ནོར་གླིང་མཐོ་སློབ་ཀྱི་རྩོམ་བསྡུའི་བརྡ་སྦྱོར།

Comments (6) on “ནོར་གླིང་མཐོ་སློབ་ཀྱི་རྩོམ་བསྡུའི་བརྡ་སྦྱོར།”

1. ༼ཡིག་ནོར་མཐོང་ན་སྙིང་ན་བའི་ཚད་དུ་སོང་འདུག༽ཅེས་གཞན་ལ་དམའ་ཕབ་ནས། དོན་ལ་གསལ་བསྒྲགས་ནང་ན་ཡིག་ནོར་འདུག སློབ་གྲྭའི་ཁ་བྱང་དབྱིན་ཡིག་གིས་བྲིས་པ་དེའི་ནང་ནའང་ཡིག་ནོར་འདུག

   མཐོ་སློབ་འདི་ཚོས་ད་མི་ཉན་ཡ།

2. མ་བརྩམས་པ་ནི་མཆོག་ཡིན་གྱིས། །
   བརྩམས་ནས་ལྡོག་པར་མི་བྱ་འོ། །
   རེ་ཌྷའགའ་བའི་དངོས་པོ་མ་གནང་བར་མ་མཐུད་འདོན་སྤེལ་གནང་ཐུབ་ན་ལེགས་སོ་ཡོད།

3. གལ་སྲིད་ཁྱོད་ཚོ་མཐོ་སློབ་པ་དང་ཤེས་ཡོན་ཅན་ངོ་མ་ཞིག་ཡིན་ཚེ་ཁད་ཡངས་པའི་སྒོ་ནས་ཕུག་རྒྱང་རིང་དུ་ལྟ་བ་ལས་གཞན་ལ་དམའ་འབེབ་ཏན་ནས་བྱེད་མི་ཉན། ཤེས་སོང་ངམ།

4. གཞན་ལ་ལྟ་བའི་མིག་ཡོད་ཀྱང༌། རང་ལ་ལྟ་བའི་མེ་ལོང་དགོས་ཞེས་མཁས་པ་སྔ་མ་དག་གིས་བཀའ་སློབ་ལམ་སྟོན་འདི་ག་ཚོད་ཀྱི་བདེན་གཏམ་ཡིན་པར་ཚོར་སྣང་ཆེན་པོ་ཞིག་སྟེར་བྱུང༌། ལར་ནས་སློབ་ཕྲུག་ལ་སློབ་ཕྲུག་ཡིན་པར་འདུ་ཤེས་ཀྱི་ཐོག་ནས་གཞན་ལ་བཤད་པ་དང་བསྒྲགས་པ་བྱེད་རྒྱུ་ནི་སློབ་ཕྲུག་གི་གོ་སར་མཁོ་བའི་ཁྱད་ཆོས་གཅིག་རེད། ག་ཚོད་ཀྱིས་ཁེངས་དྲེག་དང་ང་རྒྱལ་བྱས་ན་དེའི་ཚད་ཀྱིས་བློ་རྒྱ་བསྐྱེད་པར་བར་བགེགས་ཆེན་པོ་ཐེབས་ཀྱི་ཡོད། བཙན་བྱོལ་སྤྱི་ཚོགས་ནང་ཡིག་ནོར་དང་སྐྱོན་ཆ་མེད་པའི་དྲ་དེབ་ཚགས་གསུམ་གཅིག་ཀྱང་བསྟན་རྒྱུ་མེད་ཅེས་བཤད་ན་ཕལ་ཆེར་ཧམ་བཤད་རང་ཆགས་མི་སྲིད། ལོ་ཤས་གོང་དུ་ངེད་ཚང་གི་རྩོམ་པ་པོའི་མིང་ཡོད་པའི་ཆབ་བྲག་ཕོ་ཉས་བཙན་བྱོལ་སྤྱི་ཚོགས་ནང་རྩོམ་པ་པོ་རྣམས་ཐེབས་ཆགས་ཡིན་ལ། བརྩམས་ཆོས་རྣམས་ཀྱང་ཐེབས་ཆགས་ཞིག་ལས་མེད་བཅས་བཤད་མྱོང་ཡོད། དེར་བརྟེན་འོད་ཐིག་དུས་དེབ་ཡང་དེའི་ཁྲོད་ནས་ཚད་དམའ་ཤོས་གཅིག་ཡིན། འདི་ནི་བཙན་བྱོལ་ནང་གི་བོད་ཡིག་གི་ལས་དབང་ཙམ་ཡིན་སྟབས་ང་ཚོས་སྡང་ནོངས་བྱེད་དགོས་དོན་མེད་སྙམ།

