སྙིང་རྗེའི་རང་གཟུགས།

Comments (6) on “སྙིང་རྗེའི་རང་གཟུགས།”

1. ཀྱེ། ངའི་བརྩེ་བའི་སྤུན་ཟླ། ཐུགས་མ་ཕམ་ཤིག
   ཀྱེ། ངའི་བརྩེ་བའི་སྤུན་ཟླ། ཐུགས་མ་ཕམ་ཤིག
   རླངས་རྫས་དང་གློག་སྐུད་ཀྱི་བརྒྱུད་ནས་འཆེད་པའི་མེ་ལྕེ་འབར་མཚམས་མ་ཆད་ཅིང་། ཐོལ་རླུང་གིས་བསྐུལ་བའི་ཐལ་རྡུལ་གྱིས་ནམ་མཁའ་དང་ས་གཞི་བར་མེད་དུ་དཀྲིགས། ཡོངས་སུ་འགྱེལ་ཟིན་པའི་གྲོང་དང་ཁང་ཁྱིམ་དག་ནི་མཐོང་བ་ཙམ་གྱིས་འཇིགས་སུ་རུང་བར་སྣང་། ཡ་ཡོར་གྱུར་ཅིང་ཧྲལ་ཧྲུལ་དུ་འཐོར་བའི་གྱང་བར་གྱི་གས་སྲིབ་དག་ན་གསལ་ལ་མི་གསལ་བའི་ངུ་ངག་འབྱིན་མཚམས་ད་དུང་མ་ཆད།
   ཆད་མ་མཐུད་ཀྱི་ཁ་པར་གྱི་སྐུད་སྣེ་འགའ་རེ་ན་ང་སྐྱོབས་ཤིག་ཅེས་པའི་ཆེས་མཐའ་མཇུག་གི་ཞུ་བ་བར་མ་ཆད་དུ་སྒྲོགས། འཇིག་པའི་བསྐལ་བ་ལྟ་བུའི་ང་ཡ་བའི་དོན་རྐྱེན་འདི་བྱུང་ནས་ཆུ་ཚོད་ལྔ་བཅུ་ང་དགུ་ལྷག་འདས་པའི་ད་ལྟའང་། མུན་ནག་གི་ས་འོག་ན་རྟ་རྔ་ལྟ་བུའི་ཚེ་སྲོག་གི་ཉག་ཐག་མང་པོ་ཆད་དང་འཆད་བཞིན་ཡོད།
   ས་གཞི་ཡོངས་རྫོགས་འཇིགས་རུང་གི་དུར་ཁྲོད་ཡུག་གཅིག་ཏུ་གྱུར་ཅིང་། ནམ་མཁའ་དང་བར་སྣང་མཐའ་དག་ཏུ་བྱ་རྒོད་ཀྱིས་འཚུབ་ཁ་བཀྱེ།
   ངུ་ཆོམ་དང་འཁུན་སྒྲ་བར་མེད་དུ་འདོན་པའི་རྨས་མ། གནམ་ལྩགས་མགོ་ལ་བབས་པ་ལྟ་བུའི་སྡུག་བསྔལ་གྱིས་མནོན་པའི་ནང་མི། ལམ་གོལ་ལྟར་རྟེན་མེད་དང་རྟོལ་མེད་དུ་ལུས་པའི་མི་མང་བཅས་ནི་མནག་པར་དཀའ་བའི་སྡུག་བསྔལ་གྱིས་ཡོངས་སུ་གཟིར།
   སྣང་ཚུལ་འདི་ཇི་བཞིན་སེམས་ལ་འཁོར་ཐབས་བྲལ་ཞིང་། དོན་དངོས་འདི་ཇི་བཞིན་ངག་ནས་ཤོད་ཐབས་བྲལ། འོན་ཀྱང་། ང་ཚོས་ཀྱང་རང་གི་བཅོས་མིན་གྱི་སེམས་གདུང་ཡོད་ཚད་ཕྱི་རུ་ཕྱུངས་ཏེ། ལྷད་མེད་ཀྱི་སྡུག་གཏམ་ཡོད་ཚད་ཁ་རུ་བཏོན་ཏེ་ཡིད་སྐྱོ་བའི་མྱ་ངན་གྱི་འཚམས་འདྲི་ཙམ་བྱེད། ད་ནི་འདི་ཙམ་ཁོ་ན་སྙིང་ཉེ་བའི་སྐྱེ་བོ་དེ་དག་ལ་སེམས་གསོ་དང་བསྐུལ་མ་ཡིན།། ཀྱེ། ངའི་སྙིང་ཉེ་དག། ཐུགས་མ་ཕམ་ཤིག
   དེ་ཡང་གནམ་དང་ས་ལ་བརྩེ་བ་མེད་པ་དེས་ང་ཚོ་རང་བྱུང་གི་ཆག་སྒོ་ཡ་ང་བ་དག་ལས་གཡོལ་མི་ཐུབ་ཅིང་། རང་བྱུང་གི་ཆག་སྒོ་འདི་ལྟ་བུ་དག་གིས་ང་ཚོར་དུས་ནས་དུས་སུ་འཇིགས་སྣང་བསྐུལ།
