བསྟན་འཛིན་ནས།
ཕྱི་ལོ༡༩༢༣བོད་ས་བྱི་ལོར་བླ་བྲང་བཀྲ་ཤིས་འཁྱིལ་གྱི་ཉེ་འཁོར་ཨ་མདོ་ཙ་ཡུས་ཞེས་པའི་ཡུལ་སྡེར་སྐུ་འཁྲུངས། བོད་དུ་རྒྱ་མིས་བཙན་གནོན་བྱས་ཏེ༡༩༥༩ལོར༧གོང་ས་མཆོག་གི་དབུས་བོད་མི་ཁྲི་ཕྲག་དུ་མ་རྒྱ་གར་ལ་བཙན་བྱོལ་དུ་ཕེབས་དགོས་བྱུང་སྐབས་ཁོང་ཉིད་ཀྱང་བཙན་བྱོལ་དུ་ཕེབས། ལོ་དེར་གནས་མཆོག་རྡོ་རྗེ་གདན་དུ་ཆོལ་གསུམ་གཅིག་གྱུར་ཏུ་དྲིལ་ནས་༧གོང་ས་མཆོག་གི་སྤྱན་སྔར་མནའ་གན་མཐུ་མོ་ཆེ་འཇོག་སྐབས་མདོ་སྨད་མི་འཐུས་ཀྱི་ཁོངས་སུ་བཅར། རྡ་རམ་ས་ལར་བཙན་བྱོལ་གཞུང་གསར་འཛུགས་གནང་བའི་སྐབས་མདོ་སྨད་མི་མང་གི་སྤྱི་འཐུས་ཐེངས་དང་པོ་གནང་། ཀུན་མཁྱེན་སྐུ་ཕྲེང་ལྔ་པ་བསྟན་པའི་རྒྱལ་མཚན་མཆོག་གི་མ་འོངས་སྔོན་གཟིགས་ཀྱིས་ཆོས་རྒྱལ་སྲོང་བཙན་སྒམ་པོའི་རྒྱལ་རབས་རྣམ་ཐར་ཕྱག་སྲོལ་གསར་གཏོད་གནང་བ་དེ་དག་འཁྲབ་སྟོན་བྱ་རྒྱུའི་དུས་སྐབས་ད་ལམ་ཡིན་པ་འདྲ་དགོངས་ནས་སྒྲ་བྲོ་གཞུང་གསུམ་ཁུངས་ལྡན་ཤེས་མཁན་ཁ་ཤས་ཀྱིས་གཙོས་པའི་མདོ་སྨད་མི་གྲངས༧༠སྐོར་ལས་གྲུབ་པའི་ཨ་མདོ་ཟློས་གར་ཚོགས་པ་ཞེས་པ་བོད་ཟླ༥ཚ ེས་༡༥འཛམ་གླིང་སྤྱི་བསངས་ཉིན་གསར་འཛུགས་བྱས་ཏེ་ཟླ་དྲུག་རིང་སྦྱོར་བརྡར་བྱས་རྗེས་༧སྐྱབས་རྗེ་ཡོངས་འཛིན་གླིང་རིན་པོ་ཆེར་གཟིགས་འབུལ་ཞུས།
དེ་ནས་ཀ་ལི་ཀ་ཏ་དང་ལྡི་ལི་སྦོམ་སྦེ་སོགས་རྒྱ་གར་གྲོང་ཁྱེར་ཆེ་ཁག་གི་མི་མང་ལ་རྒྱལ་རབས་རྣམ་ཐར་སྤྱན་འབུལ་ཞུས་ཏེ་བོད་ལོ་རྒྱུས་ངོ་སྤྲོད་ཁྱབ་བསྒྲགས་སོགས་ཀྱི་མཛད་རྗེས་བླ་ན་མེད་པ་བཞག། ༡༩༦༢ལོར༧གོང་ས་མཆོག་ལ་ཟློས་གར་གཟིགས་འབུལ་ཞུ་སྐབས་ཐུགས་དགྱེས་ཚོར་དང་བཅས་བཀའི་ཕེབས་སྐོར། འདི་མུར་འགྲུལ་པ་ལྟ་བུའི་མི་ཡུལ་དུ་མི་ཚེ་འཁྱོལ་དཀའ་བས་གཞིས་ཆགས་ཤིག་ཚུགས་ཞེས་གསུངས་པ་བཞིན་ར་ཇྰ་པུར་དུ་ནེ་ཧ་རུ་རྗེས་དྲན་ཚོགས་པ་གསར་འཛུགས་གནང་། ལག་ནའུར་བཞུགས་པའི་རྒྱ་གར་གྱི་སློབ་དཔོན་ཆེན་པོ་བི་ནུ་བ་སྦ་སྦའི་དྲུང་དུ་བཅར་ཏེ་ས་ཆ་སློང་པས་ད་ལྟ་ཀ་ལེ་མེན་ཀྲོན་གཞིས་ཆགས་ཀྱི་ས་ཆ་འདི་ཡིག་ཆ་དང་བཅས་བཀྲིན་བསྩལ་བའི་སྟེང་མི་རིགས་ལ་དབྱེ་འབྱེད། ཆོས་ལུགས་ལ་ཕྱོགས་རིས་མེད་པར་ཆོལ་གསུམ་མི་ཚང་༣༠༠སྐོར་གྱི་སྡོད་ཁང་དང་།
དེ་མཚུངས་སློབ་གྲྭ། སྨན་ཁང་། དགེ་དགོན་བཀྲིས་འཁྱིལ། རྙིང་དགོན་སྨིན་གྲོལ་གླིང་། དཀར་དགོན་བདེ་ཆེན་ཆོས་འཁོར་བཅས་ཡོད་པའི་གཞིས་ཆགས་འཚུགས་ཤིང་དོན་གྲུབ་གླིང་ཞེས་༧གོང་ས་ཆེན་པོས་མིང་ཡང་སྩལ། ༡༩༧༨ཕྱི་ཟླ༦པའི་ཚེས༡༦དགོང་མོར་ཕུགས་བསམ་མེད་པའི་མི་སྣ་དག་གིས་ལྐོག་མདའ་རྒྱབ་ནས་རྨས་སྐྱོན་ཚབས་ཆེ་བཟོས་པ་སྨན་བཅོས་རིམ་གྲོ་གང་གིས་མ་བརྟན་པར་ཚེས་༡༨ཉིན་དགུང་གྲངས༥༥ཐོག་སྐུ་ཚེ་འཕེན་པ་རྫོགས། དེ་ལྟའི་བཀྲིན་བརྗེད་ཐབས་བྲལ་བའི་གུང་ཐང་ཕྱག་མཛོད་ཨ་ཁུ་ཚུལ་ཁྲིམས་མཆོག་གི་དྲན་རྟེན་དུ་༢༠༡༠ཕྱི་ཟླ་ཚེས་ཉིན་བཞེངས།།
ཁེར་རྐྱང་གི་ཡུལ་གྱར་བའི་གདོང་དེབ་ནས་བདམས།
བསྟན་འཛིན་ནས།
བྱས་རྗེས་ཁོ་ན་མ་གཏོགས་ཞབས་འདྲེན་ཞུས་མེད་བསམ་གྱིན་ཡོད་པས
དྲན་རྟེན་ཙ་ཡེས་སྡེ་བ་ན་བཞེངས་ཡོད་མ་གཏོགས། ཀ་ལི་མིན་གྲོང་ན་དེ་འདྲ་ཞིག་ཡོད་ཚོད་མི་འདུག
ནོར་བཅོས། ( ཡོད་ན་མ་གཏོགས )
བསྟན་འཛིན་ལགས། ཁེར་རྐྱང་གི་ཡུལ་གྱར་བའི་གདོང་དེབ་ཞེས་པ་སུས་བྲིས་གནང་བ་དང་། ལག་ཏུ་རེག་མིན་གྱི་ལན་གསལ་ཡོད་པ་ཞུ། དཔེ་དེབ་བལྟ་ཀློག་གི་འདོད་པ་ཤིན་ཏུ་ཆེ་པས་ཐུགས་རྗེ་གཟིགས།
