ཁྲི་ལ་གསོལ་བའི་མི།

Comments (12) on “ཁྲི་ལ་གསོལ་བའི་མི།”

1. གྲོགས་ས་དཀྱིལ་གྱིས་བཀའ་ཁྲིའི་སྐོར་ལ་སྙན་ངག་བདེ་མོ་ཞིག་བྲིས་པར་དགའ་བསུ་ཞུ།

2. ༄༅། །སྤྱན་རས་གཟིགས་ཀྱི་སྤྱན་གྱིས་མ་གཟིགས་པའི་ས་ན།།
   བོད་དོན་ཐག་གཅོད་ཐུབ་པའི་ཐབས་ཇུས་ཅང་མེད་པས།།
   བློ་སེང་རླུང་རྟ་རྒྱུག་ནས་བཀའ་ཁྲི་ལ་ཕེབས་ཀྱང་།།
   བོད་ལ་སྐྱིད་པའི་ཉི་མ་འཆར་རྒྱུ་ཞིག་དཀའ་འོ།།

   ཀི་སྭ་ལྷ་རྒྱལ་དགྲ་བོའི་སྒྱོགས་སྒྲ་དང་བསྡེབས་པའི།།
   བྲེ་སར་འབྲོང་གི་རྒྱུད་པའི་ངར་སྐད་ཀྱིས་འཚོ་བའི།།
   བློ་སེང་རླུང་རྟ་རྒྱུག་ན་སྐྱབས་བཅོལ་གྱི་སྲིད་གཞུང་།།
   ཁྲིམས་ཀྱིས་དབང་བསྒྱུར་ཐུབ་པའི་རེ་བ་ཞིག་འཆའ་འོ།།

   བོད་མི་ཡོད་རྒུའི་སེམས་ལ་ན་ཟུག་རེ་ཉར་ནས།།
   མིག་ཞགས་འོད་མདངས་ཅན་པོ་རེ་བ་ལ་འཕྲོས་པའི།།
   བློ་སེང་རླུང་རྟ་རྒྱུག་ན་སྐྱབས་བཅོལ་པའི་གཞིས་ཆགས།།
   མི་ཐོར་ཚགས་ཚུད་ཐུབ་པའི་རེ་བ་ཞིག་འཆའ་འོ།།

   ཤེས་བྱའི་ལང་ཚོ་ཧ་ཅང་སྨིན་ལེགས་སུ་སྒྲོག་ཀྱང་།།
   སློབ་པའི་གྲྭ་ན་རང་སྐད་ཡལ་ཉེན་དུ་འདུག་པ།།
   བློ་སེང་རླུང་རྟ་རྒྱུག་ན་སྐྱབས་བཅོལ་པའི་ཤེས་ཡོན།།
   གོང་ནས་གོང་དུ་སྤེལ་བའི་རེ་བ་ཞིག་འཆའ་འོ།།

   ཐག་རིང་བོད་ཀྱི་རང་དབང་རེ་ཞིག་ལ་བཞག་ནས།།
   ཐག་ཉེ་དོན་རྩ་ཅན་གྱི་ཚིག་གསུམ་རང་ཞུས་པ།།
   ཐག་ཆོད་ལག་བསྟར་ཐུབ་པའི་བློ་སེང་ཞིག་བྱུང་ན།།
   ཐག་འགྱངས་ཨམ་ཕྲུག་སེམས་རྩ་དེ་ག་ཡིས་ཚིམ་པ།།