   འཇིགས་སྣང་དང་གདུང་བ་འདི་ལྟ་བུ་དག་གི་ཁྲོད་དུ་ང་ཚོས་རང་བྱུང་ཁམས་ལ་སློག་པའི་ཡ་ལན་དེ་ནི་གྲོག་མས་འཁོར་ལོ་འགོག་པ་ལྟ་བུ་ཞིག་རེད།
   འོན་ཀྱང་ང་ཚོར་གནས་བབ་འདི་ལྟ་བུའི་ཁྲོད་ནས་ཀྱང་བྱ་རྒྱུ་དང་བསམ་རྒྱུ་གཅིག་རང་ཡོད་པ་ནི། ཟོལ་གསོག་མེད་པའི་བརྩེ་བ་དང་བཅོས་མ་མིན་པའི་གདུང་ཚོར་ཕྱི་ལ་བཏོན་ཏེ་ཁྱེད་ཀྱི་གམ་ནས་བརྟན་པོར་འགྲེངས་ཐུབ་རྒྱུ་དེའོ། །
   ད་དུང་ང་ཚོ་སྟོན་པ་ཐུགས་རྗེ་ཅན་གྱི་བསླབ་པའི་འོད་ཟེར་དང་གདམས་པའི་གདུད་རྩི་ལ་གུས་པ་ཞིག་གི་ངོས་ནས་འདི་ནི་རང་གི་རྐྱེན་ངན་དང་སྡིག་སྒྲིབ་སྦྱོང་བའི་ཕྱགས་ཤིང་དང་། བྱམས་བརྩེ་དང་གཞན་ཕན་བསྒྲུབ་པའི་གོ་སྐབས་སུ་བལྟས་ནས་བཟོད་སྒོམ་ཆེན་པོས་ཆོས་ཀྱི་ཉམས་ལེན་ལ་བློ་སྦྱོང་ངེས་པར་དུ་བྱ་དགོས།
   བློ་སྦྱོང་དེ་ཡང་ལས་ངག་གི་བྱ་སྤྱོད་དངོས་ལ་ཕྱོགས་ནས་ཁ་ཞེ་གཉིས་མེད་ཀྱི་ཐོག་ནས་མངོན་གྱུར་བྱེད་དགོས།
   ཡིད་སྐྱོའི་གནས་ཚུལ་འདི་བྱུང་མ་ཐག༸རྒྱལ་བ་ཡིན་བཞིན་ནོར་བུས་བླ་ན་མེད་པའི་བཀའ་མཆིད་ཀྱི་བདུད་རྩི་ཕེབས་ཤིང་། འཛམ་བུ་གླིང་གི་རླབས་ཆེན་གྱི་དབུ་ཁྲིད་དང་ཆོས་ཀྱི་གཙོ་འཛིན། གནད་ཡོད་ཀྱི་ཚོགས་སྡེ་བཅས་ཤིན་ཏུ་མང་པོས་གདུང་སེམས་མཉམ་བསྐྱེད་ཀྱི་འཚམས་འདྲི་བྱས།
   དེ་དང་ཆབ་གཅིག བོད་ཆོལ་ཁ་གསུམ་དང་གཞི་བྱེས་གཉིས་ཀྱི་སྤུན་ཟླ་ཡོངས་རྫོགས་བློ་གཅིག་སེམས་གཅིག་གིས་ཁྱེད་རྣམས་དང་ཐེ་ཚོམ་མེད་པར་ལག་བརྡང་སྦྲེལ་ནས་ཡོད།
   དེ་ཕྱོགས་ཀྱི་ལྷག་བསམ་དང་བརྩོན་པ་ཆེ་བའི་སྤུན་ཟླ་དཔའ་བོ་དག་གིས་དཀའ་ཚེགས་ཆེ་བའི་གཡུལ་ས་མདུན་མ་ན་ཡོད་ཚད་ཁྱད་དུ་བསད་ནས་ཁྱེད་རྣམས་ཀྱི་དཔུང་གཉེན་གནང་བཞིན་ཡོད་པ་བཞིན། ལེ་དབར་ཁྲི་ཕྲག་གི་ཆོད་པའི་ཐག་རིང་གི་སྤུན་ཟླ་ང་ཚོས་ཀྱང་སྐར་མེ་ཆུང་ཆུང་རེའི་འོད་ལ་གཡོ་བ་མེད་པའི་མིག་གིས་གཅེར་བཞིན་ཁྱེད་རྣམ་པའི་ཆེད་དུ་གསོལ་བ་འདེབས་བཞིན་ཡོད། དྭངས་གཙང་གི་སེམས་པ་འདིས་ཁྱེད་ལ་སྐྱོ་གྲོགས་བྱེད་ཀྱིན་ཡོད། རྣམ་དཀར་གྱི་ལེགས་བྱས་འདིས་ཁྱེད་ལ་བསྐྱེལ་མ་བྱེད་ཀྱིན་ཡོད།

