ངའི་འདང་ཅན།

ཤར་ཕྱོགས་ཁུག་རྟ།
༡
སྤྱན་ཤེལ་ཕྱག་གིས་གདོང་ལ་ཐེངས་གཉིས་གཏད་སོང
ཚངས་པའི་དབྱངས་ཀྱི་གསུང་དེས སྔར་བཞིན
སྒོ་ཕྱི་མ་ནས་ཁྱེར་བའི་ངའི་ཞེད་སྣང་ གཟིམ་སྒོ་ནང་མར་ཐོལ་གྱིས་ཡལ
ཁྱེད་སྐུའི་མདུན་དུ ཕྱག་གི་དྲོད་འཇམ་འོག
ངས་རང་ཉིད་ཡུད་ཙམ་ཞིག་ལ་བརྗེད་སོང
ངའི་དྲན་པ་དང་རྣམ་རིག་ཀྱང་མི་འདུག
ངས་སྔར་བཞིན
བོད་མི་རིགས་ལ་ཁྱེད་ཀྱིས་བསབ་ཐབས་མེད་པའི་བཀའ་དྲིན་ཞིག་བཞག་པ་ཚོར་ཞིང
བཀའ་དྲིན་དེའང བཀའ་དྲིན་ཙམ་མ་རེད་ལ
དྲིན་ཆེན་པོའོ་བསམ་ནས བཀའ་དྲིན་ཆེ་བ་རེད་ཅེས་ཀྱང་མི་བསམ་མོད
རྒྱ་ནག་གི་མེ་ཏོག་མ་ལི་ཀར་བྱམས་བརྩེས་གཟིགས་འདུག་ལ
ཞལ་ཕོར་འགྲམ་གྱི་ཞལ་འདོན་སྣ་ཐུང་དེ་ ངས་གློག་བརྙན་ཞིག་ནས་མཐོང་བ་དེ་མིན་ནམ
ངས་བསམ་ན ཁྱེད་ཀྱིས་ངས་མི་མཐོང་པའི་སྤྱན་ཕྱག་མང་པོ་ཞིག་སྒུལ་གྱི་མེད་འགྲོ་བསམ་ལ
ངས་བསམ་ན ཁྱེད་ཀྱིས་ངའི་དྲན་པ་རྣམས་བཀག་སྟེ
མིག་རྡེབ་པ་ཙམ་གྱིས་ང་ལ་གང་ཡང་མ་ལྷག་པར་གསུངས་སོང་
སེམས་བདེ་མོར་བཞུགས ཡང་བསྐྱར་མཇལ་ཡོང་
ཡང་བསྐྱར་མཇལ་ཡོང ང་སྒོ་ཕྱི་མར་སླེབས་སོང
གནའ་བོའི་དགོན་པ་དེའི་དུང་སྦུགས་རྒྱ་གླིང་གིས
ང་རང་ང་དང་མི་འདྲ་བ་དེའི་ཤེད་ཤུགས་ཀྱི་པང་དུ་བསུས་བྱུང
རྨི་ལམ་ཡིན་མིན་ད་དུང་མ་ཤེས་ནའང
ཞོགས་ཀ་ཞིག་གི་མཁའ་དབུགས་ལྟར ཁྱེད་ལ་ག་ལེར་སེམས་འདི་ཐོད་པར་བཅོས་ཏེ
ཐེངས་གསུམ་གཏུག་ན་འདོད
༢
སྐྱིད་དུས་ལྷོད་དུས གནའ་བོའི་རང་གི་རི་ཆུ་ནགས་གསུམ་ཀྱང་ཡོད་ན་བསམ་ཁར
ངའི་ཧོང་ཤ་འདི་རང་གི་ཕ་སས་མི་ཁུར་སུས་འཁུར་ཀྱང་བསམས་མྱོང
ཨ་མ་ ཨ་མ་ལགས ངའི་ཕ་མ་གཉིས་ཀ་ཡིན་པའི་ཨ་མ་ལགས
འདི་རྣམ་རྟོག་ཅིག་ཡིན་ན ངོ་མ་ཞིག་ཡིན་ནམ