རྒྱུས་ཡོད་ཀྱི་རྒན་པོ་ཁ་ཤས་ཀྱིས་བཤད་ན། ཨ་མདོ་ཡིས་ལྐུགས་རྟགས་བསྟན་ནས་ལྐོག་གསོད་བཏང་བ་དེ་ནོར་འཁྲུལ་ཆེན་པོ་ཤོར་བ་རེད། དེའི་རྐྱེན་གྱིས་ཨ་མདོ་གསར་འབྱོར་བ་ཚོ་ལ་ཆགས་ས་བརྟེན་ས་མེད་པར་ཆགས་པར་བཤད། ཁོས་ཆོལ་ཁའི་ཕྱོགས་ཞེན་གྱིས་ནོར་འཁྲུལ་བཟོས་ཡོད་ན་ཡང། རྒྱ་དམར་ནག་གི་མཉམ་དུ་ཆིངས་ཡིག་བཞག་པ་དང་དེ་འདྲའི་ནོར་འཁྲུལ་ཚབས་ཆེན་བཟོས་ཡོད་པ་མ་རེད། ཨ་མདོ་མི་ཡིས་ཁ་རྡུང་འདྲ་བཏང་ནས་མ་བསད་པར་བཞག་ཡོད་ན། གནས་ཚུལ་འགྱུར་ནས་ད་ལྟ་སྔོན་མའི་གནས་ཚུལ་རང་བཞིན་ལྟ་བུ་ཆགས་འགྲོ་བས། ང་ཚོ་ཨ་མདོ་གསར་འབྱོར་བ་ཚོ་རྡ་སར་ཁྱིམ་སྡོམ་ལྟར་འདུག་མི་དགོས་པར་གཞིས་ཆགས་ས་ཞིག་ཡོད་ཀྱང་། དེ་མེད་པར་བཟོས་པ་རེད། ཁམས་པས་ནང་ན་མི་དེ་འདྲ་མང་པོ་བྱུང་ཡོད་པ་རེད་དེ། གསོད་ཀྱི་འདུག་གམ། ད་ལྟ་ཁམས་པས་སྡེ་དགེ་གཞིས་ཆགས། ནང་ཆེན་གཞིས་ཆགས་ཞེས་སོ་སོའི་ལུང་པའི་མི་གསར་པ་འབྱོར་ན་འདུག་ན་འདུག་ཆོག་ཆོག་ལྟ་བུ་ཞིག་འདུག་ག་ཟེར་། ད་དུང་མི་དེ་ནི་མི་ལ་སྐད་ཆ་བཤད་དགོས་ན། འབྲེལ་བ་བྱེད་དགོས་ན། འཇོན་ཐང་ཅན་དེ་ལྟ་བུ་ཨ་མདོ་ནང་ན་དཀོན་པོ་རེད། ཕྱོགས་ཞེན་བྱེད་དགོས་པ་དེ་ཡང་སྐབས་དེ་དུས་ཀྱིས་སྐུ་དྲག་ཚོས་མཐའ་ལ་བཀར་ནས་་བྱུང་བ་རེད། ཁམས་དང་ཨ་མདོ་ལ་གཞུང་གི་ལས་ཀ་རག་ཁག་པ་དང། གཞིས་ཆགས་ལ་ཡང་ལམ་སང་མ་བཏང་བར་ནར་འགྱངས་བྱས་པར་བཤད།
ཨ་ཁུ་ཚུལ་ཁྲིམས་ཀྱི་ལོ་རྒྱུས་གོ་མྱོང་། ཁོང་མི་མང་ལ་བལྟ་རྟོག་བྱེད་མཁན་དང་འཇོག་ཐང་ཅན་ཞིག་ཡིན་པ་དང། མི་ལ་འཇོན་ཐང་ཡོད་ན་ཕྲག་དོག་བྱེད་མཁན་མང་ལབ་པ་ནང་བཞིན་རེད།
དེའི་སྐབས་ཀྱི་སྐུ་དྲག་ཚོས་ཕྲག་དོག་གིས་མེ་འབར་ཡོད་ཚོད་དང་ཨ་ཁུ་ཚུལ་ཁྲིམས་ཡང་ཕྲག་དོག་གི་མེ་མདའི་འོག་དུས་ལས་འདས་པ་དངོས་གནས་བོད་མི་ལ་གྱོང་རེད།
ཕྲན་གྱིས་ཨ་ཁུ་ཚུལ་ཁྲིམས་ཚང་གི་མཚན་ཐོས་པ་ཙམ་ལས་ཁོང་གི་སྐོར་གསལ་བོ་མི་ཤེས་པས། འདིའི་ཐད་ཤེས་མཁན་ཡོད་ན་ཅིག་གསུངས་རོགས་ཞུ། ཁོ་ལྐོག་གསོད་བྱས་པ་རེད་ཟེར། ག་རེ་བྱས་ནས་ལྐོག་གསོད་བྱས་པ་རེད། ལྐོག་གསོད་སུས་བྱས་པ་རེད། ལྐོག་གསོད་བྱེད་དགོས་དོན་ཅི་ཡིན་ནམ། གལ་སྲིད་འདིའི་སྐོར་ཤེས་མཁན་གྱིས་གསལ་བཤད་ཅིག་གནང་ཐུབ་ན་བཀའ་དྲིན་ཆེ།
