ལྕགས་པོ་རི།

དོལ་སྨྱོན།

དམྱལ་ཁམས་ཀྱི་མུན་པ་གངས་ལྗོངས་སུ་མ་མཆེད་པའི་སྔོན་ལ། སྨན་གྱི་བླ་མའི་
ལྷུང་བཟེད་ནང་འཁྱིལ་བའི་ལྕགས་པོ་རི།
ཁྱོད་ཀྱི་མཁའ་དབྱིངས་སུ་རྒྱུ་བ་ནི་དྭངས་གཙང་གི་བསིལ་རླུང་ཡིན་ལ། ཁྱོད་ཀྱི་ཉེ་
འཁོར་ན་འཐུལ་བ་ནི་ཞི་བདེའི་དྲི་བསུང་ཡིན། འོན་ཀྱང་ད་ལྟ་མཐོ་སྒང་གི་ཡོད་ཚད་
ནས་ཡོད་ཚད་གཤིན་རྗེའི་བཙོན་རར་གྱུར་ཚར་དུས། ཁྱོད་ཀྱི་མཁའ་དབྱིངས་སུ་
འཁྲིགས་པ་ནི་དམར་ནག་གི་ཆུ་འཛིན་རེད་ལ། ཁྱོད་ཀྱི་ཉེ་འཁོར་དུ་འཐུལ་བ་ནི་
འབར་རྫས་ཀྱི་དྲི་ངད་རེད།

གཤིན་རྗེའི་རྩ་ཁྲིམས་མཐོ་སྒང་དུ་མ་གྲགས་པའི་སྔོན་ལ། བདེན་བྲལ་གྱི་ཕྱོགས་སུ་
ལྷིང་ངེར་འགྱིངས་བའི་ལྕགས་པོ་རི།
ཁྱོད་ནི། ཕྱག་ན་རྡོ་རྗེའི་བླ་རི་དང་སྨན་གྱི་བླ་མའི་གྲོང་ཁྱེར། ཐང་སྟོང་རྒྱལ་པོའི་སྒྲུབ་
ཕུག་དང་གསོ་བ་རིག་པའི་འདུས་སྡེ། འཚོ་བྱེད་ཀུན་གྱི་འབྱུང་གནས་དང་ལུས་ཅན་
ཡོངས་ཀྱི་སྐྱབས་གནས་སུ་གྲུབ། འོན་ཀྱང་ད་ལྟ་གངས་ཅན་གྱི་འཁོར་ཡུག་ཡོད་ཚད་
ལ་གཤིན་རྗེའི་རྩ་ཁྲིམས་ཀྱིས་ཁྱབ་ཚར་དུས། ཁྱེམ་དང་ཏོག་ཙེ་ཐོགས་པའི་གཤིན་རྗེའི་
ལས་མཁན་རྣམས་ཀྱིས། ཁྱོད་ཀྱི་ཕྱི་ནས་དྲུས་ཤིང་ནང་ནས་བསྔོགས། འོག་ནས་ཕུག་ཅིང་
སྟེང་ནས་བརྟོལ་ཏེ། ཁྱོད་ཀྱི་བྱིན་རླབས་ཀྱི་མཚན་ཁ་ཡོད་ཚད་མོག་པོར་བཏང་།

ལྕེ་སྤྱང་གི་མིག་ཟུང་བསིལ་ལྡན་གྱི་ལྗོངས་སུ་མ་བགྲད་པའི་སྔོན་ལ། རྒྱ་གླིང་དང་དུང་
ཆེན་གྱི་འགྱུར་ཁུག་སྙན་པའི་ལྕགས་པོ་རི།
ཁྱོད་ཀྱི་འཁོར་ཡུག་ཡོད་ཚད་ལ། སྨན་གྱི་བླ་མའི་བདུད་རྩི་དང་ཐང་སྟོང་རྒྱལ་པོའི་བྱིན་རླབས་ ལྔ་བ་ཆེན་པོའི་ཐུགས་བསྐྱེད་དང་སངས་རྒྱས་རྒྱ་མཚོའི་མཛད་རྗེས། ད་དུང་།
རྒྱུད་བཞིའི་དབྱངས་རྟ་སྙན་མོ། ཡོད་ཚད་ནས་ཡོད་ཚད་ཁྱོད་ཀྱི་རི་ཆུ་ནགས་གསུམ་ལ་
ཁྱབ་ནས་ཡོད་ཅིང་། ཁྱོད་ཀྱི་ཕྱི་ནང་གསང་གསུམ་ལ་ཐིམ་ནས་ཡོད། འོན་ཀྱང་ད་ལྟ་མཐོ་
བོད་ཀྱི་ཡུལ་ལྗོངས་ཐམས་ཅད་ལྕེ་སྤྱང་གི་མིག་ཟུང་ནང་ཐིམ་ཚར་དུས། ལྕགས་པོ་རི།
ཁྱོད་ཀྱི་རླབས་ཆེན་གྱི་མཛད་རྗེས་ཡོད་ཚད་ངམ་གནག་གི་རྡུལ་དང་བསྲེས་ཏེ་ཡར་ཀླུང་
གཙང་པོར་བསྐུར་ཟིན།

ད་དུང་། ལྕགས་ཀྱི་ཀ་བ་བར་སྣང་གི་མཐོངས་སུ་བཙུགས་པ་ནི།
གསོ་རིག་གི་བསྟན་པར་དུང་བ་ཞེན་པའི་མི་བུ་དག་གི་སྙིང་ལ་ཟུར་གསུམ་གྱི་གྲི་རིང་
བཙུགས་པ་དང་ཀུན་ནས་མཚུངས།