ཚང་མ་གཉིད་ཁུག་འདུག

ཀླུ་སྨྱོན།
ད་སོ་མ་ང་ཕྱི་རོལ་གྱི་མུན་པའི་ཁྲོད་དུ་འཆམ་འཆམ་ཞིག་ལ་ཕྱིན་པ་ཡིན།

མུན་ནག་གི་ཁྲོད་དུ་གློག་འོད་གསལ་ལ་མི་གསལ་བ་ཞིག་འཕྲོས་འདུག

མཉམ་པར་ཞིག་བཞག་དུས།

ལམ་འགྲམ་གྱི་རླངས་འཁོར་ཆེ་ཆུང་ཚང་མ་གཉིད་ཁུག་འདུག

རླངས་འཁོར་དེ་ཚོའི་རྒྱབ་ཀྱི་ཁང་པ་ཚང་མ་ཡང་གཉིད་ཁུག་འདུག

ཁང་པའི་ནང་གི་མི་ཚང་མ་ཡང་གཉིད་ཁུག་འདུག

མི་དེ་དག་གི་རྣམ་ཤེས་མ་རབས་དེ་ཚོ་ཡང་གཉིད་ཁུག་འདུག

མི་དེ་དག་གི་ཡ་ཐོད་ཀྱི་མིག་གཉིས་ཀྱང་གཉིད་ཁུག་འདུག

མི་དེ་ཚོའི་འདོམ་གྱི་ལིང་ག་དང་བྷ་ག་ཡང་གཉིད་ཁུག་འདུག

མདོར་ན་ང་རང་གཅིག་པོ་མུན་ནག་གི་ཁྲོད་དུ་སྨྱོས་པ་ཇི་བཞིན་གོམ་བགྲོད་བྱེད་བཞིན་པ་མ་གཏོགས།

གྲོང་ཁྱེར་ཆེན་པོ་འདི་གཉིད་ཁུག་འདུག

གྲོང་ཁྱེར་ཆེན་པོ་འདི་སྒལ་བར་འཁྱེར་བཞིན་པའི་ས་གཞི་ཆེན་པོ་འདི་ཡང་གཉིད་ཁུག་འདུག

གྲོང་ཁྱེར་འདིའི་གཡས་གཡོན་གྱི་རི་བོ་ཐམས་ཅད་ཀྱང་གཉིད་ཁུག་འདུག

མཛེས་སྡུག་ལྡན་པའི་མཚོ་དང་མཚེའུ་ཡོད་ཚད་ཀྱང་གཉིད་ཁུག་འདུག

ལྗོན་ཤིང་གི་ཡལ་གའི་སྟེང་དུ་ཡོམ་ཡོམ་བྱེད་པའི་འདབ་ཆགས་ཚོ་ཡང་གཉིད་ཁུག་འདུག

མགོ་ཐོག་གི་ནམ་མཁའ་ནག་པོ་འདི་ཡང་གཉིད་ཁུག་འདུག

རྒྱང་རིང་གི་སྐར་ཚོགས་དེ་ཚོ་ཡང་གཉིད་ཁུག་འདུག

ནམ་རྒྱུན་ཕྱོགས་མེད་དུ་ལྡང་བའི་བསིལ་རླུང་དེ་ཡང་གཉིད་ཁུག་འདུག

ངའི་ཐབ་ཚང་གི་ནང་དུ་ཟས་ལྷག་འཚོལ་བར་བྲེལ་བའི་གྲོག་མ་དེ་དག་ཀྱང་གཉིད་ཁུག་འདུག

སྐྱེ་སྟོབས་འབར་བའི་རྩྭ་དང་མེ་ཏོག་དེ་ཚོ་ཡང་གཉིད་ཁུག་འདུག

མདོར་ན་འཇིག་རྟེན་འདིའི་སྟེང་གི་ཡོད་ཚད་གཉིད་ཁུག་འདུག

ཚོར་སྣང་ཞིག་ལ་བསྐལ་པ་འཇིག་ཟིན་པ་འདྲ།

བསྐལ་པ་འཇིག་ནས་ཉི་མ་འགའ་ཕྱིན་པ་དང་ཡང་འདྲ།

ཡིན་ན་ཡང་ངས་དེ་ལྟར་མིན་པའི་སྨོན་ལམ་བཏབས།

རླངས་འཁོར་དང་ཁང་པ།

མི་དང་རྒྱ་མཚོ་ཀྱེ།

གཉིད་ལས་སད་པར་གྱིས་ཤིག

ང་དང་མཉམ་དུ་མུན་ནག་གི་ཁྲོད་དུ་འཆམ་འཆམ་ལ་སྐྱོད་དང་།