མཚན་མོ་རིང་དུ་རིང་དུ།

བདེ་ཆེན་སྒྲོལ་མ།
མཚན་མོ་ནི་མཚན་མོ་ཡིན་པས།
མཚན་མོ་ལ་རིང་ཐུང་ཞིག་གང་ནས་ཡོད།
་་་་་་་་་་་་་་་་་་ཁ་བྱང་གི་གསང་བ།

ཀ
ཁ་སང་དེ་རིང༌། ཉི་མ་དང་རྡ་སའི་བར་ཐག་ཇེ་རིང་ཇེ་རིང་རེད།
གཅིག་བྱས་ན་བདག་གི་བསམ་ཚུལ་ནོར་ཡོད་སྲིད།
གནས་ལུགས་སྟོང་ཉིད་ཀྱི་མིག་ནང་ནས། མི་རིགས་དང་རྒྱལ་ཁབ་ག་ལེར་བོར་འགྲོ་དུས།
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།

ཁ།
སྐུ་ངོ་ཚོས། རྐང་པ་རྡ་ས་དང་མགོ་བོ་ཨ་རིར་བཞག་དུས་དང༌།
འཇོན་པོ་ཚོས། དབྱངས་གསལ་སོ་བཞི་ཡི་ཞིང་སར་ABCDཡི་ས་བོན་འདེབས་དུས།
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།

ག
ས་འདི་ནས། མང་པོ་ཞིག་གིས་ཁ་མི་གྲགས་པ་དེ་ཡག་རྟགས་ཤིག་མ་རེད།
ལྐུགས་པ་མིན་པའི་ཁ་མི་གྲགས་མཁན་དེ་ཚོ།
དངོས་གནས་སྐྱག་པ་ལ་ཐུག་ན་སྐྱག་འབུ་དང༌།
ལྕི་བ་ལ་ཐུག་ན་ལྕི་འབུ་རེད་འདུག
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།

ང༌།
མང་མང་གིས་ཟླ་འོད་ཀྱང་མི་མཐོང་བའི་མཚན་མོ།
མི་སྐོར་ཞིག་གིས་ཟླ་བའི་ནང་གི་རི་བོང་གི་བཟོ་དབྱིབས་དང་མཛེས་སྡུག་གླེང་གིན་འདུག
རྒད་པོ་ལོ་ལོན་དང་བྱིས་པ་བསམ་མེད་ཚོས།
བླ་མའི་ཡོན་ཏན་ཟེར་བཞིན་ཐོད་པ་ས་ལ་བརྡབས་སོང༌།
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།

ཅ།
ཁ་སང་༧གོང་ས་མཆོག་གིས་གསུངས་པའི་བཀའ་སློབ་དེ།
དེ་རིང་མི་དམངས་ཀྱི་མགོ་བོ་རྡུང་བྱེད་ཀྱི་ཐོ་བར་གྱུར་འདུག
བཀའ་བློན་གྱི་རྐུབ་སྟེགས་མཐོ་དྲགས་པའི་སྒང་ལ།
གདོང་ལ་འཛུམ་མདངས་ཀྱང་བཞི་ལྔ་བརྩེགས་རེ་གྱོན་པས།
ལས་བྱེད་ཚོས་མི་ལོ་གསུམ་ལ་བཀའ་བློན་གྱི་བཞིན་རས་ངོ་མ་མཐོང་མ་མྱོང་ཟེར།
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།

ཆ།
དགེ་རྒན་མིན་པའི་དགེ་རྒན་མང་པོ།
དགོན་པ་བརྒྱུད་ནས་སློབ་གྲར་སླེབས་སོང༌།
ཁོང་ཚོས་དགོན་པ་ནས་མི་ཆོག་པ་སློབ་གྲས་ཀྱང་མི་ཆོག་ཟེར།
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།

ཇ།
ཁོ་མོས་འགྲོ་ཞོར་དུ་ང་ལ་འགྲམ་ལྕག་ཚ་བེར་བ་ཞིག་གཞུས་སོང༌།
སྐད་ཆའི་འགྲམ་ལྕག་དེ་དངོས་གནས་སྙིང་ལ་གཟན་པ་ལའང༌།
ཝེ། ཁྱོད་ཀྱིས་སྙུ་གུ་སྒུལ་ཤེས་པ་ལས་ཅི་ཞིག་ཤེས།
ཙོང་དང་ཀྲུ་མ་ཀྲོ་གཏུབ་ཨེ་ཤེས་ཟེར།
མཚན་མོ་རིང་དུ་རིང་དུ། ལོ་དང་ཟླ་བར་འདྲེས་སོང༌།