁྲིམས་གཏན་འབེབས་གནང་བ་དང་ཕྲན་རང་བཙན་བྱོལ་སྒྲིག་འཛུགས་ཀྱི་སྲི་ཞུའི་ལས་དོན་ནས་རྒས་ཡོལ་ཞུས་ཀྱང་༧གོང་ས་མཆོག་གི་དམིགས་བསལ་སྐུ་ཚབ་ཀྱི་འོས་འགན་མུ་མཐུད་ཞུས་པ་ཡིན།
ཉེ་ལམ་གྱི་འགྱུར་བ་མ་ཕྱིན་བར་དུ་༧གོང་ས་མཆོག་བོད་མིའི་སྒྲིག་འཛུགས་ཀྱི་དབུ་ཁྲིད་ཡིན་པར་བརྟེན་ཕྲན་ནས་གཙོ་བོ་བཙན་བྱོལ་སྒྲིག་འཛུགས་ཀྱི་ལས་དོན་ཁག་དང་། དེ་འབྲེལ་སྲི་ཞུ་བ་དང་ཚོགས་ཁག་བཅས་ལ་རོགས་ཕན་གང་ཞུས་དེ་དག་འགལ་ཟླ་གང་ཡང་མེད། དེའི་ཐོག་བོད་མིའི་སྒྲིག་འཛུགས་ཀྱི་གནད་དོན་དང་། ཡང་ཨ་རིའི་གཞུང་ལ་ཞུ་གཏུགས་དགོས་རིགས་ལས་དོན་གཞན་ཐོག་ཕྲན་ནས་ནིའུ་ཡོག་ཏུ་ཡོད་པའི་སྐུ་ཚབ་དོན་གཅོད་རིམ་པ་དང་ལྷན་དུ་ལས་འཁུར་མཉམ་རུབ་ཞུས་ཡོད།
དབུས་བོད་མིའི་སྒྲིག་འཛུགས་ཀྱི་སྒྲོམ་གཞིར་འགྱུར་བ་ཕྱིན་པ་དང་བཅའ་ཁྲིམས་ལ་བསྒྱུར་བཅོས་དང་སྟབས་བསྟུན་ཕྱི་ལོ་ ༢༠༡༡ ཕྱི་ཟླ་ ༥ པའི་ནང་བཀའ་ཤག་ནས་གུས་ལ་དེའི་ཁོངས་སུ་ལས་འགན་ཞིག་བསྐོ་གཞག་གནང་འདོད་ཡོད་པ་གསུངས་བྱུང་། བཙན་བྱོལ་བོད་མིའི་སྒྲིག་འཛུགས་ཀྱི་སྲི་ཞུ་ནས་ཡུན་རིང་སྔོན་རྒས་ཡོལ་ཞུས་ཟིན་པ་དྲན་སྐུལ་དང་བཅས་བཅའ་ཁྲིམས་ཀྱི་ཆ་རྐྱེན་དེ་དག་ཕྲན་གྱི་འོས་འགན་ལ་འབྲེལ་བ་ཆགས་ཀྱི་མེད་སྐོར་བཀའ་ཤག་ལ་དེ་འཕྲལ་ཕྱག་བྲིས་ཤིག་ཀྱང་ཕུལ་བ་ཡིན།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཐད་ཀའི་ཆབ་སྲིད་ཀྱི་དབུ་ཁྲིད་འོག་གུས་ནས་དགའ་ལྡན་ཕོ་བྲང་གི་གཞུང་འཛིན་ཉིན་མཐའ་མའི་བར་ལ་ཞབས་ཕྱི་གང་ནུས་བསྒྲུབ་རྒྱུའི་གོ་སྐལ་བྱུང་བ་ནི་ཤིན་ཏུ་ནས་སྐལ་པ་བཟང་པོ་ཡིན།
ཉེ་ཆར་གྱི་འཛིན་སྐྱོང་གི་འགྱུར་བའི་རྗེས་ངོས་ནས་དབུས་བོད་མིའི་སྒྲིག་འཛུགས་དང་འབྲེལ་བའི་གནད་དོན། དེ་ཡང་ཆེ་ཁག་ཨ་རིའི་གཞུང་ངམ་གཞུང་གཞན་དག་ཚོ་དང་འབྲེལ་བ་བྱེད་རྒྱུའམ། ཡང་ན་ཆུང་ཙག་ངོ་སྤྲོད་ཡི་གེ་འབུལ་རྒྱུ་མཚོན་པ་རྣམས་མཚམས་འཇོག་ཞུས་པ་ཡིན། དེང་གནད་དོན་དེ་རིགས་ཆ་ཚང་ནིའུ་ཡོག་ཏུ་ཡོད་པའི་བོད་ཀྱི་དོན་གཅོད་ཁང་ནས་ཐུགས་འགན་བཞེས་བཞིན་ཡོད།
