༼དུས་བབ་དྲ་ཚིགས་ནས་འདིར་བཤུ་འགོད་ཞུས།༽
འདོན་སྤེལ། ༢༠༡༡/༠༡/༡༣
སྐབས་གཉིས་རིང་བཀའ་བློན་ཁྲི་པའི་སྲིད་རྟགས་སུ་བཞུགས་པའི་བཀའ་བློན་ཁྲི་པ་མཆོག་གིས། ཁོང་གིས་ད་བར་ཐེག་པ་ཆེན་པོའི་གཞུང་ལུགས་ཀྱི་བླ་མ་བསྟེན་ཚུལ་ལྟར་བླ་མའི་བཀའ་བཞིན་བསྒྲུབས་པ་ལས། བོད་རྒྱལ་ཁབ་དང་མི་རིགས། ཆབ་སྲིད་བཅས་ལ་བསམ་བློ་བཏང་མྱོང་མེད་ཟེར།
ཟླ་འདིའི་ཕྱི་ཚེས་ ༧ ཉིན་རྒྱ་གར་རྒྱལ་ཡོངས་མཐོ་རིམ་སློབ་མའི་ཚོགས་ཆེན་ཐེངས་ལྔ་བའི་མཛད་སྒོ་ས་རཱ་མཐོ་སློབ་ཏུ་ཚོགས་ཡོད་ལ། མཛད་སྒོའི་སྟེང་བྱེས་བཞུགས་བོད་རིགས་མཐོ་རིམ་སློབ་མ་ཐུན་མོང་གིས་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ལ་༼ བཀའ་དྲིན་རྗེས་དྲན་གྱི་གཟེངས་རྟགས༽ ཤིག་དང་། ནུབ་བྱང་མི་རིགས་སློབ་གྲྭ་ཆེན་མོའི་སློབ་མ་བཀྲ་ཤིས་རབ་བརྟན་ནམ་ཐེའུ་རང་ལགས་སུ་༼ དཔའ་བོའི་སྙིང་སྟོབས་ཀྱི་རྟགས་མ།༽ ཞེས་པ་གཉིས་ཕུལ་ཏེ། བཀའ་བློན་ཁྲི་པ་མཆོག་གིས་ད་བར་བོད་ཀྱི་སྲིད་འབྱོར་རིག་གསུམ་ཐད་རླབས་ཆེའི་ཕྱག་ལས་མང་བོ་བསྐྱངས་དང་སྐྱོང་བཞིན་པར་རྗེས་དྲན་དང་། ཐེའུ་རང་ལགས་ཀྱིས་རྒྱ་ནག་གི་གནོད་ཤུགས་ལ་མགོ་བོ་མ་བསྒུར་བར་ ༢༠༠༨ ལོའི་ཞི་རྒོལ་ཆེན་མོ་དང་ད་ལྟའི་བོད་ནང་གི་དཀའ་སྡུག་མཚོན་པའི་རྩོམ་ཡིག་སྤེལ་བར་བསྟོད་བསྔགས་གནང་ཡོད།
ཡིན་ནའང་། ཉིན་དེར་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས། ཁྱེད་ཚོས་ང་ལ་བསྔགས་བརྗོད་དང་གཟེངས་རྟགས་གནང་བ་དེ་ངས་བོད་མི་རིགས་དང་རྒྱལ་ཁབ། བོད་ཀྱི་སྤྱི་ཚོགས་བཅས་ཀྱི་དོན་དུ་ལས་ཀ་ཞེ་དྲག་བྱས་པ་རེད། དེ་ཡག་པོ་བྱུང་བ་རེད་ཅེས་གསུང་གི་ཡོད་ནའང་། ང་རང་ཉིད་ཀྱི་ངོས་ནས་ངས་མི་རིགས་ལ་ཤ་ཞེན་དང་སྤྱི་ཚོགས་ལ་ཤ་ཞེན་བྱེད་དགོས་བསམ་པའི་འདུན་པ་མེད་ལ། ངས་དེ་ལྟ་བུ་ཞིག་བྱེད་ཀྱིན་ཡོད་པའི་ཚོར་སྣང་ཡང་ཁྱོན་ནས་མེད།
ང་ཆུང་དུས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་ཤཱཀྱའི་དགེ་སྦྱོང་ཐེབས་ཆག་ཅིག་ཡིན་སྟབས། སོ་སོའི་ལུས་ངག་ཡིད་གསུམ་གྱི་ནུས་པ་གང་ཡོད་པ་དེ་ཁྱེད་ཉིད་དགྱེས་ཕྱིར་བདག་བྲན་འབུལ་ལགས་ན། །ནམ་མཁའ་ཇི་སྲིད་འབངས་སུ་བཟུང་དུ་གསོལ། ཞེས་གསུངས་པ་བཞིན་བླ་མའི་དྲིན་ལ་ཐུག་ཡོད།
