སྐར་ཆེན། ཡོ་རོབ།
རྨོངས་འཆར་འདི་སྤེལ་དུས། ངས་གལ་སྲིད་ཞེས་བའི་ཐ་སྙད་འདི་སྤྱོད་དགོས་བར་གྱུར། རྒྱུ་མཚན། ང་ཕ་མ་མིན། ང་བུ་ཕྲུག་ཞིག་ཡིན། མཐོ་སློབ་འགྲིམས་བཞིན་པའི་བུ་ཕྲུག་ཞིག་ཡིན།
སློབ་བུ་ཞིག་ཡིན། རང་གི་ཕ་ཡུལ་དང་ཁ་བྲལ་བའི་སློབ་བུ་ཞིག་ཡིན། ཕ་མ་མ་ཐུག་པར་ལོ་བརྒྱད་འགོར་བའི་སློབ་བུ་ཞིག་ཡིན། འོན་ཀྱང་། གལ་སྲིད་ང་ཕ་མ་ཡིན་ན། ངེད་ལ་བུ་ཕྲུག་བསྐྱེད་པའི་དམིགས་ཡུལ་་ཞིག་ཡོད་། རང་གི་བུ་ཕྲུག་གི་འཚར་ལོངས་ལ་རེ་བ་ཞིག་ཡོད།
རང་གི་བུ་ཕྲུག་གཅེས་བར་སྐྱོང་སྟངས་ཀྱི་བརྒྱུད་རིམ་ཞིག་ཀྱང་ཡོད། ངེད་ཀྱི་བསམ་པར་བརྒྱུད་རིམ་འདི་ཕ་མ་ཚང་མར་དགོས་ངེས་ཤིག་རེད་འདོད། འོན་ཀྱང་། ངེད་ཀྱི་དྲིན་ཆེན་ཕ་མ་གཉིས་གཙོས་བའི་བོད་ནང་གི་ཕ་མ་ཚོར་འདི་ལྟའི་བརྒྱུད་རིམ་དེ་མེད། ཁོང་ཚོར་བརྒྱུད་རིམ་འདི་མེད་པར་ཐུགས་ཁག་མེད། ཁོང་ཚོར་སློབ་སྦྱོང་མེད། རང་ལ་དགོས་བའི་འཚོ་སྡོད་ཀྱི་ཐོབ་ཐང་དེ་མེད། རང་ལ་བདག་པའི་འཚོ་སྡོད་ཀྱི་རང་དབང་དེ་མེད། རང་དབང་དང་ཐོབ་ཐང་ཟེར་བ་དེ་མེད་ན་བརྒྱུད་རིམ་འདི་དག་ལག་ལེན་ལ་འཁྱོངས་དཀའ། ངེད་ལ་ཁོང་ཚོར་ལེ་བདའ་མེད།
གལ་སྲིད་ང་ཕ་མ་ཡིན་་ན། ངེད་ལ་བུ་ཕྲུག་བསྐྱེད་པར་དམིགས་ཡུལ་ཞིག་ཡོད་། ངེད་ཀྱི་མི་རིགས་འདི་འཆི་གསོན་གྱི་གནས་ལ་ལྷུང་ནས་ཡོད། ངེད་ཀྱི་མི་རིགས་ལ་མི་གྲངས་ས་ཡ་དྲུག་ཡས་མས་ཤིག་མ་གཏོགས་མེད།
ངེད་ཀྱི་མི་རིགས་འདི་རྒྱའི་གཉའ་གནོན་འོག་ཤོར་ནས་ཡོད། རྒྱའི་མི་འབོར་གྱི་བཙན་འཛུལ་འོག་ལ་ཤོར་ཉེན་ཆེ། ངེད་ཀྱི་མི་རིགས་འདི་རྩ་བརླག་ལ་མ་སོང་བའི་སླད་དུ་ངེད་ཀྱིས་ཅིས་ཀྱང་མི་འབོར་གྱི་གྲངས་ཀ་དེ་སྤར་དགོས། གལ་སྲིད། བོད་པའི་ཕ་མ་རེ་རེས་ངོས་ནས་བུ་ཕྲུག་གསུམ་རེ་བསྐྱེད་པ་ཡིན་ན། ཉུར་མཐར་ཡང་བོད་མི་རིགས་ཀྱི་མི་གྲངས་དེ་ས་ཡ་བཅུ་བརྒལ་འགྲོ་གི་རེད། དེས་ན་ངེད་ལ་མི་འབོར་གྱི་སྟོོབས་ཤུགས་ཤིག་ཀྱང་ཡོད། ངེད་ལ་མི་འབོར་གྱི་སྟོབས་ཤུགས་འདི་ཅིས་ཀྱང་དགོས་ངེས་ཡིན།