   ཀྱེ། ངའི་བརྩེ་བའི་སྤུན་ཟླ། ཐུགས་མ་ཕམ་ཤིག ཁྱེད་ཀྱི་ཡིད་གདུང་གི་མཆི་མ་འབྱིད་པར་མཛོད་ཅིག་དང་ང་ནི་ནམ་ཡང་ཁྱེད་ཀྱི་གམ་དུ་ཡོད་དོ། །
   ཤིན་ཏུ་བྲེལ་ཟིང་ཆེ་བའི་བར་ནས་ཤིན་ཏུ་འབར་བའི་ཚོར་འདུའི་རི་མོ་ཡི་གེར་འབེབས་པ་པོ་ནི་རྫ་ཚེ་རིང་བཀྲ་ཤིས་སོ།
   ༢༠༡༠ལོའི་ཟླ་༤ཚེས༡༦ལ།

2. ཁར་སང་ཉམ་ཉེས་ཁྲོད་ཀྱི་རེ་བ་ཞེས་པ་དེ་དང་དེ་རིང་སྙིང་རྗེའི་རང་གཟུགས་འདི་གཉིས་པོའི་མགོ་རྔ་ཆ་ཚང་ལ་ཞིབ་ཏུ་ལྟ་ཉན་བྱས་པ་ཡིན། ཆོས་བྱེད་དགེ་འདུན་པ་ཚོས་རོགས་སྐྱོར་བྱ་སྟངས་དེས་སེམས་འགུལ་ཐེབས་བཅུག་སོང་ལ་ང་ཚོ་ལ་དགེ་འདུན་པ་མང་པོ་ཡོད་པ་དེས་སྤོབས་པ་ཞིག་ཀྱང་སྐྱེས་བཅུག་སོང་། མང་ཚོགས་ཞབས་ཞུ་སྤྱི་དང་ལྷག་པར་ཡང་དཀའ་སྡུག་འདི་འདྲའི་འོག་ཏུ་ལྷུང་དུས་དགེ་འདུན་པས་ཆོས་ཕྱོགས་ཀྱི་བསྔོ་སྨོན་དགོས་པ་སྨྲོས་མེད་དང་ཕྱོགས་གཞན་ནས་ཀྱང་རོགས་སྐྱོར་བྱ་རྒྱུ་ནི་ཤིན་ཏུ་གལ་ཆེན་པོ་རེད་འདུག དགོན་ཁག་ཚོར་མང་ཚོགས་གནོད་སེལ་གྱི་ཚོགས་པ་ལྟ་བུ་བཙུགས་ནས་སྦྱོང་བརྡར་སྤྲད་ཐུབ་ན་ཤིན་ཏུ་ལེགས་སྙམ།