དེར་བརྟེན་ངའི་རྩ་བའི་བླ་མ་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་མཆོག་གིས་ཁྱེད་ཀྱི་མི་ཚེ་འདིར་༧གོང་ས་མཆོག་གི་ཞབས་འདེགས་ཞུ་རྒྱུར་ཆ་ཚང་གཏོང་དགོས་པ་རེད་ཅེས་བཀའ་གནང་སྟབས། ང་ཚོའི་ཐེག་པ་ཆེན་པོའི་གཞུང་ལུགས་ཀྱི་ནང་དུ་བླ་མ་བསྟེན་ཚུལ་གྱི་ཐབས་ལམ་མམ་བསམ་བློ་འཁྱེར་སྟངས་ལྟ་བུར་སྣ་ཁ་དགུ་གསུངས་ཡོད། བུ་མཛངས་རྡོ་རྗེ་ས་གཞི་བྲན་ཕྱག་དར།། ཐེག་པ་ཁྱི་གུ་གྲུ་ལྟར་སེམས་ཀྱིས་བསྟེན་ཞེས་བཤེས་གཉེན་བསྟེན་ཚུལ་གྱི་བསམ་བློ་འཁྱེར་སྟངས་དགུ་ཡོད། དེ་དག་དགུ་ལས་དང་པོ་བུ་མཛངས་པ་ལྟ་བུའི་སེམས་ཀྱིས་བསྟེན་ཚུལ་ཞེས་པ་དེ་རེད།
བླ་མའི་ཞབས་འདེགས་སྒྲུབ་སྐབས་བྱ་བ་དེ་སོ་སོས་ངས་འདི་ལྟ་བུ་ཞིག་བྱ་རྒྱུ་ཡིན། ངས་འདི་དང་གན་འཇོན་གྱི་འདུག་ཅེས་གདམ་ཀ་རྒྱག་རྒྱུ་མེད་པར། བླ་མའི་དགོངས་པར་གང་ཡོད་པ་དང་བླ་མས་གང་དུ་མངགས་པ། བླ་མས་བྱ་བ་གང་བསྒྲུབ་ཏུ་བཅུག་ནའང་དེ་ག་རང་བྱ་རྒྱུ་དེ་རེད། གལ་སྲིད་བྱ་བ་དེ་བསྒྲུབས་ཏེ་འཇོན་གྱི་མི་འདུག་ན། མི་ནུས་དེ་ལ་ཚིག་གིས་སྦྱང་ཞེས་པ་ལྟར་ད་ངས་འཇོན་མ་སོང་ཞེས་ཞུ་རྒྱུ་མ་གཏོགས། འཇོན་གྱི་ཡོད་མེད་ལ་མ་བལྟས་གོང་ནས་ངས་འཇོན་ས་མ་རེད་ཞུ་རྒྱུ་དེ་ཐེག་པ་ཆེན་པོའི་བླ་མ་བསྟེན་སྟངས་མ་རེད། བླ་མས་འཇོན་ཐང་ཡོད་པར་གཟིགས་ཏེ་འདི་དང་གན་བྱོས་གསུངས་ཡོད་པ་ཞིག་ལ་ཆ་འཇོག་དགོས་ཀྱི་ཡོད།
དེར་བརྟེན། ངའི་མི་ཚེའི་ནང་དུ་གང་བྱས་པ་དེ་བླ་མས་བཀའ་བསྒྲུབ་རྒྱུ་དང་། བླ་མའི་ཞབས་འདེགས་བསྒྲུབ་རྒྱུའི་བསམ་བློ་ཁོ་ན་མ་གཏོགས། ངས་མི་རིགས་ཀྱི་བསམ་བློ་གཏོང་གི་མེད་ལ་རྒྱལ་ཁབ་ལའང་བསམ་བློ་གཏོང་གི་མེད། ཆབ་སྲིད་ལའང་བསམ་བློ་གཏོང་གི་མེད་པས། ཁྱེད་ཚོར་དེ་ལྟ་བུའི་གཟིགས་ཚུལ་ཞིག་བྱུང་སྟེ་གཟེངས་རྟགས་གནང་གིན་ཡོད་ཚེ། གཅིག་བྱས་ན་གཟེངས་རྟགས་གནང་ཡུལ་ནོར་ཡོད་པ་རེད་བསམ་གྱི་འདུག་མོད། གནང་མཁན་གྱིས་གནང་གྲུབ་པ་དང་ཞུ་མཁན་གྱིས་ཞུས་ཚར་སྟབས། དེ་རང་འཇགས་འཇོག་རྒྱུ་ལས་དེ་ལ་བགྲོ་གླེང་བྱ་རྒྱུ་ལྷག་མེད་ཅེས་གསུངས་ཡོད།