3. ཉུང་བསྡུས་བཙན་བྱོལ་བོད་མིས་མང་མོས་ཀྱིས།
   པུར་རྒྱལ་བོད་ཀྱི་གསེར་ཁྲིར་བསྐོས་མོད་ཀྱང་།
   ཕ་རྒོད་སྲོང་བཙན་སྒམ་པོའི་འཕྲིན་ལས་ལ།
   འགྲན་པའི་རྣམ་དཔྱོད་ཡོད་མེད་བལྟ་རྒྱུ་རེད།
   གཞོན་སྐྱེས་དེངས་རབས་སློབ་གསོས་ཕྱུག་རབས་ཀྱི།
   འུར་གཏམ་གནམ་ས་ཀུན་ཏུ་བསྒྲགས་པ་ལས།
   རེ་བའི་དམིགས་སྤུ་ཁྱོད་ལ་བསྟོད་མོས་ཀྱང་།
   སྲོང་བཙན་དགོངས་པ་སྒྲུབ་མིན་བལྟ་རྒྱུ་རེད།
   ཁྲིམས་ལུགས་མཁས་དབང་བུ་རྒོད་ཁྱོད་ཉིད་ཀྱིས།
   རྒྱལ་སྤྱིའི་ཁྲིམས་ཀྱི་བདེན་དབང་ལ་བརྟེན་ནས།
   པུར་རྒྱལ་བོད་དེ་རྒྱ་དམར་བཙན་འོག་ནས།
   རང་དབང་རྒྱལ་ཁའི་གཏམ་བཟང་དགུག་པ་ལགས།

4. བློ་སེང་ཁྲིམས་ལུགས་མཁས་ན་ཡང་། །
   རྒྱ་རྒན་ཚང་གི་ཁྲིམས་ལུགས་ལ། །
   འགྱུར་བ་སྤུན་ཙམ་བཏང་ཐུབ་མིན། །
   ད་ལྟར་བཤད་ཚོད་ག་ལ་ཐུབ། །

   ཁྲིམས་ལུགས་འགྲོ་ལུགས་མཁྱེན་ན་ཡང་། །
   གཞིས་ཆགས་ཚགས་ཚུད་ཡོང་མིན་ཏེ། །
   ས་གནས་མི་ཚོགས་ལ་བརྟེན་ཕྱིར། །
   ཁྲིམས་ཀྱིས་བསྒྱུར་ཐབས་ག་ལ་ཡོད། །

   ཁྲིམས་ཀྱི་འགྲོ་སྟངས་མཁྱེན་ན་ཡང་། །
   ཟམ་གདོང་ཚང་ལས་ལྷག་པ་ཞིག །
   གངས་སྐྱིད་ནས་བཟུང་གཞིས་ཆགས་བར། །
   ཚགས་ཚུད་གནང་རྒྱུ་དཀའ་སེ་རེད། །

5. བོད་་མི་ཡོད་ཏོ་ཅོག་གིས་རེ་བ་ཆེ་ཆུང་གི་ཁ་མིག་ཁྱོད་ལ་གདེངས་པའི་བཀའ་ཁྲི་བློ་སེང་མཆོག་གི་
   བྱ་བཞག་འགྲུབ་ཅིང་འགྱུར་ལྡོག་ཆེན་པོ་ཞིག་ལྟ་གོན་ལ་གཞོལ་པའི་སྨོན་འདུན་ཞུ་ཞུ་ལགས།

6. དག་མཆན་ཐོབ་རྒྱུ་ཟེར་བ་དེ་ཅི་འདྲ་ལ་གོ་དགོས། །ང་འདིར་འཛུལ་པར་དཀའ་ངལ་འདུག

7. བློ་སེང་ཁྲི་ལ་འཁོད་པར། །
   ཁ་དར་ཨ་ཤི་ཕུལ་ཡོད། །
   ཁྲིམས་ཤེས་གཞོན་སྐྱེས་ནུས་པས། །
   བོད་དོན་ཉམས་སར་སློངས་ཤིག །

