ཞབས་རྗེས

-འཚོལ་སྙེག་དང་བསམ་གཞིགས

དེ་ཉིད་བསོད་རྒྱལ

༡

ས་གཞི་ལ་ཁ་བས་གཡོགས་པའི་ནངས་མོ་དེར
ནམ་མཁའ་ནི་མདང་ཁ་བ་བབས་པ་དང་ཁྱོན་ནས་མི་འདྲ
སྔོ་སང་སང་། ཧ་ཅང་གི་འབྱམས་སུ་ཀླས
དེ་མཛེས་སྡུག་ཅིག་ཡིན་པས
མཛེས་སྡུག་གི་སྔ་རོལ་དེར་ངས་བསམ་བློ་ཞིབ་པར་བཏང་བ་ཡིན

ཁ་ན་རླངས་པ་དཀར་ལྷོག་ལྷོག་ཏུ་འཕྱུར་ཞོར
ལག་ཟུང་ཁ་ལ་ཡང་ཡང་དུ་ཁྱེར་བཞིན
རྐང་པ་ས་ལ་ཐཱག་ཐཱག་ཏུ་རྡེབ་ཞོར
ང་། དར་ལྕོག་མཐོང་སའི་རྒྱབ་རི་ཡི་ལམ་ལ་ཞུགས་པ་ཡིན

དེ་རིང་ཚེས་བཅོ་ལྔ་ཡིན་པས
རྒྱབ་རི་ལ་གསང་ཕུལ་པའི་ཉིན་མོ་ཡིན
ང། ཡར་ལངས་བ་འཕྱི་དྲགས་འདུག
ཁ་བ་ལ་རྐང་རྗེས་ཤིག་པར་ཟིན་འདུག

དྲང་མོར་བཤད་ན། རྐང་རྗེས་དེ་དད་ན
རང་ཉིད་ཀྱི་རྐང་བ་མི་གྲང་ལ་འགྲོ་བར་བདེ་མོད
དོན་གྱིས། དེ་གཞན་གྱི་རྐང་རྗེས་རེད
རང་ཉིད་ལ་རང་ཉིད་ཀྱི་རྐང་རྗེས་མཐོང་བའི་ས་ཁྲ་ཞིག་མཁོ་ཨང
ས་ཁྲ་དེ་ནི་ངས་རྟ་པར་སེམས་ཀྱི་མེ་ལོང་ལྟ་བུ་ཞིག་ལ་སྙམ་བཞིན་ཡོད
ང་། ལམ་ཁ་དེ་ནས་་ཡུན་རིང་ལ་ལངས་ནས་བསྡད་པ་ཡིན

མཇུག་མཐར་ངའི་སྙིང་གི་ཁ་གྲགས་སོང
རྐང་རྗེས་དེ་ལྟ་བཞིན་ལྟ་བཞིན
གསར་ཏུ་རང་ཉིད་ཀྱི་རྐང་རྗེས་ཤིག་པར་ཏེ་ལམ་ལ་ཆས

ངའི་ལྷམ་ནང་ལ་ཁ་བས་ཁེངས་སོང
ངའི་རྐང་པ་ཆབ་རོམ་ལས་ཀྱང་འཁྱགས་སོང
ངའི་པུས་མོ་རྡོ་ལ་རྡེབ་སོང
ངའི་ལག་གི་གསང་རྩི་ས་ལ་ལྷུང་སོང
ངའི་ལག་གི་གསང་ཆང་ཐང་ལ་བྱོ་སོང
ངའི་རྐང་པ་ད་དུང་མདུན་ནས་མདུན་དུ་བསྐྱོད

ཁོ་ཚོའི་རྐང་རྗེས་ནི་འཕར་བའི་རྐང་རྗེས་དང་འདྲ…………

འདི་ལྟར་རྒྱབ་རི་སྒང་ལ་ཐོན་དུས
མི་མང་པོ་གདའ། གསང་ད་དུང་ཕུལ་མི་འདུག
ང་རང་ཤིན་ཏུ་མཚར་བཞིན། དབུགས་འཚང་འཚང་གིས
ལག་གཡོན་པ་དཔྱི་མགོར་བཞག་ཏེ
འདི་འདྲའི་མི་ཚོགས་ཆེན་པོ་ལ
རྐང་རྗེས་གཅིག་མ་གཏོགས་མེད་པ་འདི་ཅི་ཡིན་ནམ་སྙམ

ཁོ་ཚོ་རང་ཉིད་ལ་མ་དགའ་བ་ཡིན་ནམ
ཁོ་ཚོ་ཕ་རོལ་ལ་དུངས་དྲགས་པ་ཡིན་ནམ
ཁོ་ཚོ་ལ་གཞན་གྱིས་བཙན་བྱས་པ་ཡིན་ནམ
ཁོ་ཚོས་ལམ་འདི་འདི་ལྟར་འདེནས་པ་ཡིན་ནམ

………………. …….. .. .

