གླིང་སྒྲུང་རྩོམ་རིག་ལས་གླིང་གེ་སར་གྱི་ལོ་རྒྱུས་དཔྱད་གཞིའི་སྐོར་མྱུར་སྐྱོབ་བྱ་གལ་ཆེ་ཚུལ།

གེ་སར་ཞིབ་འཇུག་པ་རྨེ་སྲིབ་ནོར་བུས།

གཅིག གླིང་གེ་སར་གྱི་ལོ་རྒྱུས་ཀྱི་དཔྱད་གཞི་རྩ་མེད་དུ་འགྲོ་ཉེན་ཆེ་ཚུལ།

ཕྲན་གྱིས་བོད་གཞུང་ཤེས་རིག་ལས་ཁུངས་ཀྱི་སྟངས་འཛིན་འོག་གླིང་སྒྲུང་ལ་རིགས་གཅིག་རྐང་འཛིན་གྱིས་དཔྱད་ཞིབ་བྱས་པའི་རྒྱུད་རིམ་ཁྲོད་ནས། གླིང་སྒྲུང་སྒྱུ་རྩལ་རྩོམ་རིག་ཅེས་པ་འདི་མྱུར་སྐྱོབ་བྱས་ཟིན་པར་རྟོགས། དོན་གནད་དེ་ནི་བོད་ཀྱི་རྩོམ་རིག་འཕེལ་རྒྱས་ཀྱི་ངོས་ནས་བཤད་ན་དགའ་འོས་པ་ཞིག་ཡིན། འོན་ཀྱང་གླིང་གེ་སར་གྱི་དངོས་བྱུང་ལོ་རྒྱུས་ཀྱི་ཐད་ནས་བལྟས་ན་དེ་ནི་ཆེས་ཉེན་ཁ་ཅན་ཞིག་ཀྱང་རེད། ༡ ལོ་རྒྱུས་ཀྱི་འགྱུར་རིམ་དང་། གནས་རིམ། དུས་རབས་སོགས་སུ་འགལ་བའི་སྒྱུ་རྩོམ་གྱིས་གླིང་སྒྲུང་ལ་རྒྱས་སྤྲོས་བྱས་པ། ༢ གླིང་སྒྲུང་རྩོམ་རིག་ཁྲོད་ཀྱི་རྟོག་འཆར་རྩོམ་རིག་མཚོན་བྱེད་ཀྱི་འཁྲབ་སྟོན་སྣ་ཚོགས་འཁྲབ་པ། ༣ ལྷ་ཆོས་རིག་གནས་བརྗོད་གཞི་བཟུང་ནས་དངོས་ཡོད་གནས་ཚུལ་ལས་བརྒལ་བའི་བརྩམས་ཆོས་སྤེལ་བ། ༤ གླིང་སྒྲུང་རྒྱ་ནག་གི་སྐད་ཡིག་ཐོག་བསྒྱུར་ཟིན་པ་དག་ལ་གཞིར་བཅོལ་སྟེ། རྒྱའི་མཁས་པ་དག་གིས་རྒྱ་ཡུལ་གྱི་གནས་སྟངས་མཚོན་བྱེད་ཀྱི་རྒྱའི་གླིང་སྒྲུང་བརྩམ་ངེས་ཡོད་པ། ༥ ལྷག་དོན་རྒྱ་གཞུང་གིས་གླིང་སྒྲུང་ནི་རྒྱའི་ཆོས་ལུགས་དཀར་པོ་ཞེས་པའི་བྱེ་བྲག་གམ་ཆ་ཤས་སུ་འདོད་ཚུལ་བཟུང་སྟེ། གླིང་སྒྲུང་ཞིབ་འཇུག་ཚོགས་ཁག་བཙུགས་དང་འཛུགས་བཞིན་ཡོད་ལ། ལྟ་ཚུལ་དེ་འདོད་མཁན་གྱི་རྒྱ་རིགས་གེ་སར་ཞིབ་འཇུག་པའང་མང་ནས་མང་དུ་འགྲོ་བཞིན་ཡོད་པ། ༦ གནའ་བོའི་བོད་པའི་སྤྱི་ཚོགས་ཁྲོད་གླིང་སྒྲུང་ནི་དངོས་མེད་འཆར་སྒྲུང་ཁོ་ན་ཡིན་པའི་སྣང་ཚུལ་འདོད་མཁན་མང་པ་དང་། དངོས་བྱུང་ཡིན་པའི་གནས་ཚུལ་རྟོགས་མཁན་ཉུང་བ། ༧ དེང་གི་ཁྱོན་ལ་གླིང་གེ་སར་ནི་ལོ་རྒྱུས་མི་སྣ་ཞིག་ཏུ་བགྲེང་མཁན་གྱི་དཔྱད་ཞིབ་པ་མང་ནའང་། རང་ཕྱོགས་གླིང་སྡེ་འཛིན་བའི་ལྟ་ཚུལ་དང་འདོད་ལུགས་མི་མཐུན་པའི་དབང་གིས་དཔྱད་ཞིབ་ཀྱི་བློ་རྒྱ་ཆུང་དུ་གྱུར་བ། ༨ སྐབས་འཚོལ་བ་འགའ་རེས་ལོ་རྒྱུས་ཞིབ་འཇུག་པ་དང་མཁས་དབང་རྣམ་པའི་དཔྱད་ཞིབ་ཀྱི་མདུན་ལམ་ལ་གཡོ་ཁྲམ་གྱིས་གནོད་སྐྱོན་བྱས་པ་དང་བཅས་གླིང་སྒྲུང་རྩོམ་རིག་དང་འབྲེལ་བའི་སྤྱི་ཚོགས་ཀྱི་འགུལ་ཤུགས་ཁྲོད། གླིང་གེ་སར་གྱི་ལོ་རྒྱུས་དཔྱད་གཞི་དེ་ཁྱུར་མིད་དུ་འགྲོ་ཉེན་ཆེ་འདུག