གལ་སྲིད་ང་ཕ་མ་ཡིན་་ན། ངས་རང་གི་བུ་ཕྲུག་གི་མོས་པ་དང་འདུན་པ་ལ་རྒྱབ་སྐྱོར་དང་རམ་འདེགས་བྱེད་ཀྱི་ཡིན། གལ་སྲིད་ངེད་ཀྱི་བུ་ཕྲུག་གི་མོས་པ་དང་འདུན་པ་དེ་རི་མོ་བ་ཞིག་བྱེད་རྒྱུ་དེ་ཡིན་ན། ངས་བུ་ཕྲུག་གི་མོས་པ་དང་འདུན་པ་དེར་གཞི་རྐང་ཡག་པོ་ཞིག་ཚུགས་རྒྱུའི་དོན་དུ་རང་གི་ནུས་ཚོད་ཀྱིས་མཐུན་རྐྱེན་སྦྱོར་རྒྱུ་ཡིན། གཞན། ངས་བུ་ཕྲུག་དེ་རྩོམ་འབྲི་བ་ཞིག་ཆགས་ན་བསམ་བའི་རེ་བ་དང་འདོད་པ་དེ་བུ་ཕྲུག་གི་མོས་པ་དང་འདུན་པ་ཕྱོགས་སའི་་རི་མོ་བའི་སྒང་ལ་གཡོགས་ཀྱི་མིན་། ཕ་མའི་མོས་པ་དང་འདུན་པ་བུ་ཕྲུག་གི་སྒང་ལ་རྒྱས་འགེབ་བྱེད་རྒྱུའི་འདོད་པ་ངེད་ལ་མེད།
གལ་སྲིད་འཚར་ལོངས་ཀྱི་བརྒྱུད་རིམ་ཁྲོད་དུ། ངེད་ཀྱི་བུ་ཕྲུག་གིས་རི་མོ་བ་ཞིག་བྱེད་རྒྱུའི་མོས་པ་དང་འདུན་པ་དེ་བརླགས་ནས་པར་ལེན་པ་ཞིག་བྱེད་རྒྱུར་བློ་ཁ་ཕྱོགས་པ་ཕྱོགས་པ་ཡིན་ན་། ངེད་ཀྱིས་དེ་ལ་རྒྱབ་སྐྱོར་་བྱེད་ངེས། ངེད་ཀྱིས་དེ་ལ་མོས་མཐུན་བྱེད་ངེས།
གལ་སྲིད་ང་ཕ་མ་ཡིན་ན། ངེད་ཀྱིས་བུ་ཕྲུག་གི་མཚར་འཛིན་གྱི་བློ་རིག་ལ་གཏོར་བཅོམ་གཏོང་མི་སྲིད། མཚར་འཛིན་གྱི་བློ་རིག་འདི་བུ་ཕྲུག་གི་ཡོན་ཏན་རེད། མཚར་འཛིན་གྱི་བློ་རིག་འདི་བཅོམ་པ་ཡིན་ན། བུ་ཕྲུག་གི་བསམ་བློའི་ཡར་རྒྱས་མེད་པ་བཟོས་བ་དང་གཅིག་པ་རེད།
ཤེས་བྱ་ཞེས་བ་དེ་བློ་རིག་གི་བང་མཛོད་ལྟ་བུ་ཞིག་ཡིན་ན། མཚར་འཛིན་གྱི་བློ་དེ་བང་མཛོད་དེའི་སྒོ་འབྱེད་བྱེད་ཀྱི་ལྡེ་མིག་ལྟ་བུ་རེད། ངེད་ཀྱི་བུ་ཕྲུག་ལ་མཚར་འཛིན་གྱི་བློ་རིག་ཡོད་པ་ལ་བརྟེན། དུས་ནས་དུས་སུ་བུ་ཕྲུག་གིས་ངེད་ལ་དྲི་བ་གཏོང་གི་རེད། དོགས་འདྲི་བྱེད་ཀྱི་རེད།