ཉི་མ་རི་རྩེ་ལ་ཤར་སོང

དཀར་སོབ་སོབ་ཀྱི་གསང་དུ་ལྷོག་ལྷོག་གིས་དགུང་ལ་འཕྱུར

༢

གསང་ཕུལ་ཚར་སོང་། ཕྱིར་ལོག་པའི་ལམ་བར་ཏུ

ཁོ་ཚོས་ངའི་རྐང་རྗེས་ལ་མཛུབ་མོས་ཀེར་ཏེ

ལ་ལས་འཕྱ་དགོད་ཀྱིས་སྐད་སྒྲ་སྒྲོགས

ལ་ལས་དེ་སུ་ཡི་ཡིན་མིན་གྱི་ཕན་ཚུན་ལ་དྲི་བ་འདྲི

ལ་ལས་བླུན་པོ་ཁ་ནག་འདི་ཡི་རང་སྡུག་རང་གིས་ཉོས་འདུག་ཟེར

ལ་ལས་སྙིང་རྗེ་ཁོ་ལ་རོགས་པ་ཡོད་ས་མ་རེད་ཟེར

ལ་ལས་ཞིབ་ལྟ་དང་ཡང་ལྟ་ཡང་ཡང་བྱེད

གང་ལྟར་ཀྱང་། སྐབས་དེ་དུས

ངས་རང་ཉིད་ཀྱི་རྐང་རྗེས་གསལ་བོར་མཐོང་སོང

ལ་ལ་ཧ་ཅང་གིས་དྲང་། ལ་ལ་ཧ་ཅང་གིས་འཁྱོགས

ལ་ལ་གསལ་ཞིང་། ལ་ལ་ཡང

སྔོན་ལ་གོམ་པ་ཇི་ལྟར་སྤོས་ཡོད་ཀྱང

ཤུལ་ཀྱི་རྐང་རྗེས་རེ་རེ་ངང་གསལ

ཁོ་ཚོ་ལ་རང་ཉིད་ཀྱི་རྐང་རྗེས་མེད་ལ

གཞན་གྱི་རྐང་རྗེས་སྨྲ་བའི་ཁ་ཡོད

རང་ཉིད་ལ་རང་ཉིད་ཀྱི་རྐང་རྗེས་ཡོད་ལ

གཞན་གྱི་རྐང་རྗེས་ལ་ལྟ་བའི་མིག་ཀྱང་ཡོད

ཁོ་ཚོས་ལོ་རབས་ནས་ལོ་རབས་ལ

འདི་ལྟར་གསང་ཕུལ་གྱིན་ཡོད

གསང་ཕུལ་བ་ལ་དྲོད་ཡོད་ཀྱང

རྐང་རྗེས་ལ་མིག་མེད་ཐལ

རང་ཉིད་ཀྱི་རྐང་རྗེས་ཇི་ལྟར་ཡང

རང་ཉིད་ཀྱི་རྐང་རྗེས་ཡིན་པས

དེ་རང་ཉིད་ཀྱིས་མཐོང་ན

སང་ཉིན་གྱི་གོམ་པ་འོད་ལྟར་གསལ

དེ་རྒྱལ་ཁ་ཤིག་ཅི་ལ་མིན

དེ་གསར་བརྐོ་བའི་གོ་རིམ་དང་འདྲ

དེ་བས། ངས་རང་ཉིད་ཀྱི་རྐང་རྗེས་བཙལ་ཏེ་རྙེད་ཐབས་བྱས

༣

ཕྱིར་སྔོན་མ་དར་ལྕོག་མཐོང་སའི་ལམ་ཁ་དེར་སླེབས་དུས

ཕྱིར་དར་ལྕོག་མཐོང་བའི་རྒྱབ་རི་ལ་ལྟ་དུས

ཧ་ལམ་ཉིན་གུང་ལ་ཐོན་འདུག་པས

ཁ་བ་ཇི་ལྟར་དཀར་ཡང་། ཇི་ལྟར་མཐུག་ཀྱང

ཆུ་ཡིན་པའི་རང་གཟུགས་མངོན

དེ་དུས། ཁོ་ཚོའི་རྐང་རྗེས་ལ་འདམས་འབག་ལངས་འདུག

དེ་དུས། རང་ཉིད་ཀྱི་རྐང་རྗེས་ལ་ཆུ་ཡིས་ཁེངས་འདུག

དེ་དུས། ངས་ཁོ་ཚོའི་རྐང་རྗེས་མཐོང་ཚར་སོང

དེ་དུས། ངས་རང་ཉིད་ཀྱི་རྐང་རྗེས་ཀྱང་མཐོང་ཚར་སོང

དེ་དུས། ཁོ་ཚོས་གཞན་གྱི་རྐང་རྗེས་མཐོང་ཡོད་ལ

དེ་དུས། ཁོ་ཚོས་རང་ཉིད་ཀྱི་རྐང་རྗེས་མཐོང་མེད

༤

