སྐར་ཚོགས་ཁྲི་མ་འབུམ་གྱི་འཇིག་རྟེན་གྱི་ཁམས་ཆེན་པོའི་ནང་དུ་མི་དང་འདྲ་བར་སྲོག་ལྡན་གྱི་གོ་ལ་གཞན་ཞིག་ཡོད་ན། གལ་ཏེ་ཁོང་ཚོ་དང་ང་ཚོ་བར་ཐག་ ”འོད” ཀྱི་མགྱོགས་ཚད་ལས་གཞལ་ན་འོད་ལོ་ས་ཡ་ ༦༥ ཡི་ཕ་མཐར་ན་ཡོད་ཅིང་། དེ་རིང་ཁོང་ཚོས་རྒྱང་ཤེལ་ཧ་ཅང་ཚད་མཐོ་པོ་ཞིག་ང་ཚོའི་གོ་ལར་བཙུགས་་ཤིང་བལྟས་ཚེ་ཁོང་ཚོས་དེ་རིང་གི་འཛམ་གླིང་མཐོང་མི་ངེས།
རྒྱུ་མཚན་ནི་འོད་ཀྱིས་ཁྱེར་བའི་ང་ཚོའི་གོ་ལའི་སྣང་བརྙན་གོ་ལ་གཞན་དེར་བགྲོད་པར་འོད་ལོ་ནས་སོང་ན་ས་ཡ་ ༦༥་འགོར་གྱི་ཡོད་པས། སྣང་བརྙན་དེ་ནི་འདས་པའི་ལོ་ངོ་ས་ཡ་ ༦༥ ཡི་ཡར་སྔོན་གྱི་གནས་ཚུལ་མ་གཏོགས་འབྱུང་བཞིན་པའི་ད་ལྟའི་གནས་ཚུལ་ལམ་སྣང་བརྙན་དེ་འཁྱེར་གྱི་མེད། སོང་ཙང་ཁོང་ཚོས་མཐོང་བ་ནི་ལོ་ངོ་ ༦༥ ཡི་ཡར་སྔོན་གྱི་གོ་ལ་སྟེ་འཇིག་རྟེན་འདིར་གདོན་མའི་སྲོག་ཆགས་གཏུམ་འབྲུག་(Dinosaurs) འཚོ་བཞིན་པའི་སྐབས་དེར་རེད།
གནད་དོན་་དེ་ནི་ཕྱི་གླིང་གི་མི་ལ་འབྱུང་གི་ཡོད་མེད་དང་། འཇིག་རྟེན་ཁམས་ནང་དུ་སེམས་ལྡན་གཞན་ཡོད་མེད་ཀྱང་ཁ་ཚོན་ཆོད་པོ་བཤད་ནུས་མཁན་མེད་མོད། འོན་ཀྱང་གནས་སྟངས་དེ་ང་ཚོའི་ཐོག་ཡོང་གི་ཡོད་པ་ནི་བརྒྱ་ཆ་བརྒྱ་ཡིན་པས། མཚན་མོའི་ནམ་མཁར་བལྟ་དུས་སྐར་མ་ཁྲི་ཚོ་མང་པོ་དེ་དག་ད་ལྟ་ཇི་མ་ཇི་བཞིན་ལྟར་ཡོད་པ་དེ་འུ་ཅག་གིས་མཐོང་གི་མེད་ལ། ང་ཚོས་མཐོང་བ་ནི་དུས་ཚོད་གང་ལ་གང་འཚམ་སོང་ཚར་རྗེས་ཀྱི་གནས་སྟངས་ཁོ་ན་ཞིག་མཐོང་བཞིན་ཡོད། དཔེར་ན་སྐར་མ་ཁ་ཤས་ནི་ཧ་ཅང་རྒྱང་ཐག་རིང་བས་ཁོང་ཚོའི་འོད་ཀྱི་སྣང་བརྙན་ང་ཚོའི་སར་འབྱོར་བར་ལོ་ས་ཡའམ་ཐེར་འབུམ་མང་པོ་འགོར་གྱི་ཡོད་ཅིང་། མཐོང་བཞིན་པའི་སྐར་མ་མང་དག་ཅིག་ནི་སྔ་ས་ནས་གས་ཐོར་དུ་སོང་ཚར་བའམ་ཡུན་རིང་སྔོན་ནས་ཐལ་རྡུལ་དུ་གྱུར་ཟིན། དེ་རྣམས་གས་འཐོར་མ་སོང་བའི་སྔོན་གྱི་སྣང་བརྙན་གསོན་པོ་དག་གི་འོད་གོ་ལའི་ཐོག་སླེབས་ཙ་ན་ད་གཟོད་ཅུང་ང་ཚོས་མཐོང་ཐོས་སུ་གྱུར་བཞིན་ཡོད།
དེར་བརྟེན། ཁྱེད་ཀྱིས་སྐར་མ་ལ་བལྟ་ཐེངས་རེ་རེར། ཁྱེད་ཀྱིས་དོན་དངོས་སུ་འདས་པའི་དུས་ཚོད་ལ་ཕྱིར་བལྟས་བྱེད་ཀྱིན་ཡོདཅིང་། ཡང་མིན་ན་དེ་ལས་ལྡོག་ཏེ་ཧ་ཅང་རྒྱང་རིང་བའི་ས་ཆ་ཞིག་ནས། འཇིག་རྟེན་གཞན་གྱི་མི་རིགས་ཤིག་གིས་སའི་གོ་ལར་ཚུར་བལྟས་ནས་བསྡད་ཡོད་སྲིད་ལ། གཅིག་བྱས་ན་ཁོང་ཚོས་གདོན་མའི་སེམས་ཅན་དེ་གཏུམ་འབྲུག་སོགས་(Dinosaurs)མཐོང་བཞིན་ཡོད་སྲིད། ད་དུང་ཁོང་ཚོས་ས་ཆ་འདིར་བློ་གྲོས་ལྡན་པའི་འགྲོ་བ་མི་ཞིག་འབྱུང་མིན་ལ་ཚོད་དཔག་བྱེད་བཞིན་མེད་མི་སྲིད་པ་དེ་བས་ཀྱང་མིན།
གཅིག་མཚུངས་སུ་ང་ཚོས་ཀྱང་ད་ལྟའི་ཆར་སྐྱེ་འགྲོ་གནས་བཞིན་པའི་རྒྱང་རིང་གི་འཇིག་རྟེན་ཞིག་ལ་ལྟ་བཞིན་ཡོད་སྲིད་ཀྱང་། ཁོང་ཚོའི་ད་ལྟའི་གནས་བབས་ཇི་མ་ཇི་བཞིན་དེ་ད་དུང་ང་ཚོས་མཐོང་གི་མེད་སྲིད། མདོར་ན་འཇིག་རྟེན་གྱི་ཁམས་འདི་ཧ་ཅང་གཞི་རྒྱ་ཆེ་བས་སུས་ཀྱང་ད་ལྟ་འབྱུང་བཞིན་པའི་དངོས་ཡོད་གནས་ཚུལ་ཇི་བཞིན་མཐོང་མི་ནུས་ཤིང་། ང་ཚོས་ནམ་མཁའི་དབྱིངས་སུ་མཐོང་བའི་དངོས་པོ་མང་ཆེ་བ་ནི་འོད་ཀྱིས་འཁྱེར་བའི་འདས་པའི་སྣང་བརྙན་ཁོ་ན་ང་ཚོའི་མིག་ནང་དུ་ཤར་བཞིན་པ་ལས་ད་ལྟའི་གནས་བབ་གསོན་པོ་མི་མཐོང་པ་ཡིན་ནོ།།