སྤོབས་པ་མཐའ་ཡས།
༡ གཞོམ་གཞིག་བྲལ་བའི་རྡོ་རྗེའི་ཕྲེང་བ།
བོད་དུ་དར་བའི་སངས་རྒྱས་པའི་ཆོས་རྒྱུད་ཀྱི་ཕྱི་མོའམ་སྔ་ཤོས་ལ་སྔ་འགྱུར་རྙིང་མ་པ་ཞེས་འབོད་ཅིང་དེ་ནི་སྤྱི་ལོ་དུས་རབས་བདུན་པ་ཙམ་ནས་བོད་དུ་ཐོག་མར་སྤེལ་མགོ་ཚུགས། རྙིང་མ་པའི་དགེ་འདུན་གྱི་སྡེ་ཐོག་མར་དར་སྐབས་ནས་ཐུན་མིན་ཁྱད་ཆོས་ཤིག་ཡོད་པ་ནི་རབ་བྱུང་ངུར་སྨྲིག་གི་སྡེ་དང་སྔགས་པ་གོས་དཀར་ཅན་གྱི་སྡེ་ཞེས་དགེ་འདུན་སྡེ་གཉིས་ཡོད་ཅིང༌། དེའི་རབ་བྱུང་ངུར་སྨྲིག་གི་སྡེ་ནི་ཕྱི་ནང་གི་རྐྱེན་ཀྱིས་དར་རྒུད་མང་དུ་བྱུང་མྱོང་ཡོད་ཀྱང་སྔགས་པ་གོས་དཀར་ཅན་ཀྱི་སྡེ་ནི་ཐོག་མ་ནས་ད་ལྟའི་བར་དུ་རྒྱུན་ཆད་མ་མྱོང་བ་ཞིག་ཡིན། ལྷ་སྲས་དར་མས་དུས་རབས་དགུ་པའི་ནང་དུ་རབ་བྱུང་གི་སྡེ་ཉམས་རྒུད་དུ་བཏང་བ་ནས་བཟུང་རྙིང་མ་པས་རང་གི་ཆོས་རྒྱུད་ཀྱི་སྟོབས་ཤུགས་ལ་བརྟེན་ནས་བོད་ཀྱི་སྲིད་དབང་ལ་སྟངས་འཛིན་གྱིས་ཆོས་སྤེལ་བའི་གོ་སྐབས་མ་ཐོབ་པ་དང༌། དེར་མ་ཟད་བསྟན་པ་ཕྱི་དར་གྱི་རྗེས་ནས་གསར་དུ་དར་བའི་ཆོས་རྒྱུད་ཚོའི་ཞི་དྲག་གི་གནོད་ཤུགས་མང་པོས་ཉམས་རྒུད་དུ་གཏོང་བར་འབད་བརྩོན་བྱེད་མྱོང་ཡོད། ཆོས་རྒྱུད་གསར་པ་ཚོ་བཞིན་ཆབ་སྲིད་དང་འབྲེལ་བའི་སྟོབས་ཤུགས་དང༌། ཕྱི་རྒྱལ་གྱི་རྒྱལ་པོའི་དབུ་བླའམ་ཆབ་སྲིད་ཀྱི་རྒྱུག་ཁྱི་བྱས་པ་ལས་བྱུང་བའི་དཔལ་འབྱོར་དང་དམག་ཤུགས་ཀྱི་རྒྱབ་སྐྱོར་ཡང་ཐོབ་མྱོང་མེད་ལ། ཆོས་རྒྱུད་གསར་པ་ཚོ་ལྟར་གཅིག་གྱུར་གྱི་སྒྲིག་འཛུགས་མ་ལག་གི་དབང་བསྒྱུར་དང་སྒྲོམ་གཞི་ཡང་འཛུགས་ཐུབ་མེད། ཡིན་ན་ཡང་རྙིང་མའི་སྔགས་སྡེ་ནི་ད་ལྟའི་དུས་སུ་ཡང་ཆོས་རྒྱུད་གསར་པ་ཚོ་དང་མཉམ་དུ་དཔུང་པ་མཉམ་གཤིབས་ཀྱི་ཚུལ་དུ་གནས་ཡོད།