ང་ནང་ལ་ཅཱལ་ཅཱལ་ཅཱལ་རྒྱུགས་ནས་སོང་བ་ན

སྤོ་བོས་ང་ལ་མོག་མོག་ཚ་བོ་ཚ་བོ་བཟོས་ནས་འདུག

ལམ་སང་ང་རང་མལ་ས་དྲོན་མོ་ནས་སྡོད་ཟེར་ཏེ

ཇ་འོ་མ་དང་མོག་མོག་ཚ་བོ་རེ་རེ་ངང་ང་ལ་སྤྲད་སོང

ང་། ཇི་འདྲའི་སྐྱིད་ཨང་། དགའ་ཨང་། སྐབས་དེར

འོན་ཀྱང་། སྤོ་བོས་ང་རང་གསང་ཕུལ་བར་ཇི་ལྟར་སོང་མིན་མི་ཤེས

དྲང་མོར་བཤད་ན། ནངས་མོ་དེར

གངས་ཤུལ་འཁྱགས་ཟེར་བ་ལྟར་ཧ་ཅང་གིས་འཁྱགས

ཡིན་ན་ཡང་། ང་རྒྱབ་རི་ལ་གསང་ཕུལ་དུ་མ་སོང་ན་མི་ཉན

སྤོ་བོ་ཡང་མི་འཐད་ཁོ་ཐག་ཡིན

དེ་རིང་། ཁྱིམ་མི་རེ་རེ་ངེས་པར་རྒྱབ་རི་ལ་ཕེབས་དགོས

དོན་གྱིས། འཛོམས་ཀྱང་འདུག

དེ་ང་ཚོའི་སྲོལ་རྒྱུན་ཞིག་ཡིན

ང་ཚོ་ཚང་མ་བླ་རི་ལྟ་བུའི་རྒྱབ་རི་ལ་གསང་ཕུལ་དུ་སོང་ཚར་བ་རེད

ཁོ་ཚོ་ལ་ངོས་མི་ཟིན་པའི་མཐུན་མོང་གི་རྐང་རྗེས་ཡོད

རང་ཉིད་ལ་ངོས་ཟིན་པའི་རང་ཉིད་ཀྱི་རྐང་རྗེས་ཡོད

རྗེས་ནས། ཁོ་ཚོ་གཅིག་པུ་གསང་ཕུལ་དུ་འགྲོ་མི་ཤེས

རྗེས་ནས། རང་ཉིད་ཁོ་ན་གསང་ཕུལ་དུ་འགྲོ་ཤེས

ཉིན་མ་གཅིག་འདི་ལྟར་འཇའ་སོང

ཨ་མས་བསྐོལ་བའི་འཐེན་ཐུག་རྒྱགས་སེ་འཐུང་སྟེ

སྤོ་བོས་ལས་བའི་མལ་ཁྲི་ལ་ལོག་ནས

ཨ་ཕས་བཟོས་བའི་ཉལ་ཐུལ་དེ་རྒྱབ་ལ་གོན་ཏེ

ཕུ་བོས་ཉོས་བའི་སྔས་འབོལ་ལ་སྙེས་ནས

དལ་ལྷོད་ལྷོད་། འཛུལ་དམུལ་དམུལ་ངང

བདེ་བར་གཉིད་ལ་ཤོར། སྐྱིད་པར་གཉིད་ལ་ཤོར

རྨི་ལམ་ན། ངས་རང་ཉིད་ཀྱི་རང་བཙན་ད་དུང་རྩོད་ཀྱིན་གདའ

རྨི་ལམ་ན། ངས་རང་ཉིད་ཀྱི་རྐང་རྗེས་ད་དུང་འཚོལ་གྱིན་གདའ

༥

ཕྱི་ཉིན་ཞོགས་པར་ལངས་མ་ཐག

གྲོང་པ་ འདི་ལ་རྐང་རྗེས་གཅིག་མ་གཏོགས་མེད་པའི་རྒྱུ་མཚན

ངས་བརྩེ་བའི་སྤོ་བོ་ལ་དྲིས་བ་ཡིན

སྤོ་བོས་རྐང་རྗེས་དེ་སྡེ་དཔོན་གྱི་རྐང་རྗེས་རེད

ཕ་མས་ཡང་མས་ནས་དེ་ལྟར་རེད

དེ་ནས་རྒྱབ་རི་ལ་འགྲོ་སའི་ལམ་འདི་གྲུབ་པ་རེད

དེ་ན་ཉེན་ཁ་དང་འཇིགས་ཡེར་ཁྱོན་ནས་མེད་ཟེར

སྐབས་དེར། ང་ལ་སེམས་ཁྲལ་ཅིག་ལངས་སོང

སྐབས་དེར། ང་ལ་ཐེ་ཚོམ་ཞིག་ཀྱང་སྐྱེས་སོང

……. …. ….. … .. .

…….. …. ……….

