བོད་གཞུང་མང་གཉིས་ཀས་གོ་སྐབས་འཆོར་མི་ཉན།

རྐྱང་ཕྲུག་གིས་།

ད་ལོ་མདོ་སྨད་རྔ་བ་ཀིརྟི་དགོན་གྲོང་དང་། ཁམས་རྟ་བོ་ཉ་འཚོ་དགོན་པ་སོགས་སུ། རྒྱ་གཞུང་ལ་ཞི་བའི་ང་རྒོལ་གཅིག་རྗེས་གཉིས་མཐུད་དུ་བྱས་ཏེ། རྒྱ་གཞུང་གི་དམ་དྲག་དང་དྲག་གནོན་གི་འོག་ནས་སྡོད་འདོད་རྩ་བ་མེད་པའི་གནས་སྟངས་དེ་ཕྱི་རུ་མངོན་པ་བྱས་ནས། རྒྱལ་གཅེས་དཔའ་བོ་རྣམས་པས་རང་གི་གཅེས་པའི་སྐུ་སྲོག་བློས་བཏང་ནས་རྒྱལ་སྲས་སྙིང་སྟོབས་ཆེན་པོའི་རྣམ་ཐར་བཟང་པོ་བདག་གིར་བཞེས་ཏེ། བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མེ་མཆོད་ཕུལ་ནས་ཞི་རྒོལ་གནང་དང་གནང་བཞིན་པའི་ཛ་དྲག་གི་གནས་སྟངས་འདི་འདྲ་བྱུང་བའི་སྐབས་སུ། ང་ཚོ་ཕྱི་སྡོད་བོད་མི་གཞུང་སྒེར་གཉིས་ཀྱིས་ལས་དོན་འཐུས་ཤོར་དུ་མ་བཏང་བར་འཛམ་གླིང་རྒྱལ་སྤྱིའི་ཐོག་ནས་རྒྱ་ནག་གཞུང་ལ་གནོན་ཤུགས་སྤྲད་ནས་བོད་ནང་གི་གནས་སྟངས་ཛ་དྲག་འདི་ལས་སྐྱོབས་ཐུབ་པ་དང་། བོད་དོན་བདེན་པ་ར་སྤྲོད་ཀྱི་གནས་ལུགས་རྒྱལ་སྤྱི་རང་བཞིན་ཅན་དུ་བསྒྱུར་ནས། རྒྱལ་གཅེས་དཔའ་བོ་རྣམས་ཀྱི་བདེན་དོན་གྱི་འབོད་སྒྲ་དེའི་མངོན་འདོད་དང་། ཁོང་ཚོའི་དཀའ་སྡུག་གི་གནས་སྟངས་དེ་རྒྱ་ནག་གཞུང་ལ་ནག་གསུབ་གཏོང་མི་འཇུག་རྒྱུ་དེ་ང་ཚོའི་འགན་འཁྲི་ཡིན། ཉེ་ཆར་རྔ་བ་ཀིརྟི་དགོན་པའི་དགེ་འདུན་པ་བློ་བཟང་སྐལ་བཟང་དང་། བློ་བཟང་དཀོན་མཆོག་གཉིས་ཀྱིས་སྐུ་ལུས་མེ་སྲེག་བཏང་དུས་རྒྱ་ནག་གཞུང་གིས། གནད་དོན་དེ་ཁ་བསྒྱུར་བྱས་ཏེ། ཁོང་གཉིས་ཀྱི་གནད་དོན་དེ་ཀིརྟི་དགོན་པར་འབྲེལ་བ་མེད་ཚུལ་དང་། ཁྲོམ་ས་ཞིག་གི་སྙོག་དྲ་ཡིན་ཚུལ་གྱི་ངོ་བོར་བསྒྱུར་ནས་གནས་ཚུལ་རྫུན་བཟོ་བྱས་པའི་སྐོར་དང་། ད་དུང་ཁོང་གཉིས་ཀྱི་ལོ་ན་ཡང་ཆུང་དུ་བཏང་ནས་ལོ་བཅོ་བརྒྱད་མ་ལོན་ཚུལ་དང་། ཁོང་གཉིས་ལ་དེ་འདྲའི་བསམ་བློའི་གྲ་སྒྲིག་མེད་ཅིང་། གཞན་གྱིས་བརྒྱུད་སྐུལ་བྱས་ཚུལ་སོགས་ཀྱི་གནས་ཚུལ་རྫུན་མ་བརྒྱུད་བསྒྲགས་གང་ཐུབ་བྱས་པ་འདི་དཔོ་མཚོན་རེད། དེ་ལྟའི་རྒྱ་ནག་གི་གཡོ་ཇུས་ཅན་གྱི་ལས་དོན་འདི་འདྲ་ངེས་པར་དུ་བཀག་འགོག་དང་། དེ་དག་གི་རྫུན་གྱི་སྐུབ་བརྡོལ་བར་བྱས་ཏེ། ཁྱབ་བསྒྲགས་ཀྱི་ལས་འགུལ་གཞི་རྒྱ་ཆེ་བ་ཞིག་གཞུང་མང་གཉིས་ཀའི་ངོས་ནས་སྤེལ་ཐུབ་པ་གནང་རྒྱུ་དེ་གལ་འགངས་ཆེ། དེ་སྔོན་བཀའ་ཁྲི་བློན་ཁྲི་བ་བློ་བཟང་སེངྒེ་མཆོག་གིས་ང་ཚོས་གོ་སྐབས་དམ་འཛིོན་བྱེད་དགོས་ཚུལ་གསུངས་བྱུང་། དེས་ན་ད་རེས་ང་ཚོས་བློ་རིག་སྒྲིམ་ནས་གོ་སྐབས་འདི་བཟུང་ནས་བོད་དོན་བདེན་མཐའ་གསལ་བའི་ཐབས་ལ་འབད་དགོས་པ་ལས། བོད་ནང་གནས་ཚུལ་ཛ་དྲག་རེ་བྱུང་དུས། གནས་སྐབས་རིང་ཟས་བཅད་ངོ་རྒོལ་རེ་དང་མར་མེ་ཁྲོམ་སྐོར་རེ་བྱས་པ་ཙམ་གྱིས་རྒྱལ་གཅེས་དཔའ་བོ་རྣམས་ཀྱི་མངོན་འདོད་དེ་འགྲུབ་ཐུབ་མེད། དེ་ན་ཁོང་ཚོས་ཞུམ་པ་མེད་པའི་སྙིང་སྟོབས་ཀྱིས་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་བཏང་ནས། བོད་བསྟན་སྲིད་མི་རིགས་ཀྱི་ཆེད་དུ་རང་སྲོག་བཏང་བའི་རིན་ཐང་དེ་ང་ཚོའི་ངོས་ནས་ཆུ་ཟོས་སུ་མི་གཏོང་རྒྱུ་དེ་གཞུང་གི་སྒྲིག་འཛུགས་དང་མི་མང་གཉིས་ཀར་འོས་འགན་ཡོད། གལ་སྲིད་གོ་སྐབས་འདི་ཤོར་སོང་བ་ན། ཧ་ཅང་ཕངས་པོ་ཡིན་པ་དེ་ང་ཚོས་ངོས་འཛིན་ཐུབ་པ་གནང་དགོས། དཔེར་ན་ཕྱི་ལོ་༢༠༠༨ ལོར་བོད་ས་སྟོད་སྨད་བར་གསུམ་ནས་གནམ་ས་འགུལ་ཞི་བའི་གྱེན་ལངས་བྱས་ཡོད་ཀྱང་། ཕྱི་ཕྱོགས་ཀྱི་བོད་གཞུང་མང་གཉིས་ཀས་བོད་ནང་གི་གནས་སྟངས་ཛ་དྲག་དེ་ལས་སྐྱོབས་ཐུབ་མེད་པ་མ་ཟད། ད་དུང་ཉེས་མེད་བོད་མི་མང་པོ་རྒྱའི་བཙོན་འོག་ཏུ་བཟོད་པར་དཀའ་བའི་སྡུག་གྱོང་མནར་གཅོད་ཚད་ལས་རྒལ་བ་མྱང་དང་མྱོང་བཞིན་པ་རེད། ཉམས་མྱོང་འདི་གཞི་ལ་བཞག་ནས་ང་ཚོས་གཞིས་ལུས་དཔའ་བོ་དཔའ་མོ་རྣམས་དཀའ་སྡུག་གི་གནས་ལས་སྐྱོབ་ཐུབ་པ་གནང་རྒྱུ་དེ་རེད།
ཡང་ཉེ་ཆར་བརྒྱུད་ལམ་ཁག་ཏུ་རྡ་སའི་གཞུང་སྒེར་གྱི་མི་སྣ་ཁག་ཅིག་གིས། བོད་ནང་གི་དཔའ་བོ་རྣམས་ལ་རང་སྲོག་གཅེས་ཉལ་བྱས་ཏེ། རང་གི་རྣམ་དཔྱོད་བད་སྤྱད་ནས་ཡུན་རིང་འཐབ་རྩོད་བྱེད་དགོས་ཚུལ་གྱི་གཏམ་བཤད་གནང་བཞིན་པ་དེ་ཚོའི་སྐད་ཆ་དེ་འགན་གང་ཡང་མ་ཁུར་བའི་རྟགས་མཚན་རེད། བོད་ནང་གི་གནས་སྟངས་དེ་ང་ཚོས་བལྟས་བསྡད་པ་ནང་བཞིན་གཏན་ནས་མེད། ཁོང་ཚོ་འུ་ཐུག་ཐབ་ཟད་ནས་རང་གི་མི་རིགས་ཀྱི་ལས་དོན་སྒྲུབ་པའི་ཐབས་ལམ་གཞན་མེད་པར་བརྟེན་འདི་འདྲའི་བློས་བཏང་བྱེད་དགོས་བྱུང་བ་རེད། ང་ཚོ་ཕྱི་ཕྱོགས་སུ་རང་དབང་ལུང་པར་ཡོད་མཁན་ཚོས་ཁོང་ཚོའི་ལས་འགུལ་ལ་བཀག་འགོག་བྱེད་ཀྱང་མི་ཉན་ལ། སྐུལ་སློང་བྱེད་རྒྱ་ཡང་ཁག་པོ་རེད། ཁོང་ཚོས་བློས་བཏང་ཆེན་པོས་འདི་འདྲ་བྱས་ཡོང་དུས་བཀག་འགོག་དངོས་གནས་དེ་རྒྱ་གཞུང་གིས་ཁོང་ཚོའིེ་ཐོག་འཛིན་པའི་སྲིད་ཇུས་འཁྱོག་པོ་དེ་བཀག་འགོག་བྱེད་རྒྱུ་དང་བདེན་པ་ར་སྤྲོད་བྱེད་རྒྱུ་དེ་རེད། རྒྱ་གཞུང་གིས་ཚུར་བཙན་འཛུལ་བྱས་ལས་བོད་མིའི་ངོས་ནས་ཕར་བཙན་འཛུལ་བྱས་པ་དེ་འདྲ་མིན་སྟབས་ང་ཚོས་གཞིས་ལུས་རྒྱ་ཆེའི་མང་ཚོགས་ལ་དེ་འདྲ་མ་བྱེད་བརྗོད་ན་གཏན་ནས་འགྲིག་ཐབས་མི་འདུག གོང་དུ་བརྗོད་པ་ལྟར་ང་ཚོས་ཁོང་ཚོར་ལས་འགུལ་འདེ་འདྲ་སྤེལ་དགོས་པ་དང་དེ་འདྲ་བྱེད་དགོས་པ་རེད་ལབ་ནས་བརྒྱུད་སྐུལ་བྱས་ནའང་མི་འགྲིག མདོར་ན་གཞུང་གི་འཛུགས་ཀྱི་འཛིན་སྐྱོང་གསར་པས་ཚ་ཚ་འུར་འུར་གྱི་ལས་འགུལ་ཞིག་ངེས་པར་དུ་སྤེལ་དགོས་པར་སེམས། དེ་ལྟར་མ་བྱས་ན་བཀའ་ཁྲི་བློ་བཟང་སེངྒེ་མཆོག་གིས་དེ་སྔོན་འོས་བསྡུའི་འགྲན་རྩོད་སྐབས་གསུངས་པའི་སྐད་ཆ་དེ་ཚོ་བདེན་པར་རློམ་ཁག་པོ་འདུག