འདི་སྐོེར་མང་ཙམ་འབྲི་དགོས
ལྐོག་གསོད་ཨེ།
མང་ཆེ་བསཁོང་གོ་མིང་ལ་་གུང་ཐང་ཚུལ་ཁྲིམས་གསོལ། སྡེ་ར་ཏིན་ཟེར་བའི་གཞེས་ཆགས་ཀྱི་སྒོ་ཆེན་ཞིག་གི་
འགྲམ་ཟུར་ན་ཁོང་གི་ལོ་རྒྱས་དང་བཀའ་དྲིན་གསལ་བོ་བྲིས་ཡོད། སྔོན་མ་ཡིན་ན་ལོ་ལྟར་རྗེས་དྲན་རེར་
བྱེད་ཀྱིན་ཡོད་པ་ཁོང་ཁི་ཆུང་མས་ངར་བཤད་མྱོང་། རྗེས་དྲན་བྱེད་མཁན་ཁོང་གི་ནང་མི་གཙོས་ཨ་མདོ་
ཁ་ཤས་དང་ཁམས་པ་ཡང་གཅིག་གཉིས་ཤིག་ཡོད་ཟེར། ཕྲན་གྱིས་འདིའི་སྐོར་ཁོང་གི་ཆུང་མར་དྲིས་སྐབས་
མོས་བཤད་དོན་ང་ལས་བླ་བྲང་ཨ་ཁུ་བསམ་འགྲུབ་དང་རྔ་བ་ཕུར་ཀོ་གཉིས་ཀྱིས་ཡན་མི་སུ་གང་གིས་མི་
ཤེས་ཟེར། ངས་ཕར་ཀོ་དྲིས་ཀྱང་ཁོང་གི་ལན་སྤྲད་མ་སོང་། ཁོང་གསོད་མཁན་དངོས་ནི་རེ་སྐོང་དོན་འགྲུད་རེད། ད་དུང་གསོད་མཁན་གྱི་རྒྱབ་སྐྱོར་ན་རྒྱལ་ལོ་དོན་འགྲུབ་
དང་ཨ་ལགས་འཇིགས་མེད་སོགས་ཡོད་པ་རེད་ཟེར་བའི་གཏམ་ཞིག་མང་བོའི་ཁ་ན་གྲགས་ཀྱང་བདེན་པ་ཡིན་མིན་ཥི་ཤེས། ཁོ་གིས་མེ་ཏོག་ཅིག་འདེབ་ཀྱིན་སྐབས་རྒྱབ་ལོག་ནས་མེ་མདས་བརྒྱབ་ཏེ་བསད་པ་རེད།
སྐབས་དེར་གུང་ཐང་ཚུལ་ཁྲིམས་བཙན་བྱོལ་ནང་འཇོན་ཤོས་ཤིག་དང་དཀྲུག་ཤིང་བྱེད་མཁན་རེད་ཟེར་ནས་
ཀུན་གྱིས་བཤད་མྱོང་བ་ཞིག་རེད། ཁོང་གི་ངན་གཙོ་བོ་ཐེ་ཝན་ནས་སྒོ་མོ་བླངས་ཏེ་བོད་ནང་ཁུལ་བསྐྲུགས་
པ་རེད་ཟེར། ངས་བལྟས་ན་ཁོང་གིས་ཐེ་ཝན་ནས་སྒོ་མོ་བླང་ཡོད་རྒྱུ་རེད་བསམ་གྱིན་འདུག་འོན་ཀྱང་
སྐབས་དེར་མདོ་དབུས་ཁམས་གསུམ་སུ་ཡིན་ན་ལྐོག་ནས་ཐེ་ཝན་སྒོ་མོ་བླངས་ཏེ་ཟོས་ཡོད་པ་ཞིག་རེད།
གཞན་ཁོང་གིས་སྐུ་དྲག་ཚོ་དང་རྐུབ་ཅོག་བརྩད་པ་རེད་ཟེར་ཡང་དེ་ལ་ཁག་ཅེ་ཡོད། དེ་རྩོད་དགོས།