བསམ་གཞིགས་སློང་གི་རེད། ངེད་ཀྱིས་གང་ཐུབ་ཐུབ་ཀྱིས་དྲི་བ་རེ་རེར་ལན་རྒྱག་གི་ཡིན། ངེད་ཀྱིས་མ་ཤེས་ཡོད་ན། གཞན་ལ་འདྲི་གི་ཡིན། དེབ་ྐློག་ནས་བཙལ་གྱི་ཡིན། ངེད་ཀྱིས་ལན་འདེབས་དཀའ་བའི་མཚར་འཛིན་གྱི་དྲི་བ་དེ་འདྲར་ཐུག་ན། ངེད་ཀྱིས་བུ་ཕྲུག་ཆེད་ལས་མཁས་པ་དེ་འདྲའི་རྩར་འཁྲིད་ནས་ཆེད་ལས་མཁས་པ་དང་མཉམ་དུ་གླེང་སློང་བཅུག་གི་ཡིན།
གང་ལྟར། ངེད་ཀྱི་བུ་ཕྲུག་འདི་རྗེས་མ་བླུན་པོ་ཆུ་སྣ་གར་འཁྲིད་མ་ཡིན་པར་དོགས་དཔྱོད་ཀྱི་བློ་ཡོད་མཁན་ཞིག་། བྱ་དངོས་འདྲ་མིན་གྱི་་གནས་ལུགས་ལ་ཞིབ་པར་འཇུག་མཁན་ཞིག།
དཔྱོད་ཤེས་ཀྱི་བློ་རྒྱ་ཡོད་མཁན་ཞིག་ཆགས་རྒྱུ་ནི་ངེད་ཀྱི་རེ་བ་ཡིན།
གལ་སྲིད་ང་ཕ་མ་ཡིན་ན། ངེད་ཀྱི་བུ་ཕྲུག་གིས་ནོར་འཁྲུལ་བཟོས་བ་ཡིན་ན།
ངས་བུ་ཕྲུག་ལ་གཤེ་གཤེ་གཏོང་མི་སྲིད། རྡུང་རྡེག་དེ་བས་ཀྱང་ག་ལ་གཏོང་ཕོད། བུ་ཕྲུག་གིས་བཟོས་བའི་ནོར་འཁྲུལ་རེ་རེ་ནི་ཉམས་མྱོང་གི་སྨན་ཐུན་རེ་རེ་ཡིན། ནོར་འཁྲུལ་ཆུང་ཆུང་རེ་རེས་ངའི་བུ་ཕྲུག་ལ་བློ་ཁ་གསར་བ་རེ་རེ་ཕྱེས་ཀྱི་ཡོད།
དེས་ན། ངས་བུ་ཕྲུག་ལ་གཤེ་རྒྱུའི་ཚབ་དུ། བུ་ཕྲུག་དང་མཉམ་དུ་ནོར་འཁྲུལ་དེའི་སྐོར་ལ་གླེང་མོལ་བྱེད་ཀྱི་ཡིན། གླེང་མོལ་དེ་གྲོགས་པོའི་ངོ་བོའི་སྒོ་ནས་བྱེད་ཀྱི་ཡིན། བུ་ཕྲུག་ལ་ནོར་འཁྲུལ་གྱི་འབྱུང་རྐྱེན་དང་བརྒྱུད་རིམ་སོགས་གླེང་མོལ་བྱེད་ཀྱི་ཡིན།
འོན་ཀྱང་། བུ་ཕྲུག་སོ་སོའི་ངོས་ནས་ནོར་འཁྲུལ་ཡིན་པ་ངོས་མ་ཟིན་བར་དུ་ངེད་ཀྱིས་བུ་ཕྲུག་ལ་དེ་ནོར་འཁྲུལ་རེད་ལབ་ཀྱི་མིན། ནོར་འཁྲུལ་ངོས་ཟིན་མཚམས་། ངེད་ཀྱིས་བུ་ཕྲུག་ལ་སོ་སོའི་ནོར་འཁྲུལ་སོ་སོས་ཡོ་བསྲང་བྱེད་དགོས་བའི་བསམ་ཚུལ་འདོན་གྱི་ཡིན།