ལོ་སར་བཏང་བ་ནི་མ་གཞི་ནས་སྤྲོ་སྐྱིད་རོལ་བ་མིན་ཡང
ལོ་སར་ནི་ཨང་ཀི་ཞིག་ཡིན་པས་ན
ལོ་སར་རོལ་རྒྱུ་ནི་ངའི་ཨ་མ་དང་རྨོ་མོ་ཚོའི་གོན་པ་གྱོན་སྟངས་འདྲ་བོ་ཞིག་ཡིན
དགའ་དང་སྐྱོ་བོའི་གོན་པའང་གྱོན་རྒྱུ་ཡོད་པ་འདྲ་བས
ཅི་མི་སྙམ་པར་ ཁ་སང་གྲོགས་ཤ་བོས་བཤད་པ་ལྟར
ཕ་མ་གཉིས་རིམ་བསྟུད་ཕྱིན་སོང་ཚུལ་གྱི་སྒྲུང་དེས
ལོ་རྒན་དྲུག་བཅུར་ཕྱོགས་པའི་རྒྱ་གར་ཚང་གི་མགྲོན་ས་ནས
ཨ་མ་ལགས ངས་མགྲོན་པོ་ཚོའི་མི་ཚེ་ལ་འདི་ལྟར་རྣམ་རྟོག་འཁོར
ཨ་མ ཕ་ས བདག་པོ མགྲོན་པོ
༣
ངས་མྱི་སྐད་ཞིག་ཐོས་སོང ང་ལ་ ༼པ་ལགས་༽ཞེས་འབོད་པའི་མཛའ་མོས
ང་ལ་རྟག་ཏུ་མྱི་སྐད་ཁོ་ན་གསུངས
ང་སྔར་བས་མྱི་སྐད་དེས་རང་གི་མཛའ་མོར་འཁྱུད་དུ་བཅུགས་སོང
ངས་དམ་པོར་བསྡམས་པ་ཡིན ག་ལེར་ལྷོད་པ་ཡིན
མཛའ་མོས་༼ པ་ལགས ༽ཞེས་ང་ལ་འཆམ་པོ་བྱས་སོང
པ་ལགས་ནི་མཛའ་མོས་ང་རང་འབོད་སྟངས་རེད
ངས་དོན་དམ་གྱིས་མཛའ་མོ་ནི་ཅི་ཞིག་ཡིན་པ་རྟོགས་བཞིན་པ་འདྲ་ནའང
ངས་སྦི་རག་ཧུབ་རེ་མ་བཏུང་བར་ ཡི་གེར་དགའ་བའི་བློས་གྲོགས་འདི་དག་ལ་ཤོད་ནུས་སམ
ཁོང་ཚོའང ང་ལྟར་ཕ་སྐད་འདིར་འཐམས་དྲགས་ནས་མིས་གླེན་པར་རྩིས་པ་ཞེ་གཅིག་ཡིན་པས
ངའི་ཁ་ནས༼ འདོད་པའི་བསྟན་བཅོས་ ༽ཅི་ལྟར་བྲིས་སམ་ཞེས་དབང་མེད་དུ་ཤོར་སོང
ངའི་ཞེ་འདང་མཐའ་དག་གི་མཛའ་མོ་སྐད་ཅིག་མར་འཁྲིས་སུ་སླེབས་སོང
ངའི་འདང
ང་འདང་ཆེ་བའི་མཛའ་མོ
འདང་ནི་བརྩེ་བ་མ་རེད་ལ ལྟོས་བཅས་ཀྱང་མ་རེད
འདང་ནི་ནམ་ཡང་འདང་རང་རེད ངའི་འདང་གི་བདག་མོ
ངའི་གམ་དུ་ ངའི་བློས་གྲོགས་དང་དཔེ་དེབ་ཚོའི་དབུས་སུ
ཞེ་འདང་གིས་འཁྱིལ་ནས་འདུག
ཞེ་འདང་གིས་འཛུམ་ནས་བཞུགས
ངའི་འདང་ཅན་མ
༢༠༡༡། ༣། ༥། དགུང་མོར་བྲིས།