མེར་བསྲེགས་ཀྱི་གཏན་ཚིགས།

དགེ་འདུན་པ་ཚེ་དབང་ནོར་བུ་དམ་པར་མྱ་ངན་ཆེད་དུ་བྲིས།

འཇིགས་མེད་ཚེ་རིང་།

ད་ནི་ང་ཚོར་རང་ལུས་མེར་བསྲེགས་གཏོང་མཁན་གྱི་རང་དབང་འཐབ་རྩོད་པའི་གྲངས་ཀ་བཞི་ལ་ལོངས་སོང་། འཐབ་རྩོད་པ་རེ་རེར་འཐབ་རྩོད་དྲིལ་བསྒྲགས་མཁན་གྱིས་”དཔའ་བོ་”ཞེས་མཚན་སྙན་གྱི་ཆོ་ལོ་སྦྱོར་གྱི་ཡོད། གཅིག་བྱས་ན་མཚན་སྙན་འདི་གཟི་བརྗིད་ཆེན་པོ་ཡིན་སྲིད། སྟབས་ལེགས་པ་ཞིག་ལ་འདས་པའི་འཐབ་རྩོད་པ་བཞི་ཡིས་མཚན་སྙན་འདིའི་ཆེད་དུ་ལས་འགུལ་སྤེལ་མེད་ཅིང་། ཁོང་རྣམས་ཀྱིས་ཚེ་སྲོག་གི་ཚད་གཞིར་བླངས་པའི་ཆེ་མཐོང་དང་འདོད་མོས། རང་དབང་བཅས་ནི་ལམ་ལམ་འབར་བའི་མེ་ལྕེ་དང་ལྷན་དུ་གསོན་ཡོད་པའི་ང་ཚོའི་རྔུལ་ཆུ་དང་སྦྱར་ཡོད། འོན་ཀྱང་། ཤི་མ་མྱོང་བའི་ང་ཚོར་མཚོན་ན་མེ་ལྕེའི་ཁྲོད་གཟིམ་ལ་ཉེ་བའི་གང་ཟག་དེའི་བཟོད་བསྲན་དཀའ་བའི་སྡུག་བསྔལ་དང་། ཁྱད་འཕགས་ཀྱི་ཚོར་བ་སེམས་ཐོག་ཏུ་ལེན་མི་ཐུབ་པ་ཡིན། ང་ཚོས་ཤེས་ཐུབ་པ་ནི་ཁོ་ཚོས་ཅིའི་ཕྱིར་རང་ལུས་མེར་བསྲེགས་བཏང་བའི་རྒྱུ་མཚན་དེ་ཡིན་ཡང་། ཚིག་གིས་མཚོན་མི་ཐུབ་པའི་མེར་བསྲེགས་ཀྱི་གཏན་ཚིགས་ཇི་སྙེད་ཅིག་ཡོད་པ་ལམ་ལམ་འབར་བའི་མེ་ལྕེ་ཡིས་དག་པའི་ཞིང་དུ་གདན་འདྲེན་ཞུས་ཡོད།

འཇིག་རྟེན་སྟེང་ཡལ་མི་སྲིད་པའི་བོད་ཀྱི་འཐབ་རྩོད་དང་མཉམ་དུ་མེ་ལྕེའི་ཁྲོད་ཀྱི་དགེ་འདུན་པ་ཚེ་དབང་ནོར་བུ་ཀྱི་ལགས་མཐའ་མའི་ཚེ་སྲོག་གིས་ལས་འགུལ་འདིར་མཐའ་བསྡོམས་རྒྱག་མི་སྲིད་པ་དང་། ཁོང་གི་རྗེས་སུ་ད་དུང་ཁོང་ལྟ་བུའི་རང་དབང་འཐབ་རྩོད་པ་ཞིག་ཡོང་ངེས། ལུ་གུ་བརྒྱུད་དུ་འོང་བའི་ཚེ་སྲོག་གི་ཕྲེང་བས་རྒྱ་ནག་གཞུང་གིས་བོད་ཐོག་འཛིན་པའི་སྲིད་ཇུས་ལ་གུ་རེ་རྩེས་པ་མ་ཡིན་པར་ངོ་རྒོལ་གྱི་རྣམ་འགྱུར་བསྟན་པ་ཡིན་པས་མེ་ལྕེའི་ཁྲོད་ཀྱི་བོད་མིའི་ཚེ་སྲོག་མཐའ་ཅན་དུ་གཏོང་དང་མི་གཏོང་དེ་ཡོངས་སུ་རྒྱ་ནག་གཞུང་གི་ལག་པར་ཡོད་པ་ཞིག་རེད། ངས་བསམ་པ་ལ་ཁེ་ཕན་གྱི་ཆེད་དུ་ཚེ་སྲོག་ལ་རྩིས་མེད་གཏོང་མཁན་མང་པོ་མེད་པ་ཡིན། འདས་པའི་དམག་ཆེན་དང་པོ་དང་གཉིས་པའི་སྐབས་སུ་ཁེ་ཕན་གྱི་ཆེད་དུ་ཡང་ང་བའི་དམག་འཁྲུག་ཤོར་བ་དང་། དེང་གི་དུས་སུ་རྒྱ་ནག་གཞུང་གིས་ཁེ་ཕན་གྱི་ཆེད་དུ་བོད་ཁམས་དམ་དྲག་བྱེད་པ་གཉིས་ལ་བྱེད་ལས་ཀྱི་ཆ་ནས་ཁྱད་པར་ཆེན་པོ་མེད་པ་དང་། འདིའི་དོན་ནི་བོད་མི་རྣམས་ཀྱིས་བློ་ཕམ་དང་བཅས་”རང་གི་བདེ་སྐྱིད་གཞན་གྱི་སྡུག་བསྔལ་དུ་བསྐྲུན་”ཞེས་བརྗོད་པ་རེད།