གཉིས། གླིང་གེ་སར་གྱི་ལོ་རྒྱུས་དཔྱད་གཞིའི་སྐོར།

གླིང་གེ་སར་བྱོན་དུས་གསལ་བའི་ཡིག་རྙིང་ཁག་དང་། གླིང་གེ་སར་བྱོན་ཡུལ་གསལ་བའི་ས་ཆ། གླིང་གེ་སར་གྱི་གནས་ཡུལ་གསལ་བའི་མཁར་ཤུལ། གླིང་གེ་སར་གྱི་མངའ་ཐང་གསལ་བའི་སྡེ་ལྷག གླིང་གེ་སར་གྱི་མཛད་ཕྱོགས་གསལ་བའི་གནའ་རྫས། གླིང་གེ་སར་གྱི་དབང་ཤུགས་གསལ་བའི་ས་གནས་ཁག གླིང་གེ་སར་གྱི་ངག་རྒྱུན་ལོ་རྒྱུས་གསལ་བའི་གླིང་སྒྲུང་། གླིང་སྒྲུང་ལ་ཡང་བཤད་སྒྲུང་དང་། བབས་སྒྲུང་། གཏེར་སྒྲུང་། པྲ་ཕབ་ཀྱི་སྒྲུང་དང་ བཅས་གླིང་གེ་སར་གྱི་ལོ་རྒྱུས་ཀྱི་དཔྱད་གཞིའི་རྒྱུ་ཆར་གལ་འགངས་ཆེ་བ་མ་ཟད། བོད་སིལ་དུས་ཀྱི་ལོ་རྒྱུས་གསལ་རྟོགས་ཡོང་ཐབས་སུ་ཆེས་གལ་འགངས་ཆེ་བ་ཞིག་ཡིན་པས། འདི་དག་འཚོལ་ཞིབ་དང་། གཅེས་སྐྱོང་བདག་གཉེར་བྱ་གལ་ཆེ་འདུག་སྙམ།

