བོད་དོན་རང་ཤིར་གཏོང་འདོད་པ་ནི་རྨི་ལམ་རང་རེད།

ཤར་ཕྱོགས་ཁུག་རྟ།
ལོ་རབས་ ༨༠ པའི་ནང་བོད་ལ་གཟིགས་སྐོར་ཐོག་མ་ཕེབས་ལ་ཉེ་བའི་ཉིན་ཁ་ཤས་ཀྱི་སྔོན་ལ། ” བོད་རང་སྐྱོང་ལྗོངས་” ཟེར་བའི་འགོ་ཁྲིད་ཚོས་མཚོན་པའི་བོད་ཀྱི་ས་ཆར་མངགས་པའི་གུང་བྲན་ཏང་གི་འགོ་ཁྲིད་ཚོས་བོད་མི་རྣམས་ལ་གཟབ་མནན་གྱིས་འདི་འདྲ་ཞིག་གསུངས་ཡོད། “ཏཱ་ལའི་རུ་ཚོགས་ཀྱི་མི་སྣ་ཁ་ཤས་རྒྱལ་ནང་དུ་ལྟ་སྐོར་ལ་ཡོང་གི་ཡོད་པས། ཁོང་ཚོར་ངོ་རྒོལ་དང་ཞེ་འཁོན་མ་སྟོན་རོགས་”ཞེས་མངགས་ཡོད། སྐད་ཆ་འདི་ནི་རྒྱ་ནག་གཞུང་ལ་མཚོན་ན་ཡུན་རིང་བོད་ལ་རྒྱུས་མངའ་བྱས་པའི་མཐའ་སྡོམ་ཡིན་ལ། སྐབས་དེའི་གཙོ་འཛིན་ཏིང་ཞའོ་ཕེན་ལ་མཚོན་ནའང་བོད་ཀྱི་དཀའ་ངལ་སེལ་རྒྱུ་ནི་ཉོག་འཛིང་ཧ་ཅང་ཆེ་བ་ཞིག་ཡིན་པར་དགོངས་བཞེས་གནང་མེད། ཡིན་ནའང་རྒྱ་ནག་གཞུང་རང་གི་རང་དོན་ཡིད་ཆེས་ལས་ཕམ་པར་གྱུར་བ་ཞིག་ནི་སྐུ་ཚབ་རྣམས་ལ་ཕེབས་བསུ་བྱས་པའི་གཞིས་ལུས་མི་མང་གི་ཁ་ཞེ་གཉིས་མེད་ཀྱི་རྣམ་པ་དེ་ཡིན་ཞིང་། དེས་བོད་མི་ཚོས་བོད་ལ་བྱུང་བའི་སྐྱོ་གར་གྱི་ལོ་རྒྱུས་བརྗེད་མེད་པ་རྟོགས་ཤིང་། ཁོང་ཚོས་སླ་བར་གོ་བའི་བོད་ཀྱི་གནད་དོན་ཐག་གཅོད་བྱེད་ཕྱོགས་ནི་རྦད་དེ་ནོར་འཁྲུལ་ཅན་ཡིན་པ་ཤེས་ཡོད་ཀྱང་། སྐབས་དེར་རེ་བ་བྲལ་བའི་རྣམ་འགྱུར་ཁོ་ནས་བཙན་བྱོལ་བོད་གཞུང་དང་འབྲེལ་འདྲིས་ཀྱི་རྣམ་པ་བསྟན་པར་སྲིད་དོན་མཁས་པ་མང་པོས་ཕྱོགས་སྡོམ་གནང་ཡོད།
སྤྱིར་བཏང་ལོ་རབས ༨༠ པ་འདི་རྒྱ་བོད་གཉིས་ཀྱི་མདུན་ལམ་དང་དེར་འབྲེལ་བའི་རྒྱལ་སྤྱིའི་ཆབ་སྲིད་གནས་བབ་བཅས་ཕྱོགས་གང་ས་ནས་དཀྱོགས་མཚམས་གལ་ཆེན་ཞིག་དང་དུས་ཚོད་འཁྲུག་ཤོས་ཤིག་ཏུ་ངོས་འཛིན་གནང་གི་ཡོད་པ་ལྟར། ཏིན་ཞའོ་ཕེན་གྱིས་བོད་ལ་ལྟོས་ཏེ་རྒྱལ་སྤྱིར་སྟོན་བཞིན་པའི་ཞལ་རས་ལ་རེ་བས་ཁེངས་འདུག་ཚུལ་དང་། བཙན་བྱོལ་བོད་གཞུང་གི་དབུ་འཕང་ཇེ་མཐོར་སོང་བའི་སྐབས་ཤིག་ཡིན་ནའང་། དྲུག་བཞིས་དོན་རྐྱེན་གྱིས་རྒྱ་ནག་གཞུང་གི་དབུ་ཁྲིད་རེ་ཤོས་ཀྱི་རྨི་ལམ་དཀྲོག་ཁར། བོད་ལ་བསྟན་པའི་ཞལ་རས་རྫུན་མའི་སྡུག་ཉམས་ཀྱང་དམར་བཤག་བྱས་འདུག