ང་ནི་ནམ་རྒྱུན་བོད་མིའི་སྐྱིད་སྡུག་ལ་སེམས་ཁུར་བྱེད་པའི་གྲྭ་རྐྱང་དཀྱུས་མ་ཞིག་དང་། རང་ནུས་གང་ཡོད་ཀྱིས་མི་རིགས་ཀྱི་ཆེད་དུ་ཞབས་ཞུ་ཕྲན་བུ་ཙམ་སྒྲུབ་མྱོང་མཁན་ཞིག་ཀྱང་ཡིན། ཡིན་ནའང་། ཁ་སང་དེ་རིང་གི་བོད་ནང་གི་ན་གཞོན་ཤེས་ཡོན་ཅན་གཙོས་བོད་མི་ཡོངས་ཀྱི་སེམས་ཤུགས་དང་ཁ་ཡོད་ལག་ཡོད་ཀྱིས་ལག་ལེན་བྱེད་སྟངས་སོགས་ལ་བལྟས་པ་ཡིན་ན། ང་ཚོ་ལ་རེ་བ་དང་། ང་ཚོས་ལོ་མང་རིང་དཀའ་ལས་རྒྱབ་པའི་ལས་དོན་ལ་རེ་འབྲས་ཡོད་པ་གདོན་མི་ཟ་སྙམ། རང་ཉིད་ཀྱི་བསམ་བློའི་སྟེང་ནས་བཤད་ནའང་མི་རིགས་ཀྱི་གནད་དོན་ངོ་ཤེས་པ་དང་རྒྱུས་ཡོན་ཐོབ་པ་ནས་བཟུང་། རང་གནས་སའི་ཁོར་ཡུག་ཆུང་ཆུང་དེ་ནས་ལས་དོན་ཕྲན་བུ་ཞིག་ནས་འགོ་བརྩམས་ཏེ། མི་རིགས་འདྲ་མཉམ་དང་། ཁེ་ཕན་རང་དབང་། དམངས་གཙོ། དད་མོས་རང་དབང་། སྨྲ་བརྗོད་རང་དབང་སོགས་ཀྱི་ཆེད་དུ་ཐེངས་མང་པོར་སྐད་འབོད་ཞུས་པ་ཡིན། ལྷག་པར་དུ་རང་གནས་སའི་ཁོར་ཡུག་ཆུང་ས་དེ་ནས་མི་རིགས་ཀྱི་རིག་གཞུང་དང་སྐད་ཡིག་གི་རིན་ཐང་དེ་མང་ཚོགས་དཀྱུས་མ་རྣམས་ལ་ངོ་སྤྲོད་ཞིབ་རྒྱས་སུ་བཤད་ནས་མི་རིགས་ལ་བགས་ཆགས་ཟབ་མོ་འཐེབས་སུ་བཅུག་པ་ཡིན། དེ་འདྲའི་རྒྱུ་ཚོགས་ཆུང་ཆུང་སྒྲུབ་པའི་ཕན་འབྲས་ལའང་ཕ་ཡུལ་རེབ་གོང་ཡུལ་དུ་མི་རིགས་ཀྱི་ལས་དོན་ཆེད་མདོ་སྨད་ཡུལ་དུ་ཆེས་ཐོག་མའི་སྒྲོན་མེ་ཐེངས་མང་བསྒྲོན་མྱོང་། དེ་དང་ཕྱོགས་མཚུངས་སུ་བོད་ཡུལ་དུ་མི་རིགས་ཀྱི་ལས་དོན་ཆེད་སེམས་ཁུར་དང་ཕྱག་ལས་གནང་མཁན་ལོ་རེ་ནས་ལོ་རེར་ཇེ་མང་དུ་འགྲོ་བཞིན་ཡོད་པ་མངོན་གསལ་དོད་པོ་རེད། དཔེར་ན། དྲ་ལམ་དང་། དུས་དེབ། བོད་མི་རེ་ཟུང་གི་མི་ཚེ་ལོ་རྒྱུས་ཁག་ཏུ་མངོན་ལྐོག་མེད་པར་བོད་མིའི་གནས་ཚུལ་གསལ་བོ་བརྗོད་ཐུབ་པའི་སྙིང་སྟོབས་ཆགས་ཡོད། རྒྱུ་མཚན་དེའི་ཕྱིར། ང་ཚོ་ཡིད་མ་ཆད་ན། ང་ཚོ་ལ་རེ་བ་ཡོད། ཡིན་ནའང་། རྒྱལ་ཁབ་དང་། མི་རིགས། མི་སྒེར་གཞན། ད་དུང་དཀོན་མཆོག་མཁྱེན། རྒྱལ་བ་རིན་པོ་ཆེ་མཁྱེན་ཞེས་པའི་རེ་བ་གང་ཡོད་གཞན་ལ་མ་བཅོལ་བར་རང་སྟེང་ནས་ཁ་ཡོད་ལག་ཡོད་ཀྱིས་ལས་དོན་སྒྲུབ་རྒྱུ་གལ་ཆེ་སྙམ། རེ་བ་ཆེ་ཤས་ཞིག་ཡོད་པ་ནི། རྒྱལ་ཁབ་ཕྱི་ནང་གཉིས་ཀར་ཡོད་པའི་བོད་མི་རྣམས་ཀྱིས་མི་རིགས་སྤྱིའི་ལས་དོན་ཐད་ནས་འབྲེལ་ལམ་གནང་རྒྱུ། དཔེར་ན། རྒྱལ་སྤྱིའི་རང་དབང་དྲ་ལམ་སྟེང་ནས་བོད་ཕྱི་ནང་གཉིས་ཀའི་ན་གཞོན་ཤེས་ཡོན་ཅན་རྣམས་ཀྱིས་མི་རིགས་ལ་བཅངས་པའི་ལྟ་ཚུལ་ཐོག་ནས་བགྲོ་གླེང་གནང་རྒྱུ་དང་། དེ་འདྲ་བའི་རྒྱུ་ཚོགས་གཤིན་པོའི་སྟེང་ནས་རྒྱལ་ཁབ་ཀྱི་རྩ་ཁྲིམས་དང་མཐུན་པར་དཔལ་འབྱོར་དང་། ཁྲིམས་ལུགས། འཕྲོད་བསྟེན། ཁོར་ཡུག་སྲུང་སྐྱོབ། ཆབ་སྲིད་སོགས་ཀྱི་ཤེས་བྱ་དྲིལ་བསྒྲགས་བྱེད་སའི་ཐེབས་རྩ་ཚོགས་པ་གསར་འཛུགས་གནང་རྒྱུ་ཁ་སང་དེ་རིང་གི་དུས་འདིར་ཧ་ཅང་གི་ཁ་ཚ་དགོས་གཏུགས་སུ་གྱུར་ཡོད། གཙོ་བོ་རྒྱལ་ཁབ་ཕྱི་ནང་གཉིས་ཀའི་བོད་མི་རྣམས་ཀྱིས་རང་ཉིད་ལ་འོས་པའི་ལས་དོན་མ་འཕྱུག་པའི་སྒོ་ནས་གོམ་པ་ཆུང་བགྲོད་བྱས་ཚེ། ང་ཚོ་ལ་བདེན་མཐའ་སེལ་བའི་སྐལ་བཟང་གི་ཉི་མོ་ཞིག་འཆར་བར་ཡིད་ཆེས་བརྟན་པོ་ཡོད། ང་ཚོ་ཚང་མ་དགའ་འོས་པའི་རླབས་ཆེན་གྱི་གཏམ་བཟང་ཞིག་ཡོད་པ་ནི་ལོ་རེ་ནས་ལོ་རེར་བཞིན་བོད་མི་རྣམས་ཀྱིས་མི་རིགས་ལ་བཅངས་པའི་གོ་རྟོགས་སད་ཡོད་པ་དང་། དེ་འདྲ་བའི་རྟེན་འབྲེལ་བཟང་བོའི་ཆོས་ཉིད་ལས་ང་ཚོ་ལ་རེ་བ་ཆེན་པོ་ཡོད། ཡིད་མ་ཆད། སྙིང་སྟོབས་བསྐྱེད་ཅིག
ཞེས་ཨ་མདོ་རེབ་གོང་རིག་པ་འབྱུང་བའི་གྲོང་ཁྱེར་དུ་འཚོ་བ་རོལ་བའི་གྲྭ་རྐྱང་དཀྱུས་མ་ཞིག་ནས།
སྤྱི་ལོ་༢༠༡༡ལོའི་ཟླ་༡བའི་ཚེས་༢༣ཉིན་གུས་ཕུལ།
གཞིས་ལུས་བོད་མིའི་
སྙིང་སྟོབས་དང།
་སེམས་ཤུགས།
ལྷག་བསམ།
ཆོད་སེམས།
སྤོབས་པ།
ལ་རྒྱ།
ཆིག་སྒྲིལ།
དུང་གཞེན་བཅས་ལ་བསམས་ན་དངོས་གནས་ང་ཚོ་ངོ་གནོངས་དགོས་པ་ཞིག་འདུག
ང་ཚོས་ད་ནས་བཟུང་དང།་དེ་རིང་བཟུང།ད་ལྟ་བཟུང་རིག་པ་དང་གསལ་གྱིས་གཞིས་བོད་མིར་དོན་དམ་པའི་གདུང་སེམས་མཉམ་སྐྱེད་བྱེད་དགོས་པ་རེད།་་
ཁོང་གི་ཆོད་སེམས་འདི་སྙིང་གཏམ་ཞིག་གི་ཚུལ་དུ་སེམས་ལ་ཉར་ནས་ང་ཚོས་ཀྱང་རང་རང་ས་ནས་མི་སྒེར་རེ་རེ་ངོས་ནས་མི་རིགས་ཀྱི་ད་ལྟ་དང་མ་འོངས་བར་ཕན་པའི་བྱ་གཞག་རེ་རྩོམ་རྒྱུ་གལ་ཆེན་པོ་རེད།
གཞིས་ཡོད་བོད་རིག་སྤུན་ཟླ་རྣམས་ཀྱི་མཛད་རྗེས་ལ་མངོན་པར་བསྟོད།
བོད་གངས་ཅན་ལྗོངས་ཀྱི་གཞིས་ལུས་པ་ལགས། ཁྱེད་ཀྱི་སྙིང་སྟོབས་དང་ལྷག་བསམ་ཞུམ་མེད། བོད་མི་རིགས་ལ་ཅང་བའི་གདུང་སེམས། ཁྱེད་རྣམས་ནི་དུས་ཀྱི་འཔའ་བོ་འཔའ་མོ་ཡིན་ལ་རེ་བ་དང་ཕུག་བསམས་ཡིན། སྐྱབས་མགོན་ནས་དུས་ནམ་ཡང་ཁྱེད་གཟིག་པར་ཤོགས།
བཀྲིས་བདེ་ལེགས་ཤོགས།