སེམས་དང་སེམས་པའི་བར།༼ ཞར་བཀོད་ལྔ ༽

ཐོར་རྒོད་པ་སྤྱན་ཆབ།

རྩལ་ལ་གཏད་པ་ཞིག
བློ་ཡིས་བཏབ་པ་ཞིག
བཅད་པ་ཞིག མཐུད་པ་ཞིག
ཆོ་འཕྲུལ་མ་ཡིན་པའི
སྒྱུ་རྩལ་མ་ཡིན་པའི
མཛེས་རིས་ཀྱི་དོད་དུ
ཆུ་རིས་ཀྱི་དབྱིབས་སུ
སེམས་དང་སེམས་ལ་སིམ་པ་དེ
རྐང་དང་རུས་པར་ཟུག་པ་དེ
ཡིད་ཆེས་ཐེངས་ཤིག་གི་མིའི་སེམས་དྲོད་དོ
01:40 20/08/2011
རྒོལ་སྟངས་གཞན་ཤིག
རྐང་ལག་རྐྱོང་ཐེངས་དང
རྐང་ལག་སྐུམ་ཐེངས་དེས
སྔུར་དབྱངས་འཐེན་སྟངས་དང
གཉིད་བཤད་མཐོ་སྟངས་དེས
ཤ་ལྷོད་སེམས་ལྷོད་ཀྱི་རང་དབང་སྒྲུག་གིན་འདུག
01:46 20/08/2011
ཡིད་ལ་གཅུགས་པ།
ལག་ཟུང་གི་སེར་ག་དང་དེའི་ཟབ་ཚད
སེམས་ཀྱི་གཏིང་ལ་ཕོག་པ་ནས
ངས་ཁྱོད་ཀྱི་སྤྱན་ཆབ་ཧུབ་ཀྱིས་བཏུང་བཞིན
ངས་ཁྱོད་ཀྱི་བཀའ་བཀྱོན་གླུ་རུ་སྒོམ་བཞིན
དབང་ལ་དབང་བརྡ་སྤྲད་ཅིང་དམ་ཚིག་མནའ་ཡིས་མནན་ཡོད
01:50 20/08/2011
མི་ཡི་སེམས།
ཉི་མ་ནུབ་པར་བསམ་བསམ་རྗེས
རང་ཉིད་གློ་བུར་དུ་ལྟོག་སྣང་སྐྱེས

མིག་སྐྱིབས་ལྟ་བུའི་མུན་པ་དེས་ཀྱང
ས་རྩིད་ལྟ་བུའི་སྐྲ་ལོ་དེས་ཀྱང
ངོ་གདོང་ཡོད་ཚད་མུན་པས་གླན་སྣང་སྐྱེས
གློ་སྙིང་ཐམས་ཅག་སེན་མོས་བྲད་སྣང་སྐྱེས

མི་སེམས་འདི་གཡོ་བ་རླུང་དང་འདྲ་བྱུང
མི་སེམས་འདི་བརྟན་པ་རྟེན་དང་མཚུངས་སོང
02:02 20/08/2011
གཉའ་མནན་པ།
མགོ་བོ་སྔས་སུ་བཞག་པ་དེས
མི་སེམས་ཕྱི་ལ་འཁྱམས་པ་དེས
སྡུག་ཡས་དང་གོ་རིམས་ཤིག་ཟིན་སོང
མནར་གཅོད་དང་ཁྲིམས་ཆད་ལྟ་བུའི
འཇིགས་སྐུལ་ཀྱི་རྨི་ལམ་ལྟ་བུའི
དབུ་ལྕོག་ལྡེམ་སྟངས་དེ་ཟིན་སོང
02/43 08/20/2011