སྐབས་དེ་ཤེད་དུ་རྒྱལ་སྤྱིའི་མཁའ་དབྱིངས་སུ་༧གོང་ས་མཆོག་ནོ་ཝེ་ཞི་བདེའི་མཚོན་རྟགས་སུ་གྱུར་ཅིང་། བོད་ཀྱི་གནད་དོན་རྒྱལ་སྤྱིར་བསྐྱོད་པའི་གོམ་ཞེང་ནི་བློ་ཡིད་ལས་འདས་པ་ཞིག་བྱུང་ཡོད། དེ་དང་བསྟུན་ནས་རྒྱལ་ས་ལྷ་སའི་ཉེ་འཁོར་ནས་ཞི་བདེའི་བྱ་དགའི་གཟི་ཉམས་ཀྱི་དར་ཆ་སྒྲེངས་ཤིང་། བོད་ཀྱི་རེ་བ་དང་རྨི་ལམ་ཡོད་ཚད་སྐྱ་རེངས་ཀྱི་རྗེས་སུ་སྙེགས་ཤིང་། ཉི་ཤར་གྱི་ཟེར་མར་འདྲེས་ལ་རེ་བ་གསར་བ་ཞིག་འཁྲུངས།
ཚང་མས་ཤེས་གསལ་ལྟར། ད་ལྟའི་རྒྱ་ནག་གི་གཙོ་འཛིན་ཡིན་པའི་ཧུའུ་ཅིན་ཐོས་རྒྱ་ནག་གི་གཡོན་ཐལ་ཅན་གྱི་སྲིད་བྱུས་མཇུག་བསྐྱངས་ཏེ་དྲག་པོའི་ཁྲིམས་གཞི་བསྡམས་པས་རྒྱལ་ས་ལྷ་ས་ནི་དམག་གིས་མནན་པའི་མྱ་ངམ་ཐང་ཆེན་པོར་བསྒྱུར། རྒྱ་ནག་གཞུང་ལ་སླར་ཡང་སྡུག་རྩུབ་ཀྱི་བློ་ཁོག་ཅིག་སྐྱེས་ཏེ། ཧུའུ་ཅིན་ཐའོ་མདའ་འཕང་པ་ལྟར་རྒྱ་ནག་གུང་བྲན་གྱི་ཀྲུའུ་ཞིའི་སྟེགས་བུར་གཡུག བོད་ནས་ཕེབས་པའི་འགོ་ཁྲིད་གསར་བ་འདིས་དེ་སྔའི་ཧུའུ་ཡའོ་པང་གིས་བོད་ཐོག་འཛིན་པའི་ཅུང་གུ་ཡངས་ཀྱི་སྲིད་བྱུས་ལ་རྦད་དེ་འགྱུར་བ་བཏང་འགོ་ཚུགས་ཤིང་། དཔལ་འབྱོར་བསླུ་བྲིད་ཀྱི་སྲིད་བྱུས་འོག་བོད་མི་རྣམས་རྩད་རྫོགས་བྱེད་ཕྱིར་གྱི་དམིགས་ཡུལ་ཉག་ཅིག་བཟུང་བས། ཁོང་ལ་མཚོན་ན་དུས་ཡུན་གྱི་སྔ་ཕྱི་མ་གཏོགས་བཙན་བྱོལ་བོད་གཞུང་རང་བཞིན་གྱིས་ས་མཐའ་ནས་ཡལ་འགྲོ་རྒྱུའི་ཁོག་རྩིས་ཞིབ་ཏུ་རྒྱབ་ཁར། ” ཏཱ་ལའི་ནི་ཞིང་བྲན་གྱི་ཚབ་མཚོན་པ་དང་། ཁ་ཕྲལ་བ་ཡིན་པར་ ” གཡམ་སྒྲོགས་ཅི་མི་སྙམ་པར་བྱས་ཤིང་། ད་དུང་ “བླ་མའི་ལམ་ལུགས་ཀྱི་དུས་རབས་ཡོལ་ཟིན་རབ་”ཀྱི་སྐད་ཆའི་འཁོར་ལོ་བསྐོར་ཏེ་བོད་ཀྱི་བདེན་པ་རྙིང་པར་བཏང་ཞིང་། བོད་མིའི་མངོན་འདོད་ཆུད་ཟོས་སུ་བཏང་། རྒྱལ་སྤྱིའི་རྒྱལ་ཁབ་ཁག་ལ་མངོན་སུམ་འཛེམས་མེད་ཀྱིས་ “ཏཱ་ལའི་བླ་མ་དང་ཐུག་འཕྲད་བྱས་མི་ཆོག་” པའི་གནོན་ཤུགས་སྤྲད།