ང་ཚོས་”ཅིའི་ཕྱིར་རང་ཉིད་ལ་དབང་བའི་འཚོ་བ་མེད་པ་རེད་”ཅེས་བསམ་བློ་གཏོང་བཞིན་ཡོད་པ་དང་། བསམ་བློ་འདིས་རང་ཉིད་ལ་དབང་བའི་འཚོ་བ་ཡོད་པར་ཁག་ཐེག་བྱེད་འདོད་ཡོད་པ་སྟོན་གྱི་ཡོད། དེའི་རྐྱེན་གྱིས་བོད་མི་རྣམས་ཀྱིས་མང་མོས་ཡོད་པའི་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་བྱེད་ཀྱི་ཡོད་པ་དང་། དབུ་མའི་ལམ་གྱི་སྲིད་ཇུས་ཀྱི་སྙིང་དོན་ནི་“རང་དབང་དང་། དྲང་བདེན། ཆེ་མཐོང་། དེ་བཞིན་བོད་མིའི་ངོས་འཛིན་”བཅས་ཀྱི་ཆེད་ཡིན་པ་སྲིད་སྐྱོང་སྐུ་ཞབས་བློ་བཟང་སེང་གེ་མཆོག་གིས་དམ་འབུལ་གསུང་བཤད་དུ་གསལ་སྟོན་གནང་ཡོད། བོད་མི་རྣམས་ཀྱིས་རང་ཉིད་ལོ་ངོ་སྟོང་ཕྲག་མང་པོར་གཤིབས་ཤིང་འགྲོགས་ནས་འོངས་པའི་རྒྱ་མི་རིགས་ལས་གླེན་པ་དང་། ཀླ་ཀློ་ཡིན་པའི་རྒྱུ་མཚན་རྙེད་ཀྱི་མེད་ལ། རྒྱ་མི་རིགས་དང་འདྲ་མཉམ་མ་ཡིན་པའི་འཚོ་བར་རོལ་འདོད་བྱེད་ཀྱི་མེད་ཅིང་། རང་ཉིད་ཀྱི་ཆེ་མཐོང་དེ་ཁ་བ་གངས་ཅན་ཡུལ་ནས་རྒྱ་མིའི་མཐོང་ཆུང་འོག་ཏུ་ཤོར་ཏུ་འཇུག་འདོད་མེད་པ་རེད། འོན་ཀྱང་། ང་ཚོས་རྒྱ་མི་ཡོད་ཚད་བོད་མིར་མཐོང་ཆུང་བྱེད་མཁན་ཏུ་ལྟ་མི་སྲིད་ལ། རྒྱ་མི་ཐམས་ཅད་དེ་འདྲའི་ཀླད་མེད་ཅིག་ཀྱང་ཡིན་མི་སྲིད། དེའི་རྐྱེན་གྱིས་ང་ཚོ་ལ་རང་གི་མཛེས་དཔྱོད་དང་མཐུན་པའི་འཚོ་ལམ་ཞིག་ཅིས་ཀྱང་དགོས་པ་རེད།

རང་ལུས་མེར་བསྲེགས་གཏོང་མཁན་གྱི་འདས་པོ་བཞི་ལས་གསུམ་ནི་ཆོས་བྱེད་དགེ་འདུན་པ་ཡིན་པ་དང་། ཆོས་བྱེད་དགེ་འདུན་པ་ནི་ཡ་ཡོ་ཆེ་བའི་སྲིད་དོན་ལས་ཀ་དང་རྩ་བའི་ཆ་ནས་ཁ་ཐག་རིང་པོ་རེད། ཁོང་རྣམས་ཀྱི་ཚེ་སྲོག་གི་འཐབ་རྩོད་འདིས་ཧ་ཅང་གསལ་བོར་བསྟན་ཡོད་པ་ནི་༸གོང་ས་མཆོག་བོད་ལ་གདན་འདྲེན་ཞུ་དགོས་པ་གཙོ་བྱས་ཏེ་རང་དབང་དང་ཆེ་མཐོང་ལ་ཐུག་པ་ཞིག་ཡིན། གནད་དོན་འདིའམ་རེ་བ་འདི་ནི་བོད་མི་ཡོངས་ཀྱི་རྩ་དོན་དང་བོད་མི་རེ་རེ་བའི་རྩ་དོན་ཡང་ཡིན་པས་གཅིག་བྱས་ན་སྲིད་སྐྱོང་སྐུ་ཞབས་བློ་བཟང་སེང་གེ་མཆོག་གིས་བོད་ཀྱི་རང་སྲིད་རང་སྐྱོང་ནི་མི་རེ་རེའི་རང་དབང་གི་ཚད་གཞིའི་སྟེང་ནས་གྲུབ་དགོས་པར་ཧ་ཅང་ཁ་གསལ་གྱིས་གསལ་སྟོན་བྱེད་ངེས་ཤིང་། མེ་ལྕེའི་ཁྲོད་ཀྱི་ཚེ་སྲོག་མཚམས་འཇོག་བྱེད་པར་རྒྱ་ནག་གིས་ཁག་ཐེག་བྱེད་མིན་ཀྱང་སྲིད་སྐྱོང་གི་གསལ་སྟོན་ལ་དོན་ཕན་ལྡན་པའི་བརྡ་ལན་ཡོད་མེད་ལ་ཐུག་ཡོད་པ་ཞིག་ཡིན།

༢༠༡༡ཟླ་༨ཚེས་༢༦ཉིན།