8. ༄༅། །བཀའ་ཁྲི་མཆོག་ད་ལྟའི་གོ་སྐབས་འདི་ནི་སྙན་གྲགས་རྒྱས་མ་རྒྱས་ཀྱི་ས་མཚམས་ལྟ་བུ་ཡིན་པས། བཀའ་ཁྲི་མཆོག་ལ་བོད་མི་མང་པོ་ཞིག་གིས་རེ་བ་དང་མང་པོ་ཞིག་ནས་ལྟས་མོ་ལྟ་བཞིན་ཡོད་པས་སྙན་གྲགས་རྒྱས་མགོ་རྩམ་པ་འདི་ཐུར་མ་འགྲོ་གནང་གལ་ཤིན་ཏུ་ཆེ། །

9. གཞོན་སྐྱེས་དྭངས་རྩེ་བློ་བཟང་སེང་གེ་ལ་
   བཀའ་ཁྲི་ཐོབ་པའི་སྨོན་ལམ་དང་པོ་དེ།
   གཞིས་བྱེས་མཉམ་དུ་འཛོམ་པའི་སྨོན་ལམ་དང་།
   རང་བཙན་གཙང་མའི་དཔལ་ལ་སྤྱོད་པར་ཤོག
   འོས་ཀྱི་རྩེ་ཕུད་བློ་བཟང་སེང་གེ་ཡི།
   རྣམ་དཔྱོད་ལ་མི་ཁ་མེད་པར་ཤོག
   གངས་སེང་ལ་གོད་ཆག་མེད་པར་ཤོག
   ལས་དོན་ལ་ལེགས་གྲུབ་ཡོང་བ་ཤོག
   བཙན་བྱོལ་གྱི་རྩ་བ་སྟོང་བ་ཤོག
   རང་བཙན་གྱི་རྒྱལ་ཁ་ཐོབ་པ་ཤོག
   དམར་ཕྱོགས་ཀྱི་བདེ་སྐྱིད་ཉམས་པར་ཤོག་
   བོད་འབངས་ལ་བདེ་སྐྱིད་ཐོབ་པ་ཤོག

10. བཀའ་ཁྲི་བློ་སེང་ལ་ཕུལ་བའི་སྙན་ངག་འདི་བོད་ནང་སེང་རྡོར་དྲ་བ་ཐོག་བཀོད་པ་མཐོང་སོང་།
    ཕལ་ཆེར་མདོ་སྨད་ཀྱི་སྙན་ངག་པ་ཞིག་གི་བྲིས་བ་འདྲ་། ཉེར་བའི་དུས་རབས་ནང་བོད་མདོ་སྨད་ཀྱི་སྙན་ངག་པས་མི་རིགས་ཀྱི་ལ་རྒྱ་འཛིན་ཏེ་དམིགས་བསལ་བོད་ཡིག་ཐོག་རླབས་ཆེན་གྱི་ལག་རྗེས་བཞག་ཡོད་། དེ་རིང་ཡང་བཀའ་ཁྲི་གསར་པ་བློ་སེང་ལ་བསྟོད་པ་འདི་ཆེས་འོས་འཚམས་དང་དགོས་བབ་ལྡན་པ་ཞིག་མཐོང་། དེ་ཡང་བོད་ཀྱི་ལོ་རྒྱུས་ཐོག་ཁ་བྲལ་ཐབས་མེད་པའི་ཁ་ཕྱོགས་གྲངས་ལས་འདས་པ་ཞིག་ཡོད་པའི་ནང་གཞོན་སྐྱེས་ཤེས་ཡོན་པ་བློ་སེང་ནི་བོད་ཀྱི་ལོ་རྒྱུས་ཐོག་དམངས་གཙོའི་འོས་འདེབས་བྱེད་པའི་དབུ་ཁྲིད་ཐེངས་གཉིས་པ་དང་ཤེས་ཡོན་གྱི་ལམ་ནས་དབུ་ཁྲིད་དུ་འདེབས་པ་ཐོག་མ་ཆགས་ཡོད་། དེ་ཡང་བོད་ཀྱི་གཏམ་དཔེ་ནང་ཨ་མའི་བུ་ལ་ཡོན་ཏན་ཡོད་ན། དགའ་ལྡན་གསེར་ཁྲིར་བདག་པོ་མེད་ཅེས་པ་ལྟར་དངོས་ཡོད་བློ་སེང་ད་ཐེངས་གསེར་ཁྲིར་ཕེབས་སོང་། ཁོང་འོས་ཐོབ་པ་དེའི་རྒྱ་ནག་གཞུང་གི་སྐྱོན་བརྗོད་དང་ལོག་བཤད་ཇི་ཙམ་བྱེད་ན་ཡང་འཛམ་གླིང་གི་གསར་འགྱུར་རྒྱུད་ལམ་ཁག་གི་ཁོང་ལ་དོ་སྣང་ཆེ་པོ་སྤྲོད་དེ་དྲ་ཐོག་དང་ཚགས་ཤོག་སོགས་བརྙན་འཕྲིན་ཁག་ཏུ་བསྟན་སོང་། ད་དུང་ཁོང་ལ་རྒྱལ་སྤྱིའི་གསར་འགོད་པས་དྲི་བ་བཏང་བ་དང་ལེན་འདེབས་བྱེད་པའི་གནས་ཚུལ་གཅིག་གཉིས་མ་རེད་།