གསུམ། གླིང་གེ་སར་གྱི་ལོ་རྒྱུས་དཔྱད་གཞིའི་སྐོར་གྱི་དགེ་ཕན།

གླིང་གེ་སར་གྱི་ལོ་རྒྱུས་དཔྱད་གཞིའི་རྣམ་གྲངས་འདི་དག་གི་ཐོག་ནས། གླིང་གེ་སར་ནི་ལོ་རྒྱུས་མི་སྣ་ཞིག་ཡིན་མིན་གྱི་གནས་ལུགས་གསལ་རྟོགས་འབྱུང་ཐུབ་པ་དང་། གླིང་དང་འབྲེལ་བའི་སྡེ་ཁག་རེ་རེ་དང་། ཚོ་ཁག་རེ་རེ། དཔོན་ཁག་རེ་རེ། རྒྱལ་ཕྲན་རེ་རེ་མིའི་རིགས་ཀྱི་རུས་ཁུངས་ཆགས་ཚུལ་དང་། སྤྱི་ཚོགས་ཀྱི་འཕེལ་རིམ། འཚོ་བའི་གནས་སྟངས། བསམ་བློའི་འདུ་ཤེས་སོགས་ཤེས་རྟོགས་འབྱུང་ཐུབ། འདི་ལྟར་དཔྱད་ཞིབ་བྱས་པའི་ཤེས་རྟོགས་དེས་བོད་ཀྱི་ལོ་རྒྱུས་ཀྱི་དོན་གནད་གསེལ་དཀྲོལ་དང་དོན་དངོས་གསལ་རྟོགས་འབྱུང་ཐུབ་པའི་དགེ་མཚན་ལྡན།

མཐའ་དོན།

བོད་རྒྱལ་ཁབ་ཆེན་པོ་ཆགས་འཇིགས་ཀྱི་གནས་སུ་ལྷུང་བ་དང་། བོད་མི་རིགས་ཀྱི་ཡ་ང་བའི་སྐྱོ་སྡུག་གི་གནས་ཚུལ་ལ་བལྟས་ན། ངས་གླིང་སྒྲུང་གི་དོན་གནད་ཞིག་བཤད་ཚོད་མིན། འོན་ཀྱང་གླིང་གེ་སར་ལོ་རྒྱུས་མི་སྣ་ཞིག་ཡིན་པའི་ལྟ་ཚུལ་གྱི་ཐོག་ནས་བཤད་ན། གླིང་གེ་སར་གྱི་ལོ་རྒྱུས་ནི་བོད་མིའི་ལོ་རྒྱུས་ཡིན། ད་དུང་གླིང་སྒྲུང་ནང་དུ་ལོ་ཆིག་སྟོང་ཡས་མས་ཀྱི་བོད་མིའི་ལོ་རྒྱུས་ཀྱི་འགྱུར་རིམ་དང་། གནས་རིམ། བྱུང་རིམ་མང་བོ་ཞིག་གསལ་ཕྱིར་གླིང་གི་ལོ་རྒྱུས་ཀྱིས་བོད་མིའི་ལོ་རྒྱུས་ཀྱི་དོན་གནད་ལ་ཕན་ཐོགས་ཆེན་པོ་ཡོད།
སྤྱིར་འདས་དོན་གྱི་ལོ་རྒྱུས་མི་གསལ་ན། འབྱུང་འགྱུར་གྱི་ཁ་ཕྱོགས་ཀྱང་མི་གསལ་ཞིང་། འདས་མ་འོངས་གཉིས་ཀྱི་དོན་གནད་མི་གསལ་བའི་དབང་གིས། ད་ལྟའི་བྱེད་ཕྱོགས་ཡང་རྙོག་འཛིངས་ཅན་ཡིན། དེས་ན་ང་ཚོས་ཡང་དག་པའི་ལོ་རྒྱུས་ཤིག་ལ་གཞིར་བཅོལ་དེ་བོད་མའི་བདེ་དོན་གྱི་ཕྱིར་དུ་འཐབ་རྩོད་ཀྱི་རྣམ་གྲངས་ཅི་རིགས་ཀྱི་སྒོ་ནས་འགུལ་བསྐྱོད་བྱ།