༢ ཕ་ཆོས་གནས་དབྱུངས། ལེགས་པར་བསམ་ན་བོད་ཀྱི་ཆོས་རྒྱུད་གསར་པ་ཚོ་ཡང་ཐོག་མར་འཛུགས་མཁན་མར་པ་དང་དང་མི་ལ། ས་སྐྱ་པ། རྭ་ལོ་ཙཱ་བ། འབྲོམ་སྟོན་པ་སོགས་ཕལ་མོ་ཆེ་ཁྱིམ་སྔགས་པ་ཡིན་ཡང༌། རྗེས་སུ་ཆོས་སྲིད་ཟུང་འབྲེལ་གྱི་ལས་ལམ་ལ་ཞུགས་རིམ་བཞིན་དབང་བསྒྱུར་གྲལ་རིམ་པ་ཚོས་གྲྭ་ཁྲལ་བསྡུ་བ་དང༌། ཆོས་རྒྱུད་བཙན་སྒྱུར། ལྷག་པར་ཡང་འགོག་སྡོམ་རིང་ལུགས་ཀྱིས་སེར་དམག་རྩ་འཛུགས་ནི་ཆོས་སྲིད་ཟུང་འབྲེལ་གྱི་སྲིད་དབང་སྲུང་བའི་ལྕགས་རི་ཡིན་པའི་ལྟ་ཚུལ་ལག་ལེན་དུ་བཏབ་པའི་ཉེར་ལེན་ལ་བརྟེན་པ་ཞིག་ཀྱང་ཡིན། དེ་ཡང་དཔེར་ན། ཡུ་རོབ་ཏུ་རོ་མན་རྒྱལ་པོ་ཁི་ལོ་ཌའོ་ས་གཉིས་པའི་སྐབས་སུ་ཆང་ས་བརྒྱབ་ཚར་བའི་མིས་དམག་འཁྲུགས་རྒྱག་མི་ཐུབ་པར་བསྙད་ནས་དམག་གི་སྟོབས་ཤུགས་སྤེལ་བའི་ཆེད་དུ་སྐྱེས་པ་ལོ་གཞོན་ཚང་མས་ཆང་ས་རྒྱག་མི་ཆོག་པའི་ཁྲིམས་བཟོས། ཡེ་ཤིའི་ཆོས་དཔོན་ཞིག་གིས་ལྐོག་ཏུ་སྐྱེས་པ་ན་གཞོན་ཞིག་ལ་གཉེན་སྒྲིག་གི་རྟེན་འབྲེལ་དབང་བསྐུར་བྱས་པར་བརྟེན་རྒྱལ་པོའི་ཁྲིམས་ལ་ཐོགས་ཏེ་སྲོག་ཐོག་གི་ཉེས་ཆད་ཕོག་པ་དང༌། ཁོང་སྲོག་ཐོག་ཏུ་མ་བཏང་བའི་སྔ་ཉིན་དེར་ཁྲིམས་དཔོན་གྱི་བུ་མོར་ཝ་ལིན་ཊིན་ཞེས་པའི་བརྩེ་འཕྲིན་ཐོག་མ་དེ་བྲིས་ནས་བཏང་བར་བརྟེན་དེང་དུས་སུ་ཝ་ལིན་ཊིན་ཞེས་པའི་དགའ་རོགས་གི་དུས་ཆེན་འདི་གཏོང་སྲོལ་བྱུང་བ་ཡིན་ཞེས་པའི་གཏམ་རྒྱུད་ཡོད་པ་ལྟ་བུ་ཡིན། ངེས་འབྱུང་གིས་ཀུན་ནས་བསླངས་མིན་དང་སོར་བྱང་སྔགས་ཀྱི་བསླབ་སྡོམ་དག་མིན་ལ་མ་ལྟོས་པར་ངུར་སྨྲིག་འཆངས་བ་དང་བུད་མེད་མ་བླངས་བར་དགོན་སྡེའི་རྩ་འཛུགས་ཀྱི་ཁོངས་སུ་བཅུགས་པ་ཙམ་གྱིས་བཙུན་པ་རྣམ་དག་ཡིན་པའི་བག་ཆགས་འཇགས། ཁྱིམ་སྔགས་པའི་སྡེ་ནི་ལྷ་གསོལ་གཡང་འགུགས་དང༌། དགྲ་བསྒྲལ་བགེགས་བསྐྲད། ཨ་མཆོད་རིམ་གྲོ་བྱེད་མཁན་ཙམ་ལས་དགེ་འདུན་པའི་གྲལ་དུ་མི་བགྲང་ཁུལ་བྱེད་པའི་གོམས་གཤིས་འདི་ནི་ཚུལ་འཆོས་རིང་ལུགས་དང༌། འགོག་སྡོམ་རིང་ལུགས། བཙན་བསྒྱུར་རིང་ལུགས་བཅས་ཡང་དག་པའི་མི་ཆོས་རིང་ལུགས་ལས་ལོགས་སུ་གྱུར་པའི་ནོར་འཁྲུལ་ཅན་གྱི་གོམས་གཤིས་ཤིག་ཡིན།
༣ དྭངས་གཙང་ཤེལ་གྱི་མེ་ལོང༌། སྔགས་པའི་སྡེ་རིང་དུ་གནས་ཐུབ་པའི་རྒྱུ་རྐྱེན་ནི་ཁྱིམ་མི་སྤངས་བ་དང་མངོན་ལྐོག་མེད་པའི་སྤྱོད་པ་གཉིས་ལ་རགས་ལས་ཡོད། དེ་ལ་ཁྱིམ་མ་སྤངས་བ་ལ་བརྟེན་ནས་རང་གི་མི་རྒྱུད་ལ་ཆོས་ཀྱི་སློབ་གསོ་དང་བག་ཆགས་རྒྱུན་བསྲིངས་ཐུབ་པ་དང༌། བསོད་སྙོམ་དང་ཞལ་འདེབས་ཁོ་ནའི་འཚོ་བ་གཞན་བརྟེན་མ་ཡིན་པས་མང་ཚོགས་ལ་བཤུ་གཞོག་གི་ཁུར་པོ་འགེལ་མི་དགོས་པ་དང༌། ཁྱིམ་པ་རྒྱ་ཆེའི་མང་ཚོགས་དང་འགྲོགས་འདྲིས་བདེ་བ་དང༌། ཁྱིམ་པའི་ཉེར་མཁོའི་ཆོས་ཀྱི་རིམ་གྲོ་སོགས་མང་ཚོགས་ཀྱི་དགོས་མཁོ་བཞིན་ཞབས་འདེགས་སྒྲུབ་པ་ཡིན། གལ་ཆེ་བ་ཞིག་ལ་སྔགས་བཙུན་གྱི་སྡེ་ནི་ཐོག་མ་ནས་ཁྱིམ་ན་གནས་པར་ཞལ་གྱིས་བཞེས་པར་བརྟེན་མངོན་ལྐོག་ཀྱི་འགལ་བ་ཆེར་མེད་པས། འོས་པའི་ལས་རྣམས་དངོས་སུ་བཀག་ནས་མི་འོས་ལས་རྣམས་ལྐོག་ནས་བྱེད་པ་དང༌། གྲོང་པའི་ཆོས་ཀྱི་ས་ལ་མི