ངེད་ཀྱི་སོ་སོ་བུ་ཕྲུག་ཡིན་པའི་སྐབས་ཀྱི་ནོར་འཁྲུལ་རྣམས་ཁོང་ལ་གླེང་མོལ་གྱི་ལམ་ནས་བཤད་ཀྱི་ཡིན།
གལ་སྲིད་ང་ཕ་མ་ཡིན་ན། ང་ཐག་རིང་ལ་འགྲོ་དགོས་བྱུང་ན།
ངས་རང་གི་མི་ཚེའི་ཉམས་མྱོང་རྣམས་ཡིག་ཐོག་ལ་བྲིས་ཏེ་བུ་ཕྲུག་ལ་བསྐུར་གྱི་ཡིན། བུ་ཕྲུག་གིས་བྱས་བའི་བྱས་རྗེས་སྣ་གཅིག་ཡིན་ཡང་དེ་ལ་གདེངས་འཇོག་ཆེན་པོ་བྱེད་ཀྱི་ཡིན། ད་དུང་དེས་ག་ལ་ཚད། དགོས་དོན་བྱུང་ན། ངས་བུ་ཕྲུག་གི་དགེ་རྒན་ལ་ཡང་འཕྲིན་ཡིག་བཏང་ནས་བུ་ཕྲུག་གི་སྐོར་ལ་བསམ་ཚུལ་བརྗེ་རེས་བྱེད་ཀྱི་ཡིན།
གལ་སྲིད་ང་ཕ་མ་ཡིན་ན། གལ་སྲིད་ང་ཕ་མ་ཡིན་ན།
འོན་ཀྱང་། ང་ཕ་མ་མིན། སློབ་ཕྲུག་དཀྱུས་མ་ཞིག་ཡིན།
ལོ་ཁ་ཤས་ལས་མི་འགྱངས་པར་ཉིད་ཀྱང་ཕ་མ་གང་ཤེས་ཏེ་ཕ་རྒན་ཞིག་ཏུ་འགྱུར་གི་རེད། དེ་དུས་ཉིད་ཀྱིས་གོང་གི་རྩོམ་ཡིག་འདི་བཞིན་ལག་ལེན་དུ་འདེབ་ཐུབ་པའི་སྨོན་ལམ་འདེབས། ཡིན་ན་ཡང་ཕ་སེམས་བུ་དང་བུ་སེམས་རྡོ་ཞེས་པའི་གཏམ་དཔེ་འདི་ཡང་མིག་མཐོང་ལག་ཟིན་དུ་ཡོང་གི་འདུག་ཡ།
ང་ཕ་རྒན་ཞིག་ཆགས་རྒྱུར་ཉུང་མཐར་ཡང་ལོ་ངོ་བཅུ་གྲངས་འགོར་གྱི་རེད་།
རྒྱུ་མཚན། ང་ད་དུང་སློབ་ཕྲུག་རེད། ང་ལ་སྦྱངས་བྱའི་ྐློག་དེབ་མང་། བགྲོད་བྱའི་ལམ་བུ་མང་།
རྗེས་མ་ལྷོད་ཀྱི་ཁ་བརྡ་བྱེད་ཡ།
ཕྱོགས་གཞན་ཞིག་ནས་ངེད་ཀྱི་རྨོངས་འཆར་འདི། ཕ་སེམས་བུ་དང་བུ་སེམས་རྡོ་ཡིན་མཁན་ཚོར་བརྡ་ཞིག་ཡིན།
གལ་ཏེ་བུ་ཕྲུག་དེ་ནི་དེང་རབས་ཀྱི་ལུགས་སྲོལ་བཟང་བོ་དང་དར་སྲོལ་ཆེ་བས་དུད་ནག་འཐེན་མཁན་གྱི་ལམ་ཁར་ཞུགས་ན་ཁྱེད་རང་གི་ཁོས་འདོད་ཐོག་དུ་འཇོག་རྒྱུ་ཡིན་ནམ། ཡང་ན། དེང་རབས་ཀྱི་ལུགས་སྲོལ་དུ་བརྩི་བས་མཚན་སྲེད་དམ་འཁྲིག་སྲེད་ལ་རོལ་མཁན་ཞིག་བྱེད་རྒྱུ་ཡིན་ཟེར་ན་ཁྱེད་རང་གི་དེ་ལ་རྒྱབ་སྐྱོར་བྱེད་ཐུབ་བམ། ད་དུང་། ཉིན་ཞིག