གོང་མ་མཆོད་ཡོན་ལས་འཕྲོས་ཏེ་ངས་ཀྱང་དོགས་སློང་གི་ཡི་གེ་གསུམ་ཙམ་ཁྱེད་ལ་འབྲི་དགོས་བྱུང་། ད་འདིར་གནས་ཚུལ་མི་མཐུན་པ་གསར་པ་དེ་འདྲ་མང་པོ་མེད། མི་མཐུན་པ་ཁ་ཤས་ཅིག་ཡོད་པ་འདིར་ཡང་སྐྱར་བྲིས་ཡོད། སྤྱིར་བཏང་འབྲེལ་བ་དེའི་རིགས་ལ་ཕན་གནོད་གཉིས་ཀ་ཡོད་རྒྱུ་རེད། ད་མང་པོ་འབྲི་འདོད་མེད། ཐང་ཡང་ཅུང་ཆད་སོང་། ཁྱེད་རང་གིས་ག་རེ་བྲིས་མ་བྲིས་རང་གི་འདོད་པ་རེད། མ་གཞི་གང་ཞིག་འབྲི་ནའང་ཕྱོགས་ཡོང་ནས་བསམ་བློ་གཏོང་རྒྱུ་དེ་གལ་ཆེན་པོ་རེད། ངས་ཁྱེད་ལ་ལྡོག་ཕྱོགས་ཁོ་ན་ནས་དཔེ་མཚོན་ཁ་ཤས་དྲངས་པ་ཙམ་ཡིན།
༡ སོག་པོས་ཨི་རན་ནང་དགོན་པ་བཞེངས་པའི་སྐོར། ཇོན་མན་གྱིས་བརྩམས་པའི་ཀུབ་ལི་ཁན་ཞེས་པ་དེར་ལྟ་རོགས་གནང་།
༢ རྒྱལ་པོ་ཡིན་ན་མི་སེར་ citizen ཡང་ཡིན་པ་རེད། བོད་ཀྱི་ལོ་རྒྱུས་ཐོག་ཏྰ་ལའི་བླ་མའི་དགོངས་ཚུལ་ཟེར་བ་དེར་ལྟོས།
༣ གུ་ཤྲི་ཁང་དགེ་ལུགས་པའི་བཀའ་སྐུལ་དང་དུ་བླང་སྟེ་རོགས་རམ་བྱེད་དུ་ཡོང་བ་ལས་བཙན་འཛུལ་བྱེད་དུ་ཡོང་བ་མིན་པ་གསལ་པོ་རེད། དེ་མདོ་སྨད་ཆོས་འབྱུང་སོགས་མང་པོ་ཞིག་ན་གསལ་པོ་བཀོད་ཡོད་པ་ལྟར་རེད།
༤ གོང་མ་འཇམ་པའི་དབྱངས་ཟེར་བ་བླ་ཆེན་གཅིག་པོས་འུད་སྒྲོགས་མིན་པར་མི་མང་ནང་གཏམ་དཔེ་ཚུན་གྱི་ནང་ཁྱབ་བསྡད་ཡོད་པ་ཞིག་རེད།
༥ བོད་གཅིག་གྱུར་ཟེར་བ་དེ་ས་སྐྱ་པས་ཧོར་ལ་མགོ་འདོགས་མ་བྱས་སྔོན་དུ་བྱུང་མེད། ཇིང་གིར་རྒྱལ་པོ་མ་ཤི་སྔོན་ནས་ཨ་མདོ་དང་ཁམས། པེ་ཅིང་ཚུད་པའི་རྒྱ་ནག་གི་བྱང་ཤར་ས་ཆ་ཡོངས་རྫོགས་སོག་པོས་དབང་འོག་བསྡུས་ཚར་གྲུབ་པ་རེད། འདིའང་གོང་གི་དེབ་ཀུབ་ལི་ཁན་ལ་ལྟོས། དེའི་ནང་ས་ཁྲའང་གསལ་པོ་བཀོད་འདུག
༦ ས་སྐྱ་བའི་སྐབས་དེར་བོད་པ་རང་གི་ནང་ནས་རྒྱལ་ཁབ་འཛུགས་ཐུབ་པའི་ཆ་རྐྱེན་ལེགས་པོ་ཞིག་ཡོད་པ་ངས་མཐོང་གི་མི་འདུག དེའི་སྐབས་དབུས་གཙང་ཡང་དཔོན་མགོ་དུ་མར་ཆད་ཡོད། ས་སྐྱ་པཎ་ཆེན་དཔོན་པོ་རེད་ཟེར་ནས་གདན་འདྲེན་ཞུས་པ་མ་རེད། སོག་པོས་བོད་ལ་དབང་སྒྱུར་བྱེད་རྒྱུ་གཏན་ཁེལ་གྲུབ་ནས། བོད་ནང་བརྟག་དཔྱད་བྱས་ཏེ་སུ་ལ་སྟོབས་འབྱོར་དང་མངའ་ཐང་ཆེ། སུ་ལ་གཟི་བརྗིད་ཆེ། སུ་ཆོས་ལ་མཁས། དེ་ཚོར་བརྟག་ནས་མཐར་ཆོས་ལ་མཁས་པ་ས་པཎ་གདན་དྲངས།
ཐུགས་རྗེ་ཆེ། ཡིན་དང་ཡིན། བསམ་ཚུལ་མི་མཐུན་པ་བྱུང་སྐབས་ཁོ་རང་གི་ཅི་བཤད་རང་དབང་རེད་ཟེར་ནས་བཏང་སྙོམ་དུ་མི་འཇོག་པར་ཕན་ཚུལ་བསམ་ཚུལ་བརྗེ་རེས་བྱ་རྒྱུ་གལ་ཆེ། དེ་གཅིག་གིས་གཅིག་ལ་ཁ་གཏད་གཅོག་དགོས་པའི་དོན་མིན། རང་གི་སེམས་ལ་ཡོད་པའི་དོག་གཞི་དེ་ཚོ་གསལ་པོ་བཟོ་ཆེད་ཡིན། ནོར་འཁྲུལ་མེད་པ་སུ་ཡང་མེད། བློ་གཟུ་བོར་གནས་དགོས་རྒྱུ་དེ་གལ་ཆེན་པོར་མཐོང༌།