་འབབ་པར་དམ་བཅས་པའི་རྫུན་སྐུབ་རྡོལ་བ། ཚུལ་འཆོས་ཀྱི་སྤམ་མདོག་ཤོར་བ་སོགས་ཀྱིས་ཁྱིམ་པ་སུན་འབྱིན་ཀྱི་ལས་བསག་ཏུ་མེད་པར་བརྟེན་མང་ཚོགས་ཀྱི་ངོས་ནས་ཀྱང་སྐུར་འདེབས་དང་ལྷག་པར་ཡང་དད་པ་ལོག་པའི་རྒྱུ་རྐྱེན་ཉུང་བ་ཡིན།
༤ སེམས་གཏིང་ནས་འབུས་པའི་མེ་ཏོག དེ་བཞིན་སྔགས་པས་རང་རང་གི་ཆོས་ལ་སློབ་གཉེར་ཉམས་ལེན་བྱེད་སྟངས་ནི་ཕལ་ཆེར་རང་རང་གི་ཕ་མ་ནས་མི་རྒྱུད་ལ་ལྷན་སྐྱེས་ཀྱི་ཚུལ་དུ་འགོས་ནས་ཡོད་པར་བརྟེན་ཕྲུ་གུའི་གནས་སྐབས་ཡོལ་རྗེས་སུ་གསར་དུ་འབྲེལ་བ་བཙུགས་པའི་མཁན་སློབ་གྱིས་བཙན་འཇུག་བྱས་པའི་ཀུན་བཏགས་ཀྱི་བག་ཆགས་ཙམ་དང་བསྡུར་ཐབས་མེད། དཔེར་ན་ཁྱིམ་ཚང་ཞིག་ལ་དགེ་སློང་ཞིག་ཡོད་པ་དང་ཁྱིམ་ཚང་གཞན་ཞིག་ལ་སྔགས་རྒན་ཞིག་ཡོད་པ་དེ་གཉིས་ཀྱིས་རང་རང་གི་ནང་མི་ལ་ཆོས་ཀྱི་བག་ཆགས་དང་སློབ་གསོ་འཇོག་པའི་སྟོབས་ཤུགས་ལ་ཁྱད་པར་ཧ་ཅང་ཆེ། དེ་ཡང་དགེ་སློང་ནི་དགོན་པའམ་རི་ཁྲོད་དུ་གནས་པ་ལས་ཁྱིམ་དུ་སྡོད་པ་ཆེས་ཉུང་བ་དང་གལ་སྲིད་ཁྱིམ་དུ་སླེབས་ན་ཡང་སྐྱ་སེར་ཀྱི་ལམ་སོ་སོར་གནས་པར་བརྟེན་འགྲོགས་འདྲིས་གཏིང་ཟབ་པོ་དེ་ཙམ་ཞིག་འོང་དཀའ། སྔགས་རྒན་ནི་བསྙེན་སྒྲུབ་ཀྱི་སྐབས་རེ་ཟུང་མ་གཏོགས་ཕལ་མོ་ཆེར་ནང་མི་དང་མཉམ་དུ་འཚོ་བ་སྐྱེལ་ཞིང༌། ཕོ་མོ་སུ་ཡིན་ཡང་འགྲོགས་འདྲིས་བདེ་བར་བརྟེན་ཆོས་ཀྱི་བྱ་བ་ཆེ་ཕྲ་ཚང་མ་ཡང་ལག་ལེན་མཐོང་བ་བརྒྱུད་པའི་སློབ་གསོ་གཏིང་ཟབ་མོ་འཇོག་ཐུབ།