་ཁྱེད་རང་གི་རྒྱུ་དངུལ་ཡོད་ཚད་ཁོ་རང་གི་མིང་ཐོག་དུ་འཇོག་དགོས་ཟེར་ན་ཁྱེད་རང་གི་འཇོག་ངེས་ཡིན་ནམ། ཨོ་རེད། ཁྱེད་རང་སློབ་ཕྲུག་ཞིག་ཡིན་སྟབས་ཕ་མ་ཟེར་བས་སྐྱིད་སྡུག་ཁ་ཙམ་ཞིག་གླེང་ཤེས་པ་ལས་རྨི་ལམ་བཟང་བོ་ཞིག་རྨིས་པ་ལས་གང་ཡང་མ་རེད། རྒྱུ་མཚན་དང་དཀའ་ངལ་ནི་ཁྱེད་རང་གི་ད་དུང་མི་ཤེས་སྟབས་ཁག་ཡོད་རྒྱུ་མ་རེད། ཡིན་ཡང་། གོང་གི་འདི་དག་ལ་ལན་རེ་འདེབས་པར་འཚལ།
ངས་དང་པོ་ཕྱི་རྒྱལ་གྱི་མིའི་འགྲོ་འདུག་སྤྱོད་གསུམ་ལ་རང་གིས་ལད་མོ་ཡག་པོ་བྱེད་ན་འདོད། དེ་ནས་རང་གིས་ལད་མོ་བྱས་ནས་གང་སྦྱངས་པ་ཕྲུ་གུ་ལ་སྤྲོད་ཀྱི་ཡིན། ད་དུང་ཟ་མ་ཟ་དུས་དང་ཇ་འཐུང་དུས་ཕྲུ་གུ་ལ་ཕྱི་རྒྱལ་གྱི་མི་དང་གཅིག་པ་གཅིག་རྐྱང་བྱས་ནས་ཟ་དགོས་ཟེར་ན་འདོད། གང་ལྟར་བོད་པའི་རྟགས་བསྟན་ན་མི་ཆོག་ཟེར་དགོས་པ་མིན་འགྲོ། བོད་པའི་ཟ་སྟངས་འཐུང་སྟངས་དང་སློབ་གསོ་རྗེས་ལུས་རེད་ལབ་ན་ཉན་གྱི་ཡོད་འགྲོ། ད་དུང་ལོ་བཅོ་བརྒྱད་ནས་ངས་ཁྱོད་ལ་མི་བརྩི། ཁྱེད་ཀྱིས་ཕ་མའང་བརྩི་མི་དགོས། ཕ་མ་དང་ལྟ་བ་མི་མཐུན་ན་པོ་ལི་སི་བོས་ནས་ཕ་མ་བཙོན་ཁང་དུའང་བཅུག་ཆོག་གི་རེད་ལབ་ན་ཡག་པོ་འདུག་གམ།
ངེད་ཀྱི་རྨོངས་འཆར་ལྟར་ན། དུད་ནག་འཐེན་མཁན་གྱི་རིེགས་འདི་དེང་རབས་ཀྱི་ལུགས་སྲོལ་བཟང་པོ་ཞིག་མ་རེད། མི་རིགས་དང་རྒྱལ་ཁབ། ཚོགས་སྡེ་སུས་ཀྱང་འདི་ད་ཕན་ལུགས་སྲོལ་བཟང་པོ་ཞིག་ལ་བརྩི་མཁན་བྱུང་མེད།
ཁྲོམ་རྭའི་དཔལ་འབྱོར་གྱི་ཐོག་ཏུ་ཡང་འདི་ཚོང་གི་མ་རྩ་ཞིག་ལ་ངོས་འཛིན་གྱི་འདུག་མ་གཏོགས་ལུགས་སྲོལ་བཟང་པོ་ཞིག་ལ་ངོས་འཛིན་གྱི་མི་འདུག དུད་ནག་གི་ཐོན་ཁུངས་གཙོ་བོ་ཡིན་པའི་ལྷོ་ཤར་ཨེ་ཤེ་ཡའི་རྒྱལ་ཁབ་དེ་དག་གིས་ཀྱང་དུད་ནག་འདི་ལུགས་སྲོལ་བཟང་པོ་ཞིག་ལ་བརྩི་གི་མི་འདུག