དྲ་གྲོགས་བོད་པ་ཚང་གུང་ཐང་ཚུལ་ཁྲིམས་ནང་མིར་འབྲེལ་འདྲིས་ཡོད་པ་འདྲ། ད་དུང་ཁྱེད་ཀྱིས་བཤད་པ་ལྟར་ན་ཁོའི་ཆུང་ད་དུང་ཡོད་པ་ཞིག་གོ་སོང་། དེས་ན་ཁོའི་ཆུང་མ་ཡོད་ཐོག་ལ་གུང་ཐང་ཚུལ་ཁྲིམས་ཀྱི་ལོ་རྒྱུས་གསལ་བོ་ཞིག་བཅར་འདྲི་བྱ་ཐུབ་ན་རབས་རེད།
ཡ་མཚན་ཞིག་ཁོས་ག་རེ་བྱས་ཡོད་ན་མེད་ན། ཁོའི་རྗེས་དྲན་ཐོག་གི་ལོ་རྒྱུས་ལྟར་ན་ཁོས་བོད་མི་གཞིས་ཆགས་དང་གསར་རྙིང་དགོན་སྡེ་མང་བོ་ཞིག་གསར་འཛུགས་དང་ཕན་བཏགས་ཡོད་པ་ཁོ་ཐག་རེད། དེས་ན་འདི་ལྟ་བུའི་མི་འཇོན་པོ་ཞིག་ལ་ག་རེ་བྱས་ནས་མི་ངན་རེ་ཟུང་གིས་ལྐོག་གསོད་བྱ་དགོས་པ་རེད། འདི་ལ་འབྲེལ་ཡོད་གཞིས་ཆགས་དང་དགོན་སྡེ། ཁོའི་ཕ་ཡུལ་ཙ་ཡུས་ཕྱོགས་མི་སྣ་ཤེས་ཡོན་དག་གིས་དོ་སྣང་གནད་དགོས་པ་ཞིག་རེད། འདི་ལྟ་བུའི་མི་ཞིག་དོན་མེད་དམར་གསོད་བཏང་ཚར་ན་ད་དུང་ཁུ་སིམ་མེར་འདུག་དགོས་དོན་ཅི་ཡིན་ནམ།
༈ ཨ་ཁུ་ཚུལ་ཁྲིམས་ནི་སྐབས་དེ་དུས་བོད་བཙན་བྱོལ་གཞུང་ལས་ཀྱང་སྐད་གྲགས་ཆེ་བའི་མི་སྣ་ཞིག་ཀྱང་ཡིན་ཚོད་འདུག ང་རང་ལོ་ན་ཆུང་ཆུང་ཡིན་ཡང་ཕ་མ་རྒན་རྒོན་སོགས་ཀྱིས་ཞལ་ནས་མི་དེ་ནི་འཇོན་ཐང་ཅན་ཞིག་དང་། ཕུག་བསམ་ཅན་ཞིག་ཡིན་པ་ཁོང་ཚོས་རྗོད་བཞིན་འདུག་ལ། ཆོས་ལུགས་དང་། ཆོལ་ཁའི་དབྱེ་བ་མེད་པར་ཀུན་དང་བསྟུན་ཏེ་ཡུལ་གྱར་བའི་བོད་པ་ཚོ་ཕྱོགས་གཅིག་ཏུ་སྤུངས་ཏེ་དགྲ་བོ་རྒྱ་མིར་ཁ་ཐད་གཅོད་རྩིས་བྱས་པ་བཤད་རྒྱུ་འདུག ཡིན་ན་ཡང་སྟབས་མ་ལེགས་པ་ཞིག་ལ་ཁོང་གི་ལོ་རྒྱུས་ཀྱི་ཤིང་སྡོང་དེ་ཚུལ་བཞིན་དུ་བཙུགས་མ་བཅུག་པར་རིན་ཐང་བྲལ་བའི་ཁོང་གི་སྐུ་སྲོག་དེ་འཕྲོགས་ཏེ། རྒྱ་མི་དགའ་རུ་འཇུག་ཡོད། དེ་ཚོ་ཚང་མའི་་རྒྱབ་ཏུ་སུ་ཡོད་བལྟ་རྒྱུ་དེ་ང་ཚོ་ཚང་མའི་ལས་འགན་ཡིན་པས་ཕྱོགས་ལྷུང་མེད་པར་གཟིགས་ནས་དྲྭ་རྒྱའི་སྟེང་བཀོད་ཐུབ་ན་ཀུན་ལ་ཕན་ཐོག་ཆེ་བར་སེམས།