༦

ལོ་ཤས་འདས་སོང

ཁྲུང་ཁྲུང་ལྷོ་ལ་གཤར་གྱིན་པའི་ཉིན་མོ་ཞིག་ལ

སྡོང་ལོ་ས་ལ་ཟགས་ཀྱིན་པའི་ཉིན་མོ་ཞིག་ལ

རླུང་བུ་སིལ་སིལ་གཡུགས་བཞིན་པའི་ཉིན་མོ་ཞིག་ལ

ས་གཞི་འདི་ཡིས་མྱ་ངན་ཐེངས་ཤིག་བྱ་བར་ཚུགས

ས་སྲོད་དེར། དར་ལྕོག་ཐཱག་ཐཱག་ཏུ་བསྐྱོད་ཀྱིན་གདའ

ཐོལ་བྱུང་གིས་གོ་ཐོས་སུ། སྐད་ཆ་ན་མིག་ཆུ་ཡིས་འཚང་ཤུགས་ཤུགས

ཐོལ་བྱུང་གིས་ཚོར་བ་ལ། སྙིང་གསེང་ན་སྡུག་བསྔལ་གྱིས་སྐྱ་ལོག་ལོག

དེ་གཏན་ངན་ཞིག་ཅི་ལ་མིན

སྡེ་དཔོན་གཏན་དུ་གཉིད་སོང་ཟེར

ལྷིང་འཇགས་ཀྱི་རི་གྲོང

ལྷིང་འཇགས་ཀྱི་ཁུག་སོ་ན་དུ་ཁུང་གི་དུ་བ་ཡ་ལ་ཡང་བོར་རྒྱུ

དར་ལྕོག་རླུངགིས་བསྐྱོད་པའི་ཐཱག་སྒྲ

སུ་ཞིག་གིས་འགྲམ་ལྕག་ལ་གཞུས་བ་དང་འདྲ

མིག་ཆུ་ཐོར་བ་ནི་ཇི་འདྲའི་ཁུ་སུམ

ངུ་སྐད་ཤོར་བ་ནི་ཇི་འདྲའི་ཉམ་ཆུང་ཨང

༧

ཉིན་དེར། ལོ་དེ་ཡི་ཟླ་དེ་ཡི་ཚེས་བཅོ་ལྔ་རེད

ཐོ་རངས་ཀྱིས་ང་བསླངས་སོང་། སྲོལ་རྒྱུན་ལྟར

ང་། བླ་རི་ལྟ་བུའི་རྒྱབ་རི་ལ་གསང་ཕུལ་དུ་སོང་བ་ཡིན

ལམ་བར་ནས་མི་གཅིག་ལ་ཡང་འཕྲད་མ་སོང

རྒྱབ་རི་ལ་སླེབས་དུས། སྔོན་མ་ལྟར་མི་ཚོགས་མི་འདུག

ཁུ་སུམ་སུམ། རང་ཉིད་ཁོ་ནས་གསང་ཞིག་ཕུལ་བ་ཡིན་མོད

སྔོན་མ་ལྟར། གསང་ལ་དུ་བ་དང་དྲོད་ཁོལ་མི་འདུག

སྣང་ཚུལ་དེར། ང་ཁྱོན་ནས་ཧང་མ་སངས

སྣང་ཚུལ་དེས། ངའི་སེམས་པ་རྨང་ནས་སྐྱོ་སོང

སྣང་ཚུལ་དེས། ང་སེམས་ཁྲལ་གྱིས་མནར་སོང

རྒྱབ་རི་ལ་གསང་ཆད་འགྲོ་སྙམ་པའི

ཕྱིར་ལོག་པའི་ལམ་བར་ཏུ

སྡེ་དཔོན་དྲན་བཞིན་དྲན་བཞིན

སྡེ་དཔོན་འདི་ལྟར་བཞུད་པ་ལ་ཡིད་མ་ཚིམ

སྤུན་ཟླ་དྲན་བཞིན་དྲན་བཞིན