དར་སྲོལ་ཆེ་བ་དང་ལུགས་སྲོལ་བཟང་བོ་གཉིས་ཁ་ཁ་རེད། ངེད་ཀྱི་བུ་ཕྲུག་གི་མི་ཚེའི་ཕུགས་བསམ་དང་མདུན་ལམ་གྱི་སྐོར་ནས་ཚན་པ་ཞིག་གླེང་ཡོད། དེ་ཡང་ཕུགས་བསམ་དང་མདུན་ལམ་ཐག་གཅོད་དང་འདེམས་མོས་ཀྱི་སྐོར་ནས་རེད་མ་གཏོགས་འཁྲུག་སྲེད་དང་དུད་ནག་སོགས་སྒེར་གྱི་བྱ་སྤྱོད་དང་འབྲེལ་བའི་སྐད་ཆ་དེ་མ་རེད།་ ངེད་ཀྱི་རེ་བར། ཁྱེད་ཀྱིས་ངེད་ཀྱི་རྨོངས་འཆར་དེ་བསྐྱར་ྐློག་ཞིག་བྱེད་རོགས། ཞིབ་ཚགས་པོའི་སྒོ་ནས་ྐློགས། སེམས་པ་རྒྱ་ཡན་ལ་མ་སོང་བར་ྐློགས། དོན་དག་སེམས་ལ་ངེས་ནས་ྐློགས། དེ་ནས་སོ་སོར་བསམ་ཚུལ་ཡོད་ན། རྨོངས་འཆར་ཡོད་ན། ནོར་འཆུག་མེད་པར་ཤོད། ནང་དོན་མ་འགལ་བར་ཤོད། མ་རེད་དམ།
བུ་ཕྲུག་དེ་ཡང་རང་གི་ནོར་འཁྲུལ་ངོས་ལེན་ཐུབ་པ། རྟོགས་དཔྱོད་ཀྱི་བློ་རིག་ཡོད་མཁན་ཞིག་ཡིན་དུས།
བྱ་སྤྱོད་ཐ་མལ་བའི་རིགས་འདི་འདྲ་བསྟེན་གྱི་མ་རེད། ང་ཕ་མ་མ་རེད། སློབ་ཕྲུག་རེད། ཁྱེད་བདེན་པ་རེད། འོན་ཀྱང་། ངས་ཕ་མའི་དཀའ་ངལ་མཐོང་མྱོང་། ཐོས་མྱོང་། དེའི་ཕྱོགས་ལ་བསམ་བློ་བཏང་མྱོང་། ཕ་མའི་དཀའ་ངལ་མཐོང་ནས་མིག་ཆུ་བཏང་མྱོང་། སེམས་པ་སྡུག་གིས་མནར་མྱོང་།
དེར་བརྟེན། རྨོངས་འཆར་འདི་འདྲ་ཞིག་སྤེལ་ཡིན།
ངེད་ཀྱིས་བསམ་ན། ནུབ་ཕྱོགས་པའི་ཕ་མས་བུ་ཕྲུག་སྐྱོང་སྟངས་དང་ཤར་ཕྱོགས་པའི་ཕ་མའི་བུ་ཕྲུག་སྐྱོང་སྟངས་ཐད་ན་ལེགས་ཆ་དང་ཞེན་ཆ་གཉིས་ཀ་ཡོད་གི།
ལེགས་པའི་ཆ་བླངས་ནས་སོ་སོའི་བུ་ཕྲུག་ལ་སྤྲོད་ཨེ་ཐུབ་བལྟ་རྒྱུ་དེ་གལ་ཆེན་པོ་རེད། བུ་ཕྲུག་དེ་ཡང་རྗེས་མ་འཛམ་གླིང་ལ་བལྟ་ཤེས་མཁན་ཞིག་ཆགས་ཀྱི་རེད།
ལེགས་ཉེས་བླང་དོར་ཤེས་མཁན་ཞིག་ཆགས་ཀྱི་རེད། ཕ་མ་ཡིན་ལབ་ནས་དབང་ཆ་གཅིག་སྡུད་འདྲ་བོ་བྱས་ནས་བསྡད་ན་བུ་ཕྲུག་མི་ཕན་པའི་ཐོག་ལ་སོ་སོའི་ནང་སེམས་ཀྱི་བདེ་ཐང་ལ་ཡང་ཕན་གྱི་མ་རེད་ཡ།