འོན་ཀྱང་དེ་ནི་གུས་ནས་སྒྲིག་འཛུགས་གསར་པ་དེ་ཡི་ལས་དོན་ལ་ཕྱག་རོགས་ཞུ་འདོད་མེད་པ་དང་། ཡང་ན་བཀའ་ཤག་གསར་པ་ནས་གུས་ལ་ཡིད་ཆེས་མེད་པ་དེ་འདྲ་གང་ཡང་མིན་པར། ད་ལྟའི་སྒྲོམ་གཞི་གསར་པའི་འོག་དེ་སྔའི་བརྒྱུད་རིམ་གྱི་གནད་དོན་རྣམས་གསལ་པོ་བཟོ་རྒྱུའི་རིམ་པ་ཙམ་ཞིག་ཡིན། བརྗོད་མ་དགོས་པ་ཞིག་ལ་རང་ངོས་ནས་བོད་མིའི་སྒྲིག་འཛུགས་ཀྱི་དབུ་ཁྲིད་གསར་པར་ཞབས་ཕྱི་དང་དེ་བཞིན་ལམ་སྟོན་གང་ནུས་ཞུ་རྒྱུའི་ཆོད་སེམས་བརྟན་པོ་ཡོད། དོན་གནད་འདིའི་ཐོག་གུས་ནས་བཀའ་བློན་ཁྲི་པ་བློ་བཟང་སེང་གེ་མཆོག་དང་བཀའ་བསྡུར་ཐེངས་མང་ཞུ་རྒྱུའི་གོ་སྐབས་བྱུང་།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་ཀྱི་ལས་གནས་ཐོག་དུས་ཡུན་གང་འཚམས་རིང་མུ་མཐུད་སྐུ་ཚབ་སྐལ་བཟང་རྒྱལ་མཚན་ལགས་དང་ལྷན་འགན་འཁུར་ཞུས་ཐོག་རྒྱ་ནག་གཞུང་གི་དབུ་ཁྲིད་དང་མཉམ་དུ་རང་ཕྱོགས་ནས་གྲོས་མོལ་ཡོང་ཐབས་འབད་རྩོལ་དང་གྲོས་མོལ་གྱི་ལས་རིམ་འགན་ཁུར་ཞུ་རྒྱུ་ཡིན། ལས་འགན་དེའི་ཐོག་ཕྲན་གྱི་ངོས་ནས་གྲོས་མོལ་གྱི་ལས་རིམ་ལ་རོགས་ཕན་དང་ཐུགས་སྣང་གནང་མཁན་གྱི་གཞུང་ཁག་གིས་གཙོས་ཚོགས་སྒེར་རྣམས་དང་མུ་མཐུད་འབྲེལ་འདྲིས་བྱེད་རྒྱུ་ཡིན།
ད་ལྟའི་བོད་ནང་གི་ཛ་དྲག་གི་གནས་ཚུལ་དང་རྒྱ་ནག་གཞུང་གི་དབང་འཛིན་པ་ཚོས་ཧ་ཅང་གདུག་རྩུབ་ཆེ་བའི་བྱ་སྤྱོད་ལ་བལྟས་ན་གྲོས་མོལ་ཡོང་ཐབས་འབད་རྩོལ་བྱ་རྒྱུ་ཡང་ཕན་ཐོགས་མེད་པ་ལྟ་བུ་རེད། འོན་ཀྱང་ཕྱོགས་གཞན་ནས་བསམ་ཚེ་ད་ལྟའི་ཛ་དྲག་གི་གནས་སྟངས་དེར་གདོང་ལེན་བྱེད་རྒྱུ་ནི་གྲོས་མོལ་ལས་ཐབས་ལམ་གཞན་གང་ཡང་མེད་པ་བསམ་ཡོད་སུས་བལྟས་ཀྱང་ཤེས་ཐུབ་པ་ཞིག་ཡིན།
༧གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་གྱིས་ཝ་ཤིང་ཊོན་ཌི་སི་ནས་ཕྱི་ལོ་ ༢༠༡༡ ཕྱི་ཟླ་ ༡༡ ལ།