སྤུན་ཟླ་ཚོ་འདི་ལྟར་མ་ཕེབས་པ་ལ་སེམས་པ་སྐྱོ

སྡེ་དཔོན སྡེ་དཔོན་ཨང

སྤུན་ཟླ སྤུན་ཟླ་ཨང

༨

ང་། ནང་ལ་དལ་ཅག་གེ་སླེབས་དུས

ཆུང་མ་གཟུགས་མཐོང་བརྙན་འཕྲིན་ལ་འཁོར་འདུག

བུ་དང་བུ་མོས་གཡས་གཡོན་ནས་ཕར་རྒྱགས་ཚུར་རྒྱུགས་ཀྱིས

ཨ་ཕ་ཨ ་ཕ་ཨ་ཕ་ཟེར

དྲན་ངོགས་སུ་ཇ་འོ་མ་དང་མོག་མོག་ཚ་བོ་

ད་དུད་ཉན་ན་སྤྲོ་བའི་སྤོ་བོའི་གནའ་གཏམ་དག

གློག་བརྙན་ལྟར་འཆར་བྱུང

སེམས་པ་འདི་སྔར་ལས་སྐྱོ་སོང

ཁུ་སུམ་སུམ། སྒེའུ་ཁུང་གིས་ང་ལ་ལག་གཡུགས་བྱེད

ལྷིང་འཇགས་སེ། རྒྱང་རིང་གིས་ང་ལ་མིག་བརྡ་བྱེད

ཐོལ་གྱིས། རླུང་བུ་ཞིག་སྒེའུ་ཁུང་ལ་འཛུལ་ཏེ

ང་། བསམ་གཞིགས་ཀྱི་ཁྲོམ་་པ་ལས་ཡར་ལ་འཐེན

ང་། བྲལ་འཚུབ་ཀྱིས་ཁེངས་ཏེ། ལམ་སང

ཕྲུ་གུ་གཉིས་བོད་ཡིག་སློབ་འབྲིང་ལ་བརྫངས་བ་ཡིན་མོད

འཕྱི་དྲགས་སོང་སྙམ་པའི་འགྱོད་སེམས་ཀྱང་རབ་ཏུ་ཆེ

མཚན་མོ་དེར། ང་གཉིད་གཏན་ནས་ཁུག་ཐུབ་མ་སོང

ཡང་བསྐོར་དང་བསྐྱར་བསྐོར་གྱིས། བློ་ངོགས་སུ

རྒྱབ་རི་དང་རང་ཉིད་ཀྱི་རྐང་རྗེས

སྡེ་དཔོན་དང་རང་ཉིད་ཀྱི་སྤུན་ཟླ

ད་དུང་། ཨ་ཕས་བཟོས་བའི་ཉལ་ཐུབ་དང

སྤོ་ བོས་ལས་བའི་མལ་ཁྲི། ཕུ་བོས་ཉོས་བའི་སྔས་འབོལ

ཨ་མས་བསྐོལ་བའི་འཐེན་ཐུག་བཅས་རེ་རེ་ངང་ཤར་འོངས

སྦྲགས། ན་ཟུག་དང་སྐྱོ་གདུང་ལྷག་མ་ཞིག་གིས

སེམས་པ་མཐའ་དག་སྡུག་ལ་སྦྱར

ལུས་པོ་ཧྲིལ་བོ་ངལ་གྱིས་མནར

མཇུག་མཐར། ཨུ་ཚུགས་ཀྱིས་གཉིད་ལ་ཤོར

མཇུག་མཐར། མིག་ཆུ་ལ་བསྡོངས་གཉིད་ལ་ཤོར

རྨི་ལམ་ན། རང་ཉིད་ཀྱི་རང་བཙན་གྱི་དར་ཆ་དགུང་ན་ལྷབ་ལྷུབ་ཏུ་བསྐྱོད

རྨི་ལམ་ན། ཕྲུ་གུ་གཉིས་སོ་སོ་ན་རྒྱབ་རི་ལ་གསང་ཕུལ་དུ་འགྲོ་བཞིན་གདའ