ལྷག་པར་ཡང་གསང་བ་སྔགས་ནི་སངས་རྒྱས་ཀྱི་བསྟན་པའི་སྙིང་པོ་དང་ཐེག་པ་ཐམས་ཅད་ཀྱི་རྩེ་མོ་ཡིན་པ་ལ་གསར་རྙིང་ཐམས་ཅད་ཞལ་མཐུན་ཡང༌། དེའི་འཆད་ཉན་ནི་བོད་ཀྱི་རབ་བྱུང་གི་དགོན་སྡེ་ཕལ་མོ་ཆེར་མཚོན་ན་མདོའི་སློབ་གཉེར་ལས་ཆེས་ཉུང་བ་དང་དེ་ཡང་ཆེས་མཐའ་མཇུག་ཏུ་ལོ་ཉུང་ཤས་བྱེད་གྱིན་ཡོད་སྟབས་དེའི་ལྟ་བ་དང་གྲུབ་མཐའ་ཟབ་མོ་དག་ལ་དེ་ཙམ་གྱི་གོ་མྱོང་གཏིང་ཟབ་མོ་ཞིག་ཚུགས་ཐུབ་ཀྱིན་མེད་ཅིང༌། ཐ་ན་དེའི་ཐ་སྙད་དང་གསང་ཚིག་མང་པོ་ཡང་མདོ་ལུགས་ཀྱི་རྒྱས་འགེབས་བྱེད་པ་ལས་སྔགས་རང་ལུགས་ཀྱི་ཆོས་སྐད་ལ་བག་ཆགས་དང་མྱོང་བ་ཆུང་ཡང༌། སྔགས་པ་ཚོས་ཐོག་མ་ནས་བྱིན་རླབས་ཆེ་ཞིང་གཏིང་ཟབ་པའི་དེ་ཉིད་གཙོ་བོར་བཟུང་ནས་སློབ་གཉེར་བྱེད་པར་བརྟེན་སངས་རྒྱས་ཀྱི་ཆོས་ལ་གོ་བ་རྒྱ་ཆེ་ཞིང་ཉམས་ལེན་གྱི་གནད་ལ་མཁས་པས་ཆོས་ཀྱི་དཀའ་གནད་ཕལ་མོ་ཆེ་གཅིག་ཤེས་ཀུན་གྲོལ་གྱི་ཚུལ་དུ་འགྱུར་ཐུབ།
༥ དུས་བཞིར་མི་འགྱུར་བའི་ལྷ་ཤིང་ཤུག་པའི་སྡོང་པོ། དེ་བཞིན་རབ་བྱུང་གི་སྡེ་ནི་རྒྱ་ཆེའི་མང་ཚོགས་ལས་ལོགས་སུ་ཐོན་ནས་དགོན་སྡེ་དང་ཆོས་གྲྭའི་ནང་དུ་གཏན་སྡོད་ཀྱི་ཚོགས་སྡེ་ཡིན་པར་བརྟེན་ཕྱི་ནང་གི་བསྟན་པའི་དགྲ་བོས་གཏོར་བཤིག་བྱེད་པར་དཀའ་བ་དེ་ཙམ་མེད་པ་དང༌། གལ་སྲིད་དགོན་པ་དང་ཆོས་གྲྭའི་ནང་དུ་སྡོད་པའི་གོ་སྐབས་ཙམ་འཕྲོག་ཀྱང་རབ་བྱུང་བའི་ཆོས་སྤྱོད་ཀྱི་རྣམ་གྲངས་ཕལ་མོ་ཆེར་ཆག་འཇིག་ཐེབས་ཚར། རབ་བྱུང་བ་ནི་ཕྱིའི་དགོན་སྡེ་ལ་གཏོར་བཤིག་ཐེབས་ཀྱང་དེའི་སྒྲིག་འཛུགས་ལ་ཕོག་ཐུག་ཐེབས་འགྲོ་ལ་ངུར་སྨྲིག་གི་རྟགས་ཙམ་དང་བྲལ་ཡང་དེའི་རང་ཚུགས་འཇིག་འགྲོ་བས་དེང་དུས་སུ་རང་ཁ་རང་གསོ་བྱེད་མཁན་གྱི་གྲྭ་བ་རེ་ཟུང་དགོན་པར་མི་སྡོད་པ་ལ་མང་ཚོགས་ཀྱིས་ལོག་ལྟ་སྐུར་འདེབས་ཚད་མེད་བྱེད་བཞིན་པ་ལྟ་བུ་ཡིན་ཡང༌། གྲོང་སྔགས་པའི་སྡེ་ནི་མང་ཚོགས་དང་དབྱེར་མི་ཕྱེད་པའི་ཚུལ་དུ་ཡོད་སྟབས་ཕྱི་ནང་གི་དགྲ་བོའི་ཕུང་དཀྲུག་གི་འབར་རྫས་གཡུག་ཡུལ་རྙེད་དཀའ་བས་གླང་དར་མས་ཀྱང་གཞིག་མ་ནུས་པའི་རྒྱུ་རྐྱེན་དེ་ཡིན། དཔེར་ན་རྒྱ་གར་དབུས་རྒྱུད་དུ་ཨི་ས་ལམ་གྱི་དམག་སླེབས་སྐབས་ཆོས་ལུགས་ཀྱི་ཕྱོགས་ཞེན་དང་གནོན་ཤུགས་ཁོ་ན་ལ་བསམ་ཚེ་བྲམ་ཟེ་ཧིན་དྷུའི་ལུགས་འཛིན་པ་དང་ནང་བསྟན་པ་གཉིས་ལ་རྒོལ་རྡུང་གཅིག་མཚུངས་ཕོག་ཡོད། འོན་ཀྱང་ཧིན་དྷུ་བའི་སྟོབས་ཤུགས་ལ་དེ་ཙམ་གྱི་གཏོར་བཤིག་གཏོང་མི་ཐུབ་པའི་དོན་ནི་ཁོང་ཚོའི་བསྟན་པ་དེ་གཙོ་བོ་གྲོང་སྔགས་པའམ་ཁྱིམ་ན་གནས་པ་ཚོས་བཟུང་ཡོད་པའི་རྐྱེན་གྱིས་ཡིན།
སྔགས་པ་ནི་ཕྱིའི་རྟགས་ལ་དེ་ཙམ་ལྟོས་པ་ཞིག་མ་ཡིན་སྟབས་ནང་གི་ལྟ་བ་དང་རྟོགས་པ་ནི་སུས་ཀྱང་མཐོང་མི་ཐུབ་པས་གཞན་རྐྱེན་གྱིས་འཇིག་དཀའ་བ་ཡིན། དེ་བཞིན་བསྟན་པ་ལ་དགྲ་བྱུང་དགོས་དོན་གཙོ་བོ་ནི་ཆོས་ལུགས་མི་སྣ་སྒེར་དང་ཚོགས་སྡེ་དག་གིས་ཆོས་ལུགས་ཀྱི་དར་ཆ་འཕྱར་ནས་མང་ཚོགས་ཀྱི་དཔལ་འབྱོར་བཤུ་གཞོག བསམ་བློའི་རང་དབང་སྒེར་གཅོད། ཆབ་སྲིད་ཀྱི་གནས་བབ་དབང་བསྒྱུར་གྱིས་མཐུན་སྦྲེལ་ལ་གཏོར་བཤིག་བྱེད་པ་བཅས་ལ་བརྟེན་ནས་ཆོས་ལུགས་པ་ནང་འཁྲུགས་དང་ཕྱིའི་ངོ་རྒོལ་གྱི་གནོན་ཤུགས་འཕྲད་པ་ཡིན་ཡང༌། སྔགས་པ་ནི་རང་རང་གི་ཁྱིམ་ཚང་སྐྱོང་བ་དང༌། མང་ཚོགས་ཀྱི་དགོས་མཁོའི་རིམ་གྲོ་བསྒྲུབ་པ། ཁ་འཐོར་གྱི་ཚུལ་དུ་ཆོས་ཉམས་ལེན་གྱིས་གནས་པས་སྲིད་དོན་ཆིག་སྒྲིལ་གྱི་སྟོབས་ཤུགས་མེད་པས་གཞན་ལ་རྒོལ་རྡུང་མི་ཕོག་པ་སོགས་ལ་བརྟེན་ཕྱི་ནང་གི་ཆོས་ལུགས་ཚོགས་པ་དང་ཆབ་སྲིད་ཀྱི་དབང་བསྒྱུར་བ་སུས་ཀྱང་དེ་ཙམ་གྱི་འཁོན་འཛིན་བཅངས་དོན་མེད་པ་འདི་ཡང་ཁོང་ཚོའི་སྟོབས་ཤུགས་རྒྱུན་གནས་ཐུབ་པའི་མཐུན་རྐྱེན་ཞིག་ཏུ་གྱུར་ཡོད།
སྟོན་པ་སངས་རྒྱས་ཀྱིས་འདུལ་བའི་བསྟན་པ་ལ་བསྟན་པའི་གནས་ཚད་གསུངས་ཡོད་ཀྱང༌། སྔགས་ཀྱི་སྡེ་ནི་དེ་ལྟ་མ་ཡིན་པར་དར་ཞིང་རྒྱས་ལ་ཡུན་དུ་གནས་ངེས་ཡིན་པའི་རྒྱུ་མཚན་འགའ་ཞིག་གཤམ་གསལ།
· ཁྱིམ་དུ་གནས་ཆོག་པ།
· ལུས་ངག་གི་སྲུང་སྡོམ་ཉུང་བ།
· འདོད་ཡོན་མ་སྤངས་ལམ་དུ་འཁྱེར་བ།
· བསྟན་པའི་སྙིང་པོ་ཉེ་ལམ་རྡོ་རྗེའི་ཐེག་པ་ལ་མཁས་པ།
གོང་གསལ་རྒྱུ་མཚན་དག་ནི་དེང་དུས་དང་མ་འོངས་པའི་དུས་སུ་གྲོང་སྔགས་པའི་པའི་སྡེ་ལ་ཞུགས་མཁན་མང་དུ་འགྲོ་བའི་རྒྱུ་རྐྱེན་གཙོ་བོར་གྱུར་ཡོད་སྟབས། རྙིང་མའི་སྔགས་སྡེ་ནི་བོད་དུ་ཐོག་མར་དར་བའི་ཆོས་རྒྱུད་ཀྱང་ཡིན་ལ་ཐ་མར་ཡང་རྒྱ་མཚོ་ལ་ཆུ་བོ་ཐིམས་པ་པ་ལྟར་རང་གི་ལུས་ལ་སླར་ཡང་ཐིམས་པ་སྟེ་ཆོས་རྒྱུད་གསར་པ་ཐམས་ཅད་ཀྱང་དེ་རང་དུ་འགྱུར་རྒྱུ་ཡིན་པར་འདོད་དོ། །
རྒྱུ་མཚན་འདུག གྲོང་སྔགས་པ་རྣམས་མི་ཁྱིམ་དཀྱུས་མའི་ནང་ཤ་འབུ་བཞིན་འཚང་འདུག་པས་རྒྱ་གུང་ཁྲན་གྱི་མེ་མདའི་རྩེ་གྲིས་ཀྱང་ལས་སླ་པོར་བསལ་དཀའ། རྔ་ཆོག་ཁྲོབ་ཁྲོབ་དང་རལ་བ་རྫིག་རྫིག་དེ་ཚོ་གང་ཤེས་མ་གཏོགས་བསྟན་པ་མཐའ་རུ་རྒྱས་པའི་རེ་བ་མཐོང་། ང་ཡང་ཆོས་པ་ཞིག་བྱེད་ན་སྔགས་པ་ཞིག་བྱེད་འདོད། རྒྱུ་མཚན་ནི་ནག་ཆག་དང་ནག་ཆང་།