5. ནོར་གླིང་མཐོ་སློབ་ཀྱི་རྩོམ་བསྡུའི་བརྡ་སྦྱོར།
   ཅེས་པའི་ནང་དུ་གཞན་ལ་རེ་བ་ཞིག་བཅོལ་འོན་ཀྱང་དམོད་ཚིག་ཀྱང་སྒྲགས་འདུག་པས།
   དེས་ན་གོང་གི་མཆན་འགོད་པ་རྣམས་ཀྱི་བསམ་ཚུལ་གཅིག་མཚུངས་ལྟར་ངོས་ནས་ཀྱང་བསམ་ཚུལ་མ་ཞུས་ཐབས་མེད་བྱུང་སོང།
   ཁྱེད་རྣམས་ནས་གཞན་ལ་ཤོད་པར་རང་ངོས་ནས་སྤུས་ཀ་ལེགས་པོ་ཞིག་བྱེད་དགོས་དེ་མིན་གཞན་ལྟའི་མིག་གཅིག་པོས་འགྲིག་གི་མི་འདུག
   དཔེར་ན།་ཁྱེད་ནས་བྲིས་པའི་རྩོམ་གྱི་བརྡ་བསྐུལ་ཉུང་ཉུང་དེ་ལའང་ཡིག་ནོར་དང་འབྲི་ཚུལ་སོགས་གང་ནས་ཀྱང་མ་འོས་པ་དང་མ་དག་པ་སོགས་ཀྱང་འདུག་པ་འདི་ལྟར།

   (སྤྱིར་ཕྱི་སྡོད་བོད་མི་ཚོའི་རྩོམ་སྟེགས་འདྲ་བོའི་འདིའི་སྟེང་ན་ཡང་།)
   ཚིག་སྦྱོར་འབྲི་སྟངས་དང་ཚིག་བརྗོད་སྟངས་སོགས་གང་ནས་ཀྱང་མི་འགྲིག་པ་ཞིག་ཏུ་མཐོང།
   བརྗོད་སྟངས་དེ་རིགས་ནི་རྒྱ་ནག་གིས་བརྗོད་ཚུལ་ཞིག་སྟེ།
   བཙན་བྱོལ་བོད་མིར་ཕྱིར་སྡོད་བོད་རིགས་སྤུན་ཟླ་ཞེས་ལྷ་སའི་རླུང་འཕྲིན་ནས་ལོག་ཕེབས་དགོས་ཀྱིས་སྣེ་བསུའི་བརྗོད་ཚུལ་ཞིག་རེད།
   ང་ཚོས་ནམ་ཡང་ཕྱིར་སྡོད་མི་ཞེས་མི་བརྗོད་ཅིང་བཙན་བྱོལ་བོད་མི་ཞེས་བརྗོད་དགོས་པ་རྒྱུ་མཚན་སྣེ་མང་གིས་ཤེས་ཐུབ།
   དེ་ནས་འཇུག་གི་[འདྲ་བོའི་འདི་ཡི་སྟེང་ནས]་ཞེས་འབྲེལ་སྒྲ་གཉིས་སྦྱོར་དགོས་པའི་རྒྱུ་མཚན་མེད་པ་དང་གོ་རྒྱུ་ཡང་ཅང་མི་འདུག