11. བློ་རིག་རྣམ་དཔྱོད་བཀྲ་བའི་གཞོན་ནུ་ཡི་མཛུམས་མདངས།།
    བཟང་བའི་སླབ་བྱའི་དྲིན་གྱིས་བོད་འབངས་ལ་འཕྲོད་ཡོང་།།
    སེང་གེས་གངས་རིའི་སྟེང་ནས་གཡུ་རལ་ཞིག་ངོམ་ཏེ།།
    གེ་སར་རྒྱལ་པོའི་དཔེ་བཞིན་དགྲ་བོ་དེ་གཏུལ་ཡོང་།།

    ༧རྒྱལ་བའི་བཀའ་དགོང་སྒྲུབས་རྒྱུའི་དམ་བཅའ་དང་གཅིག།
    བོད་མིའི་བསམ་བློར་མཐུན་པའི་བྱ་སྤྱོད་དང་གཉིས།།
    ཤེས་རིག་གོང་མཐོར་སྤེལ་པའི་ཐབས་བྱུས་དང་གསུམ།།
    བཙན་བྱོལ་གཞིས་ཆགས་ས་བརྟན་ཡོང་སླད་དང་བཞི།།

    གཞོན་པའི་བློ་རྒྱ་ཡང་བའི་དམིགས་ཡུལ་ལ་གཟིགས་དང་།།
    བསམ་དོན་ཆོས་བཞིན་གྲུབ་པའི་རེ་སྨོན་ཞིག་སྐྱོན་ལས།།
    ཕྱ་སྨོས་ཟུར་ས་བྱེད་པའི་དུས་ཚོད་ཞིག་མ་ཡིན།།
    ཕྱར་གྲུ་མཉམ་འདེགས་གནང་ནས་རྒྱབ་སྐྱོར་ཞིག་གནང་ཤོག།

    བོད་རྒྱལ་ལོ།། བཀའ་བློན་ཁྲི་པ་བློ་བཟང་སེང་གེ་མཆོག་མཛད་འཕྲིན་རྒྱས་གྱུར་ཅིག།

    .

12. རྒྱལ་བའི་བཀའ་དགོང་སྒྲུབས་རྒྱུའི་དམ་བཅའ་དང་གཅིག།
    བོད་མིའི་འདོད་དོན་མཐུན་པའི་བྱ་སྤྱོད་དང་གཉིས།།
    ཤེས་རིག་གོང་མཐོར་སྤེལ་པའི་ཐབས་བྱུས་དང་གསུམ།།
    བཙན་བྱོལ་གཞིས་ཆགས་ས་གཏན་ཡོང་སླད་དང་བཞི།