ཐེངས་འདིར་བྱེས་བཞུགས་བོད་རིགས་མཐོ་རིམ་སློབ་མ་ཐུན་མོང་གིས་བཀའ་བློན་ཁྲི་པར་ཕུལ་བའི་གཟེངས་རྟགས་སྟེང་དུ། དཔལ་ལྡན་བཀའ་ཁྲི་མཁས་དབང་ཟམ་གདོང་རིན་པོ་ཆེ་བློ་བཟང་བསྟན་འཛིན་མཆོག་གིས་བོད་མི་རིགས་ཀྱི་བསྟན་སྲིད་གཉན་འཕྲང་ཅན་དུ་གྱུར་པའི་གནས་སྐབས་འདིར། ༧གོང་ས་མཆོག་གི་དགོངས་དོན་ལྷུར་བླངས་ཏེ། ལྷག་བསམ་ཟོལ་མེད་ཀྱིས་བོད་ཀྱི་སྲིད་འབྱོར་རིག་གསུམ་གོང་འཕེལ་བཏང་བ་དང་། ཁྱད་པར་དུ་བདེན་དོན་དང་། ཞི་བདེ་གཙིགས་སུ་བཟུང་ནས། བོད་མི་མང་གི་སླད་དུ་བླ་ན་མ་མཆིས་པའི་སྲི་ཞུ་བསྒྲུབས་པའི་བཀའ་དྲིན་རྗེས་དྲན་མངོན་པར་མཚོན་བྱེད་དུ། བྱེས་བཞུགས་བོད་རིགས་སྤུན་ཟླ་མཐོ་རིམ་སློབ་གཉེར་བ་ཐུན་མོང་ནས་གུས་པ་ཆེན་པོས་གཟེངས་བསྟོད་ཀྱི་རྟགས་མ་འདི་ཕུལ་བ་ཡིན། ཞེས་བཀོད་འདུག
གསར་འགོད་པ། ཨ་རིག་འགྱུར་མེད།
བཀའ་ཁྲི་ལས་ཐོག་མཁས་དབང་ཟམ་གདོང་རིན་པོ་ཆེ་མཆོག་གི་ངས་བླ་མའི་བཀའ་བསྒྲུབས་ཀྱི་ཡོད་ཞེས་པ་དེ་ལ་དེ་སྔོན་ལོག་སྒྲུབ་མང་དག་གཅིག་བྱས་སོང་། རྩོམ་ཡིག་འདི་ལ་ཞིབ་པར་གཟིགས་དང་དོན་དངོས་སུ་ཁོང་གི་ཁེངས་པ་གནང་པ་ཙམ་ལས་བོད་རྒྱལ་ཁབ་དང་མི་རིགས་ཆབ་སྲིད་བཅས་ཀྱི་དོན་དུ་བསམ་བློ་མ་བཏང་བ་རེད་དམ། མཆན་བཀོད་པ་ཁག་གཅིག་གིས་ད་ལྟ་བར་དུ་བོད་མི་རིགས་དང་སྐད་ཡིག་ཆེད་དུ་སྐུ་ལས་གྲངས་མེད་སྐྱོན་མྱོང་མཁན་གྱི་བྱས་པ་ཅན་ཁོང་ལ་ཆེད་བསྟོད་བྱ་རྒྱུ་ཕར་བཞགས། རྒྱབ་ལྗོངས་གང་ལ་ཡང་བསམ་བློ་མ་གཏང་བར་དམོད་ཚིག་བསྐུར་འདེབས་བྱེད་པ་ནི་བསོད་ནམས་ཟད་པའི་རྟགས་མཚན་ནོ། ཁོང་གིས་བླ་མའི་བཀའ་བསྒྲུབས་ཀྱི་ཡོད་ཞེས་པའི་ཁོང་གི་རྩ་བའི་བླ་མ་ནི་༸གོང་ས་མཆོག་ཡིན་པས་༸གོང་ས་མཆོག་གི་དུས་རྒྱུན་དུ་སྐུ་ལས་སྐྱོན་པ་ཚང་མ་བོད་གངས་ཅན་ཡུལ་དང་མི་རིགས་འདི་ཡི་ཆེད་དུ་ཡིན། དེ་སུས་མ་རེད་ཞེས་གསུངས་ནུས་བསམ། ཟམ་གདོང་མཆོག་གིས་བོད་རྒྱལ་ཁབ་དང་མི་རིགས་ཆབ་སྲིད་ཀྱི་དོན་ལ་བསམ་བློ་གཏོང་མྱོང་མེད་བླ་མའི་བཀའ་བསྒྲུབས་ཀྱི་ཡོད་ཞེས་པ་གཉིས་ལ་ཚིག་ཙམ་གྱི་ཁྱད་པར་ལས་དོན་ཁྱད་པར་མེད་མི་འདུག་གོ། དཔའ་བོའི་གཟེངས་རྟགས་འདི་ཁོང་ལ་ཕུལ་བ་འགྲིག་པ་ཞིག་རེད། ཁོང་གི་སྐུ་ཚེའི་རིང་བོད་རྒྱལ་ཁབ་དང་། མི་རིགས། ཆབ་སྲིད་བཅས་ཀྱི་དོན་དུ་བསམ་བློ་བཏང་གནང་བ་མ་ཟད་སྐུ་ལས་སྐྱོན་པ་རྣམས་ཀྱི་འབྲས་པོ་རུ་བལྟས་ན་ཁོང་ལ་དཔའ་བོའི་གཟེངས་རྟགས་གཅིག་ལས་བརྒྱ་ཕུལ་ཡང་ཉུང་དྲག་པའི་སྐྱོན་ནོ།