ང་རྒྱལ་དང་སྡུག་རྩུབ་ཀྱི་བློ་མིག་དེ་དག་གིས་རྒྱ་ནག་གཞུང་ལ་སླར་ཡང་ཁེངས་དྲེགས་སྐྱེས་ཤིང་། དྲག་གནོན་དང་དུས་ཚོད་ཕུད་རྒྱགས་གཉིས་ཀས་བོད་ཀྱི་གནད་དོན་རང་ཡལ་དུ་འགྲོ་རྒྱུར་སྔར་ལས་ཚོད་དཔག་ཐེབས་ཁུལ་གྱིས། ༧གོང་ས་མཆོག་གི་སྐུ་ཚབ་ལ་ཅི་ཙམ་གྱིས་བཀའ་མོལ་གནང་ཁུལ་དང་། སྐུ་ཚབ་རྣམས་ཀྱིས་རེ་འདུན་ངོ་མ་ཇི་བཞིན་སྤྲད་ཀྱང་མཐའ་ན་དེ་དག་ལ་གཞི་རྩའི་ཆ་ནས་མི་ཞིག་ཡིན་པའི་ཆེ་མཐོང་ཀྱང་མ་བཞག་པར་དོན་འབྲས་སོན་མེད། རྒྱ་ནག་གཞུང་གིས་སྔོན་དཔག་ཆེན་པོ་མ་རྒྱབ་པ་ཞིག་དང་། ད་དུང་ཁ་འདུམ་གྱི་མེད་པ་ཞིག་ནི་སྲམ་གཟིག་སྟག་པགས་མེར་བསྲེགས་ཀྱི་ལས་འགུལ་དང་། ༢༠༠༨ ནས་བྱུང་བའི་ཞི་རྒོལ་གྱིས་ཁོང་ཚོའི་རུལ་སུངས་ཀྱི་སྲིད་བྱུས་རྒྱལ་སྤྱིའི་སྤྱི་ཚོགས་སུ་གསལ་བཏོན་བྱས་པ་དེ་རེད། བོད་ཀྱི་དོན་དངོས་ནི་འགེབས་ཐབས་མེད་པ་དང་། ༧གོང་ས་མཆོག་གཅིག་པུའི་གཟི་བརྗིད་ནི་མཐའ་གཏིང་བྲལ་བ་ཞིག་ཡིན་པས་ར་སྤྲོད་བསྐྱར་དུ་བྱས་པར། རྒྱ་ནག་གཞུང་གིས་བརྒྱུད་ལམ་རྫུན་མ་བཟོ་རྒྱུ་དང་དོན་དངོས་མ་མཐོང་ཁུལ་གྱིས་རྫུན་གྱི་ཨུ་ཚུགས་ལ་ཞུགས་ནས་བསྡད་དང་སྡོད་བཞིན་འདི་རེད།
ཡིན་ནའང་། ས་དང་གནམ་གཉིས་ཡོམས་འདར་བྱས་པ་ཞིག་ནི། སྐབས་འདི་ཏག་ཏག་ལ་༧གོང་ས༧ཏཱ་ལའི་བླ་མ་མཆོག་ནས་བརྒྱུད་རིམ་ནས་ཡོང་པའི་ཆབ་སྲིད་ཀྱི་འགན་དབང་མི་བཞེས་རྒྱུའི་ཐུགས་ཐག་བཅད་ཁར། གུང་བྲན་ཏང་ལའང་རྩ་དགོངས་མི་ཞུ་རུང་རྒས་ཡོལ་ལ་འགྲོ་དགོས་པའི་སློབ་སྟོན་བྱས་ཤིང་། དུས་རབས་ ༢༡ པའི་མང་གཙོའི་ཚབ་མཚོན་མི་སྣ་གོང་ན་མེད་པ་དེ་ཆགས་པས། རྒྱལ་སྤྱིའི་སྤྱི་ཚོགས་ལ་རྒྱ་ནག་གི་རུལ་སུངས་སྔར་ལས་ཇེ་གསལ་དུ་གྱུར།