3. སྐབས་དེར་ས་གནས་དངོས་སུ་མ་བཀུལ་དངས་བླངས་ཀྱིས་སྲོག་སྐྱོབས་སུ་ཕེབས་པའི་དགེ་འདུན་པ་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། ཁྱེད་རྣམས་ནི་གཤིན་པོའི་ལམ་འདྲེན་དང་། གསོན་པོའི་སྐྱབས་གནས་ཡིན། ཁྱོད་ཚོ་ནི་བོད་མི་ས་ཡ་དྲུག་གི་རིག་གཞུང་ཀུན་འཛིན་སྐྱོང་སྤེལ་བའི་བྱེད་པོ་ཡིན། བོད་པ་ཚང་གི་་ཕྱི་ལ་ངོམས་རྒྱུ་དང་། ནང་གི་རྒྱན་ཆ་ཡང་ཡིན། མདོར་ན་ཁྱོད་ཚོ་ནི་དམག་སྔ་དྲོ་འགྲོ་བའི་སྔོན་མ་དང་། ཕྱི་དྲོ་ལོག་པའི་རྗེས་མ་ཡིན། སྐྱབས་སུ་མཆི་ངུར་སྨྲིག་གི་བསྣབས་པའི་བོད་གངས་ཅན་གྱི་དགེ་འདུན་པ་རྣམས།

4. ཆེས་དཀོན་པའི་རྒྱུ་དང་འབྱོར་བ་ནི།།
   ཆེས་དཀའ་བའི་ལས་གྲུབ་པ་རེད།།
   བྱམས་སྙིང་ཆེད་དུ་སྦྱིན་མིན།།
   རང་མི་རགས་ཡིན་པས་སྟེར་ནི་རེད།།

5. བོད་པའི་དགེ་འདུན་ནི།

   དར་དམར་དམག་གི་འོག་ལ། །
   རབ་འབྱུང་དམར་པོས་མྱངས་ཡོད། །
   འབྱུང་འཁྲུགས་ས་འགུལ་སྐབས་ལ། །
   དགེ་འདུན་དམར་པོས་བསྐྱབས་བྱུང་། །

   དམར་མདོག་དབང་གི་དངོས་གྲུབ། །
   སྒྲུབ་ལ་འདུན་པའི་དགེ་འདུན། །
   དགེ་འདུན་འདུས་པ་རྒྱ་མཚོས། །
   དུས་གསུམ་བོད་རིགས་སྐྱོབས་རོགས། །

   ཁྲིམས་མཐུན་དབུ་འཕང་མཁའ་ལ་བསྙེགས་པར་ཤོག །

6. བོད་རིགས་དགེ་འདུན་ནི།

   འཕགས་པའི་རིགས་བཞི་ཚང་བའི་དགེ་འདུན། །
   འཕགས་པའི་བདེན་བཞི་སྟོན་པའི་དགེ་འདུན། །
   འཕགས་ཆོས་ཉམས་ལེན་བོད་ཀྱི་དགེ་འདུན། །
   འཕགས་ཡུལ་ནང་པའི་ཆོས་ཀྱི་དགེ་འདུན། །

   ཆོས་བརྒྱུད་བཞི་ཡི་རིས་མེད་དགེ་འདུན། །
   ནམ་དུས་བཞི་ཡི་སྐྱབས་གནས་དགེ་འདུན། །
   འབྱུང་བཞི་འཁྲུགས་དུས་སྐྱོབ་མཁན་དགེ་འདུན། །
   བཞི་ཚང་བཞིར་གྱེས་བཞི་སྟོན་དགེ་འདུན། །

   འཕགས་པའི་དགེ་འདུན་རྣམས་ཀྱིས་བཀྲ་ཤིས་ཤོག །