6. ཚིག་ཕྲེང་ཉུང་ལ། ཡིག་ནོར་མང་བའི་གསལ་བསྒྲགས་ཐུང་ཐུང་འདི་ལྟ་བུ་མིག་འོག་དུ་མཐོང་དུས་དངོས་གནས་སྙིང་ན་དགོས་པ་རང་རེད་འདུག མཐོ་སློབ་ཅིག་གི་མིང་འོག་ནས་དང༌། ལྷག་པར་ཡིག་ནོར་མཐོང་ན་སྙིང་ན་བའི་ཚད་དུ་སོང་འདུག་ཅེས་གཞན་ལ་ཁ་དཔེ་སྒྲོག་མཁན་ཞིག་གི་ངོ་ནས་བཤད་ན་རྐུན་མས་རྐུ་མ་འཚོལ་བའི་གཏམ་རྒྱུད་དེ་གསལ་ལེ་ལེ་བྱས་ནས་དྲན་དབང་དུ་འཆར་བཅུགས་བྱུང༌།
   གཤམ་དུ་ངས་ཁྱེད་ཅག་གི་གསལ་བསྒྲགས་ཐུང་ཐུང་དེའི་ནང་ཐད་ཀར་མཐོང་བའི་ནོར་འཁྲུལ་ཉུང་ཤས་ཤིག་མཛུ་སྟོན་ཞུ་རྒྱུ་ལགས་ན་དེ་དོན་ཉེས་པ་ལ་ཉེས་པ་མཐོང་སྟེ་ཕྱིན་ཆད་སྤང་བླང་གི་འཇུག་ལྡོག་མ་ནོར་བར་བྱེད་རྒྱུའི་རེ་བ་ཞུ་རྒྱུ་ཡིན།

   ༡ ཁྱེད་རྣམ་པས་བཀོལ་སྤྱོད་ཆེ་བའི་དྲ་ལམ་བརྒྱུད་ནས་རྒྱ་ཆེའི་རྩོམ་པ་པོ་རྣམས་ལ་དེ་གའི་མཐོ་སློབ་ཀྱི་སློབ་མའི་ཚགས་དེབ་ཐོག་འགོད་རྒྱུའི་རྩོམ་སྐུལ་ཞུ་བཞིན་ཡོད་སྟབས། འགོ་བརྗོད་དེ་ཡང་ནོར་གླིང་མཐོ་སློབ་ཀྱི་རྩོམ་བསྡུའི་བརྡ་སྦྱོར་ཞེས་བཀོད་པ་ལས་ནོར་གླིང་མཐོ་སློབ་ཀྱི་རྩོམ་སྐུལ་གསལ་བསྒྲགས་ཞེས་བྲིས་ན་གོ་རྒྱ་ཆེ་བ་ཡོད།

   ༢ དུས་ཚིགས་རང་བཞིན་ཅན་གྱི་ཚགས་པར་ཞིག་ཡིན་པ་དང༌། ཞེས་པ་ལས་དུས་མཚམས་ངེས་ཅན་ནང་འདོན་སྤེལ་བྱེད་བཞིན་པའི་ཚགས་པར་ཞིག་ཡིན་པ་དང༌། ཞེས་བྲིས་ན་བཟང༌། དེ་མིན་དུས་ཚིགས་རང་བཞིན་ཅན། ཆུ་ཚོད་རང་བཞིན་ཅན། ཟླ་བ་དང་གཟའ་འཁོར་རང་བཞིན་ཅན། ལོ་རང་བཞིན་ཅན་ཟེར་བ་སོགས་གོ་རྒྱུ་ཅང་ཨེ་ཡོད་སྙམ།

   ༣ སྐབས་ལྔ་བའི་མཐོ་རིམ་སློབ་གཉེར་བ་ཞེས་པ་ལས་སྐབས་ལྔ་པའི་མཐོ་རིམ་སློབ་གཉེར་ཞེས་པ་ཡིག་བྲིས་ན་ལེགས་པ་ཡོད། འདིར་རྟགས་མཚུངས་ལས་བརྗོད་བདེ་འོས་བབས་ཆེ་བ་ཡོད་པས་ཡིན། ང་ཚོའི་གྲངས་གའི་ནང་ནས་ཀྱང་ལྔ་པ་དང༌། དྲུག་པ། བདུན་པ་ཟེར་བ་ལས་ལྔ་བ། དྲུག་བ། བདུན་པ་ཞེས་འབོད་ཀྱིན་མེད།

   ༤ སྐབས་ལྔ་བའི་མཐོ་རིམ་གྱི་སློབ་གཉེར་བ་ཡོངས་ནས་ཞེས་པ་ལས་སྐབས་ལྔ་པའི་སློབ་གཉེར་བ་ཡོངས་ནས་ཞེས་ཐད་བྲིས་བྱས་ན་མཛེས་པ་ཡོད། འགོ་བརྗོད་ནང་ནོར་གླིང་མཐོ་སློབ་ཅེས་བྲིས་ཟིན་ཡོད་སྟབས་དངོས་གཞིའི་ནང་ཚིག་རྙོག་མང་པོ་བྲིས་དགོས་མ་མཆིས།

   ༥ རྒྱ་ཆེའི་བོད་ཕྱི་ནང་གི་རྩོམ་འབྲི་བ་པོ་དག་གིས་ཞེས་པ་ལས་བོད་ཕྱི་ནང་གི་རྒྱ་ཆེའི་རྩོམ་པ་པོ་རྣམས་ཀྱིས་ཞེས་བྲིས་ན་སྡེབ་སྦྱོར་ཉན་པ་ཡོད་སྙམ།

   ༦ ཕྱི་སྡོད་བོད་མི་ཞེས་པའི་ཚིག་འདི་རྒྱ་འདྲེ་གུང་ཁྲན་གྱིས་ང་ཚོའི་གཞུང་ལ་ཆེད་དུ་གཉེར་ནས་བཀོལ་སྤྱོད་བྱེད་བཞིན་པའི་ཆབ་སྲིད་ཀྱི་ཚིག་ཅིག་ཡིན་སྟབས་ང་ཚོས་ནམ་ཡང་བེད་སྤྱོད་བྱེད་རྒྱུ་མེད། དེ་ལས་ལྡོག་ནས་ང་ཚོས་བོད་རང་དབང་མ་འཐོབ་བར་བཙན་བྱོལ་བོད་མི་དང༌། ཡང་ན། བཙན་བྱོལ་སྤྱི་ཚོགས་ནང་ཞེས་ཚིག་འདི་དག་ཡང་ནས་བསྐྱར་དུ་བེད་སྤྱོད་གཏོང་དགོས།

   ༧ ཡིག་ནོར་མཐོང་ན་སྙིང་ན་བའི་ཚད་དུ་སོང་འདུག་ཅེས་དང༌། ང་ཚོའི་རྩོམ་ཡིག་འཕེལ་རྒྱས་དུ་འགྲོ་བའི་ལམ་ག་རྦད་དེ་བཀག་ཡོད། ཅེས་སོགས་རྩོམ་འབྲིའི་གཤོག་རླབས་མ་རྒྱས་པའི་སློབ་གཉེར་བ་ཁྱུ་ཚོགས་ཤིག་གི་རྩོམ་སྐུལ་གསལ་བསྒྲགས་འདི་ལྟ་བུའི་ནང་དེ་་འདྲ་བྲིས་ན་ལེགས་པོ་མེད་ལ། ད་དུང་ཁྱེད་ཅག་གིས་བོད་ཕྱི་ནང་གཉིས་ཀའི་རྒྱལ་ཡོངས་རྩོམ་པ་པོ་རྣམས་ལ་ཆེད་སྐུལ་རྩོམ་ཡིག་གསལ་བརྡ་སྤེལ་བཞིན་པར་བརྟེན། གུས་ཞབས་དང་དམའ་ས་ནན་བཟུང་དགོས་པ་མ་ཟད། ཁེངས་དྲེག་དང་ང་རྒྱལ་གྱི་རྣམ་པ་མ་ཐོན་པ་བྱེད་ཐུབ་ཚེ་རྩོམ་ཡིག་གི་ཞལ་འདེབས་ཀྱང་དེ་ལས་དཔག་པའི་གྲུབ་འབྲས་ཡོད་ཆོག་སྙམ།

   ༨ Institue ཡི་གེ་འདི་འདྲ་ཞིག་དབྱིན་ཡིག་ནང་ཕལ་ཆེར་མེད་སྙམ། Institute ཞེས་པ་འདི་ཡིན་པ་འདྲ། མཐོ་སློབ་པ་ཞིག་ཡིན་པའི་ཆ་ནས་ཆུང་རྩག་རིགས་ལའང་ནོར་འཁྲུལ་མ་ཤོར་བར་ཡིད་གཟབ་དགོས་མཐོང༌།