བསྟན་འཛིན་ཤེས་རབ།
འཕུར་མ་ལྡིང་གིས་བསྐྱོད་བཞིན་པའི་ཕྱེ་མ་ལེབ་དེས།
མདུན་རོལ་ཀྱི་མི་ཚོགས་སྟུག་པོའི་ཁྲོད་ནས།
རང་ཉིད་ཀྱི་སྐྲ་ལོ་ལ་ལག་ཤད་རེ་རྒྱག་བཞིན།
མཐའ་སྐོར་ལ་ཁེངས་སེམས་ཀྱིས་ལྐོག་ལྟ་རེ་བྱེད་ལ།
སྣང་ཚུལ་གཞན་ཞིག་ཡོད་ཁུལ་གྱིས་རང་ཉིད་ཀྱི་ཚོ་ཁག་ལ་སྡང་མིག་རེ་འཕེན།
ད་སོ་མར་བཏགས་པའི་དར་ལྕོག་གི་འགྲམ་རོལ་ཏུ།
ལག་གཡས་ཐོད་པར་གཏེགས་ཏེ་ཉི་འོད་འགེབ་ཚུལ་དེས།
ཕ་རོལ་གྱི་གྲིབ་འོག་ན་འགྲེང་འདུག་པའི་སྐྱེ་བོ་དེར།
རྒྱང་རིང་ནས་གྲགས་ལ་ཉེ་འགྲམ་ཞིག་ནས་གྲགས་འོངས་པའི་ཐལ་མོའི་རྡེབ་སྒྲ་དེའི་གཏང་སྙོམས་ལ་ཉན་བཞིན།
མི་ཡིས་དེ་འདྲའི་ཟློས་གར་འཁྲབ་ཤེས་ལ་མི་ལ་དེ་འདྲའི་ཚུལ་ཆོས་འགྲོ་བར་ངོ་མཚར་བཞིན།
མི་རྣམས་ཀྱི་རྟོགས་བཏགས་འདྲ་བའི་ཕ་ཡུལ་དེ་བློས་བསླངས་རེ་བྱས་ཤིང་།
སྤང་ཁུག་ཆུང་ཆུང་ཞིག་ཏུ།
ཡིད་དུ་འོང་བའི་ཕྱེ་ལེབ་ལ་ཁང་ཆུང་ཞིག་བསླེས་ཏེ།
རྡོག་སྣེ་ཐོག་བཞིན་པའི་ཕྱེ་ལེབ་དེ་སྙིམ་པས་ཐོགས་ཏེ་ནང་དུ་འཇུག་འདོད་པའི་སྣང་བ་ཞིག་བསླངས།
ཕྲ་རིག་རིག་གི་ཕྱེ་ལེབ་དེ།
བྲེལ་འཚབ་ཀྱིས་སླར་ཡང་སྔར་མལ་དུ་འོངས་ཤིང་།
ལྷོད་ལྷོད་ངང་སྐོར་ལྡིང་ཞིག་བྱས།
ཚུལ་དེ་ནི་སུ་ཞིག་གི་སེམས་ཀྱི་འཆར་སྒོ་རྟོགས་པ་དང་འདྲ་བས།
རྐང་བའི་རྟིང་སྒྲ་ལ་ཉན་བཞིན་ཕྱག་འཚལ་མཁན་དེས་བསྐྱར་ལྟ་ཞིག་བྱས་བྱུང་།
ཕྱེ་ལེབ་ཕྲ་མོ་དེ་སྔར་བཞིན་མདུན་ཕྱོགས་ན་འགུལ་གྱིན་འདུག
ཚོ་དཔོན་ཞིག་གི་འཁོར་གཏོགས་དང་འདྲ་བའི་མི་ཚོ་དེ་རང་རང་སར་འཐོར་ནས་འདུག
བར་སྲང་ན་འཕུར་གྲབས་གཤོམ་པའི་ཕྱེ་ལེབ་ཆུང་ངུ་དེ་ཡང་གར་སོང་མི་འདུག
ཁེངས་སེམས་དེ་སྐྱུག་བྲོ་བའི་གདོང་འབག་ཅིག་དང་འདྲ་བས།
དྲོད་ཁོལ་གྱི་ཁྱིམ་གཞིས་སྟོར་བའི་གཉེན་ཉེ་ཚོ།
རང་ཉིད་ཀྱི་རྒྱབ་རོལ་ཏུ་སྤྱུགས་སོང་།
ཕ་གའི་དར་ལྕོག་དེ་ཚོ་སླར་ཡང་ཕེག་ཕེག་ཏུ་བསྐྱོད་སོང་།
དར་ལྕོག་གསར་བ་འདོགས་མཁན་སླེབས་སོང་བ་ཡིན་ནམ།
མི་ཚོགས་ཀྱིས་ཡང་ཡང་ཕར་ཕྱོགས་སུ་ལྟ་བཞིན་འདུག
མཚར་སྡུག་ངོམ་པའི་ཕྱེ་ལེབ་སྐོར་ཞིག་ཕ་རོལ་ན་སྐོར་ལྡིང་བྱེད།
ཕྱི་ནང་གི་བར་ཐག་ལྷོད་མཁན་ཡིན་ནམ།