ཡིན་ནའང་། རྒྱ་ནག་གཞུང་གིས་ད་དུང་ ” ཏཱ་ལའི་རྒན་ཡོལ་ནི་ཁ་བཤད་ཙམ་ཡིན་པར་ ” ཁུངས་མེད་ཀྱི་གསལ་བསྒྲགས་བྱས་ཀྱང་། མང་གཙོ་དང་རྒྱལ་སྤྱིའི་ཆབ་སྲིད་ཀྱི་ནང་དོན་རྟོགས་པའི་སྐྱེས་བུ་ཀུན་ལ་གསལ་བོ་ཆགས་ཟིན་པའི་ཏཱ་ལའི་བླ་མའི་དགོངས་གཞི་དེས་རྒྱ་ནག་གཞུང་གི་དམིགས་དོན་རྦད་དེ་ཚལ་བར་གཏོར་ཡོད་ལ། བོད་ཞེས་པ་དེ་བཙན་བྱོལ་ནས་རང་ཡལ་དུ་མི་འགྲོ་བ་དང་། བོད་ཕྱི་ནང་གཉིས་ཀྱི་ཁ་ཐག་ཇེ་རིང་དུ་འགྲོ་མི་ཐུབ་པའི་གནས་སྟངས་གསལ་རྗེན་བྱས་ཡོད།
ཆབ་སྲིད་དཔྱད་བརྗོད་པ་ཁ་ཤས་ཀྱིས། སྐབས་འདིར་ཀྲང་ཆིན་ལིས་ཀྱི་སྐད་ཆ་སྟེ། ” ༧ཏཱ་ལ་དང་ཤི་གསོན་གྱི་འཐབ་འཛིང་བྱེད་དགོས ” ཞེས་པར་ཕྱིར་ལྟོས་བྱས་ཤིང་། ཀྲུང་དབྱང་ནས་ཐབས་བྱུས་ཐད་ཀར་ཡོད་པའི་ཀྲང་ཆིན་ལིས་ཀྱི་སྐད་ཆ་དེ་ད་ཆ་གང་དུ་ཕྱིན་ཡོད་མེད་ཀྱི་སྣ་དགོད་རྒྱབ། དྲག་གནོན་གཅིག་པུས་ཤི་གསོན་དབྱེ་འབྱེད་བྱེད་མི་ཐུབ་པའི་དྲི་བ་བསྐྱར་དུ་བཀོད་པ་ན། རྒྱ་ནག་གཞུང་གིས་སླར་ཡང་ ” ཏཱ་ལའི་རྒས་ཡོལ་རྫུན་མ་རེད། རང་འཁྲབ་རང་སྒྲིག་རེད་” ཅེས་ནང་ཁོག་མེད་པའི་སྐད་ཆ་བཤད་རྒྱུ་ལས་གཞན་ཅི་ཞིག་ཡོད་དམ། ཅི་ཞིག་འཇོན་ནམ།

ང་ཚོས་གསལ་བོར་མཐོང་ཐུབ་པ་ཞིག་ནི། ༧གོང་ས་སྐྱབས་མགོན་༧ཏཱ་ལའི་བླ་མའི་སྲིད་འགན་རྩིས་སྤྲོད་ཀྱིས་རྒྱ་ནག་གཞུང་གི་བཙན་བྱོལ་བོད་གཞུང་སྐྱབས་བཅོལ་ནས་རང་ཡལ་དུ་གཏོང་རྒྱུའི་སྲིད་བྱུས་ལ་ལན་འདེབས་དངོས་གནས་དེ་བྱས་ཡོད་ལ། དེས་དབང་གིས་ཁོང་ཚོ་དག་གིས་རྫུན་གཏམ་རྣ་ལ་འགྲོ་བོ་ཞིག་ཀྱང་སྒྲིག་ཤེས་ཀྱི་མེད་པ་འདི་རེད། བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་ནས་སྔ་མོ་ནས་སྡོམ་ཚིག་གསལ་བོར་བསྐྱོན་པ་བཞིན། ” རྒྱ་ནག་གཞུང་ལ་ཆབ་སྲིད་ཀྱི་ཆོད་སེམས་མེད་པ་གསལ་བོ་རེད། ” གསུངས་བ་དག་ཀྱང་གནས་སྟངས་འདི་འདྲ་ལ་དགོངས་པ་མིན་འགྲོ་བསམ།

༢༠༡༡ ། ༦། ༢༠། ཉིན།